Yohanes 12
12
Hwe Maria en a’bosu e’ben op a’ge Yesus
oyuk pam egelik pesi wene
(Matius 26:6-13; Markus 14:3-9)
1Wene asogo egesarik oruakhwe, agauwa huaben welemarik en, agauwa mesik pam seni Paskah ano a’ge nouwogoluk owan oruakhwe, at Yesus o Betania ap Lazarus waragama en elalugap pesi a’ge ano owi pam waga. 2Wagama, is aphwami eba a’ge en ebaget serigisema re, hwe Marta en so’boru so’burentasukhwe, Lazarus emin, aphwami yo’go enebegesa a’ge ebano emin, Yesus eminat ne’gesa. 3#Luk. 7:37,38Asogo no’gukhwe, at hwe Maria en a’bosu onuk narwastu e’ben op a’ge o’go a’bigat ’balogwi a’ge, setengah liter o’go ’bil-’bal Yesus oyuk pam egelik pesirik e, at Maria u’gwarek asu pam horegei. Asogo tegeimu, o ogola ebano e’ben sang-pang egei. 4Asogo tegeimu, at Yesus osi iak wogu legesa a’ge mesik onuk Yudas Iskariot, pobuk Yesus woruagoluk yo’go laga a’ge ano en e, disogo egei,
5“A’bosu narwastu ai pam aphwami yabuk ene’gik agauwa mesigat paget togwiam ene’gik o’go mesik-mesik wogontogwi ano a’ge 300 wik-wok e, is aphwami ena’ge erlak a’ge so’buronto a’geat de, a’bosu almaregei ai nopaget,” oluk, wene ’balegei. 6Asogo wene ’balegei ai re, aphwami ena’ge erlak a’ge ai ede en egei puk. We, at arilak enemin enebe ’berlegat ono uang owi tenak welat, at u’gwarek paget hisakho hwerlasu laga ai en egei o. 7Asogo egeimu, at Yesus en e, disogo mo’gulesi,
“Hwe yu a’bosu egelik nebesi ai paget, wene yagoso puk o. An nebe pobuk watnobuema nebe waromma werak salnobuogoluk a’bosu egilnobu ’gela’geat pekharok welagarik egilnebegei yu i o. 8#Ula. 15:11Ye, is aphwami ena’ge erlak a’ge ai, his henemin modok wolorogup a’geat de, an nak e, his henemin modok weleik erlak o,” oluk mo’gulentesi.
Is ap Allah eiye a’ge en Lazarus ebe woruogoluk obok ’baligisa wene
9At Yesus en asogo mo’gulentesirik oruakma, aphwami en e,
“At Yesus ebe o Betania oruak o,” oluk egesema, is aphwami Yahudi a’ge enebe ’berlegat enesa’go hweligisarik legesa. Asogo legesa ai re, at Yesus nak enil houwogoluk legesa puk. At e, Lazarus werak a’ge Yesus en elalugaptegei ano eminat enil ontouwogoluk legesa. 10-11Legesema, is ap Allah eiye a’ge onuelak ’gaindek en e, disogo egesa,
“Lazarus elalugaptegei ai en, aphwami Yahudi a’ge enebe a’bigat nis neniak ukpoluk enede Yesus ebam he’berik pogwi o,” oluk, Lazarus ogo woruogoluk wa’gun ’gabolugu legesayat.
At Yesus ebe o Yerusalem ’gwisokhwe
erliktigisa wene
(Matius 21:1-11; Markus 11:1-11; Lukas 19:28-40)
12Asogo egesarik oruakhwe, loruk o’gwe, is aphwami en e,
“At Yesus o Yerusalem weigoluk wago yo,” oluk egesema, is aphwami a’bik seni Paskah nouwogoluk no’gumu odoktigisa a’ge ebano enesa’go hweligisarik e, 13#Mzm. 118:25,26ha’bu ’gela’ge e’gela ’balhegeik woluk e, Yesus ologotma amitmit supsogo liplau wagalat e, disogo egesa,
“Nue wa! Nue wa! Nue wa!” oluk u ’gela’ge,
“Hosana! Nenaik Allah ’gain Onuk Logo a’ge en nis aphwami Israel a’ge nonue ’gain perakhobou wagama wegen a’ge yu,
at enat obaphobuak o,”
oluk weni wetil-wetil ’gwigisa. 14-15#Zak. 9:9’Gogwiam, at Allah en pageat disogo egeimu pelal wogo oruak o,
“His aphwami o kota Sion welegep a’ge honogorlok hagup o!
Honue ’gain wam keledai emalik ’get owan a’ge o’borl pam huragarik wago etle henil yethemit o!”
oluk egei hegitsogoat, Yesus wam keledai emalik ’get owan a’ge mesik wesirik e, o’borl pam huragarik ’gwegei ai o. 16Asogo ’gwegei ai erlige re, is at osi iak wogu legesa a’ge ebano en, wene aga a’ge ano pobitu erlak. A’geat de, at Yesus waragama pobuk Allah en elalugap pesirik logo pesimu enede eberigisarik e, disogo egesa,
“At ebaget Allah iak pelal wogo oruagat o. Is aphwami en at ebaget tugukhwe nenil hege ano re, wene pelal wogo oruak ai hegitsogoat tigisema o,” oluk enede eberigisa. 17Ye, at Lazarus werak saligisarikmu no oluk e, at Yesus en worlhesimu ebe elaluk agarik liplau wagama, is aphwami enil hegesa a’ge ebano en, is pema akhit mo’gulontogulat e,
18“At Yesus ebe pobi tuagoluk elalin a’ge mesik tegei,” oluk egesema aphwami enebe a’bik enesa’go hweligisarikmu no oluk e, Yesus orogolema liplau wegesa ai o. 19Asogo liplau wegesa ai en, is ap Farisi a’ge en is-is nak wene ogulat e,
“Yethemit! Di aphwami yu aphwami ’berlegat, at e’berlik modok lagai ai en e, nis en togu lege a’ge ano tugukhwe, neniak lok ema opogu legep a? Modok erlak o,” oluk egesa.
Is ap Yunani a’ge en Yesus heratil wegesa wene
20Is aphwami en seni no’gulat Allah erliktuogoluk wegesa ai re, is ap Yunani a’ge ado pema enemin wegesa. 21Is ap ai wegesarik e, ap Filipus owi o Galilea do’go, o kota onuk Betsaida a’ge ’begeitik oruakma, e’bek wegesarik e, disogo mo’gulegisa,
“Nue. Nis Yesus e’bek wom nenagai en wege o,” oluk egesema, 22at Filipus en wene egesa a’ge ano, at Andreas mo’gulesi lagarik e’birek en pobuk Yesus mo’gulegisa. 23Asogo mo’gulesi legesema, at Yesus en e, disogo mo’gulentesi,
“An abat daklau wegi ano, nebe erliknobua ano arat horok lau waga o. 24Ye, is aphwami en, gandum e’gen owi ’gwiangma yogo erlakma, aphwami waragai ai ’gela’ge, agap naduk a’ge muk otluk ’get a’ge ’baktiso erlak holuk e, e’gen mesigat owi yorogwi a’ge aiat welema o. A’geat de, owi ai ’gwiangma yorumu, aphwami waragai ’gela’ge, agap naduk a’ge ai muk otluk nak e, pobuk ’get a’ge ’baktagalat e’gen a’bigat oso yo,” oluk mo’gulentesi.
25 #
Mat. 10:39; 16:25; Mrk. 8:35; Luk. 9:24; 17:33 Asogo mo’gulentesirik, wene mesik disogo mo’gulentesi,
“At ap sa ede en e,
An ’gwiangma yema nebe nelaluk wolom nagai, oluk epasu holuk e, pobuk ebe elaluk modok wolom a’ge paget e, nal ema o. A’geat de, at ap sa ede en e,
’Gwiangma yema nelaluk wolom e, nebit, oluk epasu holuk e, at ai pobuk nalom erlakma en elaluk modok welema o. 26Ye, at ap sa en an neragam a’ge welat, ede en e,
An Yesus ebagerat taga leik o, oluk epasu holuk e, an weleikmu eba ne’biregat modok wolomogoluk ne’berlik wagalom o. Ye, at ap sa en an nebaget taga lema a’ge ai, naik en at ebe hau do’goksogo worua o, oluk niak demat mo’gulhentegis o,” oluk mo’gulentesi.
At Yesus en, “An watnobua o,”
oluk mo’gulentesi wene
27At Yesus en wene asogo mo’gulentesirik e, se’ban mesik disogo egei,
“Naik o, an di obotut yu obotut haik ai en, yogodak nede modok heseliso ai re, hat en nebe delnebin o, oluk mo’gulhum a’geat de, asogo taknobouwagolugat wegirikmu no oluk e, asogo ik erlak o, naik. 28Holuk e, naik, hat honuk logo pagathwerlemen o,” oluk mo’gulosoam e, ’bogorl pam en iak eselat e, disogo egei,
“Arat logo pagathwerlegirik e, pobuk logo pagathwerlaigat o,” oluk mo’gulosoam, 29is aphwami enebe a’bigat eba edik welegesa a’ge enesa’go hweligisarik e, is nin logon en e,
“Orlolu iak egei,” oluk ogulat, ye, is nin pema en e,
“Erlak o. Is malaikat ’bogorl pam yo’go no’gwi a’ge mesik en iak pakhesi o,” oluk ogulat egesa. 30Asogo egesema, at Yesus en e, disogo mo’gulentesi.
“Iak osoma henesa’go hweligep ai re, an nebaget puk. His henebagerat egei o. 31Yogodak Allah en, aphwami ’gwiangma a’ge wene enebam pasulat, no’gorliselat, tagalat e, at onuk logo ’gwiangma a’ge ano mukho lebikpasulat, tua ano arat horok lau waga o. 32An nebe ’gwiangma yema ediknobouema re, an en aphwami ’berlegat lis-lis wogonoboluk nu’gwarek ne’bek onobou weik o,” oluk mo’gulentesi. 33Asogo mo’gulentesi ai ebe re,
“An pobuk aphwami en disogo ediknoboluk watnobua o,” oluk u ’gela’ge egei o. 34#Mzm. 110:4; Yes. 9:7; Yeh. 37:25; Dan. 7:14Asogo egeimu, is aphwami a’bik ebano en e, disogo mo’gulegisa,
“Wene Allah en nenesa’go weregei a’ge ai pam e, nis aphwami delnonobuagoluk Allah en ap mesik perakpouma a’ge ai ebe wemarik e, elaluk modok welema o. Oluk egeimu nenesa’go hologu lege a’geat de, hat en eselat e,
An abat daklau wegi ano aphwami en ’gwiangma yema ediknobouwa o, oluk e’gen ai re, ap mesik ebe abat daklauma egei ai ebe sa paget egeimu en egen,” oluk mo’gulegisa. 35Asogo mo’gulegisema, at Yesus en e, disogo mo’gulentesi,
“An nebe o dakharak enebasu a’ge ano re, we, weiyat nemin wolomul o. Holuk e, at ap sa en o hiktakma lasu holuk e,
O ’geba lasu legi logwe, eperlak welat lasu ai en e, his lagaiam o hik uano, oluk, an dakharak enebasu a’ge nemin oruakhwe yayat o dakharakma laga lemis o. 36His henebe an en dakharak enebasu a’ge an neiyagai orogup en e, an henemin oruakhwe yayat, nebe pobirak noboluk henede nebam he’berik pogu lemis o,” oluk mo’gulentesi. Wene arat asogo mo’gulontoluk, is eba onoboluk, at Yesus ebe momu hisaklai laga.
Is aphwami Yahudi a’ge en Yesus demat oluk,
ebe pobirak erlakma en welegesa wene
37At Yesus ebe is en pobi tuagoluk enilem elalin a’ge a’bigat taga laga a’geat de, is en,
At demat oluk, ebe pobi togu legesa modok erlak. 38#Yes. 53:1Is asogo togu legesa ai re, ap Yesaya Allah iak mo’gulentasu laga a’ge en eselat e, disogo egei,
“Allah ’gain Onuk Logo a’ge, naik wa.
Nis en hat hiak mo’gulontogwiam,
sa en wene ai demat oluk pobi tegei no.
Hat he’gik anni enil houwagoluk elalin a’ge taga legen ano ebe tagokhwe,
sa en il hioluk pobi hebegei no. Erlak o,”
oluk egei a’ge pelal wogo oruak ai, demat emagoluk, asogo togu legesa ai o. 39At Allah en disogo tagenebesi ai en e, is asogo demat oluk pobitu erlakma en togu legesa, oluk Yesaya en mesik disogo egei,
40 #
Yes. 6:10
“At Allah en e, is enil en pobisogo holuk,
onogola eberak poluk enebabut heberl
otluk e, an neragam wagaiam,
an en is obabenebaikno oluk,
an enat is enil hopnik pasulat,
enede ’bugap tagalat, tegis o,”
oluk egeimu, Yesaya en pelal wokho pesimu oruak ai o. 41At Yesaya en wene asogo egei ai re, at Yesus en pobuk tagokhwe ebe erliktua a’ge paget il hesirik en, at obok egei ai o. 42Wene asogo egeimu pelal wogo oruak a’geat de, is ap ’gaindek Yahudi a’ge pema akhit enebe a’bigat, enede Yesus ebam he’berik pegesa a’geat de, is en e, disogo togu legesa,
“Is ap Farisi a’ge en o se’ban ogumu en nene’gik lisogo lebiknonobouwano,” oluk e,
“Nenede Yesus ebam he’berik pege o,” oluk aphwami enil pam ’baksogo ogu legesa erlak. 43Is ai Allah en erligonobuagoluk togu legesa erlak o. We, aphwami en erligonobu enagai en togu legesa ai o.
At Yesus iak ai pam wene enebam pasulat, no’gorliselat, tiso wene
44Is asogo togu legesa a’geat de, at Yesus en iak loksogoat disogo mo’gulentesi,
“At ap sa en ede an nebam he’berik pouwa holuk e, an nebam nak he’berik pouwa puk. Erlak o. We, an peraknobou waga a’ge ano ebam ede he’berik pouwa o. 45Ye, at ap sa en, il an niasu holuk e, an peraknobou waga a’ge anoat il hasu o. 46Ye, is aphwami enede an nebam he’berik pouwa a’ge ’berlegat e, o hiktakma welema no oluk, o dakharak enebaiogoluk an nebe o dakharak enebasu a’ge ’gwiangma yema ’bu egi o. 47An ’gwiangma yema ’bu egi ai re, aphwami wene enebam paiogoluk ’bu egi puk. We, enebe delenebiogoluk ’bu egi ai en e, at ap sa en an niak esa’go holholugat de, niak hologo tiso erlak holuk e, an enat wene ebam paik puk. Erlak o. 48At e, at ai an nebe woknobu ebirat, ye, niak pobisogo wo ebirat, ai en e, at ai wene ebam pouwa a’ge oruak o. Wene ebam pouwa ai re, o ologun pam degelonobua ai pam, an en wene mo’gulhentasu legi ai pamat wene ebam ema o, oluk asogo mo’gulhentasu legi ai re, 49an nogola en ’gagalogo mo’gulhentasu legi puk. Erlak o. We, an en mo’gulhontouwagoluk an naik peraknobou waga a’ge ano enat,
Disogo in, asogo in, oluk mo’gulnosokhweat mo’gulhentasu legi o. 50Ye, at en nis nenelaluk welemagoluk wene nenesa’go wusogo,
Disogo tip, asogo tip, oluk nenesa’go wusogo mo’gulnentasu a’ge ai nis nenelaluk welemagoluk mo’gulnentasu, oluk an naluk o. At naik en wene mo’gulnoso a’geat mo’gulhentasu legi o,” oluk mo’gulentesi.
اکنون انتخاب شده:
Yohanes 12: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
