Dw 8
8
Raalɛ ne mɔɔ bɛhyele ye kɛ ɔlɛto awuvolɛvalɛ mɛla ne la
[ 1Akee awie biala hɔle sua nu, na Gyisɛse hɔle Ɔlivi Boka ne azo. 2Aleɛ hyenle nwonlomɔ mangyee ne la, ɔziale ɔhɔle Ɛzonlenlɛ Sua ne anu. Menli ne amuala rabɔle yiale ye na ɔdɛnlanle aze kɛ ɔkilehile bɛ. 3Mɛla kilehilevolɛma ne nee Falasiima vale raalɛ bie mɔɔ bɛhɔhye ye kɛ ɔlɛto awuvolɛvalɛ mɛla ne la rale na bɛvale ye bɛziele bɛ avinli ɛkɛ ne. 4Bɛzele Gyisɛse kɛ, “Kilehilevolɛ, raalɛ ɛhye, yɛhyele ye kɛ nrenya ɛlɛfa ye awuvolɛ. 5#Sɛlɛ 20.10; Mɛla 22.22-24 Wɔ yɛ mɛla ne anu, Mosisi ɛhile kɛ ɔwɔ kɛ bɛsi raalɛ zɔhane awolɛ dedee bɛmaa ɔwu. Na kɛ ɛse ɛ?” 6Bɛhanle ɛhye bɛdole ye abɛla, amaa bɛanyia bie bɛagyinla zolɛ bɛahɔdoa ye. Na Gyisɛse hanle ɔ nwo aze na ɔvale ɔ sa ɔhɛlɛhɛlɛle azɛlɛ ne anwo.
7Bɛhɔle zolɛ bɛbizebizale Gyisɛse kpuyia, na ɔdenrɛle ɔ nwo na ɔzele bɛ kɛ, “Bɛ nuhua biala mɔɔ ɔnea a ɔtɛyɛle ɛtane ɛlɛ la ɛlumua ɛdo bolɛ ɛbɔ raalɛ ye.” 8Ɔhanle ɛhye la eza ɔhanle ɔ nwo aze na ɔhɛlɛhɛlɛle azɛlɛ ne anwo. 9Menli ne dele ɛhye la, bɛbɔle ɔ bo, ɔvi bɛ mgbanyinli ne mɔ anwo zo, bɛhɔle ngoko ngoko dedee bɛwiele kɔ bɔkɔɔ. Ɔhale Gyisɛse nee raalɛ ne angome wɔ ɛkɛ ne. 10Gyisɛse denrɛle ɔ nwo na ɔbizale raalɛ ne kɛ, “Ɔmɔ, na menli ne mɔ wɔ nienwu? Ko bɔbɔ anga ambua wɔ ewule fɔlɛ ɔ?”
11Raalɛ ne buale kɛ, “Yɛmenle, ko bɔbɔ anga o!”
Gyisɛse zele ye kɛ, “Ɛnee medame noko membua wɔ ewule fɔlɛ. Kɔ, na mmayɛ ɛtane bieko.”]
Gyisɛse a le ewiade wienyi ne a
12 #
Mat 5.14; Dw 9.5 Gyisɛse dendɛle hilele Falasiima ne bieko kɛ, “Mame a mele ewiade wienyi ne a. Awie biala mɔɔ kɛdoa me bo zo la kɛnyia ngoane nu wienyi ne, ɔnrɛlua awozinli nu ɛlɛ.”
13 #
Dw 5.31
Falasiima ne zele ye kɛ, “Kɛkala, akee ɛlɛdi ɛ nwo daselɛ, mɔɔ wɔha la ɛndo ɛhwee.”
14Gyisɛse buale kɛ, “Saa medi me nwo daselɛ bɔbɔ a, mɔɔ meka la le nɔhalɛ, ɔboalekɛ meze ɛleka mɔɔ mevi membale a, yɛɛ meze ɛleka mɔɔ melɛkɔ la. Bɛmɛ, bɛnze ɛleka mɔɔ mevi membale a yɛɛ bɛnze ɛleka mɔɔ melɛkɔ a. 15Bɛmɛ bɛnea sonla nyunlu na bɛabua ye ndɛne, na mame membua ndɛne. 16Na saa mebua ndɛne bɔbɔ a anrɛɛ me ndɛnebualɛ bayɛ fɔɔnwo, ɔluakɛ tɛ me ngome a melua a; Selɛ ne mɔɔ zoanle me la boka me nwo. 17#Mɛla 19.15 Bɛhɛlɛ ye wɔ bɛ mɛla ne anu kɛ saa dasevolɛma nwiɔ anloa yɛ ko a, ɛnee mɔɔ bɛkɛha la le nɔhalɛ. 18Medi me nwo daselɛ yɛɛ Selɛ ne mɔɔ zoanle me la di me nwo daselɛ.”
19Bɛbizale ye kɛ, “Ɛ ze ne wɔ nienwu?”
Gyisɛse buale bɛ kɛ, “Bɛnze me, yemɔti bɛnze Egya. Saa bɛze me a anrɛɛ bɛze Egya noko.”
20Gyisɛse hanle ɛhye mɔ amuala wɔ mekɛ mɔɔ ɛnee ɔlɛkilehile wɔ Ɛzonlenlɛ Sua ne anu, wɔ ɛleka mɔɔ azubɔlɛ nlɛka ne mɔ gyigyi la. Na awie biala angola ye kye, ɔboalekɛ ɛnee ye mekɛ ɛtɛdwule.
Bɛnrɛhola ɛleka mɔɔ melɛkɔ la kɔ
21Gyisɛse hanle hilele bɛ bieko kɛ, “Mebahɔ; bɛbakpondɛ me, na bɛbawu bɛala bɛ ɛtane ne mɔ anu. Bɛnrɛhola ɛleka mɔɔ melɛkɔ la kɔ.” 22Yemɔti Dwuu mgbanyima ne mɔ hanle kɛ, “Ɔse, ‘Bɛnrɛhola ɛleka mɔɔ melɛkɔ la kɔ.’ Ɛnee ɔkpondɛ yeaze kɛ ɔkahu ɔ nwo ɔ?”
23Gyisɛse buale kɛ, “Bɛmɛ bɛvi azɛlɛ ye azo, na mame mevi anwuma. Bɛvi ewiade ɛhye anu, na mame menvi ewiade ye anu. 24Ɛhye ati yɛɛ meha mehile bɛ kɛ bɛbawu bɛala bɛ ɛtane ne mɔ anu la. Saa bɛanlie bɛanli kɛ, ‘Medame a le Medame’ a bɛbawu bɛala bɛ ɛtane ne mɔ anu bɔkɔɔ.”
25Bɛbizale ye kɛ, “Ɛdawɔ a le nwane?”
Gyisɛse buale kɛ, “Kɛmɔ melumua meha mehile bɛ ala la. 26Melɛ edwɛkɛ dɔɔnwo meka ye bɛ nwo, yɛɛ melɛ dɔɔnwo mebua bɛ nwolɛ ndɛne. Mɔɔ zoanle me la le nɔhalɛ yɛɛ mɔɔ menwɔde menwɔvi ye ɛkɛ ne la a meka mekile ewiade a.”
27Bɛande ɔ bo kɛ Selɛ ne anwo edwɛkɛ a Gyisɛse ɛlɛka ahile bɛ a. 28Yemɔti Gyisɛse zele bɛ kɛ, “Saa bɛmaa medame Sonla Ra zo wɔ meanubaka ne azo anwuma a yɛɛ bɛkɛnwu kɛ ‘Medame a le Medame’ a; na bɛanwu kɛ menva me ngome me tumi menyɛ debie, na meka mɔɔ Selɛ ne kɛhilehile me la ala. 29Eza mɔɔ zoanle me la nee me lua. Ɔtɛgyakyile me, ɔluakɛ dahuu meyɛ mɔɔ ɔkpondɛ la.”
30Bɛdabɛ dɔɔnwo mɔɔ bɛdele kɛ Gyisɛse ɛlɛka ɛhye mɔ la liele ye lile.
Alehelɛ nee ngɛkɛlɛ
31Yemɔti Gyisɛse zele Dwuuma mɔɔ liele ye lile la kɛ, “Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba; 32bɛbanwu nɔhalɛ ne, na nɔhalɛ ne bamaa bɛanyia bɛ ti.”
33 #
Mat 3.9; Luk 3.8 Bɛbuale ye kɛ, “Yɛle Ebileham abo zo amra, yɛɛ yɛtɛyɛle awie biala ngɛkɛlɛ ɛlɛ. Na kɛ ɔyɛ mɔɔ ɛse yɛkɛnyia yɛ ti ɛ? Duzu edwɛkɛ a ɛkpondɛ wɔaha a?”
34Gyisɛse zele bɛ kɛ, “Meka nɔhalɛ ne meahile bɛ: Awie biala mɔɔ kɛyɛ ɛtane la le ɛtane akɛlɛ. 35Akɛlɛ ɛmbɔ abusua ne bie dahuu, na dehelɛ boka abusua ne anwo dahuu. 36Saa Ralɛ ne yɛ bɛ alehelɛ a, ɛnee bɛle alehelɛ amgba. 37Meze kɛ bɛle Ebileham abo zo amra. Noko kɛmɔ bɛnlie me ngilehilelɛ ne bɛndo nu la ati, bɛkpondɛ kɛ bɛku me. 38Meka mɔɔ Egya ɛhilehile me la, yɛɛ bɛdabɛ bɛyɛ mɔɔ bɛ ze ɛha ɛhile bɛ la.”
39Bɛbuale ye kɛ, “Yɛ ze a le Ebileham.”
Gyisɛse zele bɛ kɛ, “Saa amgba ala bɛ ze a le Ebileham a, anrɛɛ bɛyɛ mɔɔ bɛ ze yɛle la bie. 40Mɔɔ meyɛ la amuala a le kɛ menwɔha nɔhalɛ ne mɔɔ mede mevi Nyamenle ɛkɛ ne la menwɔhile bɛ. Noko bɛkpondɛ me bɛahu me. Ebileham anyɛ ɛhye! 41Bɛlɛyɛ mɔɔ bɛ ze kpalɛ ne yɛle la bie!”
Bɛbuale ye kɛ, “Yɛnle arelazinli mralɛ; yɛ ze ala a le Nyamenle. Yɛle ɔ mra kpalɛ kpalɛ.”
42Gyisɛse zele bɛ kɛ, “Saa amgba bɛ ze a le Nyamenle a, anrɛɛ bɛkulo me, ɔboalekɛ mevi Nyamenle anwo lɔ a membale a. Meamba me ti anwo adenle. Ɔdaye a ɔzoanle me a. 43Duzu ati a bɛnde mɔɔ melɛka la abo ɛ? Ɔboalekɛ bɛngulo kɛ bɛtie me nrɛlaleɛ ne la ati ɔ. 44Bɛ ze kpalɛ ne a le Abɔnsam. Ɔ mra a le bɛ, yɛɛ bɛlɛyɛ mɔɔ bɛ ze kpalɛ ne kulo la. Ɔbɔ ɔ bo amuala la ɛnee ɔle kɔdiawu. Yeanli nɔhalɛ ɛlɛ, ɔboalekɛ nɔhalɛ nretee zɛhae ɛnle ye nu. Saa ɔbɔ adalɛ a ɛnee ɔlɛyɛ mɔɔ ɔwɔ kɛ ɔyɛ la, ɔboalekɛ ɔle alane, yɛɛ ɔle adalɛ kɔsɔɔti bɛ ze. 45Mame meka nɔhalɛ ne, na ɛhye ati noko yɛɛ bɛnlie me bɛnli a. 46Bɛ nuhua boni a kɛzi ɔ kɛnra kɛha kɛ medi ɛtane nwo fɔlɛ a? 47Mɔɔ vi Nyamenle ɛkɛ ne la tie Nyamenle edwɛkɛ ne. Bɛmɛ, bɛnvi Nyamenle ɛkɛ, na ɛhye ati yɛɛ bɛduodua bɛ nzo kɛ bɛnrɛdie Nyamenle edwɛkɛ ne a.”
Gyisɛse nee Ebileham
48Dwuuma ne zele Gyisɛse kɛ, “Saa yɛka kɛ ɛle Samɛleanli na ɛlɛ ayɛne a ɛnee yɛbɔ adalɛ ɔ?”
49Gyisɛse buale kɛ “Menlɛ ayɛne. Medi Egya eni, na bɛmɛ bɛngulo kɛ bɛdi me eni. 50Memkpondɛ anyunlunyia memmaa me nwo. Awie wɔ ɛkɛ ne mɔɔ yemɔ a anyunlunyia ne le ye ɛdeɛ a, na yemɔ a bua me benle a. 51Meka nɔhalɛ ne meahile bɛ: Mɔɔ kɛli me edwɛkɛ zo la ɛnrɛwu ɛlɛ.”
52Dwuuma ne zele ye kɛ, “Akee yɛnwu ye bɔkɔɔ kɛ ɛlɛ ayɛne kpole kpalɛ! Ebileham wule, yɛɛ Nyamenle kpɔmanvolɛma wule, noko wɔmɔ ɛse, ‘Mɔɔ kɛli me edwɛkɛ zo la ɛnrɛwu ɛlɛ.’ 53Yɛ ze Ebileham bɔbɔ wule; ɛngola ɛnga kɛ ɛle kpole ɛtɛla Ebileham, na kɛ ɛse ɛ? Nyamenle kpɔmanvolɛma noko wule. Na ɛdwenle kɛ ɛle duzu?”
54Gyisɛse buale kɛ, “Saa me ngome mewula me nwo anyunlunyia a, ɛnee me anyunlunyia ɛndo ɛhwee. Ahenle mɔɔ wula me anyunlunyia la a le Egya, mɔɔ yemɔ a bɛse ɔle bɛ Nyamenle la. 55Bɛtɛnwunle ye ɛlɛ, na mame meze ye. Saa meka kɛ menze ye a, ɛnee mebɔ adalɛ kɛ bɛdabɛ la. Meze ye, yɛɛ medi ye edwɛkɛ zo. 56Bɛ ze Ebileham lile fɛlɛko kɛ ɔkɛnwu me ɛralɛ kenle ne, yɛɛ ɔnwunle ye na ɔlile nwolɛ fɛlɛko.”
57Dwuuma ne zele ye kɛ, “Ɛdawɔ mumua ne ɛtɛdile ɛvolɛ abulanlu bɔbɔ, noko ɛse ɛnwunle Ebileham?”
58Gyisɛse buale bɛ kɛ, “Meka nɔhalɛ ne meahile bɛ: Mɔɔ bɛkawo Ebileham la, ɛnee bɛfɛlɛ me ɛtease.”
59Bɛsesale awolɛ kɛ bɛto bɛazi ye, na Gyisɛse veale ɔ nwo na ɔvile Ɛzonlenlɛ Sua ne anu ɔhɔle.
اکنون انتخاب شده:
Dw 8: NB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Nzema © Bible Society of Ghana, 1998.
