Mbete Za̧h 19
19
1Wara mí Pilaɗ mbi Zezu bale, ku vboŋ ni. 2-3Mí soze yeri kaŋ ŋgatukru ɓa guɓatul mbay ndoh tul ye. Mah gar ké si̧h ɓa mah gar mbay ku ndoh ni pi dara mí sozeri gbam a ké kal ké pol ye toŋ ɓa vbá̧ ni mbew mbew. Ku ƴo ɓahri : « Soko woiri wo, mbay ziɓri. » 4Kandɔkaw mí Pilaɗ el ti̧h kala ra ɓáy, ke ɓah hi̧ ziɓri ɓahri : « Í ko, mi ten ni gi kala ɓay í tu ɓahri, mi ko suya mbew ké mgba tul ye ya. »
5Kaŋaw mí Zezu ti̧h ke guɓatul ŋgatukru ké tul ye ke mah gar a si̧h-u kú-u ndoh ni ra.
Mí Pilaɗ ɓah : « Í ko wuri nzuk ké ƴo-ay. »
6Ŋgernzuk fe puhna Ŋgerzahri ke soze-kɔr vul kani-uri ko ni bale, ku ur ke ɓay gbaw ɓahri : « Ɓar ni ɓar gaŋ. »
Pilaɗ ba, ɓah : « A woiri í mgba ni, í ɓar ni. A bi le, mi ko suya ké mgba tul ye ya. »
7Mí ŋgernzuk ziɓri yih nzak ye ɓah : « A wah le, bolkusol wah mgba tul ye ke salɓay hul ɓay fe le, ke ɗi mun ye ɓa gun Ŋgerzah. »
8Pilaɗ lah kaŋ bale, hȩkme se ni se-se. 9Mí ke el rih si ɓil kerpuh, mí ke el vbi Zezu ɓayay ɓahri : « A wo, fál suŋ mú-u ur ké ri le ? »
Zezu fer nzak ye ya. 10Bale Pilaɗ ɓah hi̧ ni ɓah : « Mu fer nzak bi ya ley ? Ŋgerna bi mah sel mu. Ŋgerna bi mah ɓar mu tul kpuh. Mu tu ya lo ? »
11Zezu yih nzak ye ɓah : « Ŋgerna ɓay mba tul bi ta ta̧w wo ya. Ŋgerna ké na ndɔk wo ɓa ŋgerna ké gi ke fál síɓa, mí Ŋgerzah hi̧ mu-aw. Sa̧wu mí nzuk ké ndoh mi ndɔk wo ra, suya ye mba suya wo mba-mba. »
12Ur ke seh-u-aw mí Pilaɗ ƴah ful ɓay sel Zezu. Mí ziɓri vba̧ nzak ɓahri : « Mu sel ni le, mu ta ɓa ya̧h mbay a luki ra ya. Nzuk ɗi mun ye ɓa mbay le, ke fah sezar munu. »
13Pilaɗ lah kaŋ ba, mí ke ten Zezu ti̧h gi ndiseŋe. Ke el kaɓ arŋgaw-kuŋ salɓay. Riŋ gel-kuŋ salɓay ra ɓa Ɓɔk-kasaw. Ke nzak ebere ɓa Gabata.
14Namu-aw ɓa nam ti̧hmbih-i guy buma. Nam a titilu ra ziɓri lek fe ɓay nam a seɗe-u ké ɓa baw nam ɔkna ti̧hmbih-u. Seh ƴo tul puh. Mí Pilaɗ ɓah hi̧ ziɓri : « Í ko wuri mbay woiri ké ƴo-ay. »
15Le ku ur ke ɓay gbaw ɓahri : « Ɔr ni. Ɔr ni. Mú ɓar ni kan tul kpuh vbatay síɓa. »
Pilaɗ ɓah : « I yih ɓay mí ɓar mbay woiri tul kpuh vbatay ley ? »
Mí ŋgernzuk fe puhna Ŋgerzahri yih nzak ye ɓahri, sezar mí ɓa mbay woyri, mbay a ɓoru ta-a. 16Wara mí Pilaɗ ndoh Zezu ndɔk soze yeri hi̧ kú si ɓar ni tul kpuh vbatay ɔr kan síɓa.
17Sozeri mgba Zezu. Zezu ra ku hi̧ ni ke suk kpuh vbatay hul ye si keni ka̧h gel kú-u ɗi ɓa Gbogbotul. Ku ɗi gelu ke nzak ebere ɓa Golgota. 18Gelaw mí ku ɓar Zezu kan tul kpuh vbatay. Nzuk a ɓoruri seɗe kara ku ɓar ké tul kpuh vbatay pi. Nzuk a mbewu ké fál ndɔk lakna ye, nzuk a seɗe-u ba, ké fál ndɔk kperu ye. A ye Zezu le ku ɓar ni ké haŋsekle woyri#19.18 Í mgba Mbete Esaïe 53.12 tuh ke gel ki̧na-ay..
19Pilaɗ vbeh salɓay ké ta tul Zezu kan gbekre, mí ku ɓar kan fál síɓa tul ye. Salɓayu vbeh kandɔkay : « Zezu ké Nasareɗ, mbay ziɓri. »
20Kaŋaw mí ziɓri ɓa ŋgi̧-u ki̧ ɓayu ɓay fe le, gel kú-u ɓar ri Zezu ɗih ya ke puh. Ku vbeh ɓayu ke nzak ebere ke nzak gerek ke nzak lateŋ pi#19.20 Nzak lateŋ ɓa nzak ɓay ɓahna rɔmri nzuk-lak tusiɓari ke sewu-aw..
21Mí ŋgernzuk fe puhna Ŋgerzah ziɓri ƴo ɓah ɓay hi̧ Pilaɗ ɓah : « Fe vbehna “mbay ziɓri-aw” ra, mú vbeh ya. Mú sɔɓ vbehna-u kandɔkay : Nzukay ɗi mun ye ɓa mbay ziɓri. »
22Pilaɗ ba, yih nzak woyri ɓah, ɓay fe ké a ye ke vbeh dale, ke vbeh da. 23Nzuk ŋgermuri ɓar Zezu ké tul kpuh vbatay bale, ku fa̧h gar ye kehr hani ɓa gel niŋ. A ge ge le ya̧ nzuku a ye, nzuku a ye. Ku el mbi gar a fál ɓilu kan ɓoɗ. Gar ra ku kaŋ mbew yaŋ. 24Kaŋaw mí sozeri ɓah ké sakra woyri ɓahri : « Náh gɔh wuri garay ya. Náh nda wuri ɓele keni ko, a ge mí ɓay i-u le ? »
Fe-u laɓ kandɔk kú-u vbeh ɓayu lewsa̧ ɓil mbete Ŋgerzah. Ɓayu ɓahri : Ku kehr gar biri hani. Gar bi a ɓoru ba, ku el mbi nda keni ɓele#19.24 Ɓayay na ɓil Mbete Siŋ (Psaumes) 22.19..
Kandɔkaw mí ɓa fe laɓna nzuk ŋgermuri ké laɓ.
25Ké bɔk kpuh vbatay Zezu ra mah ye ƴo ri ke wu̧y a ɓoru ké ɓa yi̧n mah ye. Mari wu̧y Kelewpas ke Mari ké Makdala ƴo ri pi.
26Zezu ko mah ye ke nzuk-dih fal ye a hani ké-e sa ni, ku ƴo ta̧w hani. Mí ke ɓah hi̧ mah ye ɓahri : « Maah, mú ko gun wo ké ƴo-aw. »
27Ke el ɓah hi̧ nzuk-dih fal ye ra ɓah : « Mú ko mah wo ké ƴo-aw. »
Sa seh-aw mí nzuk-dih fal ye-aw titil mgba mah Zezu ɓa mah ye.
28Bol falu bale Zezu tu ɓahri, ɓayri riw kú-u vbeh lewsa̧ ɓil mbete bolkusol Ŋgerzah laɓ ke gelu gelu ɔh da. Toŋ ɓay mbew ɓáy. Kaŋaw mí ɓay hi̧ ɓayu ɓá laɓ le, ke ɓahri : « Kɔkmbih i mi. »
29Yim a su̧h-u mbah gbari ƴɔr gelu-aw. Mí sozeri mbi sifoŋ ŋga̧h ké nzak ka̧wkpuh ɓaŋ ndoh yim a su̧h-u, mí ku ndar si tuŋ nzak ye. 30Ke ƴo̧k yim ra bale, ke ɓahri, feri riw laɓ ɔh da. Mí ke ɗiŋ tul ye, ke ndoh tem ye ndɔk bah ye mí hi̧ law ye toh.
31Kandɔk ké nam ti̧hmbih-u ɓa nam a titilu ké ziɓri lek fe ɓay baw nam ɔkna ti̧hmbih-u ra le, ŋgernzuk ziɓri sa ɓay hi̧ nzukri kú-u ɓar niri ɓá na sa tul kpuh vbatay ka̧h nam ɔkna ra ya, ɓayu ké namu ɓa nam ɔkna a luki. Mí ku si vbi Pilaɗ ɓá gur bɔk nzukri kú-u ɓar niri tul kpuh ɓay kú hu ɓa gah-u le, nzukri ɓá ɗer hul woyri. 32Bale sozeri gi gur bɔk nzuk a mbew. Ku kal si gur bɔk nzuk a ɓoru-aw pi. 33Ku ka̧h tul Zezu le, ku ko Zezu hu da, mí ku gur bɔk ye ya. 34Wara le soze a hani tuŋ gari ye ke nzaw, mí sem ke mbih ti̧h.
35Nzuk ké ko fe-u ke nun ye mí vbeh tehɓayu hi̧ wuri. Tehɓayu ɓa ketina. Nzuk ké ko fe-u ke nun tu-tu, ke ɓah ketina ɓay hi̧ law woiri ɓá te tul ketina-aw. 36Fe-uri laɓ kandɔk kú-u vbeh ɓayu lewsa̧ ɓil mbete Ŋgerzah ɓahri : Huhru mun ye mbew, ku háw ya#19.36 Ɓayay na ɓil Mbete Exode 12.46 ke Mbete Nombres 9.12..
37Ku el vbeh ké gel a ɓoru ɓáy ɓah : Ku ko nzuk kú-u tuŋ ke nzaw#19.37 Ɓayay na ɓil Mbete Zacharie 12.10..
38Bol falu, Zezeɓ ké Arimate, a ye ra ke ɓa nzuk-dih fal Zezu, mí ke sa sɔk mun ye ya ɓay hȩkme mbaŋ ye ziɓri. Ke si vbi Pilaɗ hul Zezu bale, Pilaɗ hi̧ ni ké si ɗer hul Zezu ra. Mí ke ɗer gaŋ ba. 39Nikodem ké si ta̧w Zezu ɓa suŋ lewsa̧ ra ƴo ri pi. Ke suk sa̧wkpuh mir ke sa̧wkpuh aluwe mah kilo bon say. 40Mí ku mbi hul Zezu bale, ku kuh ke ladara ke sa̧wkpuh ké ba̧ri-u fu̧ buy buyaw kandɔk ké ɓa fe laɓna ziɓri kú-u laɓ ke hul woyri. 41Gel-ɓar Zezu ɗih ya ke waka. Ké ɓil waka-aw, hoh kasaw kú-u fel ɓay mbek hulri ɓilu ƴo ri. Hoh kasawaw ra ku mbek ri hul mbew ya ɓáy. 42Seh ɓay riŋna ɓa titil nam a seɗe-u ɓil nam ti̧hmbih-u. Ɓay nam a seɗe-u ké ɓa baw nam ɔkna ke ɓay hoh kasaw-mbek hul ké ɗih ya ke gel-ɓar Zezu pi ra, ku mbek hul Zezu ké ri.
انتخاب شده:
Mbete Za̧h 19: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
