Yohanes 17
17
At Yesus en osi enebaget se’ban egei wene
1-2At Yesus en wene asogo mo’gulentesirik e, at a’gul lekho il ’bogorl akhit likhesirik e, disogo egei,
“Naik o. An taknobouwa ano arat horok lau waga o. Hat en pageat aphwami pema woknigen a’ge enebe lo’bok an homlogo en tagonoboma enelaluk modok welemagoluk aphwami ’berlegat an ne’gik pam pegen ai en e, hat hebe logo hebaik en, an homlogo logo nebemen o, naik. 3Is aphwami en e,
Allah erliktu a’ge ebe emetik-ematek nak welago yo, oluk, hebe enaluk agalat, ye, an Yesus Kristus peraknobou egenma wegi a’ge yu nebe enaluk agalat, togwi ai re, enelaluk modok welagai a’ge edip aiat o. 4An ’gwiangma di a’ge yu a’ge tuagoluk ediknebegen ano yabuk ebe arat taga legirik ologun ’balegis ano pam en logo hebegi o. 5Naik. ’Gwiang owan walho erlak welat, ne’biregat logo welege ano ’gela’ge yogodak hat oruakma eba logo nebemen o. 6Aphwami ’gwiangma a’ge hat en pageat woknigen a’ge ebano ’berlegat, hat hebe enaluk emagoluk mo’gulentegis o. Is enebe hat en a’geat de, an woknigenma no oluk e, hat hiak hologo togwi o. 7Yogodak di a’ge yu a’ge ’berlek hat en woknigen a’ge ai, is en e,
Allah enat wogesimu o, oluk arat pobi tigisa o. 8Wene hat en mo’gulnigen a’ge ebano, is arat mo’gulentegismu, arat wegesarik, an nebaget ogulat e,
Allah en perakpou wagama re, at oruakma en demat waga o, oluk enaluk agarik e, nebe pobirak nebegesa o.
9An en se’ban eselegi yu re, is aphwami ’gwiangma a’ge enebaget eselegi puk. At e, is hat heiyagai a’ge an woknigen ai en e, is enebagerat se’ban eselegi o. 10An en a’ge ’berlegat e, hat en a’geat o. Ye, hat en a’ge ’berlegat e, an en a’geat o. Is togwi ai pam, an logo nobogwi o. 11Yogodak an e, ’gwiangma yema aregen weleik erlak o. We, hat hiau weik a’geat de, is nak e, ’gwiangma yema welema o. Hat wiak tu erlakma en degelak modok welegen a’ge, naik o. Nis ne’birek nenebe mesigat welege ai ’gela’ge, is asogoat enebe mesigat welemagoluk, hat honuk logo a’ge an tualnebigen ai pam, is tenentarok welemen o, naik. 12#Mzm. 41:9; Yoh. 13:18An is enemin yema welat e, is enebe nalema no oluk, hat honuk a’ge an tualnebigen ano pam, tenentarok oruakma, is logon nalom erlak o. We,
At ai nalema, oluk, hat hiak e’gen a’ge pelal wokho pegesa a’ge ano demat emagoluk, nalom ’gela’geat nalaga o. 13An nebe hat hiau weik a’geat de, yogodak ’gwiangma ya welat, an nogola nagai hasu legi ai ’gela’ge, is onogola enagai modok houwagoluk, wene ’berlek ai mo’gulhegis o. 14Hat hiak ano is arat mo’gulentegis o. Ye, an nebe aphwami ’gwiangma a’ge yema onot erlak ai ’gela’ge, is asogoat enebe aphwami ’gwiangma a’ge onosi erlak ai en e, is aphwami ’gwiangma a’ge en modok enebirabonobogwi o. 15Hat en, is aphwami ’gwiangma a’ge ene’gerlakma en is nak ’gegilogo wogonobogun en ’gonu mo’gulheselegi puk. We, at wiak a’ge ano en wiagabenebigoluk ene’bek wagoam, hat en pegentarok wolorogun en oluk mo’gulheselegi o. 16An nebe is aphwami ’gwiangma a’ge onot erlak ai ’gela’ge re, is asogoat is aphwami ’gwiangma a’ge onosi puk. Erlagat o. 17Hat hiak ese legen ai re, dem weneat o. Ye, hat hiak dem wene ai pam, is enebe hat hu’gwarek pagerat welemagoluk pulogo enebemen o. 18Hat en an nebe aphwami ’gwiangma a’ge ene’bek peraknobou wegen ai ’gela’ge, an en is asogoat aphwami ’gwiangma a’ge ene’bek peragenebegi o. 19Is enebe hat hu’gwarek hebaget dem wene pam polik welemagoluk e, an is enebaget nebe hat hebaget pegirik polik welegi o.
20Naik. Is ai enematek nak enebaget se’ban eselegi puk. Erlak o. Is logon mu a’ge, is en wene mo’gulentai louwa ano pam enede an nebam he’berik pouwa a’ge eneminat enebaget se’ban eselegi o. 21Naik o. An en ’gonu mo’gulheselegi yu re, disogo oluk. An en naik hat he’birek hwedik, ye, naik hat en an ne’birek hwedik, welege ai ’gela’ge, is asogo enebe ’berlek mesigat a’ge ’gela’ge welemagoluk ’gonu mo’gulheselegi o. Asogo oruakma, is aphwami ’gwiangma a’ge en ogulat e,
At e, aik enat perakpou waga ai demat, oluk pobi tuagoluk, is enebe nis nenemin hwedigat wolomok o. 22Nis nenebe mesigat welege ai ’gela’ge, is asogoat enebe mesigat welemagoluk, an nebe hat en logo nebegen ’gela’ge, an en is arat logo enebegi o. 23Is demat enebe mesigat a’ge welemagoluk, is en e, an nemin hwedik, ye, hat en an nemin hwedik wolomok o. Asogo wolomul holuk e, is aphwami ’gwiangma a’ge en ogulat e,
At e, aik en perakpou wagarik ebe ede hwedik welago ai ’gela’ge, is enebe at wogesi a’ge ede hwedik welago yo, oluk enaluk emarik pobi tua o. 24Naik Allah o. Hat en ’gwiang owan walho erlak welat, an nebe hede hwedik welegen ai en e, erliknobogu lemagoluk logo nebegen ano, is hat en pageat woknigen a’ge ebano enil niouwagoluk, o an weleikmu eba, is eneminat wolom nagai o. 25Allah hegitsogo nak taga legen a’ge, naik o. Is aphwami ’gwiangma a’ge hat hebe eneperlak a’geat de, an nak e, hat naluk o. Ye, is hat en woknigen a’ge nak e,
At en perakpou waga oluk, enalugat o. 26Naik, hat en an hedeap nebegen ano ’gela’ge, is-is asogoat nede-hedesogo welat, an nebe is enemin hwedik wolomogoluk, hat honuk il-il howene mo’gulentasu legirik logon eminsogo mo’gulentasu leigat o,” oluk se’ban egei.
اکنون انتخاب شده:
Yohanes 17: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
