Jɔɔnn 18

Ba soor Yisa biaŋinba

(Matiu 26.47-56; Mak 14.43-50; Luk 22.47-53)

1Yisa nba din miar Yennu ki gbenn na poorpo, ki ŋɔɔ nan u poorpoweiteeb yaat saa, ki saa poot kpenu nba ki bi yi Kidron na. Kpaab nna din be leŋ; leŋe ki bi din be.

2Tɔn, Judas wunba nyii Yisa poor na din tuu mi kpaab maŋ boor, kimaan yoo kur Yisa din tuu saa nan u poorpoweiteeb leŋe. 3Ŋanne ki Judas tan baar kpaab maŋ ni nan lanjimanba, nan Yennu jiantu yudamm nan Farisiinba toontunna; ki bi din dia jatiat nan fita nan mulanbaabii.

4Yisa ŋarin din mi bonsiar kur nba yaa lin teenɔ, ŋanne ki u nyii tɔɔnn, ki boib a “I loon ŋmee?” 5Ki bi jiin a “Yisa nba tee Nasaret nirɔ na.” Ki u betib a “Mine na.” Ki Judas, wunba nyii u poor na, ki u see leŋ namm. 6Yisa nba ŋarin yaa a “Mine na” yoonba, ki bi ji ŋmat potuntuna, ki baa baa tiŋ ni. 7Ki Yisa ŋamm boib a “I loon ŋmee?” Ki bi bia yaa a “Yisa nba tee Nasaret nirɔ na.” 8Ki Yisa betib a “N poŋ beti a mine na. Li-i tee ki i loonimie, yin ŋaan ki binba be nna na ki bin yaata.” 9U din yet nna maŋ ki li tee nan wa poŋ yet Yennu linba ki yaa a “Fa turin binba kur na, bi sɔɔ ki teen yanni,” ki lin fit lian teen mɔnii ki gbee.

10Li yoo maŋ ki Simon Piita din dia jukbanjiak ki nɔɔt, ki chɔɔ Yennu jiantu yudaanɔ daabir niidiitu po tubir ki pot. Daabir maŋ sann din yi Malkus. 11Ki Yisa bet Piita a “Jiim a jukbanjiak maŋ ki jiin nɔɔn. A dukii mi a fara nba ki n Baa teenin na, n kan di li fara-aa?”

Ba jii Yisa ki baar nanɔ Annas peŋ biaŋinba

(Matiu 26.57-58; Mak 14.53-54; Luk 22.54)

12Ŋanne jik ki lanjimanba nan bi yudaanɔ nan Juu teeb yudamm toontunna na soor Yisa, ki lorɔ, 13ki jiiu ki daa saan nanɔ Annas boor sinsinn. Annas din tee Kayafas diamme, ki Kayafas din tee Yennu jiantu yudaanɔe li binn ni. 14Li din tee Kayafas maŋe daan bet Juu teeb yudamm a li ŋan ki niyenɔkɔɔ-n gaar niib kur paak ki kpo na, a ŋannii chee nan sɔɔ kur-n kpo.

Piita nba din nɔi a u ki mi Yisa biaŋinba

(Matiu 26.69-70; Mak 14.66-68; Luk 22.55-57)

15Ba din saan nan Yisa yoonba, ki Simon Piita nan Yisa poorpoweitɔlɔɔ ki bi waa; ki poorpoweitɔɔ maŋ din tee sɔɔ nba ki Yennu jiantu yudaanɔ miue. Li paak, ki u baar kɔɔ Yennu jiantu yudaanɔ na ŋaadundɔuŋ ni, siaminba ki Yisa be na. 16Ŋaan ki Piita ŋarin biar see nanyer po yaŋŋir tammɔb ni, ki poorpoweitɔlɔɔ maŋ nba ki Yennu jiantu yudaanɔ din miu na, ki u ŋmat yaŋŋir tammɔb na ni, ki pak nan sapaamɔ nba guu tammɔb na, ki kɔɔn Piita dundɔuŋ na ni. 17Ki sapaamɔ maŋ boi Piita, “A ki tee jɔɔ na poorpoweitɔyenɔ kaa-aa?” Ki Piita jiinɔ a “Aaii! N ki tee u poorpoweitɔyenɔ kaa.” 18Waat din be li yoo, ki toontunna na nan lanjimanba na joo sankɔɔna muu, ki see ki nanii, ki Piita tan saan taamm ki bi nanii.

Biaŋinba ki Yennu jiantu yudaanɔ boi Yisa buboit

(Matiu 26.59-66; Mak 14.55-64; Luk 22.66-71)

19Ŋanne ki Yennu jiantu yudaanɔ na boi Yisa u poorpoweiteeb nan u wannu na po. 20Ki Yisa jiin betɔ a “N poŋ tuu piak yeenin ni ki teen sɔɔ kur, ki ki bɔri n wannu kur nba ki n tuu wanti. N tuu want niib Yenjiantu diit ni nan Yennu jiantu ŋasaakak ni, siaminba ki Juu teeb kur tuu baat lakint na. Min ŋarin ki mi pak siar ki wooni. 21Ki bee teen ki a boimi? Boin binba gbat linba ki n tuu beerib na. Ŋamm mi ma tuu yeen linba.” 22Yisa nba yet nna maŋ, ki lanjimanba na yenɔ pebɔ tanpak, ŋaan boiɔ a “Bi piak jiint ki teen Yennu jiantu yudaanɔ nnee-ee?” 23Ki Yisa betɔ, “Mi-i pak bonbisiarie, fan bet sɔɔ kur la tee linba. Ŋaan mi-i pak linba tokinie, bee teen ki a ji pebimi?”

24Li yooe ki Annas te ki bi jii Yisa ki saan nanɔ Kayafas wunba tee Yennu jiantu yudaanɔ na peŋ; ki Yisa bia lek daa lor nan ŋmiit.

Biaŋinba ki Piita bia ŋamm nɔi a u ki mi Yisa

(Matiu 26.71-75; Mak 14.69-72; Luk 22.58-62)

25Piita nba din see ki nanii muu na, leŋ maŋ ki bi boiɔ, “A ki tee u poorpoweitɔyenɔ kaa-aa?” Ki Piita nɔi, ki yetib a “Aaii, n ki tee u poorpoweitɔyenɔ kaa.” 26Ki Yennu jiantu yudaanɔ daabiyenɔ, ki u ninjae tee wunba ki Piita chɔɔ u tubir ki pot na, ki u boiɔ, “N ki la-a nan Yisa kpaab na ni-ii?” 27Ki Piita bia nɔi. Li taakpaak ni na ki kojouk bui.

Biaŋinba ki Pailat bu Yisa buut ki chab a bin kpiu

(Matiu 27.1-2, 11-14; Mak 15.1-5; Luk 23.1-5)

28Kayafas nba din boi Yisa buboit ki gbenn na poorpoe, ki Juu teeb yudamm jiiu ki saan nanɔ tiŋ na yudaanɔ nba ki bi yiu Pailat na ŋaak ni. Li din tee sanyapob nie. Ki Juu teeb yudamm maŋ ki loon ki bin kɔɔ ŋaak maŋ ni, kimaan bi din loon bin dia bi mɔŋe bonŋann Yennu boor ni, a ki bin tan fit lian di yukitgar tiaru jaamm. 29Li paak ki Pailat nyii nanyer ki tookib, ki boib a “Jɔɔ na teen bee ki i biirɔ?” 30Ki bi yaa a “U-i bo-i kii tun bonbiiri, ti bo kan baar nanɔ a boor nna.” 31Ki Pailat betib, “I mɔŋ mɔŋ-n jiiu ki bu nanɔ i sennu nba want biaŋinba.” Ki Juu teeb yudamm maŋ yaa a “Ti ki mɔk yaak a tin kpi nirɔ.” 32Yisa nba din yaa a kubooru nba ki u tan sa kpo na, li din set tan tee nnee, ki fit lian gbee.

33Ki Pailat ŋmat ki kɔɔ ŋaak na ni, ŋaan yiin Yisa, ki boiɔ a “A tee Juu teeb kpanbaree?” 34Ki Yisa jiin ki boiɔ a “Fine daa boin buboit na amii siabe beta n po?” 35Ki Pailat betɔ, “Mine tee Juu nirɔ-ɔɔ? Li tee a mɔŋ mɔŋ niib nan Yennu jiantu yudamme jiia ki tan turin. A jia biir bee?” 36Ki Yisa yetɔ a “N naan ki tee tingbouŋ na ni yar kaa. N naam-i bo-i tee tingbouŋ nna yarie, n poorpoweiteeb bo sa kɔn n paak, ki Juu teeb yudamm bo kan soorimi. Aaii, n naan ki tee tingbouŋ nna naami.”

37Ki Pailat boiɔ a “A set tee kpanbare ŋarimii?” Ki Yisa jiin a “Nn, fine yeen a n tee kpanbar. Bi din marin a n wann niib barmɔnii wannue. Na paake ki n baar tingbouŋ na ni; ki sɔɔ kur nba waa barmɔnii wannu maŋ gbia n maan.” 38Ki Pailat boiɔ a “Bee tee barmɔnii?” ŋaan ŋmat nyii nanyer Juu teeb yudamm na boor ki betib a “N ki la jɔɔ na biit ki sa biirɔ. 39Ŋaan i mɔk siar ki tuu tee binn kur ni, ki n tuu nyinn dansarkɔyenɔ yukitgar tiaru jaamm yoo ki turi. I loon ki n nyinn Juu teeb kpanbar na ki turiinii?” 40Ki bi tian tintianii ki yaa a “Ti ki loon jɔɔ na kaa. Ti loon Barabase, ki a nyinnɔ ki turit.” Ki Barabas din tee fatitɔɔe.

انتخاب شده:

Jɔɔnn 18: BIM

های‌لایت

به اشتراک گذاشتن

کپی