LUKAS 19
19
Yesus min Sakius min-nen yiga wene
19:1-10
1Nde, Yesus na o Yeriko wok lug-e, o Yeriko siri kibirik irit mbirij-o. 2O iri me-ge isilobulo worak nap pemerinta enmanggim tol ndok wurugwi nap enanggul pem kek tak unu-ge Sakius irit woragaij-o. 3Woralar-e, ar-e Yesus na kudtak indi peragaij-et nde, ap na kwarat, at ebe na poro me, at-nen Yesus kudtag-e meya agaij-o. 4Meya alama-ge, at na nandug-et puburak mberarik, Yesus na wasola mbel kayeg-o luk, ar-e e bem lagaij-o. 5Lagarik worasoma-ge, Yesus na e iri na erem pem wok yosolar-e, teram lik karuk-nen Sakius na yak tosolar-e: ”Sakius wa-e. Yawo-ge kat kama nggwimin me, kar-e ndag-et nak mbuwasug-o” luk yak tij-o.
6Yosoloma-ge, Sakius na ndag-et nak mbuwagarik, alen min-et Yesus na wok ibij-o. 7Iri kwarosola kaiga nap pidsa-nen unlum ne yol ngol mbogolar-e: ”E! Ar-e meya yoso nap na ama worayekluk mburusu-o!” luk yiga-o.
8Nde, Sakius ama nggwigarik woragolar-e, Sakius na men luk, Nagawan Indo yak tosolar-e: ”Nagawan Indo wa-e. An narengge pidsa erep menggesa ereb-e insilobulo lak nap tembesa wok indimin-o. Nde, an-nen onmbol pem laruk enarengge wanidnak nap na enarengge uwi yak ondosolar-e, ondolmasa empat pem wok indimin-o” luk yij-o.
9Iri yosoloma-ge, Yesus-nen at yak tosolar-e: ”Kar-e Abaram-nen wigarak me, yawo-net kat min kat kama woragwi nap min Mbal Pem Nagawan-nen kinmiri yij-o. 10Nde, Ap Ambara an lobok yigi-ge, pul yidnak nap onkore yaga, inmiri yaga wok endeyekluk lobok yukmu-o” luk yij-o.
Kerep tol wok indidnak pem nden karuk yidnak wene
19:11-27
(Mt 25:14-30)
11Wene iri yosola kolak worakmu, Yesus-nen nden karuk wene mbi yak indij-o. Iri yid iri-ge ar-e Yerusalem panggosa worasolat me, ap-nen-e: ”Mbal Pem Nagawan-nen tenagaidnak wi yanem-et nam ma-o” luk peragola-nen yij-o. 12Iri bem Yesus-nen yosolar-e: ”Ap kek tak misig-e nagawan tak ubuwakluk, o erepma mberarik, lobok yij-o. 13Awo mbirigit lak ma-net at ndegel ubugwi nap sepulu na yonggo unpuruk, kerep tol ondomok tak tembesa wok ondosolat-nen yosolar-e: ’An mborosola-ge, kir-e kerep tol yeba wene wutluk, erep lesa wanogolar-e, kwarat tak per-o’ luk yak indij-o. 14Alat nde, ap kek tak na elem nap-nen at insili rak puruk, at imbirik ap wirik onpogolat-nen yosolar-e: ’Ap iri-ge nit nennggendumu nagawan mendak purag-e ninmbir-o’ luk yiga-o.
15Nde, ap kek tak na-ge nagawan tak ibikma, lobok yosolar-e, at ndegel ubugwi kerep tol tembesa wok indid nap ereya na ’Neram ndok werer-o’ yak unduruk, ’It iri-ge kerep tol iri na bem-nen nunggwirik nggal lesa waniga-o?’ luk aru yekluk yonggo inpij-o. 16Yonggo onposoloma-ge, nandug-et wok tid nap na at eram lobok yosolat-nen yosolar-e: ’Neid wa-e. Kerep tol misiget wok nirigen na-ge an-e erep lesa wanosolar-e, sepulu rak pigi-o’ luk yij-o. 17Yosoloma-ge, eid na-nen at yak tosolar-e: ’Konag-o! Kar-e yabu konag-et wanoso nab-o. Nde, kar-e marik kwarurak pem mot mot kwarigen ala-ge, o siri sepulu-ge kat-nen tena woranok-nen kinggem pimin-o’ luk yak tij-o. 18Yak tosoloma-ge, ndegel oboso nap misik lobok yosolat-nen yosolar-e: ’Neid wa-e. Kerep tol misiget wok nirigen na-ge an-e erep lesa wanosolar-e, lima rak pigi-o’ luk yij-o. 19Yosoloma-ge, eid na-nen at yak tosolar-e: ’Kar-e o siri lima tena woranok-nen kinggem pimin-o’ luk yij-o. 20Nde, ndegel oboso nap misik na at eram lobok yosolat-nen yosolar-e: ’Neid wa-e. Kerep tol misiget wok nirigen na-ge yu-o. An-e sum pem nggetla kura buruk woragirig-o. 21Kat kindi amawi me, kat kindi aye-nen kwarigi-o. Nde, kar-e ap insilobulo nde wanosolat, kat-nen-e yakit lag-et nde ebe mbaroso ala-nen iri kwarigi-o’ luk yij-o. 22Yosoloma-ge, eid na-nen at yak tosolar-e: ’Ndegel noboso nap meya yu-ge wa-e. Kat-nen yigen iri ndak ndag-et kebem wene mbarimin-o. An-e nindi amawi me, an-nen pigit lag-et nde wanosolat, an-nen yakit lak sa-t nde mbarosolat yoso iri-ge kar-e karu nar-o. 23Iri bem-e kar-e noluk-nen uwang ndok wosa pugwi ma pigit lak yigen-o? Iri kwarigen nggal-e, an lobok yosolar-e, an negerep tol min eralu pidnak uwang min iri na nde waneleb-o’ luk yij-o. 24Iri yuruk, at-nen iri me mendak woraiga nap na yak ondosolar-e: ’Kerep tol iri-ge at inggem mengga wanuruk, egerep tol sepulu worak nap iri wok ter-o’ luk yak ondosoloma-ge, 25it-nen at yak togolar-e: ’Nab-o. At iri-ge egerep tol-e sepulu worasu-o!’ luk yak tiga-o. 26Nde, at-nen it yak ondosolar-e: ’An yak kendeyeg-o. Arengge kwarat worak nap ala-ge, terak mena kwarat wok undugwi-o. Alat nde, arengge mariget worak nab-e at eram woraso ereya na at inggem-nen mengga wanugwi-o. 27Nde, an nimin wim nap an it ennggendumu nagawan wolmomtak insili yiga nap iri-ge wok unpuruk lobok luk, an nimbiri bem pidsa ender-o’ ” luk yij-o.
Yesus-e Yerusalem nggosola, igijak wiriga wene
19:28-40
(Mt 21:1-11; Mk 11:1-11; Yo 12:12-19)
28Yesus-nen wene iri na yurug-e, at-nen anggul tak puruk Yerusalem mbirij-o. 29Mborosolar-e, Saitun ndobo ayo ma o Mbetpage min Mbetania min panggosa wok luk, owosirak mberen nanduk wirik onposolat-nen 30yak ondosolar-e: ”Kir-e o siri nandug-et wok yugup sa iri me mberer-o. O iri me nggogolat-nen yik kagupnggal-e, ap-nen ombolwak pem kore yugwi buk kelerai wam marik mbi iri me yilik kagub-o. Karug-e, wam na wusutluk, yu me waruk lobok yer-o. 31Nde, ap-nen kin wok konpogolar-e: ’Kir-e noluk-nen wam iri wisitli-o?’ luk yak kondogola-ge, kit-nen yogolar-e: ’Nagawan Indo-nen kwarurak mbi worasu-o’ luk yak undugup na-e” luk yak indij-o.
32Nde, at owosirak mberen na mbiriganggal-e, ndemeret Yesus-nen yak indid iri na ndak ndag-et kaiga-o. 33Nde, mbirigarik, kelerai wam marik na wusurukmu-ge, wam ombo ereba-nen yogolar-e: ”Kir-e noluk-nen wam marik iri-ge wisitli-o?” luk yiga-o.
34Yogolikma-ge, it-nen yogolar-e: ”Nagawan Indo-nen kwarurak mbi worasu-o” yurug-e, 35wam marik na-ge Yesus eram waruk mborogolikma-ge, it unsum yonggora wam na ombolwak pem ndamak puruk, Yesus na wam ombolwak pem koreyak ibiga-o. 36Yesus na kelerai wam ombolwak pem koreluk mborosola-ge, ap-nen-e unsum tulama ndamak pil lobok yiga-o.
37Yesus na Yerusalem koroga, Saitun ndobo nggwe mbugwi tulama wok yosola-ge, at imin nugwi nap ap kwarat-nen kwiye worak kwaroso na kagwi me, at igijak worogolar-e, Mbal Pem Nagawan wa yak togolat, Mbal Pem Nagawan erembel wanogolat-nen enne ngguloksa yogolar-e: 38”Nagawan Indo unu bem lobok yusu nagawan yu-ge imbiringgat tak puwag-o! Aid arem-nen yamuksa woragolat, Mbal Pem Nagawan unu kek tak wolmag-o!” luk yil mbiriga-o.
39Alama-ge, ap kwarat na ennggenggerak woraidnak Parisi nap erep-nen Yesus yak togolar-e: ”Mul Ondoso Nap wa-e. ’Kenne lak mer-o’ luk kowosirak iri yak indi-o” luk yak tiga-o.
40Yak togolikma-ge, Yesus-nen wene erep nggarosolar-e: ”An yak kendeyeg-o. It yu-nen enne lak yogola, kerep yeba-nen-e ene ngguloksa yuwa-o” luk yij-o.
Yerusalem ubud-nen Yesus yip tid wene
19:41-44
41Nde, Yesus na-ge Yerusalem panggosa wok luk, o siri na yik karug-e, o na ubud-nen yip tij-o. 42Yip tosolat-nen yosolar-e: ”Yerusalem wa-e. Kar-e yamuksa wolmomtak yawo-nen karu nggal-nen-e konak lombog-et nde-o! Alat nde, yamuksa woragwi iri-ge yawo-nen-e kat kerengen-e kagun pug-o. 43Nde, misik tarem-e kat kimin wim nap-nen kat kambuk tak kuburuk, kat mburugun naru leget wa kuburuk, tu ponok-nen ponok-nen ngguwagolar-e, kebem mbud momtak tarem wok ma-o. 44It-nen-e kat min kat keleget arem woragwi nap min-e mondok irit lak tak kunpuwa-o. Nde, iri kwat konpogolar-e, kerep ebem lud lud kona pidnak misiger-o luk tet wolma bug-o. Mbal Pem Nagawan-nen kimiri yekluk lobok yosola, yenggerak pigit lak yigen pem, iri nggal kwat kubuwa-o!” luk yij-o.
Yesus-nen Mbal Pem Nagawan ama mbiridnak wene
19:45-48
(Mt 21:12-17; Mk 11:15-19; Yo 2:13-22)
45Yesus na Mbal Pem Nagawan ama ngguruk, silobulo onggo wanogolat woragwi nap ereba na langgara mbepme wirik onposolat-nen 46yak ondosolar-e: ”Mbal Pem Nagawan engga mbarak pem-nen yosolar-e: ’An nuwi yu-ge tepan yugwi ma yuwa-o’ luk yij-et nde, kit-nen-e yariya wanugwi nap ondoro nggal tak pili-o!” luk yak indij-o.
47Pempa Yesus na Mbal Pem Nagawan ama-nen ap mul ondosolat woragaij-o. Worala-ge, it tepan omborak nagawan min imiri mbarak pidnak wene enaru nap min Yawuri nap ennggendumu-nen enne kulugwi nap min-e Yesus wururak tu kore yogolat woraiga-t nde, 48ap pidsa-ge at-nen yidnak wene kulurak inndi nak yogolat, at-nen yidnak wene nak kologola karug-e, at wururak meya nde agaij-o.
انتخاب شده:
LUKAS 19: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
