Yohanes 13
13
At Yesus en osi onoyuk petne emerenebegei wene
1Ye, loruk o’gwe seni Paskah ano a’ge nouwogoluk welat, at Yesus en,
“An aphwami o ’gwiangma yema honoboluk naik e’bek togolik laik ano arat horok lau waga o,” oluk, at aluk welaga. Ye, at u’gwarek osi ’gwiangma a’ge ede hwedik welagarik, pobuk enebe ebirom erlakma en ede hwedik modok welaga. 2Welat e, at osi ebano enemin o huba’go so’boru mesikmu no’gumu, Yudas, Simon Iskariot omlogo ano, ogola Iblis ’gwegei ’gal e, Yesus ebe woruagoluk e,
“Yo’go lak o,” oluk ogola ’gagalegei. 3Asogo ogola ’gagalegeimu, at Yesus ogola en e,
“Naik en di a’ge yu a’ge ’berlegat an ne’gik pam pesimu oruak ebano re. Ye, an nebe Allah oruakma en ’bu egirik, pobuk togolik at e’bek ligegeik ani o,” oluk aluk welagayat. 4Asogo aluk welat, so’boru nasu lagarik ebe inagarik e, osum ebe ’buktak a’ge no’gorlogo poluk e, sum ’gume wit-wat enebetne horogwi a’ge wesirik ebagase’gwe herle ’gela’ge ’betesogo pesi. 5Asogo tegeitik e, sogoluak loyang pam ik na’gogo ’gwelakpesirik e, at osi iak wogu legesa a’ge ebano onoyuk petne emerenebegeitik e, sum ebagase herle ’buksogo pesi a’ge ano pam ena’bosu ho enebil laga. 6Asogo tagenebil lasu lagarik e, hwerli at Simon onuk mesik Petrus ano e’bek lau wagoam e, at en e, disogo mo’gulesi,
“Nue, hat ’gain Honuk Logo a’ge en an noyuk petne emerigoluk a? Mia o,” oluk mo’gulese lagama, 7at Yesus en e, disogo mo’gulesi,
“Not o. An tegis yu, ebe ’gesogo ’gela’geat, hat heperlak o. A’geat de, pobuk en haluk ema o,” oluk mo’gulese lagama, 8at Petrus en e, disogo mo’gulesi,
“Nue. Hat en an noyuk petne modok emerogun erlak o!” oluk mo’gulese lagama, at Yesus en e, disogo mo’gulesi,
“An en hat emethebik erlak holuk e, hat hebe an eiye wolorogun erlak o,” oluk mo’gulese lagama, 9at Simon onuk mesik Petrus en e, disogo mo’gulesi,
“Ai holuk e, nue. Noyuk petne nak emetnobogun o. Ne’gik emin, na’gul emin, ’berlegat emetnebin o,” oluk mo’gulesimu re, 10at Yesus en e, disogo mo’gulesi,
“At ap sa en, ebe arat ’gume werak oruak holuk, at ebe ’gume werak modok oruak ai en e, pobuk emeru mia o. We, oyuk nak emeru elit o,” oluk mo’gulesirik, is ’berlegat mo’gulentasulat e,
“His asogo emerak modok welegep a’geat de, henebe ’berlegat emerak welegep puk. Mesik e, emerak erlagat oruak o,” oluk, mo’gulentesi. Wene asogo mo’gulentesi ai re, at ogola en e,
11“At ai en an nebe watnobuagoluk yo’go louwa,” oluk aluk welat no oluk e, disogo mo’gulentesi,
“His emerak modok welegep a’geat de, henebe ’berlegat emerak welegep puk. Erlak o,” oluk mo’gulentesi o. 12#Luk. 22:27Arat asogo onoyuk petne emerenebegeitik e, osum no’gorlogo pesi a’ge ano ’buktegeitik, togolik hweriogo welagoma ebano huragarik e, disogo mo’gulentesi,
“An en his takhenebegi ai pobi tigep a? Erlak a. 13Ye, his en an mo’gulnogulat e,
Nonue ’gain Onuk Logo a’ge wene mo’gulnentasu legen a’ge, oluk mo’gulnogu legep ai re, an nebe honue ’gain Nonuk Logo a’ge wene mo’gulhentasu a’ge demat holugat ogu legep o. 14Asogo, an nebe honue ’gain Nonuk Logo a’ge wene mo’gulhentasu a’ge en his honoyuk petne emethenebegis holuk e, his en asogoat his-his honoyuk petne emet-emet ’bugulom o. 15An en his takhenebegi ai ’gela’ge, his en an nebabut wokho asogoat togu lemagoluk mo’gulhentegis o. 16#Mat. 10:24; Luk. 6:40; Yoh. 15:20Wene mesik yu mo’gulhentaik,
Ap ’gain mesik eragam a’ge ’gela’ge oruakhwe, at eragam a’ge en logo ’gela’ge welago erlak o. Ai ’gela’ge, ap yo’go perakpasu a’ge ano eneragam ’gela’ge oruakhweat de, at yo’go lasu a’ge ano logo ’gela’ge welago erlak o, oluk demat mo’gulhentegis o. 17An en wene mo’gulhentegis ai henaluk oroguptik togu lorogup holuk e, honogola henagai hogu lorogup o.
18 #
Mzm. 41:9
An en wene ai his henebe ’berlegat henebaget mo’gulhentegis puk. Erlak o. His yu an enat henebe polikhenebegi a’ge naluk a’geat de, wene ai paget Allah iak pam disogo oluk pelal wokho pegesa,
Ap mesik so’boru ne’birek mesikmu no’gu lege a’ge
yu en wiagapnebiogoluk inaga o,
oluk egesema pelal wogo oruak a’ge ai sogwi ema modok erlak o. Demat ema o. 19Wene ai pobuk ebe demat ago holuk,
At otok modok welago a’ge ano arat o, oluk pobi nebipogoluk, wene yogodak ai owan om erlak oruakhwe obok naduk mo’gulhentegis o,” oluk mo’gulentesirik e, wene mesik disogo mo’gulentesi,
20 #
Mat. 10:40; Mrk. 9:37; Luk. 9:48; 10:16 “At ap sa en, aphwami an en peragenebaik a’ge wogonobogwi holuk e, anat woknobua o. Ye, at ap sa en an woknebiso holuk e, at an peraknobou waga a’ge anoat wouwa o, oluk demat mo’gulhentegis o,” oluk mo’gulentesi.
At Yesus en Yudas tu a’ge aluksogo
mo’gulesi wene
(Matius 26:20-25; Markus 14:17-21; Lukas 22:21-23)
21At Yesus en wene asogo arat mo’gulentesirikmu en, at ogola wiak agama, iak ’baksogoat disogo mo’gulentesi,
“His ap henebe ya a’ge mesik en an nebe watnobuagoluk yo’go louwayat o, oluk demat mo’gulhentegis,” oluk mo’gulentesi. 22Asogo mo’gulentasu lagama, is en e,
“Ai sa en tua a’ge egei,” oluk enede nalegesarik e, are en e, are yethasulat, are en e, are yethasulat, togu legesa. 23Asogo yet-yet ’bogukhwe re, is at Yesus iak wogu legesa a’ge mesik at ede hwedik a’ge horoksogo eragam hweriogo welaga. 24Asogo hweriogo oruakma, ap Simon onuk mesik Petrus ano en e’gik dum ’bilholuk ap ano mo’guleselat e, disogo mo’gulesi,
“Ap sa paget ese legen, oluk, ebam hin wemen o,” oluk mo’gulesimu, 25at ap ano pobuk at Yesus eragam horoksogoat hegilhai lagarik e, disogo mo’gulesi,
“Nue, ai sa paget e’gen no?” oluk mo’gulesimu 26at Yesus en e,
“Ebe re, an en so’boru roti a’ge ik udalogo wogeik a’ge aiat o,” oluk egeitik e, so’boru roti ano ik udalogo wesirik e, Yudas, Simon Iskariot omlogo ano wogesi. 27Asogo wogesimu, at Yudas so’boru roti a’ge ano e’gikmu wasukhwe erianoat, at ogola Iblis ’gwegei. Asogo ’gwegeimu, at Yesus en mo’guleselat e,
“Hat en tigoluk epegen a’ge ai perleneat tin o,” oluk mo’gulesi. 28Asogo mo’gulosoam, is hweriogo welat so’boru no’gu legesa a’ge ebano en e,
“Ai no’gwe paget at Yudas mo’gulesi logwe,” oluk pobitu erlakma en wongtak pegesa. 29Asogo pobirak erlak welat, at Yudas ai arilak enemin ono uang owi’ga tenakho welagoma no oluk e, disogo epegesa,
“Yesus en nis seni soru a’ge paget di a’ge yu a’ge o’go ’bali louwagoluk mo’gulesi hwi a? Ye, at e, aphwami ena’ge erlak a’ge uang logon mesik-mesik so’burentai louwagoluk mo’gulesi hwi a,” oluk onogola eberigisa. 30Asogo opogukhwe, at Yudas so’boru roti a’ge e’gigem wesi a’ge ano woluk e, o modok hup agamayat de, odipmu ’bekhit libaga.
At Yesus en wene ’get a’ge mo’gulentesi wene
31At Yudas arat asogo libagama welat, at Yesus en e, disogo mo’gulentesi,
“Nosi. An abat daklau wegi ano Allah en logo nebasuam, aphwami en Allah erliktua ano arat yogodak horok lau waga o. 32Ye, an en tik ai erlige Allah erliktogwi holuk e, at u’gwarek ebe erliktogwi ai ’gela’ge, an neminat erliknonobogu lemagoluk, at en perleneat logo nobouwa o. 33#Yoh. 7:34Neiyagai o. An agauwa wei nak henemin weleiktik en laik o. Laikmu, his en an nebe heranobogu lorogup a’geat de, nadugat an en ap Yahudi a’ge mo’gulentesi ’gela’ge, o an laikmu eba his en heranebil lagup erlak o, oluk, yogodak his mo’gulhentegisat o,” oluk mo’gulentesi. 34#Yoh. 15:12,17; 1Yoh. 3:23; 2Yoh. 1:5Asogo mo’gulentesirik, wene mesik disogo mo’gulentesi,
“His en tugulom a’ge wene ’get a’ge mesik mo’gulhentaik,
An en his nedesogo welegi ai ’gela’ge, his asogoat, his-his nede-hede togu lemis o. 35His-his asogo nede-hede togu lorogup holuk e, is aphwami ’berlegat enil hontoluk,
Is yu Yesus osi demat hegi, oluk enaluk ema o,” oluk mo’gulentesi.
At Yesus en Petrus tua a’ge aluksogo
mo’gulesi wene
(Matius 26:31-35; Markus 14:27-31; Lukas 22:31-34)
36Yesus en asogo mo’gulentasu lagama, ap Simon onuk mesik Petrus ano en e,
“Nue. Hat o ’geba laigoluk en egen,” oluk, mo’gulesimu, at Yesus en e, disogo mo’gulesi,
“An laikmu eba, hat ne’berlik lo’boksogo lagun erlak o. We, pobuk ne’berlik worogun o,” oluk, mo’gulese lagama, 37at Petrus en at ebam hin wokhasulat e,
“Nue. An hat hebaget warom ’gela’geat welegi a’geat de, hat en e, yogodak an ne’berlik wom mia e’gen ai nopaget,” oluk mo’gulese lagama, 38at Yesus en e, disogo mo’gulesi,
“Hat demat an nebaget wareigoluk welegen a? Erlak o. Sue ayam iak u erlak oruakhwe, hat en,
An Yesus neperlak, oluk he’gik henaganam elabe togunmu en ayam iak ua o, oluk demat mo’gulhegis o,” oluk mo’gulesi.
اکنون انتخاب شده:
Yohanes 13: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
