Mbete Za̧h 20
20
1Nam a sayu ɓil nam ti̧hmbih-i guy buma, namu ɓa nam a titilu ɓil dimasi. Mari ké Makdala ti̧h ke gel pele si ka̧h tupal Zezu. Ké gelaw ke ko kasaw ké mbih nzak hoh kasaw-mbek hul ra na fál mbew. 2Bale ke kpa̧h ke ɗukna si ziŋ Simu Piyer ke nzuk-dih fal Zezu a ɓoru ké Zezu sa ni. Ke ɓah hi̧ niri ɓah : « Ku ten hul ŋgernzuk wahri ke ɓil hoh kasaw-mbek hul. Gel kú-u ɓaŋ hulu kan ri nah ko ya pi. »
3Piyer ke nzuk-dih fal Zezu a ɓoru ra ba, ku ur ti̧h si gel-mbek hul Zezu ra ɓay ko-u. 4Seɗe mbɔk woyri ku ur ɗukna. Nzuk-dih fal ye a ɓoru ra ɗuk mba Piyer mí si ka̧h gel hoh kasaw-mbek hul pol. 5Ke ɗiŋ tul peŋ gel ma ɓil hoh ra. Ke ko ɓa ladara-kuh hul Zezu ku̧ ri. Mí a ye ma, ke rih si ɓil hoh-aw ya. 6Simu Piyer ba, ka̧h ké fal mí kal si rih ɓil hoh kasaw-mbek hul. Ke ko ɓa ladara-kuh hul ra mí ku̧. 7Mindil ké pɔr tul hul gim kan ɓoɗ poŋ ladara ɓoɗ ba, fe-u lek na ke gelu. 8-9Wara mí nzuk-dih fal Zezu a ɓoru ké ɗuk ka̧h hoh kasaw-mbek hul pol ra gi rih ɓil hoh kasaw mí si ko pi dale, ɓay Ŋgerzah kú-u vbeh lewsa̧ guh law ye. Ɓayu ɓahri se, ɓa ra fe fe gaŋ kara Ŋgermbay ɓay ti̧h ke puh záh ke pa̧ymun a foyu ti̧h. Mí ke kan law tul ɓayu. 10Nzuk-dih fal yeri ké seɗe ra el si puh.
11Mari ba, ƴo nzak hoh kasaw-mbek hul ra ƴo vuh rew. Ke el ɗiŋ tul peŋ gel ma ɓil hoh kasaw ra bale, 12ke ko tem nzak pihna seɗe. Gar woyri pu rak rak. Ku kaɓ gel-kan hul. Nzuk a mbewu kaɓ fál gel-kan tul ye. Nzuk a ɓoru ba, kaɓ fál gel-kan tabɔk ye. 13Mí ku ɓah hi̧ Mari ɓahri : « Wu̧y, ɓay fe mú-u vuh rew le ? »
Ke ɓah hi̧ niri ɓahri : « Ɓay fe le ku mbi hul ŋgernzuk, mí-i tu gel kú-u ɓaŋ kan ri ya. »
14Ke ƴo ɓah kaŋ bale, ke sɔɓ nun ye ma fal. Ke el ko nzuk ƴo, mí ke tu ɓa Zezu ya. 15Zezu ɓah hi̧ ni ɓahri : « Wu̧y, ɓay fe mú-u vuh rew le ? A ge mú-u ƴah le ? »
Mari ker ɓahri, ɓa nzuk-kɔr waka-aw munu, mí ke ɓah : « Ŋgernzuk, a wo mú-u mbi hulu le, mú sɔk mi gelu ɓay mí si mbi. »
16Zezu ba, ɓah : « Mari. »
A ye ba, sɔɓ nun ye, ke ɓah ke nzak ebere ɓahri : « Raboni. »
Raboni yih ɓahri, metere bi. 17Mí Zezu ɓah hi̧ ni : « Mú mgba mi ya. Mi hil si ta̧w baah ya ɓáy. Mú si ta̧w yi̧n biri, mú ɓah hi̧ niri ɓahri, mi híl ma ta̧w bah bi. Ke ɓa bah woiri pi. Ke ɓa Ŋgerzah bi. Ke ɓa Ŋgerzah woiri pi. »
18Mí Mari ké Makdala tɔr si ɓah nzak pihna-u hi̧ nzuk-dih fal yeri hi̧ ku lah ɓahri, ke ko Gaŋ tul feri riw ke nun ye ko. Kaŋ mí ke ɓah ɓayu hi̧ niri.
19Nzaklew dimasi-u mí nzuk-dih fal Zezuri mbu̧h hani ké vul. Ku dar ful kan tul woyri ɓayu kú-u laɓ hȩkme ŋgernzuk ziɓri. Bale Zezu ti̧h tul woyri ké ɓil vulaw mbu̧y ɓahri : « Mi vah wuri ke ɗeŋ#20.19 Í mgba Mbete Efezeri 2.14-18 ke Mbete Za̧h 14.27; 16.33 tuh ke gel ki̧na-ay. . »
20Mí ke sɔk niri ndɔk ye ke gari ye. Nzuk-dih fal yeri ko Ŋgermbay woyri bale, law woyri rih niri keɗ keɗ. 21Mí ke el ɓah ra ɓáy ɓahri : « Ɗeŋ ƴo ziŋ wuri. Kandɔk ké baah pih mi, a bi kara mi pih wuri pi. »
22Mí ke el ul ɔkna ku̧ tul woyri ɓahri : « Í ya̧ wuri Tempuki. Salɓay ké i lú ké tul nzukri le, Ŋgerzah lu ɓayu pol da. 23Salɓay ké i lú ké tul nzukri ya le, ɓayu mgba niri kɔɓ ɓáy. »
24Toma ba, seh ké Zezu ti̧h tul nzuk-dih fal yeri-aw, ke ta-a. A ye ra ke ƴo sakra nzuk-dih fal yeri a boh falu seɗe. Ku ɗi ni ɓa gun hore. 25Mí nzuk-dih fal yeri sɔk ni ɓahri, ku ko Gaŋ tul feri riw ke nun woyri da. Bale Toma ɓah hi̧ niri ɓay ɓahri se, a ye ke ko no̧ko kú-u ɓar ndɔk ye ke no̧ko a gari ye, mí ke za ke ndɔk ye ya le, ke ta ya̧ ɓay woyri ya. 26Nam toŋndɔk seɗe kal. Nzuk-dih fal yeri el mbu̧h hani ké ɓil vul ra ɓáy. Toma kara kaɓ ziŋ niri pi. Ku dar ful kan tul woyri, mí Zezu ti̧h tul woyri mbu̧y. Ke ɓahri : « Mi vah wuri ke ɗeŋ. »
27Bale ke el ɓah hi̧ Toma ɓahri : « Mú ndar ndɔk wo, mú za ndɔk bi-ay. Mú ndar ndɔk wo, mú za gari bi, mú ko ɓo mú poŋ fahɓay. Mú kan law wo tul ti̧hna bi ke puh záh ke pa̧ymun a foyu. »
28Toma yih nzak ye ɓahri : « Gaŋ bi, Ŋgerzah bi. »
29Mí Zezu el ɓah hi̧ ni : « Ɓayu ké mu ko mi, mú-u kan law wo tul bi-ay le ? Pol tehna ƴo tul nzukri ké ko mi ke nun ya, mí ku kan law tul ti̧hna bi ke puh záh ke pa̧ymun a foyu. »
30-31Kandɔkaw mí Zezu laɓ fe saŋ ɓa ŋgi̧-u ké nun nzuk-dih fal yeri. Fe saŋawri riw vbeh ɓil mbete-ay ya. A a̧yri ké vbeh ku̧ ɓil mbete-ay, mi vbeh ɓay í kan law tul ye keni ɓahri, Zezu ɓa Ŋgermbay gun Ŋgerzah#20.30-31 Ɓayay si ke kerɓay ɓoɗ ɓoɗ. Ɓayay si ke Mbete Siŋ 2.2,7 sɔk ɓahri, ke ɓa nzuk ké baah Ŋgerzah mbi ni ɓa Ŋgermbay nunmbam ke tusiɓa gbam. Ɓay a ɓoru si ke kerɓay ké na ɓil ɓay gun. Gun ɓa nzuk ké lah nzak bah ye kaŋ. Zezu mbi bolkusol Ŋgerzah laɓ pihna-u ɔh ke gelu. Í ki̧ ɓay gun nzuk pirmatul ɓil Mbete-ƴah tɔh riŋri ɓay lah ɓayu ma pol.. Le tem woiri ɓay ƴo ke ɔkna ké i ziŋu ɓay tul ye.
انتخاب شده:
Mbete Za̧h 20: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
