Eyohana 8
8
Ashe moa a vu ŋa baŋ a ri eshra
1[Ambla he nga areyaŋ a mbo a zgi a gre eŋa odne, ambo Eyesu a zgi a gre Aku ba Olivi. 2Onda oha endigigiŋ nga, a bla a gre Anyuŋ-akulu. Moare mvye moa a tspi a ta ŋa a kpaŋ. Aŋa a dzu obiŋ nga a nye mo. 3Moa la a nye odaŋ, pa la moaEfarisi, moa a shri ashekyeŋ moa a vu ŋa baŋ a ri eshra a shri a ba, nga moa a daŋ a tspi egi ayi mo mvye. 4Moa a nyuŋ Eyesu a lu mi le, Andakʼpo, moa a vu ashe he omba baŋ a la a ri eshra. 5Omusa a lu odaŋ bi a lu mi le, O dzu omgbybi ba moa a bga edgu ashe he lo la ézhim. Aŋo o ka anyu eshri ashe he lo? 6Moa a ba a lu ta la Eyesu eka he okyku o kpyi ŋa nga okyku o vu ŋa ombgu. Ambo Eyesu a kʼpu obiŋ a ta engla la evgo baŋ. 7Omba ba moa a la a zhĩ odlo nga, Eyesu a kso a nyuŋ mo a lu mi le, Eshki bimi, are la a kpo odlobi a ka mbo, a zga esi a tra ashe he lo ezhim. 8Eyesu a sa a kʼpu obiŋ nganga a ta engla obiŋ. 9Omba ba moa a gno odlo eka he nga, moa a gre emo akya-kyakyeŋ. Andakʼpo ekpyemgbyeŋ a gre ori, nga moa a dzu Eyesu ta la ashe lo a zga otsotse okro lo. 10A kso nga a zhĩ ashe lo a lu mi le, Ashe, moare lo a wo ayaŋ a mo? Arekyeŋ la a vu ŋo ombgu a ra a wo ahe nga mbo? 11Ashe lo a tno ma a lu mi le, Andakʼpo, arekyeŋ a ra nga mbo. Eyesu a nyuŋ ŋa a lu mi le, Ame a mbo e sõ ombgu e ri ŋo mbo. Aŋo o yi eŋo, ambo o sa o kpo odlobi nga mbo.]
Eyesu a ĩvo Ayimom ba Obiŋ hi
12Eyesu a lu pa la mo nganga a lu mi le, Ame angyiŋ e wo Ayimom ba Obiŋ hi. Areyaŋ a mbo la a lu me ma á hwiŋ ayimom ba eso, nga aŋa á dzi evbu nga mbo. 13MoaEfarisi a nyuŋ ŋa a lu mi le, Aŋo o lu odlo eshri boŋ angyiŋ ohuhuhi, okyku eshi ekplo boŋ o lu e tsa gi akplokyeŋ mbo. 14Eyesu a tno mo ma a lu mi le, O wo eka he angyiŋ mbo. O wo ba ame e lu odlo ba eshri me a mbo, ekplo ame e lu e wo adlidzi angyiŋ okyku eshi ame e yi okro ba ame e zgi lo e ba, nga ame e sa e yi okro ba ame é ba e yi. Ambo agimi e yi okro ame e zgi lo e ba, o mbo le ba ame é ba e yi mbo. 15Agimi e la e sõ moare ombgu la oyioyi ba arehwĩ, ambo ame e la e sõ arekyeŋ ombgu mbo. 16Ame e sõ moare ombgu e mbi, ame é sheŋ ombgu la adlidzi, okyku eshi ame e wo ambambga angyiŋ otum he lo mbo, Ada la a hom me otum a wo pa la me. 17Moa a ta odaŋ bimi a lu mi le, O wo ba egŋe eha e bmi ta la emo le, e wo adlidzi angyiŋ. 18Ame e lu odlo okyku eshri me, nga Ada la a hom me otum a mbo, a la a lu odlo okyku me. 19Moa a zhĩ ŋa a lu mi le, Adoŋ a wo ayaŋ angyiŋ? Eyesu a tno mo ma a lu mi le, Agimi e yi me mbo nga e ka e yi Adugu a mbo mbo. Agimi e yi me e mbi, agimi e yi Adugu a mbo ko-ko.
20Eyesu a lu odlo hi mvye omba baŋ a nye moare Anyuŋ-akulu okro ba akpati moa la a yga amgbaŋ a wo ma. Arekyeŋ a vu ŋa ku-ku mbo, okyku eshi omba baŋ o bli a wo mbo.
Okro ame é yi, agimi e kpo e gbu bimi e ba lo mbo
21Eyesu a nyuŋ mo a lu mi le, Ame é yi a mi lo, agimi é klo me, ambo agimi é kpu la odlobi bimi. Agimi e kpo e gbu bimi e ba okro ba ame e yi lo mbo. 22MoaEyahuda a lu mi le, Aŋa a lu mi le, Agimi e kpo e gbu bimi e ba okro ba ame e yi lo mbo. Aŋa á bga eshri baŋ? 23Eyesu a tno mo ma a lu mi le, Agimi e wo moarehwi ba obiŋ hi angyiŋ, ambo ame e zgi Ongyeŋ e ba. Agimi e wo moarehwi ba obiŋ hi, ambo ame e wo arehwĩ ba obiŋ hi mbo. 24Okyku eka he lo angyiŋ ame e lu ma agimi é kpu la odlobi bimi. Agimi é kpu la odlobi bimi o wo ba agimi é bmi ba adlidzi ba Ame Angyiŋ La E Wo Ma, mbo le. 25Moa a zhĩ Eyesu a lu mi le, Aŋo o wo ayi angyiŋ? Eyesu a tno ma a lu mi le, Ame e wo ekplo ba ame e sheŋ e lu e da gimi okũ oriori. 26Ayakplo a wo ma nzenze ba ame e klo e lu nga e sheŋ ombgu eshri bimi. Are la a hom me otum, ekayaŋ a mbo a wo adlidzi angyiŋ. Ame e lu ekplo baŋ a lu a da me angyiŋ e la e da obiŋ hi.
27Moa a ka a bmye baŋ a lu odlo eshri ba Ada angyiŋ mbo. 28Eyesu a nyuŋ mo a lu mi le, Omba bimi é si Anwye Arehwĩ ongyeŋ, agimi é yi ba Ame Angyiŋ La E Wo Ma. Omba he lo agimi é yi ba ame e la e kpo ekployaŋ a mbo la eshrishri eme angyiŋ mbo, ambo ba ame e lu ekplo ba Ada a nye me. 29Aŋa la a hom me otum nga, a wo pa la me. Aŋa a la a dzu me a zga mbo okyku eshi ame e kpo ekployaŋ a mbo la e gbu ŋa eso obiŋ. 30Moare nzenze la a gno odlo ba Eyesu a lu he lo, moa a bmi ba adlidzi ka la ŋa.
Moare la a wo odzudum ma, pa la moawaghrẽ
31Eyesu nga a nyuŋ moaEyahuda la a bmi ba adlidzi ka la ŋa a lu mi le, O wo bimi e yga onyenye me, agimi e wo moanwyeotum me ba adlidzi. 32Agimi é yi adlidzi lo le, adlidzi lo nga á da gimi é dzu moawaghrẽ nga mbo. 33Moa a tno ŋa ma a lu mi le, Agi e wo moarehwi ba ogu ba Ebrahim angyiŋ, agi e dzu moawaghrẽ arekyeŋ ondakyeŋ ku-ku e ka mbo. Aŋo o klo o lu la eshi angyiŋ omba boŋ o lu mi le, Moa á shri odzudum á da gimi. 34Eyesu a nyuŋ mo a lu mi le, Ame e lu adlidzi angyiŋ e da gimi, areyaŋ a mbo la a kpo odlobi le, aŋa a wo awaghrẽ ba odlobi angyiŋ. 35Awa-ghrẽ a la a dzu pa la moa-odne ombamba mvye mbo, ambo anwye mo a la a dzu pa la mo ombayaŋ a mbo. 36O wo ba Anwye a shri odzudum a da gimi le, agimi é hwiŋ odzudum ba adlidzi. 37Ame e yi bimi e wo moare ba ogu ba Ebrahim angyiŋ, ambo agimi e klo o bga me okyku bimi e yga onyenye me mbo. 38Ame e lu odlo eshri ekplo Adugu a tsa me, ambo agimi e la e kpo ekplo ba adigimi a tsa gimi.
39Moa a tno ŋa ma a lu mi le, Ebrahim angyiŋ a wo Adigi. Eyesu a tno mo ma a lu mi le, Agimi e wo moanwye ba Ebrahim angyiŋ e mbi, agimi e kpo edgu otum baŋ a kpo. 40Ame e lu adlidzi ba ame e gno okro ba Ahogbrẽ sha e la e da gimi. Ambo ekakahelo a mbo, agimi e klo e bga me. Ebrahim a kpo eka he mbo! 41Agimi e la e kpo ekplo ba adigimi a kpo angyiŋ. Moa a tno ŋa ma a lu mi le, Agi e wo moanwye ba eshra angyiŋ mbo. Agi e wo Ada akyakyeŋ sha angyiŋ e ma, aŋa eshrishri eŋa a wo Ahogbrẽ. 42Eyesu a nyuŋ mo a lu mi le, Ahogbrẽ angyiŋ a wo adigimi adlidzi e mbi, agimi e yga me okyku eshi ame e zgi okro ba Ahogbrẽ e ba. Ame e ba la eshrishri eme angyiŋ mbo, ambo aŋa a da me e ba. 43Okyku eshi agimi e ka ekplo ba ame e lu e bmye mbo? Agimi e ka e bmye mbo okyku bimi e klo e ngli atuŋ e gno oshpa me mbo. 44Agimi e wo moanwye ba adigimi Eshi-taŋ, nga agimi e klo e kpo ekplo ba adigimi lo a klo. Okũ oriori, a wo are la a bga ebga. A bmi ta la adlidzi ondakyeŋ mbo, okyku ba adlidzi a wo ka la ŋa mbo. Omba baŋ a la a sheŋ akpro le, a la a kpo ekplo baŋ a sheŋ a bga ta la alo angyiŋ, okyku eshi aŋa angyiŋ a wo asheŋakpro, nga aŋa angyiŋ a wo adaŋ ba akpro mvye. 45Okyku ba ame e lu adlidzi angyiŋ, agimi e bmi pa la me mbo. 46Areyaŋ eshki bimi a kpo a gbu baŋ a tsa ozhẽ ba ame e kpo odlobi? O wo ba ame e lu adlidzi bgu le, okyku eshi agimi e bmi ba adlidzi pa la me mbo? 47Are la a zgi okro Ahogbrẽ angyiŋ a ba, a la a ngli atuŋ a gno odlo ba Ahogbrẽ. Okyku bimi e zgi okro ba Ahogbrẽ angyiŋ e ba mbo, agimi e ngli atuŋ e gno odlo baŋ mbo.
Eyesu ta la Ebrahim
48MoaEyahuda a tno Eyesu ma, nga a nyuŋ ŋa a lu mi le, Agi e ta akpu angyiŋ bi e lu mi ma aŋo o wo arehwĩ ba Asamariya, nga ma ogbgabi o kpo otum ka la ŋo? 49Eyesu a tno ma a lu mi le, Ogbgabi o kpo otum pa la me mbo. Ame e ka Adugu la olbi, ambo agimi e la e ka me la olbi mbo. 50Ame e klo olbi okyku eme angyiŋ mbo. Are la a klo lo a wo ma. Aŋa angyiŋ a la a sõ ombgu, nga a la a se me. 51Ame e lu adlidzi angyiŋ e da gimi, areyaŋ a mbo la a bmi ta la odlo me le, aŋa á kpu ku-ku mbo. 52MoaEyahuda a nyuŋ Eyesu a lu mi le, Ohuhuhi angyiŋ agi e bmi ba adlidzi boŋ o kpo otum ta la ogbgabi. Aŋo o ka, Ebrahim a mbo a kpu, moarehwi ba Ahogbrẽ a hom mo otum a mbo a kpu, ambo aŋo o lu mi le, Areyaŋ a mbo la a bmi ta la odlo me le, aŋa á kpu ku-ku mbo. 53Adigi Ebrahim a kpu. Eka boŋ o ka, aŋo o wo la ekʼpo o gre Ebrahim he lo? O ka, moarehwi ba Ahogbrẽ a hom mo otum a mbo a kpu. Aŋo o wo ayi angyiŋ? 54Eyesu a tno mo ma a lu mi le, O wo ba ame e shri ekʼpo e shri e da eme le, e dzu ekplokyeŋ mbo. Adugu angyiŋ a la a shri ekʼpo a da me. Aŋa angyiŋ agimi e bzi ŋa ma Ahogbrẽ bimi. 55Agimi e yi ŋa ondakyeŋ mbo, ambo ame e yi ŋa. O wo ba ame e lu mi ma ame e yi ŋa mbo le, ame é dzu asheŋakpro eka bimi. Ame e yi ŋa, nga ame e kpaŋ odlo baŋ. 56Adigimi Ebrahim a ka ayi ozhẽ okyku o ka me. Omba baŋ a ka me nga a gno oraŋ. 57MoaEyahuda moa a nyuŋ ŋa a lu mi le, Aŋo o ka, o kpo eyi ekʼpoetno a mbo mbo. Aŋo o kpo anyu o ka Ebrahim! 58Eyesu a tno mo ma a lu mi le, Adlidzi ame e lu e da gimi, ame e wo ma ayayga moa a mbre Ebrahim, Ame Angyiŋ La E Wo Ma. 59Ambla he nga, moa a tslo ézhim okyku o tra ŋa, ambo Eyesu a ghre nga a zgi a sku Anyuŋ-akulu.
انتخاب شده:
Eyohana 8: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
