LUKAS 15
15
Lomba wam pul yidnak pem nden karuk yidnak wene
15:1-7
(Mt 18:12-14)
1Misik tarem-e pemerinta enmanggim tol ndok wurugwi nap min meya yugwi nap min kwarat Yesus-nen yidnak wene kuluwokluk ndok wiri-ga-o. 2Iri ala-ge, Parisi nap min imiri mbarak pidnak wene enaru nap min-nen at obok pogolar-e: ”At yu-ge meya yugwi nap imin tak unpuruk, inmin mburu nasu yu nde ker-o” luk yiga-o. 3Iri yogola karuk, Yesus-nen nden karuk wene bem it yak ondosolar-e:
4”Kit kennggendumu-nen ap misik olomba wam-e seratus (100) worasoma, misiget nde pul yuwama-ge, ngge kwaruwa kaigeb-o? Lag-o. Owam erep sembilan pulu sembilan (99) iri na tusuwangge worak ma keya buruk, pul yidnak na ogore yuwa yuwa kujwa-o. 5Kasoluk, alen kwarat luk, olomba na endak pem kud turuk, 6ama waruk lobok yosolat-nen at anggamirak min at eralu woragwi nap min wene mbo unpuruk-nen yak ondosolar-e: ’Nolomba wam pul yidnak wanigirik me, kijik kijak wuruwog-o!’ luk yak unduwa-o. 7Nde, an yak kendeyeg-o. Iri nggal, meya yidnak nap misiget kondok yidnak pem-e aid arem-nen enalen kwarat kujwa-o. Nde, lud tak nak kwarugwi nap sembilan pulu sembilan (99) iri-ge ir-e meya yugwi buk me, kondok yuwa buk nap it enpem-e enalen te nggal-et kujwa-o” luk yij-o.
Kerep tol pul yidnak pem nden karuk yidnak wene
15:8-10
8Yuruk, Yesus-nen yosolar-e: ”Nde, kwe misig-e egerep tol sepulu worasoma, misik nde pul yuwama-ge, ngge nde kwaruwa-o? Lag-o. At-nen tal paguruk, ama o liri korosolat, kwara-t kore luk-nen orol iri kujwa irir-o. 9Tol na kasoluk, kwe na anggamirak min at eralu woraso nap min wene mbo unpuruk-nen yak ondosolar-e: ’Negerep tol pul yidnak na wanigirik me, kijik kijak wuruwog-o!’ luk yak unduwa-o. 10An yak kendeyeg-o. Iri nggal, meya yoso nap misik at meya yidnak keya buruk, kondok yosola-ge, Mbal Pem Nagawan-nen idnak aid nap-e kijik kijak kwarat witli-o” luk yij-o.
Ap misik ambara pul yidnak pem nden karuk yidnak wene
15:11-32
11Iri luk, Yesus-nen yosolar-e: ”Ap misik ambara rak mberen woraiga-o. 12Owot iri-nen at eid yak tosolar-e: ’Neid wa-e. Kat karengge iri-ge menggesa an wanurag-e yawo-t wok niri-o’ luk yak tosoloma-ge, eid na-nen-e at isilobulo menggesa ambara rak mberen na tembet indij-o. 13Tembet endamu, siyak worasolar-e, owot iri-nen-e at arengge pidsa onggo wanosoluk mbirij-o. O wandakma mberarig-e, we kasa ereba an indi-n pidnak pem at arengge ereba na piril peral kagaij-o. 14Iri kwarosolar-e, at arengge pidsa lak tak parik pem-e o iri na me nogoro nggok mbud yosolar-e, la iri na arengge abu lak woragaij-o. 15Iri ala-ge, o iri na me nap misik ndegel ibij-o. Ndegel obosolat worasoma-ge, ap iri na owam nduguruwakluk, owam worasu sa wirik ibij-o. 16Nde, la iri na-ge nere-nen wam mak tugwi mende ereba na norak perasola-t nde, ap misiget ter-o luk-nen na wok tigit lag-o. 17Iri kwarosolat woralar-e, at indi yebet kasolar-e: ’An neid ndegel ubugwi nap oboksa-ge nunggwi mende kwarat inmbitsa nili-t nde, an-e yu me-nen nere-nen wat yekluk yusu-o. 18An-e neid eram mbirimindik-nen at yak tosolar-e: Neid wa-e. Mbal Pem Nagawan min kat min kinmbiri bem-e meya yosolat woragi-o. 19Iri bem-e, an-e kat kambara momtag-e meya-o. An neberasolar-e, kat ndegel koboso nap nggal-et nuburudtag-o” luk yak timin-o’ luk yebet kagaij-o. 20Iri yebet karuk, la na at eid eram mbirij-o.
Mborosola-ge, eid na-nen erepma ereba-nen yik karug-e, abuwa kwarat karuk, puburak mborosolar-e, ambara na urusu ngonok turuk, wa yak tij-o. 21Iri kwarosola, ambara na-nen yosolar-e: ’Neid wa-e. An-e Mbal Pem Nagawan imin na, kat kimin na meya kwarosolat woragi-o. Iri bem-e an-e kat kambara momtag-e meya-o’ luk yij-o. 22Alat nde, eid na-nen at ndegel ubugwi nap yak ondosolar-e: ’Ndag-et nak! Sum konak lombok waruk lobok yuk, yirik uburuk, manggo inggi bem puruk, ijok sum yirik per-o. 23Iri rak purug-e, at imin totno nenalen pem nok-nen sapi wam usul na wil mbutluk, werer-o. 24An nambara yu-ge wat yidnag-et nde, uruk luk lobok yij-o. Pul agaij-et nde, nam yij-o’ luk yosoloma-ge, it na kijik kijak wiriga-o.
25Nde, ambara manggu iri na-ge yapmu-nen o ma panggosa wok yosolat-nen kolel kagaidnggal-e, ndawi nggu kulij-o. 26Kulurug-e, owe na-nen ndegel oboso nap misik wene mbo buruk-nen kin wok obosolar-e: ’Iri-ge ngge kwarogolat-nen yili-o?’ luk yij-o. 27Yosoloma-ge, ndegel oboso nap-nen yosolar-e: ’Kat kowot na urug-et lobok yidnak pem keid-nen sapi wam usul na wutluk, igijak wurusu-o’ luk yij-o.
28Yosoloma-ge, owe na isilepma kwarat luk, o ma nggurak larok yosola-ge, eid na warik, ’Ma nggwi-o’ luk emengen mbarij-o. 29Alat nde, owe na-nen eid na ene erep nggarosolar-e: ’Yu nde ki-o. An-e olengen lasolat mbosolat kat kwara ndegel kobosolat, kat-nen yidnak yidnak nak kwarosolat woragi-t nde, kar-e no wok nirigen-o? An nanggamirak inmin kijak wuruwaklug-e, kambing wam misiget ter-o luk wok niriget lak yigen-o. 30Alat nde, kat kambara iri-ge kisilobulo wok tigen na-ge kasa kasa ye unpugwi kwami wok ondosolar-e silobulo pidsa lak tak puruk, ma lobok yij-et nde, sapi wam usul iri wat tigen-o’ luk yij-o. 31Yosoloma-ge, eid-nen at yak tosolar-e: ’Nambara-o. Kar-e an nimin pempa woraso me, an narengge iri oboksa kat karengge nak-nen yusu-o. 32Alat nde, kat kowot iri-ge wat yidnag-et nde, uruk luk, pul yidnag-et nde, wok yid pem-e nit-nen ijok kerengge sakolat, kijik kijak worogolat yili yu-ge ob-et yili-o’ luk yak tij-o.”
انتخاب شده:
LUKAS 15: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
