Luk 24

1Na ɣɔn ne kol tueŋ de wik, ɣɔn ne nyaany, e ke bɔ te de raŋ, kene wɛl nyir cikke juir. 2Goki kuur yok ne ci lɛɛr wei ne raŋ thok. 3Goki lɔ thin, goki guɔp de Bɛnydit Yecu cuɔk lɔ yok. 4Na ɣɔn, aŋootki e ke gɛi ne yekene, ŋem, go kɔc keerou kɔɔc e kelɔm ceŋ alɛth lɔ egual: 5ana yii riɔcki, ku gutki kenyiin piny, e ke yookki ke, Yii yeŋo ye we ran piir kɔɔr te de kɔc ci thou? 6Aliu etene, ee rɔt jɔt: ciɛtka wenhiim ne wel eke ci lɛk we ɣɔn ŋoot en ke tɔ ne Galili, 7jiɛm en ye bi Wen de raan bi dhiil ne gɛm yine kɔc rac, ku bi piaat, ku bi rɔt bɛɛr jɔt ne kol e diak. 8Goki kenhiim ciɛt ne welke, 9ku jiɛlki te de raŋ, ku lek keekake kedhia lɛk thiɛrkutok, ku kɔc kedhia. 10Ku kaake ye yi Mari Magdalene, kene Joana, ku Mari man e Jakob: ku diar kɔk kene keek, keeka ke lek keekake dutuuc. 11Go keewelke ciɛt wel ke acibel enɔŋ keek; ku cik welken gam. 12Go Petero rɔt jɔt, ku riŋ te de raŋ; leer ku guŋ ku luiitic, ke ŋem alɛth linon e ke tai kepɛc; a go dhuk pande, ke gɛi ne ke ci tuɔl.

13Ŋem, ren de kɔcpiocke ake lɔ ne yekole pan thin cɔl Emauth, ye cathde mail keedherou ku nuth ne jal ne Jeruthalem. 14Goki lɔ e ke gɔk ne keriɛc ebɛn ci tuɔl. 15Na ɣɔn aŋootki e ke gɔk, ku yiki roth thiec, ke Yecu miit rɔt, ku leer ke ke. 16Goki nyiin cuɔl, a cik nyic. 17Go ke yɔɔk, Ye ye abara de ŋo yaka mat wuɔla ke we cath dholic? Goki kɔɔc ediu, e ke ci nyiin kuany. 18Go toŋ de keek cɔl Kleopath, go gam yook, Ye yin e ye ran toŋ rɛɛr ne Jeruthalem ku kuc ka ci tuɔl ne keeakolke? 19Go ke yɔɔk, Ye yeki yi kaŋo? Goki yɔɔk, Yii kaaye ka ke Yecu de Nadhareth, man e ye nebi ku rire luɔide kene welke ne Nhialic nyin ku kɔc kedhia: 20ku gɛm cene ye gam ne banydit ke ka ka Nhialic ku banykuɔ, bi luɔk thou, ku piɛtki. 21Ku kee ŋɔthku wuu ye yen ede ci Yithrael bi luɔk. Ku kacie keekake abac, nin aya diak nin eke loiye keekake. 22Diarkuɔk kɔk aa wɔ cɔk gɛi, ne kee cik kek riɛr te de raŋ; 23ku na wen akenki guɔp de Yecu yok, e ke bɔ, jamki yi cik malaikai ŋem, man eke ye jam yii piir. 24Go kɔc kɔk eke tɔ wɔ ke goki lɔ te de raŋ, goki lɔ yok ne cit luɛl wen de diar: ku yeguɔp eka kenki ŋem. 25Go ke yɔɔk, Ye agai kɔc ci bel, ku cak kaŋ ye dai dot ne wepiɔth ka eke ci lɛk week ne nebii! 26Cii piath bi Kritho keekake guum, ku bi lɔ ne nuɔmdeic? 27Go ke nyuɔth kacigɔɔr kedhia ne yen, gɔɔc ne Mothe agut en nebii kedhia. 28Goki lɔ e ke coth panthi, pan e bii ke thin: go cieth tueŋ cit ke bi lɔ ke lɔ. 29Goki peen, jamki, Yii rɛɛre we wɔ: ne ke cen cuɔl. Go lɔ lee tɔ ke ke. 30Na ci nyuc ke ke ciɛmki, ke lom mono, ku thiei, ku wɛɛkic, ku yin ke. 31Goki jal nyic; go rɔt liɛɛp wei, a cik beer ŋem. 32Goki jam ne roth, Yii kenku piɔth nyop ne biɔk thin, wen jiɛm en ke wɔ dholic, ku wen nyuth en wɔ ne kacigɔɔr? 33Goki roth kuany ne yethane, dhukki Jeruthalem, ku yokki thiɛrkutok ne ci gueer tetok, ku kɔc eke tɔ kene keek, 34jamki, Yii Bɛnydit ee rɔt cok jɔt ejik, ku kee tuɔl enɔŋ Thimon. 35Goki kaŋ ciir kedhia ka eke ci loi dholic, ku nyiny e cik kek ye bɛn jal nyic ne wɛɛk de mono.

36Ku na ŋootki e ke luel keewelke, ke Yecu tul ne keciɛl yic, ku yook ke, Ye keeyabi dɔɔr tɔ ke we. 37Goki nhiim mum ne riɔc, ku cɔlki yii ye jɔk e cik ŋem. 38Go ke yɔɔk, Ye yeŋo riɔc we? ku yeŋo muum we nhiim tɛk we ne kajuec? 39Ŋɛmka ɣacin ku ɣacok, kee ɣa guɔp: thapka ɣa, ku ŋɛmka; ne ke ye jɔk ciɛn riiŋ ku yuɔm ci mandie. 40Na ci yekene luel, e ke nyuthke yecin ku yecok. 41Ku na ŋootki e ke mum nhiim ne yum de piɔu, gɛiki, go ke yɔɔk, Ye nɔŋ kecam etene? 42Goki yiɛn baŋ toŋ de rɛc ci geet. 43Go loom, ku ciɛm ne kenhiim.

44Go ke yɔɔk, Ye welcie ɣɔn cake luel eke, ka ŋoot ka tɔ wɔ we, ya keriɛc ebɛn abi rɔt dhiɛl, ka ci gɔɔr ne loŋ de Motheic, ku nebii, ku diɛt, ne ɣɛn. 45Go ke jal loi nhiim, bik kacigɔɔr ya nyic; 46go ke yɔɔk, Ye kee gɔɔr yala, ya Kritho abi gum, ku bi rɔt jɔt ne kol e diak; 47ku ya bi gam de awac kene pɛl de rɛɛc bi ke ya pial juɔr ebɛn ne rinke, kɔne gɔɔc ne Jeruthalem. 48We ye duleek ke keekake. 49Ku ŋɛmka, we tuɔcke keciluel ne Awa; ku rɛɛrka ne Jeruthalem, agut te cene we piɔth ne riɛr nhial.

50Go ke ŋaar biyic agut en Bethani, ku jɔt yecin nhial, thiei keek. 51Na ɣɔn aŋoot e ke thieike, ke jiɛl ne keyic, jɔt leere nhial. 52Goki door, ku dhukki Jeruthalem ke ke ci piɔth lɔyum areet: 53ku yiki lɔ yekalu luut, yiki Nhialic thiei.

اکنون انتخاب شده:

Luk 24: LEKJOT

های‌لایت

به اشتراک گذاشتن

کپی