Amatiyu 17
17
Ozhiozhiŋ
1Ambla ba elum efĩ nga, Eyesua da Ebitru, ta la Eyakubu, ta la Eyohana, moaha a wo moanáŋ angyiŋ, moa pyeŋ a vre akũ ka la ŋa. 2Omba ba moa a ka Eyesu nga, aŋa a zhiŋ. Eyayi baŋ e zhiŋ e dzu ekyle lalalaŋ eka olum. Aknye baŋ nga a shka ayi leleleŋ eka ayimom. 3Moanwyeotum atra he lo a ka Omusa, ta la Eliya, moa a kpla egba ta la Eyesu. 4Ebitru nga a ta enzi a lu a da Eyesu a lu mi le, Aŋo Adigi-odne, o wo odzi o gre eshri ba agi e wo ahe. O wo boŋ o bmi le, ame é ta abro atra ahe. Akyeŋ okyku ŋo, akyeŋ okyku Omusa, nga akyeŋ okyku Eliya. 5Omba baŋ a kpla egba eka he lo nga, etabro la e shka ayi leleleŋ e gile eshri mo, nga enzi e zgi ma e lu mi le, Anwye ba esesla ba ame a gno oraŋ ka la ŋa e gre eshri angyiŋ, a wo ahi lo. Agimi e ngli atuŋ e gno odlo baŋ! 6Omba moanwyeotum a gno enzi he lo nga, eyli e kpo mo e gre eshri, nga moa a kʼpu obiŋ a zhiŋ ayi a ka obiŋ. 7Eyesu a ba okro mo, a tka mo nga a lu mi le, Agimi e kso, e da eyli e kpo gimi mbo! 8Moa a zhiŋ ayi a ka ongyeŋ, ambo moa a ka arekyeŋ mbo, o wo le Eyesu sha.
9Omba ba moa a gile a sku akũ lo a khwo nga, Eyesu a shĩ mo a lu mi le, Agimi e lu ekplokyeŋ eshri okoka ba agimi e ka hi, e da arekyeŋ mbo, o wo le moa a da Anwye Arehwĩ a kso ongybi ayga. 10Ambla he nga moanwyeotum a zhĩ Eyesu a lu mi le, Okyku eshi moare la a nye odaŋ a lu mi ma Eliya á ba a ba ori? 11Eyesu a tno ma a lu mi le, O wo eka he a mi. Eliya angyiŋ á ba a ba ori, okyku o daŋ a nyuŋ ekployaŋ a mbo a vu abgo. 12Ambo ame e lu e da gimi, Eliya a sheŋ a ba bgu, ambo moarehwĩ a bmi ka la ŋa mbo, nga moa a kpo ŋa efye eka moa a klo. Moa á kpo Anwye Arehwĩ a mbo ekakahelo. 13Ambla he nga moanwyeotum baŋ a ka a bmye baŋ a ta egŋe eshri Eyohana la a kpo abaptisma angyiŋ.
Eyesu a shaŋ anwye ba ogbgabi o kpo otum ka la ŋa
14Omba ba moa a bla a ba okro eshki nga, alomakyeŋ a ba okro Eyesu nga a kʼpu obiŋ egi ayi baŋ. 15A lu mi le, Andakʼpo, aŋo o ka anwye me ayiekŋe! Aŋa a gbu andom. Ombamba alo o la o vu ŋa. A kpo nga a tsu a gbu ovo, ta la ami. 16Ame e shri ŋa e ba okro moanwyeotum boŋ okyku o da mo a shaŋ ŋa, ambo moa a shaŋ ŋa a gbu mbo. 17Eyesu a tno mo ma a lu mi le, Agimi e wo la obmi ba adlidzi ma mbo, nga eshri bimi e shye e gre eshri! Agimi e klo ba ame e dzu ka la gimi ma-me e gbu omba ekayaŋ? Agimi e klo ba ame e kpo ble-ble anyu ka la gimi? Aŋo o shri anwye lo o ba okro me! 18Eyesu a shrom ogbgabi lo, nga o zgi anwye lo nga aŋa a shaŋ omba he lo.
19Moanwyeotum baŋ a ba okro baŋ shu nga moa a zhĩ ŋa a lu mi le, Okyku eshi agi e kpo e gbu e se ogbgabi lo mbo? 20Eyesu a tno ma a lu mi le, Alo o kpo eka he okyku bimi e bli la obmi ba adlidzi mbo angyiŋ. Agimi e ngli e gno, o wo bimi e wo la obmi ba adlidzi la o wo etsitsi eka eyi ba amastad sha a mbo, agimi e kpo e gbu bimi e lu ta la akũ hi e lu mi le, O gʼbu ahe o yi a mi. Alo á gʼbu. Nga agimi é kpo é gbu ba o kpo ekployaŋ a mbo! [ 21Olu, ta la onyomshrialgo sha o kpo o gbu ba alo o kpo o ghwo o da mo a se ogbgabi. Ozhẽ-okyeŋ o wo ma nga mbo.]
Eyesu a lu odlo eshri eku baŋ
22Ambla moanwyeotum pyeŋ a ba Egalili, Eyesu a nyuŋ mo a lu mi le, Omba o ra nzenze ba moa á ba a shri Anwye Arehwĩ á shri á da moare mbo. 23Moare he lo á bga ŋa, nga olum otra Ahogbrẽ á kso ŋa ongybi. Esõ e byli moanwyeotum baŋ e gre eshri.
Ewaŋ ba Anyuŋ-akulu
24Omba ba Eyesu, pa la moanwyeotum baŋ a ba Akafanahum, moa la a yga ewaŋ ba Anyuŋ-akulu moa a ba okro Ebitru nga moa a zhĩ ŋa a lu mi le, Andakʼpo boŋ a la a hre ewaŋ ba Anyuŋ-akulu a mi? 25Ebitru a tno ma a lu mi le, Eka he a mi la. Omba ba Ebitru a gre odne nga, Eyesu a zhĩ ŋa a lu mi le, Esima, aŋo o ka anyu? Ayi angyiŋ a la a hre ewaŋ ba anzho, o mbo le ewaŋ, a la a da moareŋ ba obiŋ hi? Moanwye-obiŋ lo angyiŋ le, moazhẽ? 26Ebitru a tno ma a lu mi le, Moazhẽ angyiŋ. Eyesu a tno ma a lu mi le, O wo ba alo o wo eka he angyiŋ le, o wo eheŋ-ekyeŋ ba moanwye-obiŋ a hre mbo. 27Ambo agi e klo e tpi moare he esõ ayi mbo, okyku eka he, aŋo o sko okugya boŋ o yi o ta atsa atam. O se atsa ba oriori boŋ o vu. Aŋo ó hwiŋ amgbaŋ anyu atsa la á ba a tse ma okyku ewaŋ me ta la e boŋ. Aŋo o shri lo o hre.
اکنون انتخاب شده:
Amatiyu 17: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
