Akisy. 50
50
1Toapiya nai Yosepu loreet a papa keŋ kigwor a nen, ido tonu papa keŋ. 2Tolimok Yosepu ŋiketiyak keŋ ŋulu arae ŋimurok akiosakin nakuwan a papa keŋ ekitoe ŋolo nyitobosi akuwan. Aŋun, apotu ŋimurok kiosakis ekitoe nakuwan a Isirael; 3yaasi ikes ŋirwa ŋatomoniomwon itiyaete ŋun, anerae apaki ŋina etya ŋin iŋes itemokino iosere akuwan nyebos. Kigworo Ŋijipitian aŋuna keŋ ŋirwa ŋatomonikanikaarei.
4Ani edaun ŋirwa ŋulu egworotor ikes aŋuna a Yakob kisirwor Yosepu ŋituŋa ŋulu a ekal a Parao tema, “Ani tokona karae ayoŋ ŋolo ajok aneni kus, ekelipit iyes tolimokis Parao ŋakiro nu: 5Abu papa kaŋ ekesikoŋ ayoŋ; tema, ‘Aapuu ayoŋ atwanare. Tonukae ayoŋ nalyal ŋina abu ayoŋ obok nakwap a Kanaan.’ Aŋun, ekelipit ayoŋ iyoŋ ikimyek ayoŋ etipeiyo inaa, ikotere anuki papa kaŋ, ido nai oboŋu.” 6Toboŋok Parao tema, “Ape kitipeiyo, ido tonuk papa kon, ikwapei abunio iŋes ikisikoŋ iyoŋ, kitiya ŋun.”
7Aŋun, abu Yosepu kitipeiyo Kanaan akinuk papa keŋ. Kitipeiyosi iŋes kaapei ka ŋiketiyak a Parao, ŋikasikou ŋulu a apukan a Parao ka ŋikasikou ŋulu akwap a Ijipit. 8Toloto tari ŋituŋa ŋulu a ekal a Yosepu, ŋikaitotoi keŋ ka ŋituŋa a ekal a papa keŋ. Ŋidwe kec bon apotu kidoŋo Gosen ka ŋamesekin ta ŋaatuk. 9Ya iŋes ŋagaari ka ŋikametok kec. Alal asepic ŋin nooi. 10Ani edolunete ikes nalos ŋina ka Atad, ŋina eyai diyete Yorodan, kigworo a nen nooi iyaloloŋete; kigwor Yosepu papa keŋ a nen ŋirwa ŋikanikaarei. 11Ani iŋolikinete Ŋikanaani ŋulu eboiyete anakwap a ŋin epite ŋolo egworotor ikes analos a ŋina ka Atad, temasi, “Erae na akigworo ŋina apipilan aneni a Ŋijipitian.” Aŋun, apotu ikes tonyarata ekiro akibois a ŋin Abel-Misiraim. #50:11 Abel-Misiraim Iŋes atemar neni egworotor Ŋijipitian Eyai akibois ŋin diyete Yorodan. 12Apotu ŋidwe a Yakob ŋulusapa kitiyata neni keŋ ŋuna sek ecikakinit iŋes ikes akitiya. 13Yaasi iŋes nakwap a Kanaan, tonuka naturukan ŋina ayai lomanikor ŋolo a Makipela, lomanikor ŋolo ayai diyete Mamure. Emanikor ŋol, iŋes agyeluni Aburaam aneni a Epuron a ŋolo arae Etitait, erae neni enukio ŋikatwak. 14Kedau Yosepu akinuk papa keŋ, toboŋo Ijipit kaapei ka ŋikaitotoi keŋ ka ŋituŋa daadaŋ ŋulu alosito ka iŋes akinuk papa keŋ.
Kisyoni Yosepu ŋikaitotoi keŋ
15Ani eanyunete ŋikaitotoi a Yosepu atemar atwana papa kec, temasi, “Ani mono keriŋa Yosepu ikimanit iwon, ido kinyaŋa ŋuna aronok ŋuna aponi iwon kitiyae neni keŋ?” 16Aŋun, apotu ikes toloto neni a Yosepu temasi, “Abu papa kon tolimu ŋakiro nu eriŋa nyetwana ebe, 17‘Tolimokisi Yosepu nu: Ekemaimai ayoŋ iyoŋ, kisyoni ŋikaitotoi kon aŋuna aronok aŋuna apotu ikes kitiyata neni kon itogyelasi iyoŋ.’ Aŋun nai, tokona ikimaimai isua iyoŋ, kisyoni adyakaret a ŋiketiyak a Akuj a ŋina a papa kon.” Kikalou Yosepu irworikinete ikes neni keŋ. 18Kikalout ŋikaitotoi keŋ daŋ, toramakinos kwap kiŋaren Yosepu temasi, “Ikiya isua ne ikirae ŋipi kon.” 19Nai toboŋok Yosepu ikes tema, “Nyikuryaketa! Arae mono ayoŋ Akuj a? 20Tari daŋ ŋina icamitotor iyes akiar ayoŋ, abu Akuj tocamak ŋun, ikotere ŋuna ajokak etakanunete, toiunotor ŋituŋa ŋulu alalak, lopite ŋolo itiyaa Akuj tokona. 21Aŋun, nyikuryaketa; ayoŋ elope eketani iyes kaapei ka ŋidwe kus ŋulu cicik.” A ŋakiro a ŋun, abu Yosepu tolema akuryanu alotai a ŋikaitotoi keŋ, kirwor neni kec erimaana.
Ŋirwa a Yosepu ŋulu esidyok ka atwanare keŋ
22Aŋun, abu Yosepu kiboi alo Ijipit, iŋes kaapei ka ekal a papa keŋ; todolo ŋikaru keŋ amiat ka ŋitomon. 23Eŋolikinit Yosepu ŋidwe a ŋidwe a Epuraim; ŋidwe a Makir alokoku a Manase daŋ, abu Yosepu todak anakejen keŋ.
24Tema nai Yosepu neni a ŋikaitotoi keŋ, “Aapuu ayoŋ atwanare; nai kire ebuni Akuj neni kus akiŋarakin iyes, ikiyai iŋes iyes kitipeiyosi anakwap a na, toloto nakwap ŋina abu iŋes kikoŋ ainakin neni ka Aburaam, Isaka ka Yakob.” 25Aŋun, abu Yosepu kisikoŋ Ŋisirael tema, “Ani ebuni Akuj neni kus akiŋarakin iyes, yaasi ŋakoyo kaŋ a ne.” 26Totwana Yosepu erae ŋikaru keŋ amiat ka ŋitomon; kiosae akuwan keŋ a ekitoe a ŋolo nyitobosi, kiwuakinae tooma nasaduku anakwap a Ijipit.
انتخاب شده:
Akisy. 50: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.