LUKAS 16
16
Tol ndok woroso nap indi nggat nggat worak nap ebem ndek karuk yidnak wene
16:1-13
1Yesus-nen at owosirak yak ondosolar-e: ”Isilobulo kwarat winde mbi-nen-e at orol ndok woroso nap mbi woragaij-o. Worala-ge, ap mbi-nen isilobulo winde na yak tosolar-e: ’Kat korol ndok woroso nap na-nen-e kat korol-e we irit ndibi ndi rak pusu-o’ luk yak tij-o. 2Yak tosoloma-ge, tol ndok woroso nap iri na wene mbo uburuk, winde iri-nen yak tosolar-e: ’Kar-e ngge kwarosola-nen kobok kuligi-o? An nisilobulo wanosolat woraigen iri-ge engga bem ndegera mbarosoluk, wok niril lobok yi-o. Nde, kat-nen an norol tena wolmomtag-e lag-o’ luk yak tidj-o. 3Iri yak tosola-ge, tol ndok woroso nap na indi-nen yebet kasolar-e: ’An neid-nen we nap tak nubusu yu-ge nggweyak yalurak na namawi lak, nggi yurak na ninggiri kwarat me, ngge nde kwarimin-o? 4Lag-o. An kwarurak mende-ge yawo-n yebet kagi-o! Iri kwarimindik me, an we nap tak nobosola-ge, an-nen yongga indimin pem it-nen enma rak nubuwa-o’ luk peragaij-o. 5Iri perasoluk woralar-e, tol ndok woroso nap na-nen at eid arengge wanidnak nap oboksa wene mbo unpuruk yarik, nandug-et lobok yid nap na yak tosolar-e: ’Kar-e an neid arengge-ge namat nunggwirik wanigen-o?’ luk 6yosoloma-ge, ap iri-nen yosolar-e: ’Wam amburu kenanggo yimbe seratus (100) wanigi-o’ luk yij-o. Yosoloma-ge,tol ndok woroso nap-nen at yak tosolar-e: ’Kat namat wanigen engga mbarak yu wanosoluk, ndag-et nak kore luk-nen: ”Yimbe-ge lima pulu (50) wanigi-o” luk mbari-o luk yij-o. 7Yurug-e, at-nen ap misik yak tosolar-e: ’Nde, kat namat wanigen-e nunggwirig-o?’ luk kin wok obosoloma-ge, ap iri-nen yosolar-e: ’Nggandum’ mbato sum seribu (1,000) wanigi-o’ luk yij-o. Yosoloma-ge, tol ndok woroso nap na-nen ap iri na yak tosolar-e: ’Kat namat wanigen engga mbarak yu wanosolug-e, ”Sum delapan ratus (800) nak wanigi-o” luk mbari-o’ luk yak tij-o.
8Iri kwarij-o yogola kolosolug-e, eid na-nen tol ndok woroso nap mot mot kwaroso buk iri-nen indi nggat nggat pidnak karuk, erembel wanij-o. Nde, nggweyak ma nap inndi nggat nggar-e ijar-o. Nde, yaya bem worali nap-nen inndi nggat nggar-e lak nggal-nen yusu-o” luk yij-o.
9Yurug-e Yesus-nen yosolar-e: ”An yak kendeyeg-o. Nggweyak ma mende yu-nen-e kanggamirak momtak nap indi yangoner-o. Iri ala-ge, nggweyak ma mende na lak ma-t nde, unlug-et pem wolmomtak sa-nen wok kunpuwa-o. 10Marik kwarurak pem-net nde, mot mot kwaroso nab-e nggulok kwarurak pem-nen na mot mor-et kwaruwa-o. Nde, marik kwarurak pem mot mot kwaroso buk nab-e nggulok kwarurak pem na mot mot kwaruwa bug-o. 11Nde, kat-nen-e nggweyak ma mende yu wanosolar-e, mot mot kwarigit lak ala-ge, piri yoso buk mende-ge ta-nen nde kinggem puwa-o? 12Nde, ap enarengge kat-nen mot mor-et kwarigit lak ala-ge, kat karengge-ge ta-nen nde wok kuruwa-o?
13Ndegel oboso nap-nen eid tag-e mberen tak ndegel unpurag-e meya-o. Iri kwarosolar-e, eid misik iri abuwa kasolat, misik isili kujwa-o. Nde, eid misik-nen yidnak yidnak kwarosolat misik-nen yidnag-e te rak puwa-o. Iri nggal-et kar-e Mbal Pem Nagawan min nggweyak ma mende min mberensa-t ndugururag-e meya-o” luk yij-o.
Yesus-nen mul indidnak wene
16:14-18
(Mt 11:12-13, 5:31-32; Mk 10:11-12)
14Iri yidnak wene na kulurug-e, it Parisi nab-e uwang ukwe ukwe yugwi me, Yesus na nda wat ibiga-o. 15Alat nde, Yesus-nen it yak ondosolar-e: ”Ap-nen kek tak yik kagwi iri-ge Mbal Pem Nagawan-nen teberak yik kaso me, ap enlengen pem-e nir-e lud tak nak kwarugwi-o luk yili-t nde, kit kinndi arem-e Mbal Pem Nagawan aru-o.
16Nde, ap yi maroso nap Yoanes na wok yigit lak worala-net Musa-nen imiri mbarak pidnak wene min Mbal Pem Nagawan ene lomboksa yugwi nap-nen mbaridnak wene min-e kwat tenak woraiga-o. Nde, Yoanes wok yid kur-nen-e Mbal Pem Nagawan-nen tenagaidnak wi wene aid wene na yak ondogola-ge, Mbal Pem Nagawan-nen tenagaidnak wi iri na me nggogolar-e, pela mbo mbo nggwili-o. 17Nde, mbal min nggweyak min lak momtag-e te-t nde, imiri mbarak pidnak wene-ge marig-et ter-o luk lak tak puwa bug-o.
18Ta-nen nde ogwe keya buruk, kwe misik wanosola-ge, mbabi-t yusu-o. Nde, nin nap-nen kwe keya bidnak iri wanosola-ge, iri na mbabi-t yusu-o” luk yij-o.
Isilobulo worak nap min Lasarus min-nen kwaridnak wene
16:19-31
19Yuruk, Yesus-nen yosolar-e: ”Isilobulo worak nap mbi woragaij-o. Woralar-e, usum-e konak nak yorosolat, nunggwi mende undu konak nak pempa nok tenak woragaij-o. 20Nde, at uwi tumende bem-e isilobulo lak nap unu-ge Lasarus, mama worak nap na mbinggirik woragaij-o.
21Iri me woralar-e, ’Isilobulo worak nap-nen at naso sa-nen mburu abapno mbidnak pendaga namin-o’ luk peragaij-o. Nde, yengge lobok yosolar-e, at mama yeba na aben nasolat woragaij-o.
22Misik tarem-e isilobulo lak nap na wat yosola-ge, aid nap-nen at wok uburuk Abaram eralu piga-o. Nde, imbirig-e isilobulo worak nap na wat yamu, yapma piga-o. 23Wat yidnak nap ndok wurugwi sa woralar-e, yane worosolat-nen-e at erengen lik kagaidnggal-e. Abaram na erepma worala, Lasarus na-ge Abaram eralu worala lik eneyagaij-o. 24Eneyarug-e, isilobulo worak nap na-nen ene ngguloksa yosolar-e: ’Neid Abaram wa-e. An-e kanduk arem yane wat tenak worasu yu-ge, kar-e an nabuwa kasolar-e, Lasarus iri yak ti-o. Inggi yi ma buruk, an nama imin tak puwak-nen yak ti-o’ luk yij-o.
25Alat nde, Abaram-nen yosolar-e: ’Nambara wa-e. Kindi yebet ki-o. Kar-e kuruk woralar-e, konak mende nak wanosolat woraigen-o. Nde, Lasarus-e meya mende nak wanosolat woragaij-et nde, yawo-ge ar-e yu me alen pem worasu-o. Nde, kar-e andi bandi kasu-o. 26Nde, wene misig-e yu-o. Ap yu me-nen iri me mbogolat, ap iri me-nen yu me luwagolat ma naru, kat min nit min nennggendumu lembet nggok nggaserak worasu-o’ luk yij-o. 27Yosoloma-ge, isilobulo worak nap na-nen yosolar-e: ’Iri ala-ge, Neid wa-o. Lasarus iri-ge an neid ama wirik pi-o. 28Iri me-ge an nowosirag-e lima worali me, ir-e andi bandi kagwi sa yu me ngguma naru, kirimbi yak unduwak-nen Lasarus irige wirik pi-o’ luk yij-o.
29Yosoloma-ge, Abaram-nen yosolar-e: ’Kat kowosirag-e Musa min Mbal Pem Nagawan ene lomboksa yugwi nap min-nen mbaridnak engga-ge it tena worali me, iri-nen yidnak yidnak kwarogolat wolmag-o’ luk yij-o. 30Yosoloma-ge, isilobulo worak nap na-n yosolar-e: ’Iri kwarurak iri nag-e ndag-e lag-o. Neid Abaram wa-e. Are, wat yidnak nab-et nde, uruk luk, it endam wok yosola-n perak nde it meya yidnak keya buruk kondok yuwa-o’ luk yij-o. 31Alat nde, Abaram-nen yosolar-e: ’It iri-nen-e Musa-nen yidnak wene min Mbal Pem Nagawan ene lomboksa yugwi nap-nen yidnak wene min te rak pogola-ge, wat yidnak nap ennggenggerak-nen uruk luk mbiridnak nap-nen yidnak wene na kuluwa bug-er-o’ luk yij-o.”
انتخاب شده:
LUKAS 16: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
