Akisy. 49
49
Ŋakiro a Yakob ŋuna esidyok neni a ŋidwe keŋ a ŋulusapa
1Tonyarau nai Yakob ŋidwe keŋ ŋulusapa, tema neni kec, “Tocununos ne, ikotere akalimokini ayoŋ iyes ŋakiro ŋuna etakanunete neni kus alorwa a ŋulu eponito.
2Tocunakinos kiirasi, iyes ŋidwe a Yakob ŋulusapa;
kiirasi ŋakiro a Isirael a papa kus.
3Ruben, irae iyoŋ lokoku kaŋ ŋolo kiyae,
agogoŋu kaŋ ka arait ŋina esyaunan ŋina ka agogoŋu aŋina asorokanu kaŋ,
ŋolo iloit anapolou ka ŋolo iloit anagogoŋu.
4Iryenyaana iyoŋ ikwa akalele nai nyiruwor
iyoŋ ŋolo iloit anapolou,
anerae ibu iyoŋ tolot kiryamakinos ka aberu a papa kon ŋina nyiitit;
ibu nyiker alosit lokitaada a papa kon,
ido tolom a nen.
5Simeon ka Lepi,
irae iyes ŋikaitotoi;
eruworosi ŋiboro ŋulu ke ejie ŋulu ka adedeŋu kus.
6Elipa ayoŋ nyamin natukot kus,
elipa ayoŋ nyaruwor erukitos a Simeon ka Lepi,
anerae imunyasi iyes ŋikilyok a adedeŋu kus,
iŋwala iyes ŋimoŋin, anacamit kus,
iŋedeŋedeete ŋamori kec.
7Eruwor aŋoit kus ŋina icenen, anerae idedeŋ nooi;
Eruwor anyunyura kus daŋ ŋina icenen, anerae iryenyaaka nooi!
Akorakini ayoŋ ikes nakwap a ŋituŋa a Yakob,
eelakini ayoŋ ikes nakwap a ŋituŋa a Isirael.
8Yuda, ikipurete iyoŋ ŋikaitotoi kon;
ereuni apedor kon ŋimoe kon,
eryedikete ŋidwe a papa kon
ŋulusapa alokiŋaren kon.
9Ikwaanikin iyoŋ Yuda ka itaok a eŋatuny,
iboŋuni iyoŋ ikoku kaŋ, anibore a ŋini iari iyoŋ.
Ikwaanikin iyoŋ ka eŋatuny, iriyori iyoŋ akuwan toper;
ikwaanikin iyoŋ ka aŋatuny,
emam ŋini ikatakini akitoŋo iyoŋ.
10Mam ŋini elemari apukan aneni a Yuda,
ipukaete ŋiletok keŋ jik,
elemianakinete iŋes ŋituŋa a ŋakwapin ocur,
ka itopoloorete ŋituŋa a ŋakwapin iŋes.
11Eenikini iŋes isigirya keŋ lokitoe ŋolo a epiini alomanikor keŋ,
eenikini iŋes itaok a asigirya keŋ lokitoe a epiini ŋolo ajokan,
eruwor epiini ilosya iŋes ŋilowi keŋ
ka ipuri ekaaso keŋ a areŋis a epiini;
12Ereŋiata ŋakonyen keŋ aŋuna a epiini,
ekwaŋiata ŋikyal keŋ aŋuna a ŋakile.
13Iboiyori Sebulon nadipo ka anam,
eruwor akibois keŋ edoket a ŋameeli
edoli ekukoru a akwap keŋ Sidon.
14Ikokini iyoŋ Isakar esigirya ŋolo agogoŋon,
ŋolo euryani alokiŋa alokidiŋ ŋanokin a ŋamesekin;
15abu Isakar kiŋolik atemar kejokyar aryamun akibois ŋina kieŋunet,
ka ajok nooi akwap ŋin;
aŋun, abu Isakar tokukokin akijaun egogos,
toruwor epito ŋolo etiyae etic ŋolo areikinitae.
16Eruwor Dan ekatubon ŋakiro a ŋituŋa keŋ,
itiyae iŋes ŋun ikwapei ekabila epei a Ŋisirael.
17Ikokini Dan emun ŋolo eyai diyete erot,
akipom ŋina eyai lorot,
ŋina epedori akikony aŋole kidiama emolokonyit,
ikotere nai ekameton aŋole ŋin imasar ekaukau.
18Akuj, edarit ayoŋ aiuno aneni kon,
19Eremete ŋikaremok ŋiboro a Gad,
nai eremuni iŋes daŋ ebwaŋi ikes.
20Eruwor akimuj ŋina ka Aser ŋina etuman,
eruwor akimuj ka Aser ŋina ikwaan ka ŋina imujete ŋirwosi.
21Ikokini Naputali agete ŋina elacakina,
ŋina euri ŋitak ŋulu ajokan nooi.
22Ikokini Yosepu epiini ŋolo araan,
epiini ŋolo araan ŋolo eyai diyete elelya
epiini ŋolo elyarito ŋaten kidiama arwatata.
23Itijikinete iŋes ŋulu eyenete akigum a ŋikaleŋeleŋe;
toguma iŋes,
ido topero edapito iŋes.
24Nai erubakini akau a ŋikaleŋeleŋe keŋ iketakina,
isimukekinio ŋakan keŋ ajiore
anapedor a ŋolo Etiron a ŋolo a Yakob;
ka alokiro a Ekeyokon a ŋolo erae aupal a Ŋisirael,
25elipi Akuj a papa kon kitiya ŋun,
ikiterereŋ iŋes iyoŋ,
a ŋarereŋisyo a ŋuna aŋakipi a ŋuna alokidiama,
a ŋarereŋisyo a ŋuna aŋakipi a ŋuna eisete alokwap,
a ŋarereŋisyo a ŋuna a ŋiletok.
26Epolok nooi ŋarereŋisyo ŋuna ikigatakinit iyoŋ papa kon,
iloito tari ŋarereŋisyo ŋuna a ŋimoru a ŋulu a ŋikaru ka ŋikaru,
iloito tari alalau a ŋiboro a ŋimukura a ŋulu a ŋikaru ka ŋikaru;
elipi toryamu Yosepu ŋarereŋisyo ŋun,
aŋuna eraakar iŋes aponi tosetarae apolokin ŋikaitotoi keŋ.
27Ikokini Benjamin ededeŋ epeot,
taparacu enyami iŋes ibore ŋini eari,
ani eboŋ, totyakatyaka ibore ŋini eŋatunit.”
28Erae ŋul daadaŋ ŋikabilae ŋitomon ka ŋiarei ŋulu a Ŋisirael, ido ŋakiro ŋun abu Yakob tolimok ŋidwe keŋ apaki ŋina eterereŋio ikes. Inak ŋinituŋanan kec arereŋu ŋina etemokino aŋuna keŋ.
Atwanare ka anukio a Yakob
29Kicik nai Yakob ikes tema, “Aapuu ayoŋ akiwuakin neni eya ŋituŋa kaŋ. Tonukae ayoŋ neni eya atapapaa kaŋ, naturukan ŋina eyai lomanikor ŋolo a Epuron a ŋolo erae Eitait, 30naturukan ŋina alomanikor a ŋolo eyai Makipela, diyete Mamure, nakwap ŋina a Kanaan, tooma emanikor ŋolo agyeluni Aburaam aneni a Epuron a ŋolo arae Eitait, erae neni enukio ŋikatwak. 31Nen iŋes aponi tonukakinae Aburaam ka aberu keŋ Sara; nen iŋes aponi tonukakinae Isaka ka aberu keŋ Rebeka ka nen iŋes abu ayoŋ onukak Lea. 32Emanikor ŋolo eyai nen ka aturukan ŋina eyai nen, aponi togyelunae aneni a Ŋiitaiti.” 33Ani irikakini Yakob akicik ŋidwe keŋ ŋul ŋulusapa, kinapakin lokitaada, kiridak. Yaarae iŋes tonukae neni anukitae ŋituŋa keŋ.
انتخاب شده:
Akisy. 49: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.