LUKAS 14
14
Yesus-nen ap misik ki rak pid wene
14:1-6
1We woragwi tarem misik pem Yesus na mberarik, Parisi nap ene kulugwi nap mbi ama-nen nunggwi mende nasola-ge, ap iri me-nen-e kwara abut mbarogolat woraiga-o. 2Worakmu-ge ijok min inggi min limbiridnak na misig-e Yesus eram lobok yij-o. 3Iri ala-ge, Yesus-nen imiri mbarak pidnak wene mul undugwi nap min Parisi nap min kin wok onposolar-e: ”Nit-nen idnak imiri mbarak pidnak wene bem-e we woragwi tarem-nen ap ki rak unpurag-e wosama, lak? Are, ob-a?” luk kin wok inpij-o.
4Alat nde, it imiri mbarak pidnak wene mul undugwi nap min Parisi nap min-e wene erep nggarigit lak, larok nak yiga-o. Alama-ge, Yesus-nen ap iri na wene mbo buruk, ki rak puruk, wirik ibij-o. 5Iri luk, Yesus-nen it yak ondosolar-e: ”Kit kennggendumu-nen kit misik we woragwi tarem-nen kenmbara ala na, konowam ala na mbunmu yoboksa mbuwama-ge, we woragwi tarem-o luk ndag-et nak lit yaga inpil luwagit lak yurak mbi worali-a?” luk yij-et nde,
6it-nen-e wene iri onggo yurag-e puk nak yiga-o.
”Kinndi teberak woragolat, kinndi op wolmer-o” yidnak wene
14:7-14
7Nunggwi mende nujwakluk yonggo inpidnak nap erep-nen-e kore yurak konak na-t yonogola karuk, Yesus-nen nden karuk wene yu it oboksa yak ondosolar-e: 8”Kwe wanogolat nunggwi mende sakolat-nen kit yonggo konpogola-ge, ap kek tak-nen kore yugwi sa kore yil mbururak pug-o. Nde, kit kore yugupndik worakmu-ge, kit nggal-e lak, are, ap kek tak misik yonggo bidnak me, 9kit yonggo kinpid nap iri-nen kit yak kondosolar-e: ’Nap tag-o. Yu-ge ap iri kore yuwakluk amanggim pukmu-o’ yosola-ge, kinnggiri nggo nggosa we ma kore yugub-o. 10Iri bem-e kit yonggo kunpuwama-ge, kir-e we nap-nen kore yugwi sa ereba-t kore yer-o. Kore yugupndik worakmu, yonggo kinpidnak nap na lobok yosolat-nen yak kondosolar-e: ’Nenggamirag-o. Konak ma yu me-t kore yer-o’ luk yak kondosola-ge, iri nggal yuwa iri bem-nen-e yonggo inpidnak nap pidsa inmbiri bem kek tak kunpuwa-o. 11Nde, ap-nen at ondomok kek yuwa nab-e teberak ubuwa-o. Nde, at ondomok indi tebe yuwa nab-e kek tak ubuwa-o” luk yij-o.
12Yurug-e, Yesus-nen at yonggo ibid nap na yak tosolar-e: ”Kar-e lengge ala na, kubu ala na norak pem ap enmanggim nunggwi mende sagosolar-e, kat kenggamirak min kowe kowosi min kimi kambara min keralu woragwi insilobulo worak nap min yonggo unpurak pug-o. Iri kwarosola-ge, it-nen na sakolar-e, onggo yonggo kubuwa nar-o. 13Iri bem-e, kat-nen nunggwi mende saburug-e, insilobulo lak nap min unuwok kago worak min kambung puk tak woragwi min enlengen ngguru min yonggo unpugun ala-ge, 14it-nen onggo sak kururag-e lak me, imbiringgat tak kubuwa-o. Lud tak woragwi nap tuguruk unluk tak puwa tarem-nen-e Mbal Pem Nagawan-nen onggo wok kuruwa-o” luk yij-o.
Nunggwi mende nggulok sagaidnak pem nden karuk yid wene
14:15-24
(Mt 22:1-10)
15Nunggwi mende nokluk at imin koreyak woraidnak ap misik-nen wene iri kuluruk, Yesus yak tosolar-e: ”Mbal Pem Nagawan-nen tenagaidnak wi-nen nunggwi mende nujwa nab-e enalen kujwag-o” luk yij-o.
16Yosoloma-ge, Yesus-nen at yak tosolar-e: ”Misik tarem-e ap mbi-nen nunggwi mende nggulok sagosolar-e, ap kwarat yonggo inpij-o. 17Iri lug-e, nunggwi mende abu saga keya burug-e, ap iri-nen at ndegel oboso nap mbi at-nen yonggo inpidnak nap endam wirik posolat-nen yosolar-e: ’Abu lid lud tak pidnak worasu-o. Nil lobok yer-o luk yak indil mbiri-o’ luk yij-o. 18Iri yij-et nde, it pidsa-nen-e: ’An-nen wanurak na kwarar-o. Lobok yimin pug-o’ luk yil mbiriga-o. At misik-nen yosolar-e: ’Nab-o. An-e nggweyak mbi onggo pigirik me, nggweyak iri mbenaril mburusu-o’ luk yij-o. 19Nde, at misik-nen yosolar-e: ’Nab-o. An-e lembu wam sepulu onggo pigirik me, wal kil mburusu-o’ luk yij-o. 20Nde, at misik-nen yosolar-e: ’An-e kwe nggeret wanigirik me, an lobok yurag-e meya-o’ luk yij-o.
21Iri yogola karug-e, ndegel oboso nap na mberarig-e, iri na wene oboksa-ge at eid ndegera yak tij-o. Yak tosoloma-ge, at eid na isilepma kwarat luk, at ndegel oboso nap na yak tosolar-e: ’Kar-e ndag-et nak o silmu mburugundik, tula tula ereba waring kasolar-e, insilobulo lak nap min unuwok kago worak min enlengen ngguru min kambung puk tak woragwi min inmin luk lobok yi-o’ luk yak tij-o. 22Iri kwatluk lobok yosolar-e, ndegel oboso nap-nen eid na yak tosolar-e: ’Neid wa-e. Kat-nen yidnak yidnak kwarigi-t nde, o-ge terag-et worasu-o’ luk yij-o. 23Yosoloma-ge, eid na-nen ndegel oboso nap na yak tosolar-e: ’An nama yebet yuwaklug-e, kar-e tula nggok nggwe min marik nggwe min mborosolar-e, ap yorok porok wesu bem woragwi ereba kene lembesa langgara inpil lobok yi-o. 24Nde, wene yu yebet ker-o. Nunggwi mende saki yu-ge nandug-et yonggo inpigi nap misik mbi-nen nujwa bug-o!’ ” luk Yesus-nen yij-o.
At imbirik nogolat inndi weserak purak wene
14:25-33
(Mt 10:37-38)
25Ap mondok kwarat-nen Yesus imin waring kaiga-o. Iri ala, at na nden kaga yik eneyasolat-nen it yak ondosolar-e: 26”Ta-nen nde an neram lobok yosolar-e, at eid ija min ogwe la min owe owosi min at ondomok indi min isili rak pigit lak-nen-e an nimbirik noso nap momtag-e meya-o. 27At-nen idnak e lang pang tak pidnak iri pijanuruk, at nimbirik nuwa buk nab-e an nimbirik noso nap momtag-e meya-o. 28Nde, kit misik-nen-e o mot mbi wereyeg-o perasolug-e, awo wirigit lak ma-net kore luk, o yu na wururak mende onggo purak tol-e ndak worasu, lak? luk orol na wonarugwi-o. 29Nde, tol nde wonarigit lak-nen-e ap iri-nen-e o mabin puwa-t nde, o mot na wiril ludtak mende lak me, o na wirigit lak keya buwama-ge, iri kwarosola kaidnak nap pidsa-nen-e at pesel ubuwa-o. 30Pesel obogolar-e: ’E! Ap yu-ge o tel nak kosa keya bid yu-ge ngge-o!’ luk yak tuwa-o. 31Ap nagawan misik at nap san winde-ge sepulu ribu worak iri na-nen ap nagawan misik at nap san winde-ge dua pulu ribu worak na imin wim mbareyekluk, kore luk. Ap iri imin-e ndak nde wim mbarimin, lak, ngge-o?” luk nandug-et indi wal kaso-o. 32Nde, indi mbenatluk nde wim purag-e meya ala-ge, wim nggwigit lak ma-net lambuk yurak wene mbaruwokluk wene wosa wim nap endam ap wirik puwa-o. 33”Iri ngglal-et kit kennggendumu-nen ap misiger-o luk tet kit kinsilobulo pidsa ’Nimbir-o’ luk keya bigit lak-nen-e an nimbirik noso nap kwat momtag-e meya-o” luk Yesus-nen yij-o.
Undu lak mayu wene
14:34-35
(Mt 5:13; Mk 9:50)
34Yuruk, Yesus-nen yosolar-e: ”Mayu iri-ge undu worag-et nde, mayu na undu lak ala-ge, nggesa undu worak tak purag-o? 35Mayu undu lak iri-ge yaidnak sa purak na meya, nggweyak amburu rak puwakluk purak na meya ala karuk, mbo nak pugwi-o. Ta-nen nde wene yu kulurak eneyanggo worak ala-ge, wene yu kuluwag-o” luk yij-o.
انتخاب شده:
LUKAS 14: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
