N. Marc 11
11
XI. CAIB.
Criosta dol a stigh gu Ierusalem air muin asail; a mollachadh na craoibh-fige gun mheas, ʼsa tilgeadh luchd-ceannach us reic as an teampull.
1Agus nuair thainig e teann air Ierusalem us Betania aig sliabh Olibheit, chuir e air adhart dithis dhe a dheisciopuil,
2Us thuirt e riu: Siubhlaibh doʼn bhaile a tha muʼr coinneamh, agus air ball a dol a stigh ann, gheobh sibh bioraiche an ceangal, air nach do shuidh duine riamh: fuasglaibh us thugaibh an so e.
3Agus ma their duine air bith ribh: Ciod tha sibh a dianamh? abraibh, gu bheil feum aig an Tighearna air: us leigidh e an so e san uair.
4ʼSa dol air an adhart fhuair iad am bioraiche an ceangal air taobh-mach a gheata aig coinneachadh dà rathaid; us dhʼfhuasgail iad e.
5Agus thuirt cuid deʼn fheadhainn a bha ʼnan seasamh an sin riu: Ciod tha sibh a dianamh a fuasgladh a bhioraiche?
6Us thuirt iad riu mar a dhʼorduich Iosa dhaibh, us leig iad leo e.
7Agus thug iad am bioraiche gu Iosa; us chuir iad am falluinnean air, agus shuidh e air.
8Us sgaoil moran an aodaichean air an rathad; agus ghearr feadhainn eile meoir chraobh, agus sgap iad air an rathad iad.
9Agus ghlaodh an fheadhainn a chaidh roimhe, ʼsa lean e, a g-radh: Hosanna:
10Is beannaichte esan a tha tighinn an ainm an Tighearna: is beannaichte rioghachd ar n-athar Dài a tha tighinn: Hosanna anns na h-ardaibh.
11Us chaidh e stigh do Ierusalem thun an teampuill; ʼs an deigh amharc air gach ni mun cuairt, bho na bhaʼm feasgar a nis ann, chaidh e gu Betania maille ris na dhà-dhiag.
12ʼS an ath latha nuair a chaidh iad a mach á Betania, bha acras air.
13ʼS nuair a chunnaic e fad as craobh-fhige air an robh duilleach, thainig e fiach am faigheadh e ma dhʼ fhaoidte dad oirre; ʼs nuair a rainig e i, cha dʼfhuair e ni ach duilleagan: oir cha robh àm nam figis ann.
14ʼSa freagairt, thuirt e rithe: A so suas gu bràth na itheadh neach meas dhiot. Agus bha dheisciopuil ga chluinntinn.
15Us rainig iad Ierusalem. ʼS nuair a chaidh e stigh doʼn teampull, thòisich e ri fuadachadh a mach na feadhnach a bha reic, ʼs na feadhnach a bha ceannach san teampull; agus leag e buird luchd-malairt an airgid, us cathraichean luchd-reic chalman.
16ʼS cha n-fhuiligeadh e gun giulanadh neach air bith saghach tromhʼn teampull:
17Us theagaisg e, a g-radh riu: Nach eil e sgribhte: Gun abrar tigh urnaigh ri mo thighse feadh nan cinneach uile? Ach rinn sibhse uamh mheirleach dheth.
18Agus nuair chuala na h-ard-shagairt ʼs na Sgriobhaich so, dhʼiarr iad ciamar a dhʼfhaodadh iad cur as da: oir bha eagal aca roimhe, a chionn gun robh an sluagh uile a gabhail ioghnaidh ri theagasg.
19Agus nuair thainig am feasgar, chaidh e mach as a bhaile.
20ʼS nuair a bha iad a gabhail seachad sa mhaduinn, chunnaic iad a chraobh-fhige seargte bho friamhaichean.
21Us Peadar a cuimhneachadh, thuirt e ris: A Rabbi, seall, tha chraobh-fhige, a mholluich thu, air seargadh as.
22Us Iosʼ a freagairt, thuirt e riu: Biodh creideamh Dhe agaibh.
23Gu deimhinn tha mi radh ribh, co sam bith a their ris a bheinn so: Tog agus tilg thu fhein sa mhuir, agus aig nach bi teagamh ʼna chridhe, ach a chreideas, gun dianar ciod sam bith a their e, gum bi e diante dha.
24Air an aobhar sin deiream ribh: Ge bʼe ni dhʼiarras sibh ann an urnaigh, creidibh gum faigh sibh e, us thig e guʼr n-ionnsuidh.
25ʼS nuair sheasas sibh a dhianamh urnaigh, mathaibh ma tha dad agaibh an aghaidh duine air bith, los gum math ur n-Athair a tha air neamh ur peacannan fhein dhuibhse.
26Ach mur math sibh, cha mhua mhathas ur n-Athair a tha air neamh ur peacannan fhein dhuibhse.
27Agus thainig iad a rithist gu Ierusalem. ʼS nuair a bha e coiseachd san teampull, thainig na h-ard-shagairt, agus na Sgriobhaich, agus na seanairean ga ionnsuidh,
28Us thuirt iad ris: Ciod an t-ughdaras leis a bheil thu dianamh nan nichean so? us co thug an t-ughdaras so dhut gu bheil thu gan dianamh?
29Agus Iosa a freagairt, thuirt e riu: Faighnichidh mise aon fhacal dhibhse, agus freagraibh mi; agus innsidh mise dhuibhse ciod an t-ughdaras leis a bheil mi dianamh nan nichean so.
30Baisteadh Eoin, an ann bho neamh, no bho dhaoine a bha e? Freagraibh mi.
31Ach smaoinich iadsan aca fhein, a g-radh: Ma their sinn: bho neamh, their e: Car-son ma ta nach do chreid sibh e?
32Ma their sinn: bho dhaoine, tha eagal an t-sluaigh oirnn: oir sheall daoine uile air Eoin mar fhior fhaidh.
33ʼSa freagairt thuirt iad ri Iosa: Cha n-aithne dhuinn. Us thuirt Iosa riu, ʼs e freagairt: Cha mhua dhʼinnseas mise dhuibhse ciod an t-ughdaras leis a bheil mi dianamh so.
اکنون انتخاب شده:
N. Marc 11: MacETN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Scottish Bible Society 2017
© Comann Bhìoball na h-Alba 2017
