Oluka 16
16
Andakʼpo otum la a kpo adlidzi mbo
1Eyesu a nyuŋ moanwyeotum baŋ a lu mi le, Alomakyeŋ la a wo la angyiŋ ma, a wo andakʼpo ba otum ma. Moa a lu a da are angyiŋ eka ba andakʼpo ba otum he lo a la a tpi ŋa angyiŋ ayi. 2Are angyiŋ he lo a bzi ŋa a nyuŋ ŋa a lu mi le, Aŋo o yi ekplo ba ame e gno eshri boŋ? Ame e klo boŋ o shri etsko ba ekployaŋ a mbo boŋ o la o kpo ta la anzho me o da me, okyku eshi ame e klo boŋ o dzu andakʼpo ba otum me nga mbo. 3Alom he lo a lu ta la eŋa a lu mi le, Adugu-odne a klo o kyu me abgo otum. Ame é kpo eshi? Ame e wo la oshye egʼba ma ba o laŋ agbi a mbo mbo, nga o vẽ algo o wo me anzi. 4Ame e yi ekplo ba ame é ba e kpo bgu! O wo ba ame e kpo eka he lo angyiŋ, omba ba ame e wo la otum ma mbo le, ame é hwiŋ moakyemeazba la á ba a kpo á ghwo la me, nga á da me e yi e dzu adne mo. 5Ambla he nga, a bzi moa la a ri adaŋ-odne okŋe a da mo a ba. A zhĩ are ba ori a lu mi le, Aŋo o ri adugu-odne okŋe ba eshi? 6A tno ma a lu mi le, Ame e ri ŋa okŋe ba embzu awargi olivi endgaekyeŋ. Andakʼpo ba otum lo a nyuŋ ŋa a lu mi le, O ngli atuŋ o gno eka ekplo boŋ ó ba o hre. Aŋo o dzu obiŋ nga o ta embzu ekʼpoetno. 7A nyuŋ are ba oha a lu mi le, Okŋe boŋ o wo anyu? A tno ma a lu mi le, Ame e ri ŋa okŋe ba agbuhu esekʼpa okʼpo. Andakʼpo ba otum lo a nyuŋ ŋa a lu mi le, O gno eka ekplo boŋ ó ba o hre. O dzu obiŋ nga o ta agbuhu esekʼpa afote. 8Adaŋ-odne andakʼpo ba otum la a wo abibli he lo, a tsom ŋa okyku eda baŋ a kpo, okyku eshi moarehwi ba obiŋ hi, moa a kpo eda ta la ayakplo ba eshri mo adzadzi a gre eka moarehwi ba ayimom a kpo.
9Eyesu a sa a lu mi le, Okyku eka he ame e lu e da gimi, e shri angyiŋ ba obiŋ hi e vu ekpom pa la moarehwi, okyku o da gimi e yi odne ba gbagbu-amo. 10Areyaŋ a mbo la a kpo adlidzi ta la ayakplo afifi le, á kpo adlidzi ta la ayakplo agagre. Nga areyaŋ a mbo la a kpo adlidzi ta la ayakplo afifi mbo le, á kpo adlidzi ta la ayakplo agagre mbo. 11O wo boŋ o kpo adlidzi angyiŋ ta la angyiŋ ba obiŋ hi mbo le, moa á kpo anyu á ba a bmi á shri angyiŋ ba adlidzi á doŋ? 12O wo boŋ o kpo adlidzi angyiŋ ta la anzho moahwõ mbo le, ayi á ba a shri ekplo la e wo e boŋ á doŋ?
13Arekyeŋ a kpo a gbu baŋ a dzu awaghrẽ moa-odne aha mbo. O dzu omgbybi baŋ a tla akyeŋ nga a klo akyeŋ. O dzu omgbybi baŋ a bmi ta la akyeŋ nga a tla akyeŋ a ta. O kpo o gbu boŋ o dzu awaghrẽ ba Ahogbrẽ ta la awaghrẽ ba angyiŋ otsotse mbo.
Olulukyeŋ ba Eyesu
14MoaEfarisi moa a gno ayakplo he pyeŋ, ambo moa a lu ega a ygi Eyesu okyku ba moa a klo amgbaŋ. 15Eyesu a nyuŋ mo a lu mi le, Agimi e sko eshri bimi e zga eka moarehwi la a wo shasha egi ayi moarehwi, ambo Ahogbrẽ a yi edgu eso bimi. Ekplo ba moarehwi a sko lo a zga la anyuanyuŋ e wo ekplokyeŋ angyiŋ egi ayi Ahogbrẽ mbo.
16Odaŋ Omusa, ta la akpekpa ba moarehwi Ahogbrẽ a hom otum, moa a kpo otum ta la alo ma-me a gbu omba ba Eyohana la a kpo abaptisma. A zga omba he lo nga, moa a nyum Oshpaodzadzi la o wo eshri Oreŋ ba Ahogbrẽ, nga areyaŋ a mbo a kyku ebzu okyku o hwiŋ lo. 17Ambo o wo ohli ba ongyeŋ ta la obiŋ hi ó ba o bre ó yi, o gre ba ekplokyeŋ etsitsi sha a mbo odaŋ lo é ba e bre é yi. 18Areyaŋ a mbo la a kyu ashe baŋ abgo, nga a kyu ashe ahe le, a ri eshra angyiŋ. Nga are la a kyu edgu ashe he lo a ri eshra angyiŋ.
Are angyiŋ ta la Eliyazaru
19Eyesu a lu mi le, Alomakyeŋ a wo ma, a wo la angyiŋ ma nzenze. A la a ygi aknye la a wo egbmo nzenze. Nga a gno oraŋ ombamba pyeŋ. 20Alomakyeŋ a mbo la a wo ekŋe a wo ma, eshko baŋ e ri Eliyazaru. A la a ro ero egʼba. Moa a la a shri Eliyazaru a ba a zga ayizhẽ odne ba are angyiŋ he lo. 21Moa a shri ŋa a yi odne are angyiŋ he lo okyku o daŋ a pla ambrombro algo la a ygi obiŋ a ri omba ba are angyiŋ a ri algo. Ekplo ayiekŋe, ebu odne he lo e ba e ndze ero Eliyazaru. 22Eliyazaru a kpu nga moanwyeadga ba Ahogbrẽ a shri ŋa a gre okro Ebrahim, okro moa a la a kpo abgo ma Ongyeŋ. Ambo omba ba are angyiŋ a kpu moa a ngybi ŋa o khwo nga. 23Are angyiŋ lo a gre a yi a kpo ewu nzenze okro moa a la a bzi lo ma Ahades. Are angyiŋ a zhiŋ ayi ongyeŋ nga, a ka Ebrahim okrokyeŋ a mi lo ogyugyuŋ, Eliyazaru nga a dzu egbaŋ ba Ebrahim. 24Are angyiŋ a ta enzi angyangyeŋ a bzi a lu mi le, Adugu Ebrahim! O ka me ayiekŋe, nga o hom Eliyazaru otum o daŋ a ba a ghwo evgo ami a ta me olom okyku o da eso e dum me. Ame e kpo ewu e gre eshri ovo ahe. 25Ebrahim a tno ŋa ma a lu mi le, Anwye me, aŋo o tne aga o ka, omba boŋ o wo obiŋ hi, aŋo o la o gno oraŋ nzenze, ambo Eliyazaru a la a kpo ewu. Okyku eka he egbre baŋ ahe e wo oraŋ, ambo egbre boŋ e wo ewu. 26Aŋo o ka, anyuŋ amgblu a wo agʼbaha bi. O kpo o gbu ba arekyeŋ a bmyi a yi okro boŋ mbo, nga arekyeŋ a kpo a gbu baŋ a bmyi lo a ba okro bi mbo. 27Are angyiŋ a lu mi le, Ame e vẽ ŋo adugu, aŋo o bmi le, o hom Eliyazaru otum okro moa-odne adugu obiŋ hi. 28Ame e wo la moanáŋ-alalom atno ma. O daŋ a yi a lu a da mo a nyuŋ a kpo-kpo okyku o da mo a ba okro ba ewu hi mbo. 29Ebrahim a tno ŋa ma a lu mi le, Omusa pa la moarehwi ba Ahogbrẽ a hom otum moa a wo ma okyku o shĩ mo o da mo a ba okro ba ewu hi mbo. O raŋ o gre moanóŋ a ngli atuŋ a gno odlo mo. 30Are angyiŋ a tno Ebrahim ma a lu mi le, Odlo moa a lu a da mo sha o tse ma mbo, adugu Ebrahim. Ambo o wo ba arekyeŋ a kso eku angyiŋ a yi a lu a da mo, moa á zhiŋ. 31Ambo Ebrahim a lu mi le, O wo moa á gno odlo Omusa, ta la odlo moarehwi ba Ahogbrẽ a hom otum mbo le, o wo ba arekyeŋ a kso eku a mbo a gre a yi a lu a da mo, moa á bmi ba adlidzi mbo.
انتخاب شده:
Oluka 16: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
