Oluka 17
17
Odlobi
1Eyesu a nyuŋ moanwyeotum baŋ a lu mi le, O dzu omgbybi ba ayakplo la a bile moare, a ba a kpo. Ambo a ba eshri are la a da lo a kpo abgo baŋ! 2O raŋ o gre ba moa a dze edgu are he lo eghwo oto nga moa a shri ŋa a ndbi a ta anyuŋ-ondzu o sku baŋ a da akyeŋ eshki moanwye afifi he lo a tsu a gbu. 3Agimi e nyuŋ e kʼpu!
O wo ba anóŋ a kpo ŋo odlobi le, o shrom ŋa, nga o wo baŋ a ghwo obiŋ le, o kyu ŋa abgo. 4O wo baŋ a ta akpu egi ayi boŋ engyi efoha a mbo olum le, ombayaŋ a mbo baŋ a ba a ghwo obiŋ okro boŋ le, o raŋ o gre boŋ o kyu ŋa agbo.
Ombi ba adlidzi
5Moa la a nyum oshpa a nyuŋ Adigi-odne a lu mi le, O wo boŋ o bmi le, o ta gi obmi ba adlidzi ma. 6Adigi-odne a tno ma a lu mi le, O wo bimi e wo la obmi ba adlidzi la o wo etsitsi eka eyi ba amastad sha a mbo, agimi e kpo e gbu bimi e nyuŋ esĩ aki hi e lu mi le, O gʼbu la emgbʼbo nga o yi o kũ anyuŋ-ondzu! Ó kpo ó gbu.
Otum ba anwye-odne
7O wo ba akyeŋ eshki bimi a wo la anwye-odne la a lbi agbi, o mbo le a kpaŋ ékylu le, omba baŋ a zgi akla a ba odne, aŋo o nyuŋ ŋa o lu mi le, O ba shoŋ o ri algo boŋ? 8O wo eka he angyiŋ mbo! Ambo aŋo o nyuŋ ŋa o lu mi le, O yi o shri algo me o shri o ba, nga o sko ataŋ oknye o ghwo nga le o dzu o bli me. Ambla he nga aŋo o kpo ó gbu boŋ o yi o ri nga o wa. 9O wo ozhẽ ba moa a shko anwye-odne okyku baŋ a kpo ayakplo eka moa a lu? 10O wo ozhẽ okyekyeŋ angyiŋ ka la gimi. Omba bimi e kpo ekployaŋ a mbo ba moa a klo bimi e kpo e khwo bgu le, agimi e lu mi le, Agi e wo moanwye-odne angyiŋ, agi e kpo egʼba otum bi sha angyiŋ e khwo.
Eyesu a shaŋ moaeshru okʼpo
11Omba ba Eyesu a wo ozhẽ o yi Orushalima nga, a sõ agʼbaha obiŋ ba Esamariya ta la Egalili. 12Omba baŋ a yi anwye oskukyeŋ, a ri a sheŋ moaeshru okʼpo. Moa a zhiŋ a tspi ogyugyuŋ, 13nga moa a lu angyangyeŋ a lu mi le, Adigi Eyesu! O ka gi ayiekŋe! 14Eyesu a ka mo nga a nyuŋ mo a lu mi le, Agimi e yi e da moandakʼpo olu ba Ahogbrẽ a mbli gimi a ka. Omba moa a wo ozhẽ a la a yi nga, moa a shaŋ. 15Akyeŋ eshki mo okʼpo lo, omba baŋ a ka baŋ a shaŋ nga, a bla a ba nga a vye Ahogbrẽ angyangyeŋ. 16A kŋe a lom obiŋ egi ayi Eyesu nga a vye la ŋa. Alom he lo a wo arehwĩ ba Asamariya angyiŋ. 17Eyesu a zhĩ a lu mi le, Moare okʼpo moa a shaŋ mo mbo? Moatronyi ahwõ a kpo anyu? 18Moa a mbo a bla a ba okyku o vye la Ahogbrẽ mbo? Azhẽ he lo sha angyiŋ a ba? 19Eyesu a nyuŋ ŋa a lu mi le, O kso nga o yi eŋo, obmi ba adlidzi boŋ o shaŋ ŋo.
Oba-ba ba Oreŋ
20MoaEfarisikyeŋ a zhĩ Eyesu omba ba Oreŋ Ahogbrẽ ó ba o ba. A tno ma a lu mi le, Oreŋ Ahogbrẽ ó ba ozhẽ bimi é ba e ka lo angyiŋ mbo. 21Arekyeŋ á su á lu mi le, E ka, o wo ahe, o mbo le o wo a mi, angyiŋ mbo! Okyku eshi Oreŋ Ahogbrẽ o wo ésõ bimi angyiŋ.
22Ambla he nga a nyuŋ moanwyeotum baŋ a lu mi le, Omba o yi ó ba, ba agimi é ba e klo o ka olum okyeŋ eshki ba omba ba Anwye Arehwĩ, ambo agimi é ka lo mbo. 23Moakyeŋ á ba a lu mi le, O ka a mi, o mbo le o ka ahe! Ambo agimi e zgi e yi e klo okro mbo. 24Eka ba ayimom ba angyum obgu a la a shka ayi ongyeŋ, nga ba ayimom a tra, ekakahelo Anwye Arehwĩ á ba a wo onda baŋ mi lo. 25Ambo o dzu omgbybi baŋ á ba a kpo ewu nzenze ori, nga moarehwi ba omba he lo á tla ŋa. 26Eka moa a kpo omba ba Onuhu, ekakahelo angyiŋ moa á ba a kpo omba ba Anwye Arehwĩ. 27Omba mi lo, areyaŋ a mbo a la a ri nga a wa, moarealom, pa la moashe a kyu eble ma-me a gbu onda ba Onuhu a gre anyuŋ amgblami. Ambla he nga ami a ba a jygi mo pyeŋ. 28Omba mi lo ó wo eka ba omba ba Olotu angyiŋ. Areyaŋ a mbo a la a ri nga a wa nga a gbmo anzho nga a la a bla alo a shri a gbmo. Moa a la a fu anzho nga moa a mbdzi adne. 29Onda ba Olotu a zhiŋ ogbu a sku osku ba Osodom nga, ovo la o vu ŋaŋaŋla o ygi osku nga o jygi lo pyeŋ. 30Ó kpo ekakahelo angyiŋ onda ba Anwye Arehwĩ á ba a gnyu á ba.
31O raŋ o gre ba are la a wo eshri aku baŋ le, a gile a yi odne eshyẽ okyku o tslo anzho baŋ mbo. Ekakahelo are la a wo agbi le, a bla a yi odne mbo. 32Agimi e tne aga eshri ba Olotu! 33Areyaŋ a mbo la a klo o shla eshri baŋ le, é yla. Nga are la a shri eso baŋ a ndba le, á shla lo. 34Okyukyku onda mi lo, moarealom aha á lom amgbla akyekyeŋ nga moa á sko akyeŋ á ra akyeŋ á zga. 35Moashe aha á kpga algo, moa á sko akyeŋ, nga á ra akyeŋ á zga. [ 36Moarealom aha a wo agbi le, moa á sko akyeŋ á ra akyeŋ á zga.] 37Moanwyeotum a zhĩ ŋa a lu mi le, Adigi-odne, ayaŋ a mo? Eyesu a tno mo ma a lu mi le, Ashrom a la a pla a shki okro ba okom o lom ma.
انتخاب شده:
Oluka 17: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
