LUKAS 20
20
Yesus yak togolar-e: ”Kar-e no amawi bem-nen kwarusu-o?” luk yiga wene
20:1-8
(Mt 21:23-27; Mk 11:27-33)
1Misik tarem-e Yesus na Mbal Pem Nagawan ama-nen ap mul ondosolat, aid wene yak ondosolat kwat tenak worasoma-ge, tepan omborak nagawan min imiri mbarak pidnak wene enaru nap min Yawuri nap ennggendumu-nen enne kulugwi nap min-e at eram lobok luk, 2at yak togolar-e: ”Kar-e ta-nen yidnak pem yu mende kwaril nusu-o? Ta-nen ’Iri kwari-o’ yak keramu-nen kwarusu-o? Yak nindi-o” luk yiga-o.
3Yogolikma-ge, Yesus-nen it enne erep nggarosolar-e: ”Iri yigep me-ge, an-e wene misik mbi kin wok kenpeyeg-o. 4Yoanes ap yi marosolat woragaid iri-ge, Mbal Pem Nagawan-nen yidnak pem kwarid, lak? Are, ki nap-nen yidnak pem nde kwarij-a? Kit-nen yak nerer-o” luk yij-o.
5Yosoloma-ge, it na yak kerak mbogolar-e: ”Nit-nen nde: ’Mbal Pem Nagawan-nen yidnak pem-net kwarij-o’ luk yulndig-e, at-nen-e: ’Iri ala-ge, kir-e noluk-nen Yoanes ebem kinndi angin tubu yigit lak yigeb-o?’ luk yuwa-o. 6Nde, nit-nen nde: ’Ki nap-nen yidnak pem kwarij-o’ luk yulndig-e, ap pidsa-nen-e Yoanes iri-ge Mbal Pem Nagawan ene lomboksa yoso nab-er-o luk eberagwi me, nit kerep pem nunduwa-o” luk yiga-o. 7Iri ala karuk, it-nen yogolar-e: ”Iri-ge ta-nen yidnak pem kwarij-o? Nir-e kabag-o” luk yiga-o.
8Yogolikma-ge, Yesus-nen it yak ondosolar-e: ”Iri ala-ge, an-nen na ta-nen yidnak pem kwarusu-o luk yak kindimin pug-o” luk yij-o.
Anggut yabu parugu woragwi nap-nen kwaridnak pem nden karuk yidnak wene
20:9-18
(Mt 21:33-46; Mk 12:1-12)
9Iri luk, Yesus-nen nden karuk wene yu-ge ap iri na yak ondosolar-e: ”Ap misik-nen yabu mbi waga anggut uwi yaguruk, yabu na-ge ap erep-nen parugu woraidnak pem engen mbi wanuwakluk yak undurug-e, at iri-ge o nin sa mberarik kwarat woragaij-o. 10Woralar-e, engen ogore yoso tarem ndak ndak wok yosola-ge, parugu worali nap-nen yabu winde iri na amanggim anggut engen erep wok tuwakluk, at ndegel oboso nap mbi it endam wirik pij-et nde, parugu worali nap iri-nen ndegel oboso nap na nggambu wosa we irit wirik ibiga-o. 11Iri ala karuk, yabu winde iri-nen ndegel oboso nap misik tuguruk wirik ibij-et nde, parugu worali nap-nen at iri na nggambu wutluk, inggiri wosa keya buruk, we irit wirik ibiga-o. 12Iri lug-e, tuguruk kenan pem tak posolar-e, ndegel oboso nap mbi wirik ibij-et nde, parugu worali nap-nen mbut ndam ndam wosa leget ombol nggwe mbo biga-o. 13Iri ala-ge, yabu winde-nen yosolar-e: ’E! Yawo-ge no kwarimin-o? Lag-o. An nambik nambara nindi kundik irit wirik pumu-ge, at iri perak nde kek tak ubuwa-o’ luk yij-o. 14Alat nde, parugu worali nap-nen ambara na yik karuk, it-nen yak kerak mbogolar-e: ’Eid eyabu winde ma nab-e yur-o. Nde, yabu yu winde yuwok-nen at yu-ge wuruwog-o!’ luk yiga-o. 15Yurug-e, ambara iri na-ge leget ombol nggwe lesa mbo uburuk, wiriga-o” luk yij-o. Iri yak unduruk, Yesus-nen yosolar-e: ”Iri ala-ge, yabu winde na lobok yosolar-e, parugu worali nap na-ge no kwat unpuwa kali-o? 16Yabu winde iri lobok yuwarig-e, ap ereba na unduruk, yabu na nin nap-nen parugu wolmakluk wok unduwa-o” luk yij-o.
Iri yosoloma, kuluruk yigarig-e, it-nen yogolar-e: ”Ije! Iri kwarurag-e meya-o!” luk yiga-o.
17Yogolikma-ge, Yesus na it lombot onposolat-nen yak ondosolar-e: ”Iri ala-ge, Mbal Pem Nagawan engga bem-nen yosolar-e:
’O wurugwi nap-nen mbo bidnak kerep iri-ge
o unggut paro pidnak irit kwat yij-o’
luk yid iri-ge ebe-ge ngge yosolat-nen yij-o? 18Nde, kerep yu ebem wosa mbuwa nab-e ndamara labuk ma-o. Nde, kerep yu-nen yumnduwa nab-e yigisa mabe rak puwa-o” luk yij-o.
Nagawan Kaisat amanggim tol purak wene
20:19-26
(Mt 22:15-22; Mk 12:13-17)
19Wene iri yid tarem ereya na-net, ”Nden karuk wene yu-ge nit-et yak nindij-o” luk it imiri mbarak pidnak wene enaru nap min tepan omborak nagawan min-nen Yesus tenaguwokluk yiga-t nde, ap kwarat iri enaye-nen larok yiga-o. 20Iri ala-ge, at tenagurak tarem ndak makluk, enlengen waruk tak piga-o. Iri kwarogolar-e, Yesus-nen wene mbi mberak posola, iri na bem-nen at tenaga ap enpem wene mbaroso Gubernor na inggem puwokluk, imiri mbarak pidnak wene enaru nap min tepan omborak nagawan min-nen wirik onpogolar-e, enlengen enlengen yugwi nab-et nde, mot mot kwaroso nap nggal kwasa at kin wok ubuwakluk onggo wok unduruk wirik inpiga-o. 21Nde, it enlengen enlengen yuwakluk onggo wok indidnak nap na-nen Yesus yak togolar-e: ”Mul Ondoso Nap wa-e. Kat-nen yoso wene min kat-nen mul nondoso wene min mot mot nak yoso-o luk nir-e nenaru-o. Nde, kar-e ap entare mbenaroso buk me, kat-nen-e ki nap-nen kwarurak Mbal Pem Nagawan indi-n peraidnak iri-ge kar-e mondok nam-et nak mul nondoso-o. 22Nde, nit-nen idnak imiri mbarak pidnak wene bem-e nir-e Nagawan Kaisat amanggim tol purag-e op, lak meya-a? Yak nindi-o” luk yak tiga-o.
23Yak togolikma-ge, Yesus na-ge it-nen at are pogolat-nen yili na yenggerak karug-e, at-nen it yak ondosolar-e: 24”Kerep tol mbi an kayek-nen nuk kil lobok yer-o. Tol yu bem-e ta erare min ta unu min mbarak kali-o?” luk yij-o. Yosoloma-ge, it-nen yogolar-e: ”Kaisar-o” luk yiga-o.
25Yogolikma-ge, Yesus-nen it yak ondosolar-e: ”Iri ala-ge, Nagawan Kaisat arengge ala-ge, ar-et wok ter-o. Nde, Mbal Pem Nagawan arengge ala-ge, Mbal Pem Nagawan-et wok ter-o” luk yak indij-o.
26Ap kwarat ereba na inmbiri bem at are purak wene mbi mberak pigit lak ala-ge, at-nen mberak pidnak wene bem wi luk, puk nak yiga-o.
”Wat yidnak nab-e ngge rak puruk unluk momtag-o?” luk kin wok ibiga wene
20:27-40
(Mt 22:23-33; Mk 12:18-27)
27”Wat yidnak nab-e unluk yugwi bug-o” luk yugwi nap, Saruki nap ereb-e Yesus eram lobok yogolat-nen 28at kin wok obogolar-e: ”Mul Ondoso Nap wa-e: Musa-nen nit nenmanggim-e imiri mbarak pidnak wene mbarosolar-e: ’Ap misik nde la ondolma pigit lak wat yosola-ge, at owe ondolma purak pem kwetogwe na-ge owot-net wanurag-o’ luk mbarij-o. 29Misik tarem-e ap enpe tuju nderak irit woraiga-o. Woragolar-e, onowe manggu na kwe wanuruk, la ndakit lak wat yij-o. 30Wat yosola-ge, kwe togwe na owot imbirik mende na wanij-et nde, la ndakit lag-et wat yij-o. 31Nde, at imbirik mende-nen na irit tit it enpe tuju na pidsa-nen kwe na waniga-t nde, li ndakit lak irit pidsa wat yiga-o. 32Iri luk, abog-e kwe na wat yij-o. 33Iri bem-e ap unluk tak puwa tarem-e kwe iri-ge ap tuju-nen wanidnak me, kwe iri-ge ta ogwe nde ma-o?” luk kin wok ibiga-o.
34Yogolikma-ge, Yesus-nen it yak ondosolar-e: ”Ap yawo yeba woragolar-e, kwe wok kerak mbili-t nde, 35wat yidnag-et nde tuguruk unluk tak purak ndak nap na-ge Mbal Pem Nagawan-nen o nin lena wok indidnak sa iri me woragolar-e, kwe wok kerak mburag-e lag-o. 36It iri-ge aid nap nggal-et, mondok wat ma bug-o. It iri-ge wat yidnag-et nde, tuguruk unluk tak pidnak me, ir-e Mbal Pem Nagawan ilirak-nen yili-o. 37Nde, wat yidnak nap unluk tak purak wene iri-ge Musa-nen nam-et nak yij-o. Mbal Pem Nagawan engga bem-nen Musa na e sugwe kan nasola kagaid wene na bem-e, Musa-nen Nagawan Indo imin yosolar-e: ’Kar-e Abaram min Isak min Yakup min ineid Mbal Pem Nagawan-nen yusu-o’ luk yid nar-o. 38Iri yid iri-ge, Mbal Pem Nagawan-e wat yidnak nap Enmbal Pem Nagawan-nen yusu-ge lag-o. Are, unluk woragwi nap Enmbal Pem Nagawan-net yusu-o. Mbal Pem Nagawan-nen eneyasolar-e, ap pidsa-ge unluk nak eneyaso-o” luk yij-o.
39Yosoloma-ge, imiri mbarak pidnak wene enaru nap erep-nen at yak togolar-e: ”Mul Nondoso Nap wa-e. Wene onggo yigen iri-ge konak lombog-o!” luk yak tiga-o. 40Iri bem-e it-nen Yesus kin wok uburag-e kwiye yiga-o.
”Kerisut-e Ndaud ambara-nen yusu, lak?” yidnak wene
20:41-44
(Mt 22:41-46; Mk 12:35-37)
41Iri luk, Yesus-nen it yak ondosolar-e: ”Ap-nen: ’Kerisut iri-ge Ndaud ambara-nen yusu-o’ yili iri-ge noluk-nen yili-o? 42-43Nde, Ndawi Engga bem-nen Ndaud at-nen yosolar-e:
’Nagawan Indo-nen an-nen idnak Nagawan Indo yak tosolar-e: An ninggi kigit ambigit nggwe yu-t koreyak worasoma, kat kuwim nab-e an-nen kat kuwok unggutmu teberak inpimin-o luk yak tid na-t nde-o’.
44Iri ala-ge, Ndaud na-nen Kerisut imin-e: ’Kar-e an-nen idnak Nagawan Indo-nen yusu-o’ luk yid ala-ge, Kerisut iri na-ge ngge rak puruk-nen Ndaud ambara-o luk yurag-o?” luk yij-o.
Yesus-nen imiri mbarak pidnak wene enaru nap enabiyem-o luk kwil kwalsa wolmakluk nggomo indidnak wene
20:45-47
(Mt 23:1-36; Mk 12:38-40)
45Ap pidsa-ge, at ene kolak worakmu-ge, Yesus-nen at owosirak yak ondosolar-e: 46”Imiri mbarak pidnak wene enaru nap enabiyem-o luk kwil kwalsa wolmer-o. Ir-e unsum mot na yutluk waring kudtak indingen yogolat, onggo wanugwi sa-nen kek tak unpurak indingen yogolat, tepan yugwi ma-nen na irit, sakwi sa-nen na irit, ap kek tak-nen kore yugwi sa nak kore yurak indingen yugwi-o. 47It iri-ge kweyap togwe na onmbol pem lagolat, it unuwi mengga wanugwi-o. Nde, it-nen meya kwarugwi na lumurogolar-e, ir-e tepan mot pare lit karuk mburugwi-o. Iri kwatli iri-ge it enpem-e wene angin worag-et mbaruwa-o” luk yij-o.
انتخاب شده:
LUKAS 20: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
