Dw 9
9
Gyisɛse yɛ nrenya bie mɔɔ bɛwole ye anyenzinliravolɛ la ayile
1Gyisɛse kpɔsa kpɔsa la, ɔnwunle nrenya bie mɔɔ bɛkawo ye la ɛnee ɔ nye ɛzi la. 2Ye ɛdoavolɛma ne bizale ye kɛ, “Kilehilevolɛ, nwane ɛtane ti a bɛwole nrenya ɛhye anyenzinliravolɛ a? Ɔdaye mumua ne ye ɛtane ti anzɛɛ ye awovolɛ ɛtane ti ɔ?”
3Gyisɛse buale kɛ, “Ye anyenzinlira ne ɛnvane ɔdaye ye ɛtane anzɛɛ ye awovolɛ ɛtane mɔɔ bɛyɛ la anwo. Bɛwole ye anyenzinlira amaa menli anwu kɛ Nyamenle tumi ne ɛlɛyɛ gyima wɔ ye nu. 4Alehyenlɛ ye wɔ zo la, ɔwɔ kɛ yɛkɔ zolɛ yɛyɛ mɔɔ zoanle me la gyima ne; aledwolɛ ɛlɛba mɔɔ awie ɛngola ɛnyɛ gyima a. 5#Mat 5.14; Dw 8.12 Mewɔ ewiade ye anu ala la, medame a mele ewiade ye wienyi ne a.”
6Gyisɛse hanle ɛhye la, ɔdole nyɛlɛ azɛlɛ nwo, ɔvale ɔfɔtɔle ndɛtɛlɛ, ɔvale ndɛtɛlɛ ne ɔkpudale nrenya ne anye 7na ɔzele ye kɛ, “Kɔ kɔnrinzi ɛ nyunlu wɔ nzubula ne mɔɔ bɛfɛlɛ ye Saelowam la anu.” (Saelowam abo a le “Ɛzoanlɛ”.) Nrenya ne hɔle hɔnrinzinle ɔ nyunlu wɔ nzubula ne anu, na ɔkara la ɛnee ɔnwu debie.
8Ye kpalɛ zo amra nee menli mɔɔ ɛnwu ye ɛlɛ kɛ ɔde ɔlɛsɛlɛzɛlɛ la bizale kɛ, “Asoo tɛ nrenya ne mɔɔ tɛnla sɛlɛzɛlɛ la ɛne?”
9Bie mɔ zele kɛ, “Ɔdaye ɔ,” Bie mɔ noko hanle kɛ, “Kyɛkyɛ, tɛ ye ɔ, ɔzɔho ye ala.”
Nrenya mumua ne hanle kɛ, “Medame ɔ.”
10Bɛbizale ye kɛ, “Kɛ ɔyɛle mɔɔ ɛ nye ne dukuele ɛ?”
11Ɔbuale kɛ, “Nrenya ne mɔɔ bɛfɛlɛ ye Gyisɛse la fɔtɔle ndɛtɛlɛ vale kpudale me nye na ɔzele me kɛ, ‘Kɔnrinzi ɛ nyunlu wɔ Saelowam ne anu’; na mengɔnyɛle ye zɔhane yɛɛ me nye ne dukuele a.”
12Bɛbizale ye kɛ, “Na nrenya zɔhane wɔ nienwu?”
Ɔbuale kɛ, “Menze.”
Falasiima kpondɛ ayileyɛlɛ ne anu
13Bɛvale nrenya ne mɔɔ ɛnee ɔ nye ɛzi la bɛhɔmanle Falasiima ne. 14Kenle ko ne mɔɔ Gyisɛse fɔtɔle ndɛtɛlɛ ne vale dukuele nrenya ne anye la le Ɛnwomenlelielɛ Kenle. 15Falasiima ne eza bizale nrenya ne adenle mɔɔ ɔlua zo mɔɔ ɔ nye ne dukuele la. Ɔzele bɛ kɛ, “Ɔvale ndɛtɛlɛ ɔyɛle me nye, na menrinzinle la yɛɛ menwunle debie a.”
16Falasiima ne bie mɔ hanle kɛ, “Sonla mɔɔ yɛle ɛhye la ɛnvi Nyamenle ɛkɛ, ɔboalekɛ ɔnli Ɛnwomenlelielɛ Kenle mɛla ne azo.”
Bie mɔ noko hanle kɛ, “Na kɛ ɔkɛyɛ na sonla mɔɔ le ɛtanenli la ayɛ nwanwane gyima mɔɔ le zɛhae ɛ?” Na menli ne lile abunwiɔ.
17Yemɔti Falasiima ne bizale nrenya ne bieko kɛ, “Ɛse ɔdaye yɛɛ ɔdukuele ɛ nye a, ɛnee duzu edwɛkɛ a ɛka ye wɔ ɔ nwo a?”
Ɔbuale kɛ, “Ɔle Nyamenle kpɔmanvolɛ.”
18Dwuu mgbanyima ne mɔ anlie ando nu kɛ ɛnee ɔle anyenzinliravolɛ yɛɛ bɛdukue ɔ nye a. Yemɔti bɛvɛlɛle ye awovolɛ 19na bɛbizale bɛ kɛ, “Asoo bɛ ra nrenya ne mɔɔ bɛse bɛwole ye la ɛnee ɔ nye ɛzi la ɛne, na kɛ ɔyɛle mɔɔ ɛnɛ ɔnwu debie ɛ?”
20Ye awovolɛ ne buale kɛ, “Yɛmɛ yɛze kɛ yɛ ra nrenya ne ɛne, yɛɛ yɛze kɛ yɛwole ye la ɛnee ɔ nye ɛzi. 21Na yɛnze kɛ ɔyɛle mɔɔ ɛnɛ ɔkola ɔnwu debie a, yɛɛ yɛnze ahenle mɔɔ dukuele ɔ nye a. Ɔdaye yenyi; bɛbiza ye, na ɔkola ɔye ɔ nloa.” 22Ye awovolɛ ne hanle ɛhye, ɔluakɛ bɛsulo Dwuu mgbanyima ne mɔ. Dwuu mgbanyima ne mɔ ɛbɔ kpɔkɛ kɛ awie biala mɔɔ kɛha kɛ Gyisɛse le Mɛzaya la, bɛkɛye ye bɛkɛvi nyianu sua ne anu. 23Ɛhye ati a ye awovolɛ ne hanle kɛ, “Yenyi na bɛbiza ye” la.
24Eza bɛvɛlɛle nrenya ne mɔɔ bɛwole ye anyenzinliravolɛ la bieko na bɛzele ye kɛ, “Nea Nyamenle anyunlu#9.24 Anzɛɛ Fa anyunlunyia maa Nyamenle... na ka nɔhalɛ ne! Yɛze kɛ nrenya ɛhye mɔɔ dukuele ɛ nye ne la le ɛtanenli.”
25Nrenya ne buale kɛ, “Saa ɔle ɛtanenli o, saa ɔnle ɛtanenli o, menze. Debie ko ala yɛɛ meze a; yemɔ a le kɛ, ɛnee me nye ɛzi, na kɛkala menwu debie.”
26Bɛbizale ye kɛ, “Kɛ ɔzile ɔdukuele ɛ nye ne ɛ?”
27Ɔbuale bɛ kɛ, “Se meha mehile bɛ dɛba, na bɛande. Duzu ati a bɛkpondɛ kɛ meka ye bieko ɛ? anzɛɛ bɛkulo kɛ bɛyɛ ye ɛdoavolɛma ɔ?”
28Bɛbɔle nrenya ne aholoba kɛ, “Wɔmɔ a ɛle ye ɛdoavolɛ a, na yɛmɛ yɛle Mosisi ɛdoavolɛma. 29Yɛze kɛ Nyamenle dendɛle hilele Mosisi; sonla ɛhye, yɛnze ɛleka mɔɔ ɔvi a.”
30Nrenya ne buale kɛ, “Edwɛkɛ ɛzulolɛ kpalɛ! Bɛnze ɛleka mɔɔ ɔvi a, noko yehola yedukue me nye. 31Yɛze kɛ Nyamenle ɛndie ɛtanevolɛma, ɔtie bɛdabɛ mɔɔ bɛbu ye bie na bɛyɛ mɔɔ ɔkpondɛ kɛ bɛyɛ la. 32Sumunli kɛ aloa bɔle la yɛtɛtele kɛ awie ɛdukue sonla mɔɔ bɛwole ye anyenzinliravolɛ la anye ɛlɛ. 33Saa nrenya ɛhye ɛnvi Nyamenle ɛkɛ ne a, anrɛɛ ɔnrɛhola ɔnrɛli gyima mɔɔ le zɛhae la ɛlɛ.”
34Bɛbuale ye kɛ, “Ɛdawɔ mɔɔ bɛwole wɔ na bɛtetele wɔ wɔ ɛtane nu la, ɛkulo kɛ ɛkilehile yɛmɛ ɔ?” Na bɛvoanle ye bɛvile nyianu sua ne anu.
Sunsum nu anyenzinlira
35Gyisɛse dele kɛ bɛvoa nrenya ne bɛvi nyianu sua ne anu la, ɔkpondɛle ye ɔnwunle ye na ɔbizale ye kɛ, “Asoo ɛdie Sonla Ra ne ɛdi?”
36Nrenya ne buale ye kɛ, “Yɛmenle, na yemɔ a le nwane, amaa mealie ye meali?”
37Gyisɛse zele ye kɛ, “Wɔnwu ye dɛbadɛba, na yemɔ ala a nee wɔ ɛlɛtendɛ la.”
38Nrenya ne zele kɛ, “Awulae, medie medi somaa!” Akee ɔhotole Gyisɛse agyakɛ anu ɛkɛ na ɔzonlenle ye.
39Na Gyisɛse zele ye kɛ, “Membale ewiade kɛ mebabua ndɛne, amaa bɛdabɛ mɔɔ bɛ nye ɛzi la anwu debie, na bɛdabɛ mɔɔ bɛnwu debie la anye azi.”
40Falasiima bie mɔ mɔɔ ɛnee wɔ ɛkɛ ne la dele mɔɔ ɔhanle la na bɛbizale ye kɛ, “Ɛnee ɛkpondɛ wɔaze kɛ yɛdayɛ noko yɛ nye ɛzi ɔ?”
41Gyisɛse buale kɛ, “Saa bɛ nye ɛzi a, anrɛɛ bɛnli fɔlɛ, na kɛmɔ bɛdabɛ bɛse bɛnwu debie la, bɛ fɔlɛlilɛ doa bɛ.”
اکنون انتخاب شده:
Dw 9: NB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Nzema © Bible Society of Ghana, 1998.
