Eyohana 12
12
Moa a khwa Eyesu awargi Ebetanya
1Omba ba Oriabgo ba Apaska o ra elum efĩ, Eyesu a gre Ebetanya anwye osku ba Eliyazaru a dzu ma, a ba Eyesu a kso ŋa ongybi. 2Moa a kpo ŋa algo ahe lo. Amata angyiŋ a la a shri lo a gʼba moare. Eliyazaru nga a dzu eteblo ta la Eyesu otsotse. 3Emeri a sko embdzu awargi ba onad la a shka efpi nga la a wo egbmo nzenze, nga a zhiŋ lo a ygi adga ba Eyesu, nga a vu amasẽ eshri baŋ a khwa lo. Efpi lo e ngla e bli odne lo pyeŋ. 4Akyeŋ eshki moanwyeotum ba Eyesu eshko baŋ e ri Eyahuda Eskariyoti, aŋa angyiŋ á ba a yla Eyesu. A lu mi le, 5Okyku eshi moa a shri awargi he lo a gbmo eka Enaira ekʼpoefĩ nga a shri amgbaŋ lo a gʼba moaekŋe mbo? 6A lu eka he okyku baŋ a klo moae-kŋe angyiŋ mbo, ambo okyku baŋ a wo asi angyiŋ. Aŋa angyiŋ a shri abre amgbaŋ a la a zga. A la a fa ekplo moa a shri a zga ma. 7Ambo Eyesu a tno ŋa ma a lu mi le, O kyu ŋa abgo! Aŋo o daŋ a shri ekplo baŋ a wo la alo ma, a shri a zga okyku onda moa á ba a ngybi me. 8Moaekŋe a wo ka la gimi ombamba pyeŋ, ambo ame é wo ka la gimi ombamba pyeŋ mbo.
Moa a klo adga Eliyazaru
9MoaEyahuda nzenze a gno oshpa ba Eyesu a wo Ebetanya, okyku eka he moa a gre Ebetanya okyku o ka Eyesu ta la Eliyazaru, are ba Eyesu a kso ŋa ongybi. 10Okyku eka he nga, moandakʼpo olu ba Ahogbrẽ a klo ozhẽ okyku o bga Eliyazaru a mbo. 11Okyku ekplo la e kpo he, moare nzenze a zhiŋ a dzu moandakʼpo mo a zga nga a la a bmi ba adlidzi ta la Eyesu.
Eyesu a gre Orushalima
12Onda oha nga, moare nzenze la a ba Oriabgo ba Apaska, moa a gno ma Eyesu a wo ozhẽ baŋ a ba Orushalima. 13Okyku eka he moa a kplu anjyge elgi a gre o yi o tsa ŋa ozhẽ. Moa a ta akhi a lu mi le, E hlu Ahogbrẽ eshko! Ahogbrẽ a ta are la a ba eshko baŋ lo ma-ma! Ahogbrẽ a ta Anyuŋ-areŋ ba Esrayila lo ma-ma! 14Eyesu a hwiŋ ashrishri nga a vre lo a dzu ma eka ba Odlo Ahogbrẽ o lu mi le,
15Osku ba Ezayoŋ, o kpo eyli mbo!
Areŋ boŋ a ba okro boŋ ohuhuhi.
Aŋa a vre anwye ashrishri.
16Ambo moanwyeotum baŋ a ka ohe lo a bmye omba he lo mbo. Ambo ambla ba Eyesu a sheŋ a vre a dzu okro ayimom ba esesla baŋ, moa a tne aga ba Odlo Ahogbrẽ o lu eka he lo, nga moa a sheŋ a kpo eka he lo okyku ŋa.
17Moare la a wo ta la Eyesu omba baŋ a bzi Eliyazaru ongybi nga a kso ŋa, moa a lu ekplo la e kpo. 18Okyku eka he lo angyiŋ moare nzenze a gre a yi a tsa ŋa ozhẽ. Okyku eshi moa a gno ekplo egbregbre baŋ a kpo he lo. 19MoaEfarisi a lu ta la emo a lu mi le, Agimi e ka, agi e hwiŋ ekplo-kyeŋ ba alo ku-ku mbo! Agimi e ka, moare mvye moa a zhiŋ a lu ŋa ma!
MoaEgrise-akyeŋ moa a klo Eyesu
20MoaEgrise moa a wo eshki moare la a gre Orushalima okyku oriabgo lo. 21Moa a ba okro Efilibu la a zgi Ebetseda obiŋ ba Egalili. Nga moa a lu mi le, Andakʼpo, agi e klo e ka Eyesu. 22Efilibu a gre a yi a lu a da Andru; moaha lo nga a gre a yi a lu a da Eyesu. 23Eyesu a tno mo ma a lu mi le, Omba lo o kpo ba moa á ba a shri Ohlueshko á shri á da Anwye Arehwi. 24Ame e lu adlidzi e da gimi, eyi aglu-agbi e wo eyi aglu-agbi angyiŋ, o wo le moa a ta lo agbi ayga dne nga e la e kpu. Ambla ba alo e kpu angyiŋ, e la e fu eyi nzenze. 25Areyaŋ a mbo la a klo eshri baŋ angyiŋ le, eshri baŋ é yla. Areyaŋ a mbo la a tla eshri baŋ obiŋ hi, á hwiŋ eso ba gbagbu-amo. 26Areyaŋ a mbo la a klo o kpo otum me le, aŋa a lu me ma, okyku eshi ame e klo ba anwyeotum me a dzu okro ame e wo ma. Adugu á shri ekʼpo á da are la a kpo me otum.
Eyesu a lu odlo eshri eku baŋ
27Eyesu a lu mi le, O ka ohuhuhi, eso e byli me e gre eshri. Ame e lu la eshi? O wo odzi ba ame e lu mi le, Ada o da omba he lo o hwiŋ me mbo? Ambo, ame e ba okyku o kpo ewu omba he lo angyiŋ. 28Adugu, o da eshko boŋ e dzu la ekʼpo! Enzikyeŋ e zgi Ongyeŋ e ba e lu mi le, Ame e sheŋ e da lo e dzu la ekekʼpo bgu, nga ame e sa e ta lo ekʼpo ma-ma.
29Moare la a wo ahe lo, moa a gno enzi lo nga moa a lu mi le, Enzi he lo e lu odlo eka angyum-ogbu. Moakyeŋ a lu mi le, Anwyeotum Ahogbrẽ angyiŋ a lu odlo ka la ŋa. 30Ambo Eyesu a lu pa la mo a lu mi le, Enzi hi e lu odlo okyku me angyiŋ mbo, ambo okyku gimi. 31Omba he angyiŋ moa á ba a sõ obiŋ hi ombgu. Omba he lo angyiŋ moa á ba a kypi areŋ ba obiŋ hi. 32Ambla ba moa a gŋe me egŋe aki a khwo nga, ame é zhiŋ moare mvye é da mo a ba egi ayi me.
33Omba baŋ a lu eka he, a ta egŋe eshri edgu eku baŋ á ba a kpu angyiŋ. 34Moare a tno ma a lu mi le, Odaŋ bi o tsa gi o lu mi le, Emisiya é dzu ma gbagbu-amo. Ekayaŋ aŋo o lu mi le, O dzu omgbybi ba moa a gŋe Anwye Arehwi egŋe aki? Ayi angyiŋ a wo edgu Anwye Arehwi he lo? 35Eyesu a tno mo ma a lu mi le, Ayimom á ta abyi ka la gimi ple ayga. Agimi e nyuŋ e dzu omba ba ayimom a yi a wo ka la gimi, nga evbu é shki gimi mbo, okyku eshi are la a dzu evbu a yi okro baŋ a la a yi mbo. 36Agimi e bmi ba adlidzi ta la ayimom, okyku ba alo a yi a wo ka la a gimi, okyku o da gimi e dzu moarehwi ba ayimom.
MoaEyahuda a bmi ba adlidzi mbo
Ambla ba Eyesu a lu eka he a khwo nga, a zhiŋ eŋa ogbu nga a yi a ghre. 37A kpo anyuŋ ayakplo egbregbre egi ayi mo, ambo moa a bmi ba adlidzi ka la ŋa mbo. 38Nga ekplo ba Eshaya arehwĩ Ahogbrẽ a hom otum a lu e bli. A lu mi le,
Adigi-odne, ayi angyiŋ a bmi ba adlidzi ta la ekplo bi e lu?
Adigi-odne a tsa ayi angyiŋ ekʼpo baŋ?
39Okyku eka he moa a kpo a gbu o bmi ba adlidzi mbo, okyku eshi Eshaya a mbo a lu mi le,
40O dzu eka ba Ahogbrẽ a bʼbu mo ayi,
Nga a bʼbu mo eso,
Okyku o da ayi mo a ka mbo,
Nga okyku o da mo a zhiŋ a ba okro me
Okyku o da me e shaŋ mo mbo.
41Eshaya a lu eka he okyku baŋ a ka ayimom ba esesla ba Eyesu, nga baŋ a nyum oshpa eshri baŋ.
42Ambo omba he a mbo, moandakʼpo ba Eyahuda nzenze moa a bmi ba adlidzi ta la Eyesu. Ambo okyku eyli ba moaEfarisi moa a lu akplokyeŋ eshri baŋ la eyayi mbo, okyku o da mo a se mo eshki mbo. 43Moa a klo o raŋ moarehwi angyiŋ eso, o sku Ahogbrẽ.
Odlo Eyesu o sõ ombgu
44Eyesu a lu odlo la enzi angyangyeŋ a lu mi le, Areyaŋ a mbo la a bmi ba adlidzi pa la a me le, á bmi ba adlidzi pa la me sha angyiŋ mbo, ambo ta la are la a hom me otum bubgu. 45Areyaŋ a mbo la a ka me, a ka are la a hom me otum. 46Ame e ba obiŋ hi eka ba ayimom angyiŋ, okyku o da areyaŋ a mbo la a bmi ba adlidzi pa la me a dzu evbu nga mbo. 47Areyaŋ a mbo la a gno oshpa me nga a bmi ba adlidzi ta la lo mbo, ame é sõ ŋa ombgu mbo. Ame e ba okyku o sõ obiŋ hi ombgu angyiŋ mbo, ambo okyku o shla lo. 48Areyaŋ a mbo la a tla me nga a bmi ba adlidzi ta la oshpa me mbo le, arekyeŋ a wo ma la á ba a sõ ŋa ombgu. Odlo ba ame e sheŋ e lu hi angyiŋ ó ba o sõ ŋa ombgu onda mi lo! 49O wo eka he lo angyiŋ, okyku eshi ame e lu odlo ba eshrishri eme angyiŋ mbo. Ada la a hom me otum a tsa me eka akplo ba ame é ba e lu. 50Ame nga e yi ba odlo baŋ lo o la o shri eso ba gbagbu-amo o di. Ayakplo ba ame e lu hi, Ada angyiŋ a da me e lu lo.
انتخاب شده:
Eyohana 12: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
