Yohanes 11
11
At Lazarus waraga wene
1 #
Luk. 10:38,39 Ap mesik onuk Lazarus, orokhwi Maria ot Marta e’birek emin onowi o Betania mesikmu a’ge welegesa. 2#Yoh. 12:3Hwe Maria ai ebe re, pobuk a’bosu e’ben op a’ge nonue ’gain Onuk Logo a’ge Yesus oyuk pam weregeitik asu pam horegei a’ge ano yo. Asogo onowi pam oruakma agauwa mesik erlige re, at Lazarus ou ebam agama re, 3is hwami enebe ’biren ot ebap e’birek enerei ebam ou en e, Yesus mo’gulesi louwagoluk, aphwami enebam wene wusogo perakpogulat e, disogo egesa,
“Nue. Lazarus hede hwedik a’ge ano ou ebam agarik oruak o,” oluk wene wusogo peragonobogwiam e, 4at Yesus mo’gulesi legesema, esa’go hwelegeitik e, disogo mo’gulentesi,
“Ou ai en, at ebe modok warema puk. We, an en tagoam, aphwami en Allah ebe erliktugulat, omlogo an erliknobugulat, tuagoluk, ou asogo ebam agama oruak o,” oluk mo’gulentesi. 5At Yesus en, hwe Marta ebap e’birek emin, Lazarus emin, ede hwedik welaga a’geat de,
6“At Lazarus ebam ou oruak o,” oluk mo’gulegisema, esa’go hwelegei a’geat de, epenen en o welagama ebano mo egeitik, agauwa ’biren welaga. 7Asogo welagarik en, at osi iak wogu legesa a’ge ebano mo’gulentasulat e,
“Nis togolik o Yudea ’buok o,” oluk mo’gulentesi. 8Asogo mo’gulentesimu, is en e, disogo mo’gulegisa,
“Nue. Ap ’gaindek Yahudi a’ge en yogodak yayat helep pam wathobuogoluk tugukhwe orlu e’gen ano a’geat de, hat pobuk togolik o ebayat ’biogoluk taga legen?” oluk egesema, 9at Yesus en e, disogo mo’gulentesi,
“O agauwa mesik erlige dakha osoam e, hubet jam 6 hwerli en ’bekhit hopmu akhit jam 6 agoam la’bulogo 12 jam ene’gik wenarogwi ano erlak? Ap sa en o mo aphwami ’gwiangma dakharak enebasu a’ge ai il hasulat, ebe o dakharakma lasu holuk, oyuk a’gul dungsogo ’balua modok erlak o. 10A’geat de, ap sa en o huba’go lasu holuk e, at ogola dakharak a’ge erlakma no oluk e, oyuk a’gul ’balua o,” oluk mo’gulentesirik, 11pobuk mesik mo’gulentasulat e, disogo mo’gulentesi,
“Nis nenare Lazarus ano arat nogogei a’geat de, an en at nogosoma elalugap ti laik o,” oluk mo’gulentesi. 12Asogo mo’gulentesimu re, is at osi iak wogu legesa a’ge ebano en e, disogo mo’gulegisa,
“Nue. At ai we nogoso holuk e, ebe op ema o,” oluk mo’gulegisa ai, ebe re, 13at Yesus en Lazarus ebe waragama en egei a’geat de, is onogola en e,
“Demat nogoso oluk egei,” oluk onogola epegesa. 14Asogo onogola epegesa ai en e, at Yesus en wene ’baksogo disogo mo’gulentesi,
“Lazarus ebe arat waragama o. 15Asogo waraga a’geat de, his henede nebam he’berik pagup oluk, an eba ’bilo erlakma en mo egi ai, his henebagerat nogola nagai hasu legi o. Holuk e, yogodak nis Lazarus e’bek ’buogoluk manis o,” oluk mo’gulentesi. 16Asogo mo’gulentesimu, at ap onuk Tomas ogulat, Holuba’ge ogulat, ogwi a’ge ai en e, arilak Yesus osi pema ebano disogo mo’gulentesi,
“Yesus eminat waromogoluk, ’buok en manis o,” oluk mo’gulentesi.
At Yesus en, “Enelaluk modok welemagoluk enelalugabenebiso re, anat o,”
oluk mo’gulentesi wene
17Asogo mo’gulentesimu at Yesus lak ebano ’bi legesa ’gal e, Lazarus ’gwiangma selak poluk agauwa henagan welegesarik agauwa mesik oruakma ’bigisa. 18O Betania ai re, o Yerusalem horoksogo eragam o’gwe ebela lagai hwerli re, 3 kilometer ’gela’ge ai en e, 19is aphwami Yahudi a’ge a’bigat, hwe Maria emin, Marta emin, enerei Lazarus werakma onogola opsogo oluk, ene’bek wegesarik welegesa. 20Asogo oruakma, aphwami en,
“At Yesus ebe wago yo,” oluk egesema Marta esa’go hwelegeitik e, Maria o ogola oruakhwe, Yesus hai laga. 21Lagarik Yesus mo’guleselat e, disogo egei,
“Nue. Hat yema wotluk wellenma re, an nerei waraga ai re, warelep erlak epegi o. 22Asogo warelep erlak a’geat de, nue. Yogodak hat en we, no’gwe a’ge Allah ’gonu mo’gulomma re, at en wokhema nakma re, an nalugat o,” oluk, mo’gulese lagama, 23at Yesus en e,
“Hat herei togolik elaluk emayat o,” oluk mo’gulesimu, 24at Marta en e, disogo mo’gulesi,
“O ologun pam aphwami waregesa a’ge enelalugabonobua ai erlige re, at Lazarus ai pobuk togolik elaluk ema o, oluk, an nalugat o,” oluk mo’gulese lagama, 25at Yesus en e, disogo mo’gulesi,
“Aphwami enelaluk modok welemagoluk, an enat enelalugabenebiso yo. At ap sa en ede an nebam he’berik poluk en warema holuk e, at ebe warema a’geat de, pobuk elaluk otluk elaluk modok welema o. 26Ye, aphwami enelaluk welat enede an nebam he’berik pogwi a’ge enebe lo’bok warom erlakma en enelaluk modok welema o. Wene ai demat oluk pobi tigen a?” oluk mo’gulesimu, 27at Marta en e, disogo mo’gulesi,
“Nue, hat hebe Allah omlogo Kristus, Allah en pulogo edikhebesirik perakpouma egesa a’ge ano, harat oluk, pobi hebegis o,” oluk mo’gulesi.
At Yesus nge tegei wene
28Asogo mo’gulotluk, Marta en ebap Maria worlhai lagarik e, disogo mo’gulesi,
“Nonue wene mo’gulnentasu a’ge ano ebe wagarik horok yema welat worlhiasu o,” oluk iak ling-long mo’gulesi. 29Asogo mo’gulesimu, Maria esa’go hwelegeitik perleneat siaksogo inagarik e, Yesus e’bek waga. 30Wagarik e, at Yesus o selimu ’gwilo erlakma en, we, hwe Marta en Yesus hai lagarik e’birek sarlok tigisema eriano oruakma waga. 31Maria ano perlenesogoat siaksogo liplau wagama re, is aphwami Yahudi a’ge Maria ogola opsogo oluk o pam welegesa a’ge ebano enil hegesarik e,
“Maria Lazarus uakma nge ti laga hegi,” oluk e’berlik wegesa. 32Wagaihwe, hwe Maria ano en Yesus ebe il yetholuk e, e’bek wagarik odogorlu pam eragam sakhun egeitik e, disogo mo’gulesi,
“Nue. Hat yema welentik wellenma re, an nerei waraga ai, warelep erlak epegi o,” oluk egeitik nge tagoma, 33is aphwami Yahudi a’ge Maria e’berlik wegesa a’ge ebano eneminat nge tugumu, at Yesus en il entesirik e, is ebano ede en ede heselegeimu re, enebam hin wasulat e, disogo mo’gulentesi,
34“Lazarus ebe ’ga akhit saligepma oruak,” oluk mo’gulentesimu, is en e,
“Nue. Hil hagun en suk o,” oluk mo’gulegisema re, 35at nge tegei. 36Asogo nge tegeimu, is ap Yahudi a’ge ebano en e,
“Eige! Yethemit! Yesus Lazarus ede hwedik welagama yu, nogorlok o!” oluk erliktigisa. 37Asogo erliktigisa a’geat de, is aphwami ebano a’ge pema akhit en e, disogo egesa,
“At en ap mesik il hopnik a’ge obaptegei ai ’gela’ge, Lazarus elaluk welemagoluk obaptelipmu re, warelep epegep? Warelep erlagat o,” oluk egesa.
At Yesus en Lazarus elalugaptegei wene
38Asogo egesema, at Yesus ede heselegeimu re, werak ebe owik ebale hele’gikmu helep dopnosogo pei legesema eba hai laga. 39Hai lagarik e, disogo mo’gulesi,
“Helep ai pela’gogo hwikhai lit o,” oluk mo’gulentesimu, ap waraga a’ge ano erei Marta en e, disogo mo’gulesi,
“Nue, at ebe selak pege hwerli en agauwa henaganak a’ge welegerik agaikhen welege ai o. Holuk, arat muk agarik e, e’ben tegei o,” oluk mo’gulesimu, 40at Yesus en e, disogo mo’gulesi,
“An en wene mo’gulheselat e,
Hede an nebam he’berik pagun holuk e, Allah erliktogwi a’ge ano mesik tugumu hil hagunat ani o, oluk, arat mo’gulhegis erlak no? Mo’gulhegisat o,” oluk mo’gulesimu, 41is en helep ano pela’gogo hwikhai legesema re, Yesus il ’bogorl pam likholuk e, disogo egei,
“Naik Allah o. An niak hesa’go hweligen ai en e, hau wathebise legi o. 42An en hat ’gonu mo’gulhosoam, niak hesa’go hwelise legen ano, an nalugat a’geat de, is aphwami yema en, hat en an peraknobou wegen ai an nebe pobi nobuagoluk mo’gulhegis o, naik,” oluk egeitik, 43pobuk iak loksogoat Lazarus disogo mo’gulesi,
“Lazarus. Lipla suk o!” oluk mo’gulesimu, 44at Lazarus ebe waraga a’ge ano elaluk agarik, e’gik oyuk hettagat, orogole sum en hettagat, liplau waga. Asogo liplau wagama, at Yesus en is aphwami eba welegesa a’ge ebano mo’gulentasulat e,
“Ebela’gwe louwagoluk, ebam sum hettak a’ge eba hebelik pemit o,” oluk mo’gulentesi.
At Yesus woruogoluk yo’go lebigenebegesa wene
(Matius 26:1-5; Markus 14:1-2; Lukas 22:1-2)
45Asogo tegeimu, is aphwami Yahudi a’ge enebe a’bigat Maria lak ene’bek wegesarik welegesa a’ge ebano, at Yesus en tegei a’ge ebano enil hegesarik e, is pema akhit nin enebe esan en e, Yesus ebam enede he’berik pegesa. 46Asogo he’berik pegesa a’geat de, is pema akhit ap Farisi a’ge ene’bek legesarik e, disogo mo’gulentigisa,
“At Yesus en disogo tegei, asogo tegei,” oluk mo’gulentai legesa. 47Asogo mo’gulentai legesema re, is ap Allah eiye a’ge onuelak ’gaindek emin, ap Farisi a’ge emin en e, is ap wene Allah paget edip ’belo’gogu legesa a’ge worlontogwiam wegesema re, disogo mo’gulentigisa,
“At ap ai ebe pobi tuagoluk elalin a’ge a’bigat tago ai re, nis en no’gosogo tul epegep. 48Nis en, at asogo til no’gukhwe wene yagoum erlakma en ukpul holuk e, aphwami a’bik enede at ebam he’berik poluk lagaimu re, ologun pam e, is ap Roma a’ge wemarik e, enebe wollo’gen dagalnonobogulat e, Allah owi werik moluk tuma o,” oluk mo’gulentigisema, 49ap is a’ge mesik onuk Kayafas, is ap Allah eiye a’ge onue ’gain tahun ai pam welaga a’ge ano en disogo mo’gulentesi,
“His wene modok heneperlak en ogu legep ai o. 50Nis ’berlegat wollo’gen dagalnonobu erlakma en, we, nis nenebaget ap mesigat nak waromma re, op o, oluk pobi togu legep erlak a?” oluk wene asogo egei ai re, 51at ogola en ’gagalogo egei puk. We, at ebe Allah eiye a’ge onue ’gain tahun ai pam oruakma, Allah en ogola ’gagalegeimu re, disogo egei,
“Nis aphwami Yahudi a’ge paget Yesus ebe warema,” ai paget egei ai o. 52A’ge re, is aphwami Yahudi a’ge enebaget nak egei puk. Aphwami ’berlegat Allah eiyagai a’ge o di owi yu owi ’bogulogo legesarik oruak a’ge emin la’bolik enebaigoluk, Yesus warom a’ge paget egei. 53Asogo mo’gulentesimu, hwerli ai hwerli en e, is ap ’gaindek Yahudi a’ge en Yesus ebe modok woruagoluk obok lebikpegesa.
54Asogo egesa ai en e, Yesus o Yudea eba ap Yahudi a’ge enilem ebe selak o’gwe denaga laga erlak. We, hisak-hisak nak denaga lagarik e, o eba ukpoluk, o leimu aphwami erlakma horoksogo eragam o kota onuk Efraim lagarik, at osi iak wogu legesa a’ge ebano enemin ebayat welegesa.
55Welegesa eria hegit e, is aphwami Yahudi a’ge seni onuk Paskah no’gwi a’ge ano no horok lau wagama re, nouwogoluk owan welat, is peik ’balogwi ’gela’ge hosogo oluk, Yahudi a’ge en togwi ’gela’ge tuogoluk, onowi lo’bok en o Yerusalem odoktugu legesa. 56-57Odoktigisarik oruakhwe, is ap Allah eiye a’ge onuelak ’gaindek ebano emin, is ap Farisi a’ge emin en, wene disogo egesa,
“Is aphwami pema en Yesus ebe oruak a’ge enaluk welat holuk e, nis en at ebe tenak pouwogoluk mo’gulnentaumak o,” oluk obok woluk yo’go lebigenebegesema no oluk e, is aphwami ebano Allah owi werikmu welat, Yesus ebe heratugulat is-is nak hin wogulat e,
“At e, seni sorugumu ya wema opogu legep a? Erlak a,” oluk ogu legesa.
اکنون انتخاب شده:
Yohanes 11: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
