Yohanes 10
10
Wene wam domba wam ’gwelakharok welago a’ge ebam elitsogo mo’gulentesi wene
1At Yesus en wene asogo mo’gulentesirik e, pobuk mesik disogo mo’gulentesi,
“An en wene mesik demat mo’gulhentaik o. Ap sa en wam domba wam waigoluk ebe lalma ’gwiogoluk e, ’goduk ’gwilo o’gwe ’bekhit ’gwi lasu erlakma en, we, leget siatle hasogo ’gwiso holuk e, at ebe ai yogorlia wasu a’ge en yogorlia waiyogolugat o. 2Ye, ap sa en, ’goduk ’gwi lagai o’gwe ’bekhit ’gwiso holuk e, at ai domba eiye welat ’gwelakharok welago a’geat o. 3At domba eiye welat ’gwelakharok welago a’ge ai, ebe wago holuk, at ap mesik domba owi ’godukmu ’gagalak welago a’ge en ’goduk huthasuam, at domba eiye a’ge ano en iak pakhasuam, is domba wam en, at iak enesa’go hologumu no oluk e, ononuk lo’bok worlentasulat, wogonoboluk odipmu libago yo. 4Wogonoboluk libagalat e, at ebe naduk lasukhwe, uam domba ebano, at iak enalukmu no oluk e, e’berligat lagai o. 5Obat asogo lagai a’geat de, is ap muon eniak ogwiam e, is domba wam en is eniak eneperlakma no oluk e, ene’berlik lo pukmu en hweiye lagai o,” oluk, 6at Yesus en, wene ai ebam elitsogo is mo’gulentesi a’geat de, wene yu ’ge a’ge paget egei hweat, pobirak erlakma en welegesa.
At Yesus en, “Wam domba wam eiye welat, opsogo ’gwelakharok welago a’ge, nebe anat o,”
oluk mo’gulentesi wene
7Asogo pobirak erlak oruakhwe, pobuk at Yesus en e, disogo mo’gulentesi,
“Wene demat mesik mo’gulhentaik. Wam domba wam ai ene’gebela re, an nebeat o. 8An owan wom erlak oruakhwe, is aphwami logon naduk wegesa eba re, is enebe ’berlegat wam domba wam yogorlia worogulat, hisarogulat, togwi a’ge wegesarikmu no oluk e, is wam domba wam en, is eniak enesa’go holu erlakma en welegesa. 9Ebela ’goduk e, an nebeat o. Ap sa en an nebam ’gwiso holuk, ebe op degelak modok welat, libom-’guom eselat e, e’gela op a’ge nak nasu lema o. 10Ye, is ap yogorlia wogwi a’ge wagai ai re, wam domba wam yogorlia hisarogulat, waronobugulat, enebe modok erlagabonobugulat, tuogoluk wagai a’geat de, an wegi ai nak e, is aphwami di a’ge yu a’ge a’bikmu e’gerlakma hialogo welagai ai ’gela’ge, enebe enelaluk modok welemagoluk enelalugabonobolukmu en demat a’ge e’gerlakma hialogo welemagoluk wegi o.
11Wam domba wam eiye welat ’gwelakharok welago a’ge, nebabut op e, nebe anat o. Wam domba wam eiye welat ’gwelakharok welagai a’ge, ebabut op a’ge re, uam domba erlele wokho wareigat o, oluk ogola epasu. 12At asogo epasu a’geat de, at ap mesik wam domba wam eiye a’ge erlak. At uam puk. At we, o’go wogemagoluk ’gwelakharok oruakma mene orlomene wagoma il yetholuk, wam domba wam ukpoluk hweiye lasuam e, mene orlomene ano en domba ebano iak en dalukhegeik wogenebigoluk mukho-makho ’bogulogo lebigenebasu. 13At ai o’go wogemagoluk wam domba wam ’gwelakharok welago a’ge ai en e, wam ebano ede erlak en ugonoboluk hweiye lasu ai yo. 14-15#Mat. 11:27; Luk. 10:22Wam domba wam ’gwelakharok welago a’ge nebabut op e, nebe anat o. Naik en an aluk, ye, an en at naluk, welege ai ’gela’ge, an en nuam domba naluk, ye, is en an enaluk, welagai o. Asogo welat, an nuam domba erlele wokho wareigoluk welegi o. 16Ye, an nuam domba wam ebe lalma yema nak oruak puk. O mu’gwe logon oruagat o. Nuam eba a’ge niak enesa’go holuagoluk wogonoboluk weigolugat welegi o. Onobuomma, is an nuam domba wam yo’go ’belak mesik o’gwe no’gu lema o. Asogo no’gukhwe, an nematek en ’gwelagentarok weleik o.
17An wareiktik togolik nelaluk eigoluk nebe wareik epasu legi ai en e, naik en an ede hwedik welago yo. 18An en wareik epasu erlakmayat, is aphwami logon en ebagase pam watnobu mia o. We, an nu’gwarek nogola enat, nebe wareik epaik erligeat wareik o. Wareiktik e, pobuk togolik nelaluk eik ai nu’gwarek nogola en epaik hegitsogoat o. Asogo tuagoluk naik en peraknobou waga a’geat tik o, oluk demat mo’gulhentegis o,” oluk mo’gulentesi.
19Wene asogo mo’gulentesi ai en, is ap Yahudi a’ge eniak a’bik sagaligisarik enebe ’burl me’gerigisa. 20Asogo me’gerigisarik, is enebe pema lok o’gwe en e, disogo egesa,
“At yu mu’gat ebabut wiak a’ge ogola ’gwegeitik ebe ede ’balagarik wene osokhweat de, his at iak hologu legep ai nopaget,” oluk egesa. 21Asogo egesa a’geat de, is pema akhit en e, disogo egesa,
“Erlak o. Aphwami mu’gat ebabut wiak a’ge onogola ’goluk e, wene asogo ogwi erlak o! Mu’gat ebabut wiak a’ge en enil hopnik a’ge elirat obabonobu epegep? Modok mia o,” oluk egesa.
Is ap ’gaindek Yahudi a’ge en Yesus ebe woruogoluk pobuk obok ’baligisa wene
22Asogo egesarikmu en, is aphwami Yahudi a’ge onogola en e,
“O Yerusalem Allah owi werik a’ge pobuk opsogo degelige ano yo,” oluk onogola eberak welat seni sorugumu ano arat hegit aga. O eria hegit e, o wiak welaga. 23Asogo oruakhwe, at Yesus Allah owi werikmu, o sorlo’bon onuk Salomo osorlo’bon o’gwe nosoma, 24is ’gaindek Yahudi a’ge eragam odoktu egesarik e, disogo mo’gulegisa,
“Nenede perik oruakhwe uknenebasu legen yu, nenede yamuksogo, hwerli agauwa ’ge pam en mo’gulnentagun. Allah en Kristus yo’go poluk perakpou weik egei ano, hebe harat holuk e, ’baksogoat mo’gulnentemen o,” oluk mo’gulogu legesema, 25at Yesus en e, disogo mo’gulentesi,
“An arat mo’gulhentasu legi a’geat de, his en demat oluk opogu legep erlak o. An naik en yo’go nebesimu taga legi ai, an nobok ’baksogo mo’gulhonto ’gela’geat taga legi a’geat de, 26his henebe an en a’ge domba puk, mu a’ge oluk e, nebe pobi nobogu legep erlak ai o. 27His honogola asogo epegep a’geat de, is pema en e, an nuam domba a’ge holuk, niak enesa’go holholuk, is en an nebe enalukmu no oluk e, ne’berlik wagai o. 28Ne’berlik no’gukhwe, is enelaluk modok welemagoluk enelalugabenebasu leik ai en e, is enebe warotluk nalema erlak o. Is an ne’gik pam oruakhwe, is ap nin pema en delogo wogonobu mia o. 29Ap pema mia a’geat de, an naik en nuam domba woknesi a’ge ai nak e, ebe anni oruak o. Is an naik en woknesi a’ge ai, at e’gik pam oruakma, is ap logon en delogo wogonobu mia o. 30Naik ne’birek nenebe re, mesigarat o,” oluk mo’gulese lagama, 31is ap ’gaindek Yahudi a’ge en e, helep ene’gikmu wegesarik e, Yesus ebe modok woruogoluk tigisa. 32Asogo togu legesema, at Yesus en e, disogo mo’gulentesi,
“An naik en op a’ge a’bigat tuagoluk yo’go nebesi a’ge tagoma, henil niogu legep a’ge eba ’berlegat e, mesik ’ge ’gela’ge dagan tegismu en nebe watnobuogoluk togu legep,” oluk mo’gulentasu lagama, 33#Ima. 24:16is en e, disogo mo’gulegisa,
“Hat op taga legen ai en helep pam wathobuogoluk togu lege puk. We, hat hebe aphwami a’geat de, Allah onuk wiagapsogo, disogo ese legen,
An Allah nemin hegit, oluk ese legen ai enat wathobuogoluk togu lege o,” oluk mo’gulogu legesema, 34#Mzm. 82:6at Yesus en e, disogo mo’gulentesi,
“Wene Allah en nenesa’go weregei a’ge ano pam, at en e, disogo egeimu pelal wogo pegesema oruak,
His henebe Allah ’gela’geat o,
oluk pelal wokho oruak ano erlak no? 35Wene Allah iak pelal wogo welago ai ’berlek e, mesik sogwi ago erlak ani o. Ai en e, is at iak mo’gulentesi a’ge paget,
Henebe Allah ’gela’geat o,
oluk egeimu pelal wogo oruakhweat de, 36an en e,
Nebe Allah omlogo, egi ai en,
Allah onuk wiagaregei, oluk nopaget ogu legep. Allah enat yo’go nebesirik, demat nebe poliknoboluk ’gwiangma yema peraknobou waga a’geat de, asogo nopaget ogu legep. 37An naik en e,
Disogo taga lomup, oluk, peraknobou waga a’ge, ebe tu erlak wellema re, his en nebe pobirak noboluk henede nebam he’berik po mia o. 38A’geat de, an en tisokhwe, his en demat oluk henede an nebam he’berik po henebit ai o. Asogo tigep ai re, an en naik emin hwedik, ye, at en an nemin hwedik, welege ai, henaluk oroguptik en demat oluk pobi togup en e, an taga legi a’ge ai demat oluk pobi tit o!” oluk mo’gulentasu lagama, 39is en e, at Yesus ebe tenak pouwogoluk tigisa a’geat de, niagup-hiagup a’ge long egei.
40 #
Yoh. 1:28
Yesus asogo lagarik, pobuk togolik ik Yordan etle akhit o’gwe at Yohanes en naduk aphwami ik olomu ’belabenebise laga’gwe ebano libagarik welaga. 41Eba oruakma, aphwami a’bik at e’bek wegesarik e, disogo egesa,
“At Yohanes en elalin a’ge mesik taga laga modok erlak a’geat de, at en ap yu obok ese laga ano iak ebe enak aga,” oluk egesarik e, 42is aphwami eba welegesa a’ge enebe a’bigat enede Yesus ebam he’berik pegesa.
اکنون انتخاب شده:
Yohanes 10: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
