Amatiyu 16
16
Moa a zhĩ okyku akplo ba egbregbre
1MoaEfarisi, pa la moaEsaduki, moa a ba okro Eyesu. Moa a klo o kpyi ŋa. Okyku eka he nga moa a zhĩ ŋa okyku o daŋ a kpo ekplo egbregbre la é tsa baŋ a wo arehwĩ ba Ahogbrẽ a hom ŋa otum. 2Ambo Eyesu a tno mo ma a lu mi le, Omba ba olum o la o gbu le, agimi e la e lu mi le, Akyi a yi á kre adzadzi okyku ba ahrẽ a wo zheŋ. 3Nga endigigiŋ agimi e la e lu mi le, Ogbu ó ba okyku ba ogbu o hwĩ. Agimi e kpo e gbu bimi e ka e bmye eka ba ahrẽ a wo omba bimi e ka lo, ambo agimi e kpo e gbu bimi e lu akplo-kyeŋ eshri egbregbre ayakplo la a kpo omba he mbo! 4Moarehwĩ ba ekplu hi moa a wo abi a gre eshri, nga moa a yi Ahogbrẽ mbo ku-ku! Eyesu a sa a lu a ta ma-ma a lu mi le, Agimi e zhĩ me okyku ekplokyeŋ ba egbregbre? Ame é shri ekplokyeŋ ba egbregbre é shri é da gimi mbo, o wo le ekplo egbregbre ba Oyunana a kpo dne ame e klo bimi e tne aga lo. Ambla he nga, a kso a dzu mo a zga nga a gre eŋa.
Eyist ba moaEfarisi pa la moaEsaduki
5Omba moanwyeotum a bmyi atam a yi a gre ongre ohwõ, moa a gre esõ a ghre moa a sko agbrotsa mbo. 6Eyesu a nyuŋ mo a lu mi le, Agimi e nyuŋ e kpo-kpo ta la eyist moaEfarisi, pa la moaEsaduki. 7Moa a gno eka he a khwo nga moa a lu ta la emo a lu mi le, Aŋa a la a lu eka he okyku bi e shri agbrotsa mbo angyiŋ. 8Eyesu a yi ekplo moa a lu, okyku eka he a zhĩ mo a lu mi le, Okyku eshi agimi e lu odlo eshri agbrotsa, eshri odlo ba ame e lu hi ta la egimi? Obmi ba adlidzi bimi o wo fi sha eka he angyiŋ? 9Ma-me o ta ohuhuhi agimi e ka e bmye a wo mbo? Agimi e gre esõ e ghre eka ba ame e vgi moare ezbietno la agbrotsa atno? Ekplo la e ra nga e bli aksu ahrẽ? 10Agimi e ka, moa a vgi moare ezbienyi la agbrotsa afoha mbo? Ekplo la e ra e bli aksu ahrẽ? 11Okyku eshi angyiŋ agimi e sko odlo ba ame e lu ka la gimi hi, e shri e zga eshri agbrotsa? Agimi e nyuŋ e kpo-kpo ta la eyist moaEfarisi, pa la moaEsaduki! 12Omba he lo, moanwyeotum baŋ a ka a bmye baŋ a ta egŋe eshri eyist ba moa a shri a ygi agbrotsa angyiŋ mbo, ambo moa a ka a tspi baŋ a ta egŋe eshri onyenye moaEfarisi, pa la moaEsaduki.
Ebitru a ka Eyesu a bmye
13Eyesu a gre ogʼba obiŋ la o wo osusku ta la osku ba Esizariya Efilibi. Ahe lo Eyesu a zhĩ moanwyeotum baŋ a lu mi le, Moare a la a bzi Anwye Arehwĩ ma ayi? 14Moa a tno ŋa ma a lu mi le, Moakyeŋ a la a bzi ŋo ma Eyohana la a kpo abaptisma, moakyeŋ nga moa a la a bzi ŋo Eliya, moakyeŋ nga moa a la a bzi ŋo Erimiya, moakyeŋ a la a lu ma aŋo o wo arekyeŋ ba Ahogbrẽ a hom ŋa otum angyiŋ. 15Eyesu a zhĩ mo a lu mi le, Agimi e la e bzi me ma ayi? 16Esima Ebitru a tno ŋa ma a lu mi le, Aŋo angyiŋ o wo Emisiya Anwye ba Ahogbrẽ la a wo la esõ ma. 17Eyesu a nyuŋ Ebitru a lu mi le, Aŋo Esima, anwye Eyohana, oraŋ o wo ma okyku ŋo nzenze. O ka, arehwĩ angyiŋ a tsa ŋo adlidzi hi lo mbo, ambo Adugu la a wo Ongyeŋ angyiŋ a tsa ŋo alo. 18Okyku eka he ame e lu e doŋ, Ebitru, aŋo o wo ezhim angyiŋ. Nga ame é mbdzi akulu me ezhim hi lo. Eku a mbo é kpo é gbu ba alo é ba e kpo é gre lo mbo. 19Ame é shri emakuli ba Oreŋ Ongyeŋ é shri é doŋ. Ekplo boŋ o tla lo obiŋ hi, moa á tla lo a mbo Ongyeŋ. Ekplo boŋ o bmi ta la alo obiŋ hi, moa á bmi ta la lo Ongyeŋ. 20Ambla he nga Eyesu a shĩ moanwyeotum baŋ a lu mi le, Agimi e lu e da arekyeŋ ba ame angyiŋ, e wo Emisiya mbo.
Eyesu a lu eka moa á kpo ŋa ewu nga á bga ŋa
21A zga omba he lo nga, Eyesu a lu odlo pim pa la moanwyeotum baŋ a la a lu mi le, O dzu omgbybi ba ame é ba e yi Orushalima, nga ba ame é ba e kpo ewu abgo moandakʼpo, pa la moandakʼpo olu ba Ahogbrẽ, pa la moa la a nye odaŋ. Moa á bga me, ambo olum otra nga moa á kso me ongybi. 22Ambla he nga Ebitru a shri Eyesu a gre agba-kyeŋ nga a shrom ŋa a lu mi le, Ahogbrẽ a nyom ekplo hi lo, aŋo Adigi-odne! Ohi lo ó kpo ka la ŋo mbo ku-ku! 23Eyesu a zhiŋ ayi a ka Ebitru nga a nyuŋ ŋa a lu mi le, Aŋo Eshitaŋ! O kye o sku me! Aŋo o dzu oyla angyiŋ pa la me, okyku eshi aga boŋ hi a wo aga ba arehwĩ angyiŋ, a wo aga ba Aho-gbrẽ angyiŋ mbo!
24Eyesu a sa a lu pa la moanwyeotum baŋ a lu mi le, O wo ba are a klo o lu me ma le, aŋa a shri eshri baŋ a ndba nga a bmi o kpo ewu ma-me la eku a mbo okyku me, nga a lu me ma. 25Are la a klo o kpo ekployaŋ a mbo okyku ohwihwiŋ ba eshri baŋ sha le, á yla. Ambo are la a shri eshri baŋ a ndba okyku me le, á hwiŋ esõ. 26O wo ba arehwĩ a hwiŋ ohwihwiŋ obiŋ hi pyeŋ, ambo o wo ba esõ baŋ é ba e yla le, o wo ekplokyeŋ angyiŋ? O wo ekplokyeŋ tsitsi a mbo mbo! Ekplokyeŋ e wo ma ba are a shri a di okyku o daŋ a sa a hwiŋ esõ baŋ mbo. 27Omba o wo osusku a mo ba Anwye Arehwĩ á ba a ba la ayimom ba esesla ba Adaŋ, ta la moanwyeadga ba Adaŋ. Omba he lo angyiŋ, á ba a shri egbre areyaŋ a mbo á ba a shri á daŋ eka otum ba are a kpo obiŋ hi. 28Agimi e tne aga e ka! Moakyeŋ eshki hi, moa á kpu mbo, o wo le moa á ka obaba ba Anwye Arehwĩ á ba a ba eka Areŋ ayga.
انتخاب شده:
Amatiyu 16: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
