Eyohana 13
13
Eyesu a ndza adga moanwyeotum baŋ
1Omba he lo, olum Oriabgo ba Apaska o ra olum okyeŋ. Eyesu a yi ba omba o sheŋ o bli baŋ á dzu obiŋ hi á zga nga á yi okro ba Ada. A klo moa la a wo a baŋ obiŋ hi, nga oklo baŋ a wo la alo ma okyku mo, o wo okyku ma-me o tsa onda amom-abgo.
2Eyesu pa la moanwyeotum baŋ moa a wo okro oriabgo. Omba he lo Eshitaŋ e sheŋ e da Eyahuda Eskariyoti anwye Esima, a sheŋ a zga eso baŋ a ba a yla Eyesu bgu. 3Eyesu a yi ba Ada angyiŋ a shri ekʼpo lo mvye a shri a daŋ. A yi baŋ a zgi okro Ahogbrẽ angyiŋ a ba, nga baŋ á ba a bla á yi okro Ahogbrẽ. 4Okyku eka he Eyesu a kso a hwro ariga agre baŋ nga a kpmye otawal osi baŋ. 5A zhiŋ amihĩ a ygi atku ba o ndza abgo, nga a zga esi o ndza moanwyeotum baŋ adga nga a shri otawal baŋ a shri a kpmye osi, a shri a khwa mo adga. 6Omba baŋ a gbu eshri Esima Ebitru nga, Ebitru a zhĩ ŋa a lu mi le, Adigi-odne, aŋo o ndza adga me a mbo ko-ko? 7Eyesu a tno ŋa ma a lu mi le, Aŋo o yi ekplo ba ame e kpo ohuhuhi mbo, ambo aŋo ó yi lo ambla fi. 8Ebitru a tno ŋa ma a lu mi le, Aŋo ó ndza adga me ko mbo ku-ku! Eyesu a tno ŋa ma a lu mi le, O wo ba ame e ndza ŋo adga mbo le, aŋo ó dzu anwyeotum me nga mbo. 9Esima Ebitru a tno ma a lu mi le, Adigi-odne, o ndza adga me sha angyiŋ mbo, ambo o ndza eshri me, ta la adga me a mbo ko-ko! 10Eyesu a tno ŋa ma a lu mi le, Areyaŋ a mbo la a sheŋ a nglo bgu le, a mre erum mbo. Okyku eka he, o wo eheŋ-ekyeŋ baŋ a nglo nganga mbo, o wo le a ndza adga dne a mo. Agimi mvye e wo shasha o wo le akyekyeŋ sha eshki bimi a wo shasha mbo. 11Eyesu a sheŋ a yi are la á ba a yla ŋa, okyku eka he angyiŋ a lu mi le, Agimi mvye e wo shasha, o wo le akyekyeŋ sha eshki bimi a wo shasha mbo.
12Ambla baŋ a ndza mo adga a khwo nga, a ygi ariga agre baŋ a khwo nga a gre a yi a dzu okro baŋ eteblo. Nga a zhĩ mo a lu mi le, Agimi e ka ekplo ame e kpo ohuhuhi ka la gimi e bmye? 13Agimi e la e bzi me Andakʼpo, ta la Adigi-odne. O wo eka he lo angyiŋ, agimi e ta akpu mbo. 14Ame e wo Adigimi-odne, ta la Andakʼpo bimi, ambo ame e ndza adga bimi ohuhuhi. Okyku eka he agimi a mbo e ndza egimi adga. 15Ame e tsa gimi ozhẽ otsa angyiŋ, okyku o da gimi e kpo eka ba ame e kpo ka la gimi. 16Ame e lu e da gimi, awaghrẽ-akyeŋ a wo la ekʼpo a gre adaŋ-odne mbo, nga anwyeadga a wo la ekʼpo a gre are la a hom ŋa otum mbo. 17Agimi e yi adlidzi ba lo, ambo agimi é gno oraŋ e gre eshri o wo bimi e kpo otum ta la adlidzi he lo!
18Ame e lu odlo eshri bimi pyeŋ angyiŋ mbo, ame e yi moare ba ame e sheŋ e sla. Ambo o dzu omgbybi ba Odlo Ahogbrẽ o bli. O lu mi le, Are la a ri algo me angyiŋ a zhiŋ a sa a klo adga me. 19Ame e lu odlo he lo e da gimi ohuhuhi, okyku o da gimi e yi lo ayga. Okyku eshi, okyku omba ba alo e kpo le, agimi e bmi ba adlidzi ba Ame Angyiŋ Le E Wo Ma. 20Ame e la e lu adlidzi angyiŋ e da gimi, areyaŋ a mbo la a yga are ba ame e hom ŋa otum le, a yga me angyiŋ. Are la a yga me le, a yga are la a hom me otum.
Okaolu ba Eyesu eshri oyla
21Ambla ba Eyesu a lu eka he a khwo nga, eso e byli ŋa nzenze nga a lu mi le, Ame e lu adlidzi angyiŋ e da gimi, akyeŋ eshki bimi á yla me. 22Moanwyeotum a ka emo nga alo o so mo ayi, moa a yi are ba Eyesu a la a lu odlo eshri baŋ mbo. 23Anwyeotum lo akyeŋ la a wo a ba eso Eyesu, a dzu a ta a ka Eyesu. 24Esima Ebitru a tsa anwyeotum lo evgo nga a nyuŋ ŋa a lu mi le, O zhĩ ŋa, o lu mi le, Aŋo o lu odlo eshri ayi angyiŋ? 25Nga anwyeotum a gbga a gre okro Eyesu nga a zhĩ ŋa a lu mi le, Adigi-odne, ayi angyiŋ? 26Eyesu a tno mo ma a lu mi le, Are ba ame é ba e fu agbrotsa enyiŋ é shri é daŋ, aŋa angyiŋ a wo are he lo. Nga a sko agbrotsa a shri a fu lo enyiŋ nga a shri a ndba Eyahuda anwye Esima Eskariyoti. 27Ambla ba Eyahuda a sko agbrotsa lo nga, Eshitaŋ e kpo otum eso baŋ. Eyesu a nyuŋ ŋa a lu mi le, O kpo ekplo boŋ o klo shoshoŋ! 28Moahwõ a ka ekplo ba Eyesu a lu ka la ŋa a bmye mbo. 29Abre amgbaŋ a wo abgo ba Eyahuda he lo angyiŋ. Moanwyeotum a ka ma o dzu mbo le, ma Eyesu a hom ŋa otum okyku o daŋ a yi a gbmo ayakplo ba moa a klo okyku oriabgo lo, o mbo le ma o dzu mbo ma Eyesu a daŋ a shri ekplokyeŋ a shri a kom moaekŋe angyiŋ. 30Eyahuda a yga agbrotsa lo a khwo nga a zgi shoshoŋ. Omba he lo o wo okyukyku.
Odaŋ olohe
31Ambla ba Eyahuda a sheŋ a gre nga, Eyesu a lu mi le, ohuhuhi moa á ka ayimom esesla ba Anwye Arehwi. Moa a ka ayimom esesla ba Ahogbrẽ okyku ŋa angyiŋ. 32O wo ba moa a ka ayimom esesla ba Ahogbrẽ okyku na angyiŋ le, Ahogbrẽ eshrishri eŋa a mbo á da mo a ka ayimom esesla ba Anwye Arehwi lo. Aŋa á ngli ku-ku mbo. 33Agimi anwye me, ame é dzu ka la gimi nzenze nga mbo. Agimi é klo me. Ame e lu ekplo ba ame e lu pa la moaEyahuda angyiŋ ka la gimi ohuhuhi. Agimi e yi okro ba ame e yi lo e gbu mbo. 34Ame e shri odaŋ olohe angyiŋ e shri e da gimi, agimi e klo egimi. Eka ba ame e klo gimi, agimi a mbo e klo egimi. 35O wo ba agimi e wo la oklo ma okyku egimi le, moare mvye moa á yi ba agimi e wo moanwyeotum me.
Eyesu a lu odlo ba Ebitru á ba a kpo evom baŋ
36Esima Ebitru a zhĩ Eyesu a lu mi le, Adigi-odne, aŋo ó yi ayaŋ? Eyesu a tno ŋa ma a lu mi le, Aŋo ó kpo ó gbu boŋ o lu me ma nga o yi okro lo ohuhuhi mbo, o wo le ambla dne aŋo ó ba o lu me ma. 37Ebitru a zhĩ ŋa a lu mi le, Adigi-odne, eshi é ba e nyom me o lu ŋo ma ohuhuhi? Ame é shri eshri me é di okyku o kpu okyku ŋo! 38Eyesu a zhĩ ŋa a lu mi le, Aŋo ó shri eshri boŋ ó di okyku o kpu okyku me adlidzi angyiŋ? Ame e lu adlidzi e doŋ, engo é tko ayga aŋo ó kpo evom me engyi etra mbo.
انتخاب شده:
Eyohana 13: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
