Dw 5
5
Gyisɛse yɛ ayile wɔ nzubula ne anloa
1Ɛhye anzi Gyisɛse hɔle Gyɛlusalɛm wɔ mekɛ mɔɔ ɛnee Dwuuma ɛlɛdi bɛ Nyamenle ɛzonlenlɛ ɛvoyia bie la. 2Wɔ Gyɛlusalɛm “Mboane Anuhɔlɛ” ne anloa, nzubula bie wɔ ɛkɛ ne, ɔlɛ kpɔda nnu wɔ nwolɛ, bɛfɛlɛ nzubula ne wɔ Hibulu aneɛ nu “Bɛtezata.”#5.2 Bɛtezata: Mbuluku bie mɔ fɛlɛ ye “Bɛtɛseda”, yɛɛ bie mɔ fɛlɛ ye “Bɛteseeyeda.” 3Menli dɔɔnwo mɔɔ ɛnde kpɔkɛ la gugua kpɔda ne mɔ abo, anyenzinliravolɛma, abuburama, yɛɛ bɛdabɛ mɔɔ bɛ foa ko ɛdwe la amuala. [Bɛlɛkendɛ bɛamaa bɛakpoto azule ne, 4ɔboalekɛ ɔdwu mekɛ ne bie a, Nyamenle soanvolɛ dwu azule ne anu kpoto ye. Saa ɔyɛ ye zɔhane a, wuleravolɛ biala mɔɔ kɛlumua kɛhɔdɔ nuhua la anwo sa bɔkɔɔ.] 5Nrenya bie wɔ nzubula ne anloa mɔɔ ye ewule ne hanle ye la ye ɛvolɛ abulasa nee mɔtwɛ ɛ. 6Gyisɛse nwunle ye la, ɛnee yenwu kɛ ɔ nwo dole ye la ɛhyɛ kpalɛ; yemɔti ɔbizale ye kɛ, “Ɛkulo kɛ ɛte kpɔkɛ ɔ?”
7Nrenya ne buale kɛ, “Yɛmenle, menlɛ awie wɔ ɛke mɔɔ saa bɛkpoto azule ne a ɔfa me ɔto nu a; mekɛ biala mɔɔ menwɔbɔ mɔdenle kɛ mekadɔ nu la, ɛnee sonla fofolɛ ɛlumua me nyunlu ɛhɔdɔ nu.” 8Gyisɛse zele ye kɛ, “Dwazo, fa wɔ ɛkpa ne na kɔ.” 9Ɛkɛ ne ala nrenya ne dele kpɔkɛ; ɔvale ye ɛkpa ne na ɔhɔle.
Kenle mɔɔ ɛhye zile la le Ɛnwomenlelielɛ Kenle. 10#Nih 13.19; Gyɛ 17.21 Yemɔti Dwuu mgbanyima ne zɔle nrenya ne mɔɔ bɛyɛ ye ayile la nu na bɛzele ye kɛ, “Ɛnɛ le Ɛnwomenlelielɛ Kenle, yemɔti ɔtia yɛ mɛla ne kɛ ɛkɛzoa wɔ ɛkpa ne.”
11Nrenya ne buale kɛ, “Sonla ne mɔɔ yɛle me ayile la a zele me kɛ, ‘Fa wɔ ɛkpa ne na kɔ’ a.”
12Bɛbizale ye kɛ, “Ɛnee nwane a ɔdaye yeze wɔ kɛ ɛva wɔ ɛkpa ne na ɛhɔ a?”
13Na nrenya ne mɔɔ bɛyɛ ye ayile ne la ɛnze Gyisɛse sonla holɛ, ɔluakɛ ɛnee menli dɔɔnwo wɔ ɛkɛ, yɛɛ Gyisɛse noko ɛvinde ɛhɔ.
14Nzinlii, Gyisɛse nwunle nrenya ne wɔ Ɛzonlenlɛ Sua ne anu na ɔzele ye kɛ, “Nea o, kɛkala wɔde kpɔkɛ. Gyakyi wɔ ɛtane ne mɔ anzi ɛlilɛ, anrɛɛ mɔɔ kɛzi ɛ nwo zo la kɛbo zolɛ.”
15Nrenya ne hɔle na ɔhɔhanle ɔhilele Dwuu mgbanyima ne mɔ kɛ Gyisɛse a yɛle ye ayile a. 16Ɛhye ati bɛbɔle ɔ bo kɛ bɛyɛ Gyisɛse kpɔdekpɔde kɛ yeyɛ ayile wɔ Ɛnwomenlelielɛ Kenle a. 17Gyisɛse buale bɛ kɛ, “Egya yɛ gyima kenle biala, yemɔti ɔwɔ kɛ medame noko meyɛ gyima.”
18Edwɛkɛ ɛhye akee manle Dwuu mgbanyima ne nyianle adwenle kɛ ɔwɔ kɛ bɛku ye bɛye ye ɛkɛ, ɔluakɛ tɛ kɛ yetia Ɛnwomenlelielɛ Kenle ne mɛla ne angome ɔ, na eza ɔse Nyamenle le Ɔ Ze, na ɔlua adenle ɛhye azo yehile kɛ ɔ nee Nyamenle bɛsɛ.
Ralɛ ne lɛ tumi
19Yemɔti Gyisɛse zele bɛ kɛ, “Meka nɔhalɛ ne meahile bɛ: Ralɛ ne angome ɛnli ɔ ti anwo ɛnyɛ debie biala; ɔyɛ mɔɔ ɔkɛnwu kɛ Selɛ ne ɛlɛyɛ la ala angome. Mɔɔ Selɛ ne yɛ la, yɛɛ Ralɛ ne ɔdaye ɔyɛ a. 20Ɔluakɛ Selɛ ne kulo Ralɛ ne, yɛɛ ɔkile ye mɔɔ ɔdaye mumua ne ɔlɛyɛ la amuala. Ɔbahile ye ninyɛne mgbole bɔbɔ mɔɔ tɛla ɛhye mɔ la yeamaa yeayɛ, na ɔbayɛ bɛ muala azibɛnwo. 21Kɛmɔ Selɛ ne dwazo mɔwuamra na ɔmaa bɛ ngoane la, zɔhane ala yɛɛ Ralɛ ne ɔdaye ɔmaa awie biala mɔɔ ɔkulo kɛ ɔmaa ye ngoane la ngoane a. 22Selɛ ne ɔdaye mumua ne ɔmbua awie ndɛne. Yemaa Ralɛ ne tumi biala kɛ ɔbua ndɛne, 23amaa menli kɔsɔɔti ali Ralɛ ne eni, kɛmɔ bɛdi Selɛ ne eni la. Awie biala mɔɔ ɛnli Ralɛ ne eni la, ɛnli Selɛ ne mɔɔ zoanle ye la eni.
24“Meka nɔhalɛ ne meahile bɛ: Mɔɔ kɛdie me edwɛkɛ na ɔkɛlie mɔɔ zoanle me la kɛli la lɛ ngoane mɔɔ ɛnlɛ awieleɛ. Bɛnrɛbua ye ndɛne, na ɔvi ewule nu yera ngoane nu. 25Meka nɔhalɛ ne meahile bɛ: mekɛ ɛlɛba, yɛɛ yera bɔbɔ, mɔɔ mɔwuamra bade Nyamenle Ara ne ane, na bɛdabɛ mɔɔ bɛkɛde la bɛbadwazo bɛ bɛara ngoane nu. 26Kɛmɔ Selɛ ne a le ngoanemaavolɛ la, zɔhane ala yɛɛ yeyɛ Ralɛ ne ngoanemaavolɛ a. 27Eza yemaa Ralɛ ne tumi kɛ ɔbua ndɛne, ɔboalekɛ yemɔ a ɔle Sonla Ra ne a. 28Bɛmmamaa ɛhye yɛ bɛ azibɛnwo; mekɛ ɛlɛba mɔɔ mɔwuamra amuala bade ɔ ne wɔ bɛ nla ne mɔ anu, 29#Dan 12.2 na bɛvi bɛ nla ne mɔ anu bɛbavinde: bɛdabɛ mɔɔ bɛlile boɛ la badwazo na bɛanyia ngoane mɔɔ ɛnlɛ awieleɛ, na bɛdabɛ mɔɔ bɛlile ɛtane la badwazo na bɛabua bɛ ewule fɔlɛ.”
Gyisɛse dasevolɛma
30“Menva me tumi menyɛ debie biala; mebua me ndɛne kɛmɔ Nyamenle kɛze me la, yemɔti me ndɛnebualɛ ne le fɔɔnwo, ɔboalekɛ mempele menyɛ mɔɔ medame mekulo la, na meyɛ mɔɔ ahenle mɔɔ zoanle me la kpondɛ la.
31“Saa me ngome medi me nwo daselɛ a, mɔɔ menwɔha la bɛdie bɛto nu a ɔnyɛ boɛ. 32Na awie ko wɔ ɛkɛ ne mɔɔ di me nwo daselɛ a, yɛɛ meze kɛ mɔɔ ɔka ye me nwo la le nɔhalɛ. 33#Dw 1.19-27; 3.27-30 Bɛzoanle menli bɛmanle bɛhɔle Dwɔn anwo ɛkɛ ne, na ɔhanle nɔhalɛ ne anwo edwɛkɛ ɔhilele bɛ. 34Tɛ kɛ asɛɛ mekpondɛ sonla daselɛ la ati ɔ; meka ɛhye amaa bɛalie bɛ ngoane. 35Dwɔn le kɛ kɛnlaneɛ la, ɔzɔle na ɔdale, noko bɛ nye liele ye wienyi ne anu mekɛ ekyi bie ala. 36Melɛ dasevolɛ kpole bie mɔɔ ka me nwo edwɛkɛ kpalɛ tɛla mɔɔ Dwɔn hanle la. Gyima ne mɔɔ meyɛ, gyima ne mɔɔ Selɛ ne ɛva ɛmaa me kɛ menyɛ la, yemɔ a di me daselɛ kpalɛ na ɔkile kɛ Selɛ ne a zoanle me a. 37#Mat 3.17; Mak 1.11; Luk 3.22 Eza Selɛ ne mɔɔ zoanle me la ɔdaye ɔdi me daselɛ. Bɛtɛtele ɔ ne ɛlɛ, yɛɛ bɛtɛnwunle ɔ nyunlu ɛlɛ. 38Bɛnva ye edwɛkɛ ne bɛnzie bɛ ahonle nu, ɔluakɛ bɛnlie mɔɔ zoanle ye la bɛnli. 39Bɛmɛ, bɛsukoa Nyamenle Edwɛkɛ ne, ɔluakɛ bɛdwenle kɛ nuhua yɛɛ bɛkɛnwu ngoane mɔɔ ɛnlɛ awieleɛ ne a. Nyamenle Edwɛkɛ mumua ne ɔdaye ɔka me nwo edwɛkɛ. 40Noko akee bɛkpo kɛ bɛnrɛra me nwo ɛkɛ na bɛanyia ngoane.
41“Tɛ menli ayɛlɛyelɛ yɛɛ mekpondɛ a. 42Bɛmɛ, meze bɛ, meze kɛ bɛnlɛ Nyamenle anwo ɛhulolɛ nretee zɛhae wɔ bɛ ahonle nu. 43Egya tumi nu yɛɛ melua mɔɔ membale a, na bɛmɛ, bɛanlie me; na saa awie gyɛne ɔdaye ɔfa ye tumi ɔba a, bɛbalie ye. 44Bɛkpondɛ kɛ bɛkanvo bɛ ngome bɛ nwo ngoko ngoko, na bɛmpele bɛnlie nganvolɛ bɛnvi Nyamenle kokye ne ɛkɛ ne, na ɛnee kɛ ɔkɛyɛ na bɛalie me bɛali ɛ? 45Bɛmmadwenle nwolɛ kɛ mame a mebadoa bɛ meahile Egya a. Mosisi mɔɔ bɛ nye la ɔ nwo zo la a badoa bɛ a. 46Saa bɛliele Mosisi bɛlile a anrɛɛ bɛlie medame noko bɛli; ɔboalekɛ ɔhɛlɛle me nwo edwɛkɛ. 47Na kɛmɔ bɛnlie mɔɔ ɔhɛlɛle la bɛanli la, kɛ ɔkɛyɛ na bɛalie mɔɔ meka la bɛali ɛ?”
اکنون انتخاب شده:
Dw 5: NB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Nzema © Bible Society of Ghana, 1998.
