Oluka 20
20
Moa a zhĩ Eyesu eshri ekʼpo baŋ
1Ondakyeŋ nga, omba ba Eyesu a wo Anyuŋ-akulu a la a nye moare nga a la a nyum oshpa, moadakʼpo olu ba Ahogbrẽ, pa la moa la a nye odaŋ pa la moandakʼpo moa a ba okro Eyesu. 2Moa a nyuŋ ŋa a lu mi le, O lu o da gi, la ekʼpo ayi aŋo o kpo ayakplo egbregbre eka he? Ayi a shri ekʼpo he lo a doŋ? 3Eyesu a tno mo ma a lu mi le, Ohuhuhi e da me a mbo e zhĩ gimi akplokyeŋ. Agimi e tno me ma. 4Eyohana a la a kpo abaptisma la ekʼpo Ahogbrẽ le, la ekʼpo arehwĩ? 5Ambla he nga, moa a sla emo a kla a lu mi le, Agi é tno ma é lu la eshi? O wo bi e tno ma e lu ma Eyohana a hwiŋ ekʼpo baŋ okro Ahogbrẽ angyiŋ le, á lu mi le, O wo eka he bgu le, okyku eshi agimi e bmi ba adlidzi ta la Eyohana mbo? 6Ambo o wo bi e lu mi le, Aŋa a hwiŋ lo okro ba arehwĩ angyiŋ le, eshki hi é tra gi ézhim, okyku eshi moa a bmi ba adlidzi ba Eyohana a wo arehwĩ ba Ahogbrẽ a hom otum angyiŋ. 7Okyku eka he nga, moa a tno ma a lu mi le, Agi e yi okro baŋ a hwiŋ ekʼpo he lo ma mbo. 8Eyesu a tno mo ma a lu mi le, Ame a mbo é lu ekplokyeŋ eshri ekʼpo ame e la e kpo ayakplo hi, é da gimi mbo.
Egŋe eshri ba agbi
9Ambla he nga Eyesu a ta egŋe he a ygi moare. A lu mi le, Alomakyeŋ a wo la agbi ma. A shri lo a ghwo moarekyeŋ abgo, nga a kso odne a gre a yi a dga egi ehwõ ma-me. 10Omba ba moa a yla algo agbi nga, a hom awaghrẽ baŋ otum okro moare he lo, okyku o daŋ a yga ogʼba baŋ a shri a kom ŋa. Ambo moare he lo a bga awaghrẽ lo andzu nga moa a kyku ŋa a daŋ a gre la abgo ototno. 11Areagbi a da awaghrẽ ahwõ a sa a gre. Moa a sa a bga ahe lo a mbo andzu, moa a kpo ŋa efye nga moa a kyku ŋa a daŋ a gre la abgo ototno. 12A da awaghrẽ ba otra a gre. Moare he lo a zhga ŋa egʼba, nga moa a kyku ŋa. 13Areagbi lo nga a zhĩ a lu mi le, Ame é kpo eshi a mo? Ame é da anwye me ba eso me a yi okro mo. Ame e yi zhezheŋ moa á ka olbi baŋ! 14Ambo omba ba moare he lo a ka ŋa nga, moa a lu ta la emo a lu mi le, O ka, ahe lo angyiŋ a wo anwye baŋ. Okyku eka he, agi e bga ŋa nga le okyku o da agbi lo a dzu la gi! 15Okyku eka he nga, moa a se anwye lo a sku agbi nga moa a bga ŋa a ta okom.
Eka bimi e ka, areagbi á kpo moare he lo eshi? 16Eyesu a lu mi le, Areagbi á ba a bga moare he lo, nga á shri agbi á ghwo abgo moare alahe. Ambo omba ba moare a gno eka he nga, moa a lu mi le, O wo eka he tsitsi a mbo mbo! 17Eyesu a ka mo nga a lu mi le, Eshyẽ ba odlo hi e wo eshi? Akpa ba Ahogbrẽ a lu mi le,
Ezhim ba moa la a mbdzi a tla lo a ta eka ba alo e wo la ekplokyeŋ mbo,
E zhiŋ e dzu ezhim la e wo la owlama e gre pyeŋ.
18Areyaŋ a mbo la á tsu a gbu ezhim lo, é tsoŋ ŋa agbu. Nga o wo ba ezhim lo é gbu arekyeŋ le, é sha are he lo rerereŋ.
Ozhiozhĩ eshri ewaŋ
19Moa la a nye odaŋ, pa la moandakʼpo olu ba Ahogbrẽ, moa a klo o vu Eyesu omba he lo, okyku moa a ka a tspi ba Eyesu a ta egŋe he lo eshri mo angyiŋ. Ambo moa a kpo eyli moare. 20Okyku eka he moa a dzu ŋa a zga okyku o da mo a hwiŋ omba la o wo odzi ayga. Moa a fu moarekyeŋ ashum okyku o da mo a kpo eka ba moa a wo la adlidzi ma, nga okyku o kpyi Eyesu la ozhiozhĩ, nga o vu ŋa o yi okro moandakʼpo ta la Ogomna. 21Moare la a kpyi ŋa he lo, moa a nyuŋ ŋa a lu mi le, Andakʼpo, agi e yi ba ayakplo boŋ o la o nye a wo adlidzi angyiŋ. Agi e yi boŋ o kpo eyli arehwĩ mbo, nga boŋ o nye adlidzi ba odlo Ahogbrẽ okyku moarehwi. 22Aŋo Eyesu, o lu o da gi, ozhẽ odaŋ bi, o raŋ o gre ba agi e hre ewaŋ e da Ekeza le, la o raŋ o gre mbo? 23Ambo Eyesu a ka a bmye ba moa a klo o kpyi ŋa, nga a nyuŋ mo a lu mi le, 24Agimi e shri eyiamgbaŋ e da me e ka. A zhĩ mo a lu mi le, Eshri ayi ta la eshko ayi e wo eyiamgbaŋ lo? Moa a tno ma a lu mi le, Eshri ba Ekeza angyiŋ e wo ma. 25Eyesu a tno mo ma a lu mi le, Okyku eka he, agimi e hre ekplo la e wo e ba Ekeza, e da Ekeza, nga e hre ekplo la e wo e ba Ahogbrẽ, e da Ahogbrẽ. 26Moa a hwiŋ ozhẽ ba o vu ŋa mbo egi ayi moarehwi. Okyku eka he, moa a dzu emo tki nga, moa a ka egbregbre ta la otnoma baŋ.
Ozhiozhĩ eshri oksongybi
27MoaEsaduki a ba okro Eyesu. Moahi lo a bmi ta la oksongybi mbo. Moa a zhĩ Eyesu a lu mi le, 28Andakʼpo, Omusa a ta odaŋ a da gi a lu mi le, O wo ba arekyeŋ a kyu ashe nga baŋ a kpu nga a dzu ashe a zga, nga baŋ a hwiŋ anwye mbo le, o raŋ o gre ba anáŋ are he lo a sko ashe-eshaku lo a kyu, okyku o daŋ a mbre moanwye a zga ogu ba are la a kpu. 29Ombakyeŋ nga moanáŋ afoha a wo ma. Andakʼpo a kyu ashe, a hwiŋ anwye ayga a kpu mbo. 30Ambla he, anáŋ ba ori a sko ashe-eshaku he lo. 31Ekakahelo e kpo ta la anáŋ ba oha, ma-me ta la a ba afoha a mbo. Moa a kpu nga, moa a dzu moanwye a zga mbo. 32Ambla ekpyemgbyeŋ nga ashe lo a mbo a kpu. 33Onda moa á ba a kso ongybi le, ashe he lo á dzu ashe ba ayi eshki mo? O ka, moare afoha angyiŋ a kyu ŋa!
34Ambo Eyesu a tno mo ma a lu mi le, Moarealom, pa la moashe ba ekplu hi a la a kyu eble, 35ambo moarealom, pa la moashe la a tse ma ba moa á ba a kso mo ongybi nga moa á ba a dzu ma omba mi lo, moa á kyu eble nga mbo. 36Moa á dzu eka moanwyeadga ba Ahogbrẽ, moa á kpu mbo. Moa á dzu moanwye Ahogbrẽ a mo, okyku eshi moa a sheŋ a kso mo ongybi. 37Omusa a mbo a sheŋ a wre lo pim eka ba moa á ba a kso areyaŋ a mbo ongybi. Okro ba moa a ta odlo eshri akla la a ri ovo, Omusa a lu odlo eshri Adigi-odne eka baŋ a wo Ahogbrẽ ba Ebrahim ta la Ahogbrẽ ba Eshaku ta la Ahogbrẽ ba Eyakubu. 38Ohe lo o tsa ba Ahogbrẽ a wo Ahogbrẽ moa la a wo la eso ma, baŋ a wo Ahogbrẽ moa la a kpu angyiŋ mbo. Moa la a wo la eso ma pyeŋ, moa a hwiŋ lo okyku ŋa. 39Moakyeŋ eshki moa la a nye odaŋ a lu angyangyeŋ a lu mi le, Andakʼpo! Aŋo o tno ma adzadzi! 40Ambla he nga moa a kpo a gbu a zhĩ Eyesu odlokyeŋ nga mbo.
Odlo eshri ba Emisiya
41Eyesu a nyuŋ mo a lu mi le, Ekayaŋ moa a lu ma Emisiya a wo a ba ogu ba Adawuda? 42Okyku eshi Adawuda eshrishri eŋa a lu akpa ba Ohlueshko a lu mi le,
Ahogbrẽ a nyuŋ Adime-odne a lu mi le,
Aŋo o dzu obgori me,
43O tsa ba ame e da moafpu ŋo á ba a tsu á gbu egi ayi boŋ.
44Adawuda a mbo a bzi ŋa Adigi-odne. A kpo anyu a sa a dzu a ba ogu ba Adawuda?
Eyesu a lu ma moa a nyuŋ a kpo-kpo pa la moa la a nye odaŋ
45Omba moare pyeŋ a la a ngli atuŋ a gno odlo baŋ a nyuŋ moanwyeotum baŋ, Eyesu a lu mi le, 46E nyuŋ e kpo-kpo pa la moa la a nye odaŋ. Moa a la a klo o dzi la anyuŋ ariga mo, nga a klo o da moare a shko mo la anyuanyuŋ ekyku. Nga a la a sla ekro moandakʼpo a dzu ma anwyea-kulu, ta la okro moa a kpo abgo ma. 47Moa a la a kpgo moashe-eshaku nga a ngʼga mo adne mo. Nga moa a la a fa olu la odzodzõ okyku o da moarehwi a ka mo. Egbre mo é vu olo é gre moahwõ.
اکنون انتخاب شده:
Oluka 20: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
