Dzɔ̌n 17
17
Yɛso gɔ̀ŋlò an tuw u tsə̀təndə̄ghā tə wə̄n
1A m bùghò Yɛso kə̀aa mɛʼɛ̀ tsughu ghəa ghən gho, ù m bòm lɛ̌ɛn kɔʼ kəwālā, ka tsughu alegɔ̀ŋlò enyəa, “Tsele, nəgha zə e mô èzəŋ e kpe â ghù aleghəŋlo enyəa ghî à kôʼ kɔʼso məla wɛ wʉ̂a ki, tò enyəa ù nìi wô ghù â kɔʼso mò a Tsele, 2bòʼ enyəa, ghəa ghù lo mò ghù m fughu wə̄n â daʼa ko a zəŋò ghì ghò a dzə̀m, enyəa ù è lo alefughu mughù è doʼn təla zo â ghî ghə̀là ghù fughu â wə̄n. 3Mughù e doʼn təla zən lǒ â ghee alekwō ghû, Zə̀ kə̀ səŋo kən kə mɔ̀ʼ, kwo sugho Yɛso Kə̀lestò wəla ghù mò tum wô fɛ am mbī. 4Mùghò n nì wò ghû a kɔʼso mò fɛ am mbī a bòʼ mùghò m mìasô fwàʼ kə̀là ghù mò fughu enyəa M̀ fwâʼ fɛ aŋ ghueekətsə̄. 5Tsele nîi naŋa mugho a vʉ̀a ghù tò mùghò è ki kɔʼso mò, tɔ̂ɔŋ kɔʼso m mɔ̀ʼɔ milā ghàʼ à ghù mò ki tsəgha to mbī e zîi tsughu.
6Mùghò n dě ghùw wəla ghù lo ghè wò â ghì ghə̀là ghù mò nî fughu sə wo â mùghò am mbī. Ghe fə̀ ki lo tsəgha ghî ghə̀a, ghù n nì fùghù wò ghee â mùghò, ghe yia ghe zuw dzə̀ zə̀ghà, 7ghe ŋ kele êzəŋ enyəa fʉgha wə̀n ù dzə̀m Ŋ̀ ki, à fùghù ghû â mùghò a Tsele. 8Tɔŋlo enyəa M̀ maā naʼà tum zəghà zəla ghù mò tum enyəa Ǹ naʼà â ghee, ghe mô è zuw, boo è fughu. Ghe yia kele tsughu sugho səŋò zò enyəa Ŋ̀ kûm nùghù wò a vʉ̀a ghù, àsùghò enyəa à lò ghû, ghù kùm tum wô mugho. 9Ŋ̀ gɔŋlò an tuw u ghee, Ŋ̀ gɔ̂ɔŋ dzə̀ yò an tuw kə mbī e dzə̀m, gɔ̂ɔŋ zaŋa e kuuwn lò ko â ghî ghə̀là ghù fughu wo â mùghò, tɔŋlo enyəa à lò ghî ghə̀a. 10Fəgha kaŋa kə lo kə̀ kə̂a kò; tò aŋghəa kə̂a kə̀ lo kə̀ kaŋā ko; kɔʼso maŋā m fɛ lǒ bòʼ ghee. 11M̀ fɛ êzəŋ zəghàan tàʼn tsùghuu ghee am mbī, yìa Ǹ nughùun wô a vʉ̀a ghù. Tsele waŋa ù Zɔ̀lɔ, tsən nǎn ghee an daʼa kə̂a, kəla ghù mò fughu â mùghò, to ghe doʼò kə̀fəgha kə̀ mɔ̀ʼ, to aŋghəa ghàʼ à ghù lò fəgha ko kə mɔ̀ʼ. 12#Sms 41:9; Dzn 13:18 Nəghā zəla mùgho mò lo ghàʼ à ghee, mùgho mô ghee kwu kele an daʼa kəla ghù mò fughu â mùghò; mùghò n chǐin ghee, ghùw ù ghee u mɔ̀ʼ kà mìaa sə a te, à gɔ̀ʼɔ̀ ko yo ghùw wəla ghe fə̀ fôʼ naŋa enyəa ù kè kwəlà sâŋlò, aleluesō tsughu shwaʼ wəla ghe tɔm naŋā am Mwàʼsò kə Kəzə̀. 13M̀ fɛ ti an dziī M̀ bugho a vʉ̀a ghù. Ŋ̀ ghəa ghən fɛ am mbī kuuwn kə̀aa enyəa to tsə̀təndə̄ghā taŋa tə mô kì kpeen mɛʼɛ̄ sugho tsoʼn zəla Ŋ̀ ki ghè zò. 14M̀ maā shwaʼ wʉ̀a ù naʼà ndùw â ghee, mbī zə e bɛ̀ kɔʼ ghee bòʼ enyəa à ghe yo dzə̂ tò ghî a mbī gho, tò aŋghəa Ǹ yô sugho ghùw ù mbī. 15Gɔ̂ɔŋ zaŋa e yo dzə̂ enyəa ghù ni nughu sə kɔʼ ghee am mbī, e kuuwn lò enyəa ghù ni nan naŋa ghee am ghùu ghùw ù bǐigh. 16Ghe yo dzə̂ ghî a mbī gho tò aŋghəa Ǹ yô sugho ghùw ù mbī. 17Ghəəŋ tsughu ghee enyəa ghe e zɔlɔ an səŋò zəghà zəla ghù zoʼn ghee a te, tɔŋlo enyəa shwaʼ wʉ̀a ù lo êsəŋò. 18Mùghò ŋ ghee am mbī tum nyə ndùw, tò aŋghəa ghù mò tum nyə wô sugho mugho am mbī. 19Yìa Ŋ̀ kûm fughu mɛ̀ʼɛ̀ wô ghue waŋa wo alefwàʼ â ghù an tuw u ghee, enyəa ghe lo kûu fughu mɛʼɛ̀ wô sughò ghue e ghee â ghù.
20Ŋ̀ kaa gɔ̀ɔŋ ko yo an tuw u aghì ghən gho, Ŋ̀ gɔ̂ɔŋ sùghò an tuw ù ghì ghəla ghe lo zuūw nîi shwaʼ waŋa wəla tsə̀təndə̄ghā taŋā tə dzâa nduw â ghee, ghe boō fughu wô â mùghò. 21Yìa Ŋ̀ gɔ̂ŋlo enyəa to ghe mô lò alo kəfəgha kə̀ mɔ̀ʼ aŋ ghùe e ghee, tò aŋghəa ghàʼ à ghù bɔɔ̄m lô sugho alo kəfəgha kə mɔ̀ʼ a Tsele, àsùghò enyəa sɛ̀ à ghee e bɔɔm lo sugho alo kəfəgha kə mɔ̀ʼ; to mbī boo tsughu enyəa a mùghò tum wò ghù. 22Daʼa kəla ghù mò fughu â mùghò, mùghò m fùghù sùghò â ghee, enyəa ghe e lo fəgha ko kə mɔ̀ʼ to aŋghəa ghàʼ à ghù lò sughò fəgha ko kə mɔ̀ʼ. 23Yìa Ŋ̀ gɔ̂ŋlo enyəa mùghò è lo fəgha ko kə mɔ̀ʼ ghàʼ à ghee tò aŋghəa ghù lò fəgha ko kə mɔ̀ʼ ghàʼ ghù, enyəa ghe e tɔ̄ʼ ti tǒ ghùw u mɔ̀ʼ, to mbī lo zuūwkɛ̄lɛ̄ enyəa a mùghò tum wò ghù, àsùghò enyəa ghù ŋ ghe ləgha to aŋghəa ghù ləghaa mugho a te. 24Tsele, Ǹ ləghaa enyəa ghî ghəla ghù fughu â mùghò, ghe e lo ghàʼ à ghee an lùʼù kəla Ŋ̀ kê lo a te, to ghe lo e bɔŋɔ̄ koʼō tughu zaŋa zo; tughu zəla ghù mò fughu â mùghò, bòʼ ləgha zəla ghù fə̀ ki kele a zəŋò mùghò to mbī e bùghò zîi tsughu. 25Tsele waŋa ù dzùŋ wəla ù lò tsəghatsəgha, aŋghəa ghî a mbī ghən bûʼ kwo ko yô ghû, yìa Ŋ̀ kuūwn kwo ghû tò aŋghəa ghî à li ghən kwo enyəa à mùghò tum wò ghû. 26Mùgho nì dè ghû â ghee, Ǹ lo kòom bùghuu dòʼn yò aleghəŋlo enyəa, ləgha zə̀ghà zəla ghù ki a zəŋò mùghò, zə e lo a zəŋò ghee, mùghò è lo sugho a zəŋò ghee.”
انتخاب شده:
Dzɔ̌n 17: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
