Dw 4
4
Gyisɛse nee Samɛlea raalɛ ne
1Falasiima ne dele kɛ Gyisɛse ɛlɛnyia menli dɔɔnwo azɔne bɛ, yeava bɛ yeayɛ ɛdoavolɛma adɛla Dwɔn. 2(Nɔhalɛ mɔɔ wɔ nu la a le kɛ Gyisɛse ɔdaye mumua ne yeanzɔne awie biala; ye ɛdoavolɛma ne mɔ a zɔnenle menli a.) 3Yemɔti mɔɔ Gyisɛse dele mɔɔ bɛlɛkeha la, ɔvile Dwudiya ɔziale ɔhɔle Galeli. 4Ɔkɔ la ɔvale Samɛlea maanzinli nu.
5 #
Mɔl 33.19; Dwɔ 24.32 Ɔradwule Samɛlea sua bie mɔɔ bɛfɛlɛ ye Saekaa la azo. Ɛkɛ ne nee ɛleka mɔɔ Gyekɔbo vale ye azɛlɛ ne manle ɔ ra Dwosefi la anwa biala. 6Gyekɔbo bula ne wɔ ɛkɛ ne ala, na kɛmɔ ɛnee Gyisɛse ɛvɛ la ati, ɔdɛnlanle bula ne azo. Mekɛ ne kɛyɛ sɛnzɛngyinla.
7Samɛlea raalɛ bie rale kɛ ɔbado bula ne bie, na Gyisɛse zele ye kɛ, “Maa me nzule ne bie meno.” 8(Mekɛ ne anu ɛnee ye ɛdoavolɛma ne ɛhɔ sua zo kadɔ aleɛ.)
9 #
Ɛzl 4.1-5; Nih 4.1-2 Raalɛ ne buale ye kɛ, “Ɛle Dwuunli, mele Samɛleanli. Kɛ ɔyɛ mɔɔ ɛlɛsɛlɛ me nzule ɛ?” (Dwuunli ɛnrɛva ɔ sa ɛnrɛha ɛyɛba anzɛɛ dwora mɔɔ Samɛleanli ɛli nu anzɛɛ ɛnlo nu la ɛlɛ.)
10Gyisɛse buale kɛ, “Saa ɛze kɛ Nyamenle ahyɛlɛdeɛ ne si de, nee ahenle mɔɔ ɛlɛsɛlɛ wɔ nzule ne la a, anrɛɛ wɔbiza ye wɔmaa yemaa wɔ ngoane nzule.”
11Raalɛ ne zele kɛ, “Yɛmenle, na ɛnlɛ bokiti, yɛɛ bula ye noko anu kɔ. Na ɛnee nienwu yɛɛ ɛnyia ngoane nzule ne a? 12Yɛ nlenya Gyekɔbo a manle yɛ bula ɛhye a, yɛɛ yemɔ, ɔ mra yɛɛ ye nyɛmoa nlonle nuhua nzule. Na ɛkpondɛ wɔaha kɛ wɔmɔ ɛle sonlakpole ɛtɛla Gyekɔbo ɔ?”
13Gyisɛse buale kɛ, “Awie biala mɔɔ no nzule ɛhye bie la, nzuhɔne bahu ye bieko, 14na mɔɔ kɛnlo nzule ne mɔɔ mebava meamaa ye la bie la, nzuhɔne ɛnrɛhu ye ɛlɛ. Nzule ne mɔɔ mebava meamaa ye la bahakyi nzubula wɔ ye nu mɔɔ bamaa ye ngoane nzule nee ngoane mɔɔ ɛnlɛ awieleɛ a.”
15Raalɛ ne buale kɛ, “Yɛmenle, maa me nzule ɛhye bie maa meno na nzuhɔne angu me bieko na eza meara ɛke kɛ mebaza nzule.”
16Gyisɛse zele ye kɛ, “Kɔvɛlɛ ɛ hu na ɛ nee ye bɛrɛla.”
17Raalɛ ne buale kɛ, “Mengya nrenya.”
Gyisɛse zele ye kɛ, “Saa ɛse ɛngya nrenya a ɛnee ɛle nɔhalɛ. 18Ɔluakɛ ɛdawɔ mumua ne wɔhɔ agyalɛ nnu, yɛɛ nrenya ne bɔbɔ mɔɔ ɛ nee ye de kɛkala la, tɛ ɛ hu ɔ. Wɔha nɔhalɛ bɔkɔɔ.”
19Raalɛ ne zele kɛ, “Yɛmenle, menea wɔ a ɛle Nyamenle kpɔmanvolɛ. 20Me nlenya mɔ Samɛleama zonlenle Nyamenle wɔ boka ye azo, na bɛmɛ Dwuuma bɛse Gyɛlusalɛm ala a le ɛleka mɔɔ ɔwɔ kɛ bɛsonle Nyamenle a.”
21Gyisɛse zele ye kɛ, “Ɔmɔ, die me di, mekɛ bara mɔɔ menli ɛnrɛzonle Selɛ ne wɔ boka ye azo anzɛɛ wɔ Gyɛlusalɛm a. 22Nɔhalɛ, bɛmɛ Samɛleama, bɛnze mɔɔ bɛsonle ye la, na yɛmɛ Dwuuma, yɛze mɔɔ yɛsonle ye la. Ɔboalekɛ ngoanelielɛ kɛra a ɔvi Dwuuma. 23Na mekɛ ne ɛlɛba, yɛɛ yedwu bɔbɔ, mɔɔ ɛzonlenlɛma kpalɛ ne bazonle Selɛ ne wɔ sunsum nu nee nɔhalɛ nu a. Ɔluakɛ kɛ Selɛ ne kpondɛ kɛ bɛsonle ye la ɛne. 24Nyamenle le Sunsum, yemɔti ɔwɔ kɛ bɛdabɛ mɔɔ bɛsonle ye la bɛsonle ye wɔ sunsum nu nee nɔhalɛ nu.”
25Raalɛ ne hanle kɛ, “Meze kɛ Mɛzaya ne mɔɔ bɛfɛlɛ ye Kelaese ne la bara. Saa ɔba a, ɔbaha mɔɔ ɔwɔ ɛkɛ ne la amuala yeahile yɛ.”
26Gyisɛse buale ye kɛ, “Medame a me nee wɔ ɛlɛtendɛ la.”
27Mekɛ ne anu ala yɛɛ Gyisɛse ɛdoavolɛma ne ziale rale a, na ɔyɛle bɛ azibɛnwo kpole kɛ ɔ nee raalɛ ɛlɛtendɛ a. Na bɛ nuhua biala angola ambiza raalɛ ne kɛ, “Duzu yɛɛ ɛkpondɛ a?” na bɛabiza Gyisɛse kɛ, “Duzu ati a ɛ nee raalɛ ne ɛlɛtendɛ a?”
28Na raalɛ ne gyakyile ye nzule buakɛ ne ɛkɛ, ɔziale ɔhɔle na ɔhɔhanle ɔhilele sua ne azo amra kɛ, 29“Bɛrɛla bɛranlea awie bie mɔɔ ɛha debie biala mɔɔ meyɛ la ɛhile me a. Asoo tɛ yemɔ a ɔle Mɛzaya ne?” 30Yemɔti menli dule twi, bɛvi sua ne azo bɛrale ɛleka mɔɔ Gyisɛse wɔ la.
31Mekɛ ne anu ɛnee ɛdoavolɛma ne gua zo ɛlɛkpa Gyisɛse kyɛlɛ kɛ, “Kilehilevolɛ, bakpula ɛ sa!”
32Na ɔbuale bɛ kɛ, “Melɛ aleɛ medi mɔɔ bɛnze a.”
33Yemɔti ɛdoavolɛma ne mɔ bɔle ɔ bo kɛ bɛbizebiza bɛ nwo kɛ, “Ɛnee awie ɛrɛlɛ ye aleɛ ɔ?”
34Gyisɛse zele bɛ kɛ, “Me aleɛ a le kɛ menwɔli mɔɔ zoanle me la ɛhulolɛdeɛ zo na menwɔwie gyima mɔɔ ɔvale ɔmanle me kɛ menyɛ la yɛ. 35Bɛmɛ bɛse, ‘Yeha siane nna na ɛbuhenle ne adwu.’ Na meka meahile bɛ kɛ bɛdo bɛ nye bɛnlea ɛya nu lɔ boɛ; nzoleɛ ɛbolo, na yedwu mɔɔ ɔwɔ kɛ bɛbu a. 36Mɔɔ bu bɛyɔba ne la bɛtua ye kakɛ na ɔsoa nzoleɛ ne ɔkɔ ngoane mɔɔ ɛnlɛ awieleɛ la anu, amaa mɔɔ dua nee mɔɔ bu la abɔ nu ali fɛlɛko. 37Ɛrɛlɛ ne le nɔhalɛ bɔkɔɔ, ‘Ko dua na ko bu.’ 38Mezoa bɛ kɛ bɛhɔva bɛyɔba wɔ ɛya mɔɔ bɛanyɛ nuhua gyima la anu; awie mɔ gyɛne a yɛle nuhua gyima a, na bɛmɛ, bɛnyia menli zɔhane mɔ anwo nvasoɛ.”
39Samɛleama dɔɔnwo mɔɔ wɔ sua ne azo la liele Gyisɛse lile, ɔboalekɛ raalɛ ne lile daselɛ kɛ, “Yeha debie biala mɔɔ meyɛ la yehile me.” 40Yemɔti mɔɔ Samɛleama rale Gyisɛse anwo ɛkɛ ne la, bɛzɛlɛle ye kɛ ɔ nee bɛ ɛradɛnla, na ɔ nee bɛ dɛnlanle kenle nwiɔ.
41Bie mɔ dɔɔnwo noko liele ye lile wɔ ɔ nloa edwɛkɛ ti, 42na bɛhanle bɛhilele raalɛ ne kɛ, “Kɛkala, tɛ mɔɔ ɛhanle la ati yɛɛ ɛmaa yɛlie ye yɛli a. Yɛlie ye yɛli, ɔluakɛ yɛdayɛ noko yɛde ɔ nloa edwɛkɛ yɛ nzo nu na yɛnwu kɛ amgba yemɔ a ɔle ewiade Ngoanedievolɛ ne a.”
Gyisɛse yɛ arane abɔlɔba ko ara nrenya ayile
43Gyisɛse lile kenle nwiɔ wɔ ɛkɛ ne la, ɔvile ɛkɛ ne na ɔhɔle Galeli, 44#Mat 13.57; Mak 6.4; Luk 4.24 ɔluakɛ Gyisɛse ɔdaye mumua ne yeha ye ɛlɛ kɛ, “Nyamenle kpɔmanvolɛ biala ɛnlɛ ɔ nyunlu wɔ ɔdaye ye maanle nu.” 45#Dw 2.23 Na mɔɔ ɔdwule Galeli la, menli mɔɔ wɔ ɛkɛ ne la liele ye gyɛlɛɛnye, ɔluakɛ Akpabɛnwo Ɛvoyia ne mɔɔ bɛlile wɔ Gyɛlusalɛm la, bɛhɔle bie na bɛnwunle debie biala mɔɔ ɔyɛle wɔ ɛvoyia ne abo la.
46 #
Dw 2.1-11
Akee Gyisɛse ziale hɔle Galeli sua ne mɔɔ bɛfɛlɛ ye Kana la azo bieko, ɛleka mɔɔ ɔhakyile nzule ne nwanye la. Arane abɔlɔba bie wɔ ɛkɛ mɔɔ ɔ ra wɔ Kapɛnayɛm na ɔnde kpɔkɛ a. 47Ɔdele kɛ Gyisɛse vi Dwudiya ɛra Galeli la ɔhɔle ɔ nwo ɛkɛ ne na ɔzɛlɛle ye kɛ ɔmaa bɛhɔ Kapɛnayɛm na ɔhɔyɛ ɔ ra ne ayile, ɔluakɛ asɛɛ yewu. 48Gyisɛse zele ye kɛ, “Bɛmɛ, bɛ biala ɛnrɛlie ɛnrɛli ɛlɛ kyesɛ bɛnwu nwanwane sɛkɛlɛneɛ mgbole bie.”
49Abɔlɔba ne hanle kɛ, “Yɛmenle, mesɛlɛ wɔ, maa yɛhɔ na me ra ne kɛwu.”
50Gyisɛse zele ye kɛ, “Kɔ na ɛ ra ne ɛde kpɔkɛ.”
Nrenya ne liele Gyisɛse edwɛkɛ ne lile, na ɔhɔle.
51Ɔlua adenle zo mɔɔ ɔlɛkɔ la, ye sonvolɛma nee ye yiale na bɛhanle kɛ, “Ɛ ra ne ɛde kpɔkɛ.”
52Ɔbizale bɛ mekɛ mɔɔ ɔ ra ne dele kpɔkɛ la, na bɛhanle kɛ, “Anoma ewiazo dɔne ko yɛɛ ɛyɛlɛyɛlɛ ne dule a.” 53Nrenya ne hakyele kɛ zɔhane mekɛ ne anu ala yɛɛ Gyisɛse hanle hilele ye kɛ, “Ɛ ra ne ɛde kpɔkɛ” a. Yemɔti ɔ nee ye sua nu amra amuala liele lile.
54Ɛhye a le nwanwane gyima kpole mɔɔ tɔ zolɛ nwiɔ mɔɔ Gyisɛse vi Dwudiya rale Galeli la ɔyɛle a.
اکنون انتخاب شده:
Dw 4: NB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Nzema © Bible Society of Ghana, 1998.
