Dzɔ̌n 16
16
1Ŋ̀ ghəa ghən fɛ â ghɛ̀ dzɛ̂ wò enyəa e kwo ko ghùw wɛʼɛ lò so e bvʉ̂a kòom nù. 2Ghe lo dzùu nùghùun sə̌a wò ghɛ̀ an Ndughutə̀ne tə Tə̀dzûu tò. Nəghā e bùghòo nù, zəla mò à lò ko ndugho ù wi ghɛ, ù m moʼnlò enyəa e fi fwaʼà fwàʼ kə Kəzə̀. 3Ghe lô ghəa ghən a zəŋò ghɛ̀ ghəŋlo bòʼ ghe kaām kwo yô Tsele waŋā ŋkāa mùghò. 4Ŋ̀ ghəa ghən fɛ a ghɛ̀ dzɛ̀ nàŋa wò enyəa abugho nəgha e ghee e te e kê kpē tsughu, ghəa a te a kāʼ tsughu alesə̄, ghɛ̀ ŋ kele enyəa M̀ mafə â ghɛ̀ dzɛ̂ nàŋa.
Ŋ̀ ka mo ghəa ghən gho â ghɛ̀ kaam dzɛ̀ dzə̀ nàŋa wò dzə̀ aŋghəa a fə̀ kaʼ tsughu, bòʼ sɛ̀ mò lô tsəgha a dzə̀m. 5E sô fɛ êzə̄ŋ lo enyəa, M̀ fɛ nùghùun ndùw èbàm alô ghùw wəla ù mô tum wô mugho, ghùw wɛʼɛ ù lòʼ bùʼù tsǒo bvʉa yo â mùghò luʼū kəla Ǹ nduūw a te. 6Ghəa Ǹ dzɛ̂ wô ghəa ghən gho êzə̄ŋ â ghɛ̀, ghɛ̀ yia a doʼò nduw alo esē. 7Ǹ naam kuuwn dzàa wò ko ghɛ̀ â sə̀ŋò zò enyəa, dzɔ̀ lǎam lò â ghɛ̀ enyəa to M̀ mô nughù ndûw; tɔŋlo enyəa, abugho Ǹ tâʼkè ndûw, ghùw wəla ù lo dêe tsəghà ghɛ â dzì lo bùghòo yò â ghɛ̀. Mò Ŋ̀ kuuwn nùghù ndùw dzə̀ nù, Ǹ nduw tuū wô wə̄n â ghɛ̀. 8Abugho ghùw wəla ù lo yôsò ghɛ lo bugho, ù lo ghəŋlo ghî a mbī a kele enyəa ghe m bo e ghəŋlo, ù lo dêe sùghò â ghee enyəa Yɛso lò tsəghatsəgha, àsùghò enyəa Zə̀ kə lo ki alesāʼ ghee; 9Ù lo dêe ndûw â ghee enyəa ghe m bvʉ̀ kòmlò am bòo tə ghee, bòʼ ghe kâ bǒo fùghù dzə̀ â mùghò. 10Ù lo dêe sughò â ghee enyəa ghe m bvʉ̀ kòmlò aŋ ghəa zəla e lô tsəghatsəgha, bòʼ enyəa Ǹ ndûuw a vʉ̀a Bə̀ghà; ghɛ̀ lo kòom kòʼò tsə̀ghà yò mugho. 11Ù lo dêe ndûw â ghee enyəa Zə̀ kə̀ lo saʼā ghee, nu ghe ghùw wəla ù saʼā mbī zə saʼ tən.
12“Ǹ naam ki ndə̀mà tə aghəa Ŋ̀ ki aledzɛ̀ â ghɛ̀, Ǹ yo aledzɛ̀ êzə̄ŋ, bòʼ ghəa a te a sô ŋgěe fəmso nù ghɛ alo təfə̀ŋ. 13A laʼà bugho Zuʼ tə̀ Zɔlɔ tə lo bugho, tə lo e deē ghɛ â sə̀ŋò zò kùu ndùw Kə̀zə̀. Zuʼ tə te tə lô ghəa a kə̂a yò an daʼa kə wə̄n, tə lo kuuwn tèlè kə̀a kô fəgha kə̀là tə zuw ghè kò, tə lo e dzaā ziī wo sugho fəgha kəla kə ki alesə̄ â sə ko. 14Zuʼ tə te lo ghəəŋ nù mùghò è ki kɔʼso mò, bòʼ tə lo nìi dzàa wò shwaʼ waŋā â ghɛ̀. 15Fʉgha wə̄n u dzə̀m Tsele ù te ki, lǒ ù waŋā wo; zə lo e ghee Ǹ dzɛ̂ enyəa Zuʼ tə̀ Zɔlɔ tə lo nìi dzàa wò shwaʼ waŋā â ghɛ̀.”
Mʉŋe zɛʼɛ̄ e lo fə̀là dòʼn kɔ̀ʼɔ kə̀duʼnlo
16Fəkəmà ko enyə, ghɛ̀ lo kòʼò yò mugho, a lo kôom tsûuŋ tughūu sughò, ghɛ̀ lo kôom koʼ sugho mugho. 17Tsə̀təndə̄ghā tə wə̄n tə̀ li tə m bvʉ aŋ ghùe e ghee enyəa, “Ù bìso mòʼnlò èndūghō aŋghəa ù dzɛ̀ â sɛ̀ enyəa, ‘Fəkəmà ko enyə, ghɛ̀ kòʼò yo mugho, a lo kôom tsûuŋ tughuu sughò, ghɛ̀ lo kôom koʼ sugho mugho, bò Ǹ ndûuw alo bə̀ghà a?’ ” 18Ghe m bvʉ enyəa, “Ù mòʼò èndūghō aledzàa tsughu enyəa, ‘Fəkəmà ko enyə à?’ Ghàʼ bûʼ kwò sugho yo fəgha kə̀là ù mòʼo ghè kò.”
19Yɛso ŋ kòʼkɛ̀lɛ kɔʼ enyəa ghe ləghaa alebvʉ̄ wə̄n â ghəa zo, ù n daŋso dzɛ̀ â ghee enyəa, “Kən lò fəgha kə̀là ghɛ̀ bvʉnlo an ghùe zɛʼɛ, enyəa Ǹ yia moʼnlò èndughō aŋghəa Ǹ dzɛ̂ enyəa, ‘Fəkəmà ko enyə, ghɛ̀ lo kòʼò yò mugho, a lo kôom tsûuŋ tughūu sughò, ghɛ̀ lo kôom koʼ sugho mugho a?’ 20Kùmkùm, M̀ fɛ dzàa wò nù â ghɛ̀, ghɛ̀ lo e dinlō, kuu nsə, ghî a mbī a e ke kuuwn duʼnlo, ghɛ̀ è ke kuuwn mʉŋe, lò êzə̀ mò mʉŋe zɛʼɛ e lo kôom fə̀là doʼò wô eduʼnlo. 21Abugho wìzən sòʼo wɛ, ù n zuuw efɔnlo bòʼ nəgha e wə̄n è dzəa zə n sū. À m bùghò ù dzə tsughu, ù ŋ kòom nìzə̀ tsùghù fɔɔn zəla ù mò zuūw e dzə̀m, tsoʼn kə sô kɔʼɔ wə̄n enyəa ê ŋ wɛ dzə. 22E fi lo enyəa ghəa ghɛ̀ lo êzə̄ŋ alemʉŋē, mò Ǹ lo kòom kòʼò kpèʼe nù ghɛ, fə̂ŋ tɛʼɛ tə e ke e zɔlɔ, mò ghùw ù lì e ke yo alenìi nughù tsoʼn kɛʼɛ aŋ ghùu ghɛ̀. 23Abugho nəgha e te lo bugho, ghɛ̀ kê kòom bvʉ̂a yo mugho â ghəa è li zo. M̀ fɛ kùum dzàa wò nù â ghɛ̀, abugho ghɛ̀ lo bvʉ ko kwò kò â Tsele ù te an zən zaŋā, Ù lo fughuu nù. 24Alebùghò tâa wô êzə̄ŋ, ghɛ̀ kaām fəgha kə̀ li ko m bvʉ an zən zaŋā. Bvʉ tsughu nlò, ghɛ̀ so kele, to fə̂ŋ tɛʼɛ̄ tə e kuūm zɔlɔ. 25Ŋ̀ ghəa ghən â ghɛ̀ kwə̂ən kə̀a wò nù, mo nəgha e ndoʼò bùghò nù, zəla Ǹ lo kôom kə̂aa yô ghəa gho aŋ kwə̀ən kə ushwaʼ. Ǹ lô êzə̄ŋ e dzaā buʼn wo ghəa â ghɛ̀ kùu ndùw Tsele ù te an ndɛ an dzìi zə̂lā ghɛ̀ lo alezuūwkɛlɛ a te. 26Abugho nəgha e lo kpe tsughu, ghɛ̀ lo e bvʉa tsughu fəgha ko an zən zaŋā, mo a yò dzə̂ mugho Ŋ̀ kê gɔ̂ɔŋ nduw Tsele ù te am bàm zɛʼɛ̄. 27Ghuūghùe Tsele ù te ləgha sùghò nù ghɛ, tɔŋlo enyəa ghɛ̀ m mùghò ləgha, boo fùghù tsùghù sùghò enyəa a mùghò tum wò Kə̀zə̀. 28Mugho mò nughu wo a vʉ̀a Tsele ù te, bùghò nyə̀ wò fɛ am mbī. M̀ fɛ êzə̄ŋ kôom zə̀ghàan tsùghu mbī aledùw èbàm a vʉ̀a Tsele ù te.”
29A m bùghò ù kə̀a tsughu ghəa gho êzə̀, Tsə̀təndə̄ghā tə wə̄n tə n kɛɛ ndùw wə̄n enyəa, “Ghù vʉ̀a, ghù èzə̄ŋ e buʼn kə̀aa sə̌a wò àghəa an ndɛ; ghù kòom kwə̀ən kə̀aa yò nû. 30Ghàʼ mô êzəŋ kele enyəa ghù kwò aghəa a dzə̀m. Ghuw ù lì kòom bùʼ kì yo alebvʉ̄ ghû â ghəa è li zo, nu ghàʼ mô êzəŋ kele enyəa à ghù kûum tùm wò Kəzə̀.”
31Yɛso m bvʉ â ghee enyəa, “Ghɛ̀ boo fùghù dzə̀ nù êzə̄ŋ a? 32Nəghā e te e fɛ e kpee mɛ̀ʼn wò nù, zə m bùʼ kpe aŋghəa ghɛ̀ lo tiī zəghaàn mugho à nəŋ ko a te; chìa e tii nughūun nduw ko alo wə̄n an ndughu. Mò mugho êzə bûʼ yò sugho mùghò â nəŋ ko, nu Tsele ù te lo tsəgha ko ghàʼ à wə̄n. 33Ŋ̀ ghəa ghən gho â ghɛ̀ fɛ nì dzɛ̀ wò enyəa to ghɛ̀ mô kì ebughunlo bòʼ mùghò. Ghɛ̀ lo ŋgee faan nù fɛ am mbī; kuuwn dzə̀la tsughu ko nlò fə̂ŋ tò, nu mùgho m mbī tughu tsəghà.”
انتخاب شده:
Dzɔ̌n 16: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
