Eyohana 9
9
Eyesu a shaŋ alom moa a mbre ŋa avgayi
1Omba ba Eyesu a yi nga, a ka alomakyeŋ ba moa a mbre ŋa avgayi. 2Moanwyeotum baŋ a ka avgayi lo nga moa a zhĩ a lu mi le, Andakʼpo, okyku odlobi ba ayi angyiŋ moa a mbre alom he lo avgayi? Okyku odlobi baŋ angyiŋ le, okyku odlobi moadaŋ. 3Eyesu a tno mo ma a lu mi le, Ovgayi baŋ a vga hi, o wo okyku odlobi baŋ mbo, okyku odlobi moadaŋ angyiŋ mbo, ambo okyku o da mo a tsa ekʼpo ba Ahogbrẽ eshri baŋ. 4O raŋ o gre bi e kpo otum ba are la a hom me otum, okyku eshi olum o yi o ra. Okyukyku o yi ó hwĩ. Omba mi lo arekyeŋ á kpo á gbu baŋ a kpo otum mbo. 5Omba ba ame e yi e wo obiŋ hi, ame angyiŋ e wo Ayimom ba Obiŋ hi. 6Ambla ba Eyesu a lu eka he a khwo nga, a ta akyi obiŋ nga a bmwre obiŋ lo nga a shri lo a khwa ayi alom lo. 7Nga a nyuŋ alom lo a lu mi le, O yi o ndza ayi boŋ atam ba Esiloyom. Alo o dzu Ohomotum angyiŋ la anyu mo. Alom lo a gre a yi a ndza ayi baŋ nga a ba nga a la a ka.
8Moaekpazhi baŋ pa la moare la a ka ŋa baŋ a la a vẽ algo ayga, moa a zhĩ a lu mi le, Alom hi angyiŋ a la a dzu obiŋ a la a vẽ algo ayga mbo? 9Moakyeŋ moa a lu mi le, Aŋa angyiŋ. Ambo moakyeŋ moa a lu mi le, Aŋa angyiŋ mbo, ambo a zgi ŋa ozgi angyiŋ. Alom lo a tno ma a lu mi le, Ame angyiŋ. 10Moare a zhĩ ŋa a lu mi le, Ayi boŋ a kpo anyu a hwile? 11A tno mo ma a lu mi le, Alomakyeŋ ba moa a bzi ŋa ma Eyesu angyiŋ a bmwre obiŋ a shri a khwa me ayi, nga a nyuŋ me ma ame e yi e ndza ayi me atam ba Esiloyom. Ame e gre e yi e ndza nga ame e shaŋ. 12Moa a zhĩ ŋa a lu mi le, Alom he lo a wo ayaŋ? Aŋa a tno ma a lu mi le, Ame e yi mbo.
MoaEyahuda a mbli oshaoshaŋ he lo a ka
13Moa a sko alom la a vga ayi ayga he lo a shri a gre okro moaEfarisi. 14Onda ba Eyesu a bmwre obiŋ lo nga a hwile ayi avgayi hi o wo onda Asabat angyiŋ. 15MoaEfarisi a bla a zhĩ alom he lo eka baŋ a hwiŋ okaokro lo. Aŋa a nyuŋ mo a lu mi le, Alom lo a shri amwre a shri a khwa ayi me nga ame e ndza ayi e khwo nga, ame e ka ohuhuhi. 16Moa-Efarisikyeŋ a lu mi le, Alom la a kpo ohi lo a zgi okro ba Ahogbrẽ angyiŋ a ba mbo, okyku eshi a kpaŋ odaŋ ba Asabat mbo. Ambo moakyeŋ eshki mo moa a lu mi le, Are ba odlobi a kpo anyu a kpo ayakplo egbregbre eka he? Ambla he nga eshki moare e gʼba eŋa.
17MoaEfarisi a sa a zhĩ alom lo nganga a lu mi le, Aŋo o lu ma aŋa angyiŋ a hwile ayi boŋ? Aŋo o tne aga eshi eshri baŋ? Aŋa a tno mo a lu mi le, Alom he lo a wo arehwĩ ba Ahogbrẽ a hom otum angyiŋ. 18MoaEyahuda a bmi ba adlidzi ba alom lo a vga ayi ayga, nga baŋ a sa a shaŋ mbo. Moa a gno okro moadaŋ anwye lo ayga moa a bmi ba adlidzi. 19Moa a zhĩ moadaŋ anwye lo a lu mi le, Anwye bimi angyiŋ a wo ahi? Agimi e lu mi ma moa a mbre ŋa avgayi? O wo eka he le, a kpo anyu a ka ohuhuhi? 20Moadaŋ moa a tno ma a lu mi le, Agi e yi baŋ a wo anwye bi, nga moa a mbre ŋa avgayi. 21Ambo agi e yi eka baŋ a kpo nga a ka ohuhuhi mbo, nga agi e yi are la a hwile ŋa ayi mbo. Agimi e zhĩ ŋa ababgo bimi okyku eshi aŋa a yi eda a mo! 22Moadaŋ a tno ma eka he okyku eshi moa a kpo eyli moaEyahuda. MoaEyahuda a lu mi ma areyaŋ a mbo la a zgi egŋe ma Eyesu a wo Emisiya angyiŋ le, moa á se ŋa eshki. 23Okyku eka he lo angyiŋ moadaŋ a lu mi le, Aŋa a yi eda a mo, agimi e zhĩ ŋa!
24Moa a bzi alom ba moa a mbre ŋa avgayi lo odgo oha nga moa a nyuŋ ŋa a lu mi le, Aŋo o hwim egi ayi Ahogbrẽ boŋ ó ba o lu adlidzi! Agi e yi ba alom he lo a wo are ba odlobi. 25A tno mo ma a lu mi le, O wo ba are he lo a wo are ba odlobi le, ame e yi mbo. Ekplo ekyekyeŋ sha ame e yi, ayga ame e vga ayi, ambo ohuhuhi ame e ka. 26Moa a zhĩ ŋa a lu mi le, Aŋa a kpo ŋo eshi, nga a kpo anyu a hwile ayi boŋ? 27A tno mo ma a lu mi le, Ame e sheŋ e lu e da gimi bgu, ambo agimi e bmi mbo. Agimi e klo ba ame e lu la eshi? Agimi a mbo e klo e dzu moanwyeotum baŋ? 28Moa a ta ogbukyu a daŋ nga moa a lu mi le, Aŋo o wo anwyeotum baŋ, ambo agi e wo moanwyeotum ba Omusa angyiŋ. 29Agi e yi ba Ahogbrẽ a lu odlo ta la Omusa, ambo are he lo, agi e yi okro baŋ a zgi lo a ba mbo ku-ku! 30Alom he lo a tno ma a lu mi le, Ekplo he lo e wo ekplo egbregbre angyiŋ! Agimi e yi okro baŋ a zgi lo a ba mbo, ambo aŋa angyiŋ a hwile me ayi! 31Agi e yi ba Ahogbrẽ a la a gno moaedlobi mbo. A la a gno moare la a fa olbi a daŋ, nga a kpo ayakplo baŋ a klo. 32Ogbyigbyi moa a zga esi a kpo obiŋ hi, moa a gno ba arekyeŋ a hwile avgayi ayi mbo. 33O wo ba alom he lo a zgi okro Ahogbrẽ angyiŋ a ba mbo le, aŋa a kpo a gbu baŋ a kpo ekplokyeŋ mbo. 34Moa a tno ŋa ma a lu mi le, Moa a mbre ŋo la odlobi, nga moa a vgi ŋo la odlobi. Aŋo o klo o nye gi? Nga moa a kyku ŋa a sku anwyeakulu lo.
Ovgayi ba eso
35Eyesu a gno moa a kyku ŋa a sku anwyeakulu. Aŋa a hwiŋ ŋa nga a nyuŋ ŋa a lu mi le, Aŋo o bmi ba adlidzi ta la Anwye Arehwi? 36Alom lo a tno ma a lu mi le, Andakʼpo, aŋa a wo ayi angyiŋ? O tsi ŋa o da me okyku o da me e bmi ba adlidzi ka la ŋa. 37Eyesu a nyuŋ ŋa a lu mi le, Aŋo o sheŋ o ka ŋa bgu. Aŋa angyiŋ a wo are la a kpla egba ka la ŋo ohuhuhi. 38Alom lo a gbyle obiŋ egi ayi Eyesu nga a lu mi le, Ame e bmi ba adlidzi, Adigi-odne!
39Eyesu a nyuŋ mo a lu mi le, Ame e ba obiŋ hi okyku o sõ moare ombgu, nga okyku o da moavgayi a ka okro, nga okyku o da moa la a ka a sa a vga ayi. 40MoaEfarisikyeŋ la a wo ma ka la ŋa a gno baŋ a lu eka he nga, moa a zhĩ ŋa a lu mi le, Aŋo o sko gi a mbo o zga moavgayi ko-ko? 41Eyesu a tno mo ma a lu mi le, O wo bimi e vga ayi le, agimi e wo la ombgu ma mbo. Ambo agimi e lu ma agimi e la e ka, okyku eka he o dzu eka ba agimi e wo la ombgu ma ma-me o ta ohuhuhi.
انتخاب شده:
Eyohana 9: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
