Pewaliana 9
9
Dandina Pueꞌ Ala pe hi Nohoꞌ
1Pueꞌ Ala mobarakati hi Nohoꞌ hante anaꞌ-anaꞌnahi, hei mohawaꞌ pe iohi Notiꞌi, “Memuleꞌmokei hei ibuhoꞌimokei duniaꞌ. 2Hingkiꞌ motehuꞌhi pe ingko hinangkana pinatuwuꞌ to i duniaꞌ, tinti to i raoha, hei to mengkaduiꞌ i womboꞌ duniaꞌ hei lekiꞌna bouꞌ i tahiꞌ, lekiꞌna tiꞌo Kupepaꞌaniki pe ingko hei ikuasaꞌi. 3Hinangkana to mengkaduiꞌ, to tuwuꞌ, wadi iꞌoka. Kupeweimo mampopihana tiꞌo pe ingko hibali huꞌa-huꞌa to momataꞌ. 4Bauꞌ to meraꞌa tene, inioꞌ iꞌokaꞌi alaꞌ tuwuꞌna uwaꞌ i raꞌana. 5I duo-duona toaꞌ hei pinatuwuꞌ to morokoꞌ manusiaꞌ hingkiꞌ Kuhuku mahi. 6Himo to mobobo raꞌa manusiaꞌ, hingkiꞌ nobobo woꞌo manusiaꞌ, alaꞌ Pueꞌ Ala mowali manusiaꞌ motuntuni lenteNa hadoduoNa. 7Hei ingko, memuleꞌmoko hei tetambai woriꞌ, hingkeꞌna muleꞌmu woriꞌ i duniaꞌ.” 8Notiꞌi Pueꞌ Ala pe hi Nohoꞌ hei pe anaꞌnahi, to moꞌawa-awa hante io, 9“Hinewoꞌena Aku mampoꞌuwaꞌa podandi hante ingko hei muleꞌmu, 10hante hinangkana pinatuwuꞌ to tuwuꞌ to moꞌawa-awa hante ingko, tinti-tinti, pinatuwuꞌ to manondoꞌ, hante pinatuwuꞌ-pinatuwuꞌ to moꞌilo i duniaꞌ to moꞌawa-awa hante ingko, hinangkana to mesuwu ka duanga tiꞌo, hinangkana pinatuwuꞌ i duniaꞌ. 11Hieꞌemo podandingKu hante ingko, alaꞌ mepongka hinewowoꞌena hawaꞌi uwaꞌ to tuwuꞌ to hingkiꞌ nolobuꞌi womo uwai, hante hamboaꞌi hingkiꞌ uwaꞌ uwai to hingkiꞌ molobuꞌi duniaꞌ.” 12Hei pohawaꞌna Pueꞌ Ala, “Hieꞌemo tandaꞌ podandiKu to Kupoꞌuwaꞌ hante ingko hei hinangkana pinatuwuꞌ to tuwuꞌ, to moꞌawa-awa hante ingko, wute nantolou-louna. 13Tantoroꞌue Kupoꞌuwaꞌ i kini, hingkeꞌna tiꞌo mewali tandaꞌ podandi ka Aku hante duniaꞌ. 14Ane Kupopehupaꞌ intu kini i womboꞌ duniaꞌ, tantoroꞌue hingkiꞌ mombaha i kini, 15Aku hingkiꞌ mamponindiꞌA podandingKu to uwaꞌmo ka Aku hante ingko hei hinangkana pinatuwuꞌ to tuwuꞌ, hinangkana to meꞌinohaꞌ, horiana lekiꞌna uwai hamboaꞌi mewali uwai to hingkiꞌ molobuꞌi hinangkana to tuwuꞌ. 16Ane tantoroꞌue tiꞌo uwaꞌ i kini, hingkiꞌ Kuꞌokiꞌ, horiana Kuponindi podandiangKu tota uwaꞌ koꞌukoana ka Aku, Pueꞌ Ala pe lekiꞌna to tuwuꞌ i duniaꞌ.” 17Mohawaꞌmo Pueꞌ Ala pe hi Nohoꞌ, “Hieꞌemola tanda podandiangKu to Kupoꞌuwaꞌ ka Aku pe ingkei to uwaꞌ i duniaꞌ.”
Hi Nohoꞌ hante anaꞌnahi
18Anaꞌ-anaꞌna hi Nohoꞌ to mesuwu ka duanga iomo hi Sem, hi Ham hante hi Apeꞌ. Hi Ham iomo umoꞌna toKanaꞌa. 19To totolu hieꞌela anaꞌ-anaꞌna hi Nohoꞌ, iomohi peꞌuluane lekiꞌna toaꞌ i duniaꞌ. 20Hi Nohoꞌ iomo topokineteꞌ, iomo to uluꞌ-uluꞌna mowali kineteꞌ angoroꞌ. 21Ikopaꞌinunalu angoroꞌ, malanumo hei io mewula mpahi i lali bambaruꞌna. 22Hi Ham, umoꞌna toKanaꞌa tiꞌo pangkiꞌ kohiliana umoꞌna, katoꞌo nololita pe roduo halalira i huwali. 23Uko tiꞌo hi Sem hante hi Apeꞌ morodiꞌ hampepaꞌ wida hei ropehodaki i hindaꞌra meroduo, katoꞌo matengkaꞌhi totundu ako motutuꞌihi kohiliana umoꞌra, hingkeꞌna hawaꞌhi pangkiꞌ kohiliana umoꞌra. 24Ikopohorinalu hi Nohoꞌ ka konolanuana, hei nohori hapo to nowali anaꞌ koꞌukoana pe io, 25io mantiꞌi,
“Buntoꞌmo muleꞌma iomo hi Kanaꞌa. Hinamo io mewali hawiꞌ to merima-rima pe halalinahi.”
26Notiꞌi womo, “Tepokodeꞌ Pueꞌ Ala, Pueꞌ Alana hi Sem. Hinamo hi Kanaꞌa mewali hawiꞌna.
27Hinamo Pueꞌ Ala mampokoroba peꞌohaꞌana hi Apeꞌ. Hei hinamo io meꞌohaꞌ i bambaruꞌ-bambaruꞌna hi Sem. Angkana hi Kanaꞌa hingkiꞌ mewali hawiꞌna.”
28Hi Nohoꞌ tuwuꞌ tene 350 ntoꞌa uko duniaꞌ nolobuꞌi uwai. 29Mewaliꞌ tinuwuꞌna hi Nohoꞌ 950 ntoꞌa, katoꞌo io mahi.
اکنون انتخاب شده:
Pewaliana 9: LAILJE
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2017 Indonesian Bible Society (Lembaga Alkitab Indonesia)