Jɔɔnn 17

Yisa nba miar Yennu biaŋinba

1Yisa nba din pak nna maŋ, ŋaan gokit got sanpaapo, ki yet a “N Baa, yoo maŋ baar na. Ŋaant ki min a Bija-n la dontir, ki fit lian te ki a mun-n la dontir, 2kimaan fine turin yikoo niib kur paak, a man fit lian tur niib kur nba ki a turin maŋ manfoor nba kaa gbennu. 3Ki manfoor maŋe, ki niib sa nakin bann fin nba tee Yennu nan barmɔnii, ki sɔɔ ji kaa; ki bi bia mun sa bann min, Yisa Masia, wunba ki a tumɔ na. 4Toona nba ki a turin a n tun na, n ji tun ki gbenna, ki dont a sann tingbouŋ na ni. 5N Baa, turimin dontir a boor ni mɔtana, dontbooru nba ki n din laat, ma din be a boor ni ki a daa din ki nan dunia na.

6“Niib nba ki a din gann ki turin na, n te ki bi bannawa. Bi din tee a yabe, ki a din jiib ki turin, ki bi mun sak a maama. 7Ki mɔtana bi mi nan bonsiar kur nba ki a turin na, li nyii a boore, 8kimaan n pakib maan nba ki a turin nawa, ki bi mun gaara, ki mɔtana bi ji bann nan n set nyii a peŋe nan mɔnii, ki bi teen yada nan fine tumin.

9“Tɔn, mɔtana n ji meia bi paake na. N ki meia tingbouŋ na niib kur paak kaa, ŋaan mɔtana n meia binba ki a turin na paake, kimaan bi tee a yabe. 10N yab kur tee a yabe; ki a yab kur mun tee n yab; ki bi bia dont n sanne. 11Ki mɔtana n ji baat a boor nie na; n ji kii be tingbouŋ na ni, ŋaan ŋamm ŋarin daa sa biar tingbouŋ na niwa. Tɔn, n Baa, Popeendaanɔ na, i diab fanu nan a sann ni, sann nba ki a din purin na, a bin fit lian taan yomm kaman nan min nan fin nba kpan tee yomm na. 12Ma daa be namm na, n diab fanu nan a sann nba ki a din purin na ni. N baak bi paak, ki bi ni sɔɔ ki teen yanni, see wunba tee Sintaanii yɔɔ na. Wa teen yann na, li tee kaman nan la sɔb Yennu gbouŋ ni biaŋinbae. 13Ki mɔtana n baat a peŋe; ki ma daa be tingbouŋ na ni na, n piak linba na ki teemm, a bin fit lian la n parpeenn na booru ki saa yakir.

14“N pak a maan na turiba. Li paak ki tingbouŋ na ŋaateeb namm, kimaan bi ki tee tingbouŋ na ni yabi, kaman nan ma mun ki tee tingbouŋ na ni ŋaayɔɔ na. 15N ki meia ma a nyinnib tingbouŋ na ni kaa, ŋaan n meia ma i baak bi paake fanu, ki bonbiiuk daanɔ Sintaanii daa baat ki biiribi. 16Ma ki tee tingbouŋ na ŋaayɔɔ na, li mun bia tee nnee, bi ki tee tingbouŋ na ŋaayabi.

17“Wantib a maan nba set tee barmɔnii na, ki lin teemm popeendamm. 18Fa din tumin tingbouŋ na ni biaŋinba na, nnee ki n mun bia tumm tingbouŋ ni na. 19Ki bi paake ki n jikit n mɔŋ ki teena na, a bin fit lian teen a tiauŋ yab nan barmɔnii.

20“N ki meia ki teen ŋamm kuukɔɔ kaa; n bia meia ki teen binba tan sa teenin yada bi mɔɔntii paakewa. 21N bia meia ma bi kura-n taan mɔyomme. N Baa, fa be n ni, ki n mun be a ni biaŋinba na, ŋaant ki bi mun-n taan nant mɔyomm ti ni nna; ŋannii sa te ki tingbouŋ na ŋaateeb-n teen yada nan fine tumin. 22Popeenn binbeŋ nba ki a turin na, n mun turiba, ki bi sa fit lian taan mɔyomm, kaman nan min nan fin nba tee mɔyomm biaŋinba na. 23N be bi ni, ki a mun be n ni, a bin fit lian taan mɔyomm chib. Ŋannii sa te ki tingbouŋ na ŋaateeb-n bann nan fine tumin, ki bi sa bann nan a loonib kaman nan fa loon min biaŋinba na.

24“N Baa, a turib mine, ki n loon ki bii taŋŋi be ma tan sii be siaminba, ki bin fit lian la fa dont n sann biaŋinba na, kimaan a din loonime yoo nba ki a daa din ki nan dunia na. 25N Baa, Popeendaanɔ na, tingbouŋ na ŋaateeb ŋarin ki miani, ŋaan min ŋarin mia, ki n poorpoweiteeb na mi nan fine tumin nna. 26N fiit a binbeŋ ki wanniba, ki bia sii ŋammit ki fiitir a binbeŋ ki wantib, ki jenna, loomm nba ki a loonin na, ki bin fit lian gaar, ki n mun sii fit lian be bi ni.”

انتخاب شده:

Jɔɔnn 17: BIM

های‌لایت

به اشتراک گذاشتن

کپی