Oluka 19
19
Eyesu ta la Azaka
1Eyesu a sõ osku ba Ejeriko. 2Osku he lo alomakyeŋ a wo ma, eshko baŋ e ri Azaka. A wo andakʼpo moa la a yga ewaŋ, nga a wo la angyiŋ nzenze ma. 3Eshki e wo ma nzenze. Aŋa nga a klo o ka Eyesu, ambo a ka ŋa a gbu mbo okyku eshi a hlu mbo. 4Okyku eka he, a knye a yi a vre anva okyku o daŋ a ka Eyesu omba baŋ a bre a yi. 5Omba ba Eyesu a bre a yi nga, a ka Azaka esĩ anva lo ongyeŋ nga a bzi ŋa a lu mi le, Azaka, o gile shoshoŋ, ame é yi odne boŋ anye hi. 6Azaka a gile nga a yga Eyesu la ovyevye. 7Moare pyeŋ la a ka ŋa a nyi agla a lu mi le, Are he lo a gre odne ba are odlobi! 8Moa a gre odne a khwo nga, Azaka a kso a nyuŋ Eyesu a lu mi le, Andakʼpo o ngli o gno! Ame é gʼba angyiŋ me aha nga é shri é da moaekŋe. O wo ba ame e kpgo arekyeŋ le, ame é nyiŋ ema lo é daŋ engyi enyi. 9Eyesu a tno ma a lu mi le, Oshla o gre o ba odne he lo anye. Are he lo a mbo a wo a ba ogu ba Ebrahim. 10Eyesu a tno ma a lu mi le, Anwye Arehwĩ a ba okyku o klo nga o shla moaedlobi.
Egŋe eshri ba Enaira
11Omba ba Eyesu a wo osusku ta la osku Orushalima, a ta egŋe eshri Enaira, a da moare la a wo ka la ŋa. Moare a ka ma Oreŋ Ahogbrẽ o wo osusku a mo. 12Eyesu a ta egŋe a lu mi le, Andakʼpokyeŋ a wo ma, a gre oskukyeŋ ogyugyuŋ okyku o da mo a shri oreŋ a daŋ. Omba baŋ a ba nga le, á ri oreŋ baŋ. 13Omba baŋ á kso nga, a bzi moawaghrẽ baŋ okʼpo, nga a shri Enaira a da ayaŋ a mbo eshki mo. A nyuŋ mo a lu mi le, Agimi e la e kpo egbmo ta la alo, okyku o da gimi e hwiŋ otama o tsa ba ame e ba. 14Moare obiŋ ba andakʼpo he lo a klo ŋa mbo. Okyku eka he, ambla baŋ a sheŋ a gre a khwo nga, moa a hom otum a lu ŋa okũ a lu mi le, Agi e klo boŋ o dzu areŋ bi mbo.
15Omba ba andakʼpo he lo a hwiŋ oreŋ a khwo nga a bla a ba obiŋ baŋ. Ambla baŋ a ba nga, a da mo a bzi moawaghrẽ baŋ okʼpo lo, okyku o da mo a shri ekplo moa a hwiŋ a daŋ a ka. 16Awaghrẽ ba ori a ba a lu mi le, Andakʼpo, ame e hwiŋ Enaira okʼpo e ta Enaira okyeŋ boŋ o shri o da me. 17Areŋ a lu mi le, Ame e shko ŋo e gre eshri. Aŋo o wo awaghrẽ adzi. Ame é doŋ ó ri ekʼpo esku okʼpo, okyku eshi aŋo o tsa me adlidzi ekplo la e wo ple. 18Awaghrẽ ba oha a ba a lu mi le, Andakʼpo, ame e hwiŋ Enaira etno e ta Enaira ekyeŋ boŋ o shri o da me. 19Areŋ a nyuŋ awaghrẽ he lo a lu mi le, Ame é doŋ o ri ekʼpo eshri esku etno. 20Awaghrẽ ahwõ a shri Enaira ekyeŋ a ba a lu mi le, Andakʼpo, o ka Enaira boŋ o shri o da me lo e wo ahe. Ame e kpmye ŋo alo ala oknye e shri e zga ma dzi. 21Ame e kpo eyli boŋ e gre eshri, okyku eshi aŋo o wo are la a gbu eyli angyiŋ. O ka, aŋo o la o sko ekplo la e wo e boŋ mbo, nga aŋo o la o yla algo okro boŋ o fu mbo. 22Areŋ a nyuŋ awaghrẽ he lo a lu mi le, Aŋo o wo awaghrẽ abi. Ame é sõ ŋo ombgu la odlo boŋ o lu. Aŋo o yi ba ame e wo are la a gbu eyli, nga e la e sko ekplo la e wo e me mbo, nga e la e yla algo okro ba ame e fu mbo. 23O wo eka he le, okyku eshi aŋo o shri amgbaŋ ba ame e shri e doŋ lo o zga abanki mbo? E mbi ohuhuhi ba ame e ba, e yga lo la otama. 24Areŋ a nyuŋ moare la a wo ka la ŋa a lu mi le, Agimi e ngʼga Enaira he lo e sku awaghrẽ ba ototno, nga e shri lo e da awaghrẽ la a wo la Enaira okʼpo ma! 25Moare a nyuŋ areŋ a lu mi le, Andakʼpo, a sheŋ a wo la Enaira okʼpo ma bgu! 26Areŋ lo a tno ma a lu mi le, Ame e lu e da gimi, Areyaŋ a mbo la a wo la emakyeŋ ma, moa á shri á ta ŋa ma. Ambo are la a wo la emakyeŋ ma mbo, ofi baŋ a wo la alo ma a mbo, moa á yga lo á sku ŋa abgo. 27Eshri moafpu me la a klo ba ame e dzu areŋ mo mbo, e shri mo e ba e bga egi ayi me!
Eyesu a gre Orushalima
28Ambla ba Eyesu a lu odlo he lo a khwo, a dzu moare a zga a gre Orushalima. 29A ba osusku ta la anwye esku ahakyeŋ moa a bzi lo ma Ebefagi, ta la Ebetanya, a wo osusku ta la Orushalima. Omba moa a gbu osusku ta la Akũ ba Olivi, a hom moanwyeotum baŋ aha otum okyku o da mo a bre a yi, nga a lu mi le, 30Agimi e yi anwye osku la a wo egi ayi bimi hi. Agimi e gre bgu le, agimi e ka ashrishrikyeŋ moa a vre lo a ka mbo, moa a dze lo ekpazhi. E ngla lo e shri e kom me. 31O wo ba arekyeŋ a zhĩ gimi a lu mi le, Ayi a da gimi e ngla lo? E tno ŋa ma e lu mi le, Adigi a klo lo. 32Moaha lo a gre nga moa a hwiŋ ekployaŋ a mbo eka ba Eyesu a lu a da mo. 33Omba ba moa a ngla ashrishri lo nga, moare odne a zhĩ a lu mi le, Ayi a da gimi e ngla lo? 34Moa a tno ma a lu mi le, Adigi a klo lo. 35Moa a ngla ashrishri lo a shri a kom Eyesu. Moa a shki aknye ashriskri nga moa a da Eyesu a vre lo a dzu ma. 36Nga moa a shri aknye mo a ngla a ta ozhẽ, okyku o daŋ a bre a yi. 37Omba baŋ a gbu osusku ta la Orushalima, okro ba ozhẽ o gile Akũ ba Olivi, moare nzenze a lu ŋa ma, nga moa a la a vye Ahogbrẽ nga a hlu ŋa eshko angyangyeŋ okyku ayakplo egbregbre ba moa a ka. 38Moa a hlu Ahogbrẽ eshko a lu mi le, Ahogbrẽ a kpo a ghwo la Areŋ la a ba eshko ba Adigi-odne! Opyapyaŋ o dzu Ongyeŋ, nga e da gi e hlu Ahogbrẽ eshko!
39MoaEfarisikyeŋ a zgi eshki a zhĩ Eyesu a lu mi le, Andakʼpo, o shrom moare la a lu ŋo ma o da mo a dzu tki! 40Eyesu a tno mo ma a lu mi le, Ame e lu e da gimi, o wo moa a dzu tki a mbo, ézhim é hlu me eshko angyangyeŋ.
Eyesu a gbu ogbrẽ okyku Orushalima
41Eyesu a gbu osusku ta la Orushalima. A ka lo nga a gbu ogbrẽ, 42a lu mi le, Aŋo o yi eka moare a la a klo opyapyaŋ e mbi, aŋo o kpo eka he mbo! Ambo ohuhuhi, aŋo o ka opyapyaŋ lo nga mbo! 43Ambo omba o yi ó ba, ba moafpu ŋo á ba a hwom ŋo a ghwo. 44Nga moa á kypi ŋo á ygi obiŋ, nga moa á bga moarehwi boŋ, moa á dzu emakyeŋ á zga ku-ku mbo. Ohe lo o kpo okyku boŋ o ka o bmye omba ba Ahogbrẽ a ba okyku o shla ŋo mbo!
Eyesu a gre Anyuŋ-akulu
45Eyesu a gre Anyuŋ-akulu eshyẽ nga a kyku moare la a kpo egbmo ma eshyẽ. 46A nyuŋ mo a lu mi le, Moa a ta Akpa Ahogbrẽ a lu mi le, Moa á bzi odne me okro moa á fa olu ma, ambo agimi e zhiŋ lo e da lo a dzu emvygi moasi!
47Eyesu a nye moare Anyuŋ-akulu elelum. Anyuŋ-andakʼpo olu ba Ahogbrẽ pa la moa la a nye odaŋ, pa la moandakʼpo ba obiŋ a klo o bga ŋa. 48Ambo moa a hwiŋ ozhẽ okyku o bga ŋa mbo, okyku eshi areyaŋ a mbo a la a ngli atuŋ a gno odlo baŋ a la a lu. Moa a bmi a da ekplokyeŋ ba Eyesu a nye mo e bre e yi mbo.
انتخاب شده:
Oluka 19: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
