Susumo 30
30
1Jeng de Rahɛl a di, vit a hɛ́ na tɔs, a tɛ̀ repugu na gwà mɛ kunat, a yâng Yakɔp, “Tɔs a me nèy, ka ano wɛt, ko mê ku!”
2Yakɔp a tɛ̀ shom na Rahɛl, a ye, “Ma sé e tô Dagwi wɛt! E yɛ wɛ de a ro mɛ a hwo nà tɔs nèy.”
3Ko Rahɛl a ye, “Nā hwông fwom hom Bilha. Dyɛng na yɛ, na a tɔ hwey e to hom. Yi ano ma rɔda tɛ́ me neng-gwɔ̂ nèy.” 4Ko a nɔng Bilha, hwông fwom mɛ, a tɛ́ ɛ jɛn-hwā. Yakɔp a dyɛng na yɛ. 5Bilha a sey jim, a tɔ̀ a Yakɔp hwey wen. 6Ko Rahɛl a ye, “Dagwi a ga hàla me washak, a ga wok won hom, ko a ga nɔng me hwey.” Yaga ano, a vo a hɛ rezâ Dan. 7Bilha a to sey jim o cak, ko a tɔ̀ a Yakɔp hwey wen hê neba. 8Ko Rahɛl a ye, “Ma ga ra kyisa ding-ding na gwà hom Leya, ko ma ga di wɛng.” Yaga ano, a vo a hɛ rezâ Naftali.
9Jeng de Leya a di, a ga tumal tɔ́s, a jut hwông fwom mɛ Zilpa, a nɔng Yakɔp, a tɛ́ ɛ jɛn-hwā. 10Jeng de Zilpa a tɔ̀ a Yakɔp hwey wen, 11Leya a ye, “Káa, e wɛ̂ng sɛ́ a hemo ɛ?” Yaga ano, a vo a hwey o rezâ Gat. 12Zilpa a to tɔ̀ a Yakɔp hwey wen hê neba, 13ko Leya a ye, “E yerê wɛng de ma vɔk wɛt! Beha ba rɔda tang mɛ, à wo wɛng!” Yaga ano, a vo a wen o rezâ Ashɛr.
14Sede jeng bwâl alkama ya vey, Rubɛn a wɔ e hey, a sɛ̀ pyâl-gwi, a vey a neng mɛ̄ Leya mɛ̀. Rahɛl a yâng Leya, “Ka hwà simo, nɔt me pyâl-gwî sɔ mō.”
15Ko dê Rubɛn a yâng pwi mɛ, “Hwà ga sey ɛ rwas e me, hane ha vey a hwo wɛt a? A remo hwó to simo hwo sey ɛ̀ pyâl-gwî sɔ hom a?”
Ko Rahɛl a toyo a yɛ, a ye, “Ka hwà nɔng me pyâl-gwî sɔ mō, ko dalɔ e pɔl na hwo turuk hemo.”
16Jeng de Yakɔp a sé toyo yi e hey nawiri, Leya a nusu vey sey ɛ e gwong, a yang ɛ, “Hwô pɔl na me, yaga ma ga tala byɛ mō na pyâl-gwî sɔ hom.” Ko naturuk nane mo Yakɔp a dyɛng na Leya.
17Dagwi a wok won Leya, ko a sey jim, a tɔ a Yakɔp hwey wen hê netungun. 18Ko a ye, “Dagwi a ga tala me pyɔlɔ hom, yaga ma nɔ̂ng rwas hom hwông fwom hom.” Yaga ano, a vo a hwey o rezâ Isakar. 19Leya a to sey jim, ko a tɔ̀ a Yakɔp hwey wen hê netyiimin. 20Ko a ye, “Dagwi a ga nɔng me nɔrɔ rat. A remo rwas hom e nɔng me nerey, yaga ma ga tɔs a yɛ nèy bewen netyiimin.” Ko a vo a hɛ rezâ Zɛbulun. 21E yɛnɛ mo a tɔ̀ hwey hwong, ko a vo a yɛ rezâ Dina.
22Ko Dagwi a bare na Rahɛl kwong, a wok won mɛ, ko a nɔng ɛ tɔ̂s nèy. 23Rahɛl a hwo sey jim, ko a tɔ̀ hwey wen, a ye, “Dagwi a ga pat a me pyɛ byɛs. 24Tik na a to gwɛ̌ a me ɛ wen.” Ko a vo a hwey o rezâ Yɔsɛf.#30:24 Yɔsɛf: Cap reza mo ya sé “tik, na a gwɛ̌”.
Yakɔp a yong ɛ̀ na Laban e ra sehwoyo mɛ
25Bama de Rahɛl a tɔ Yɔsɛf, ko Yakɔp a yâng Laban, “Tɛ̀ me e gwong, na me bin kyè vɔk e sevwel hom. 26Nɔng me beha hom na nèy hom de ma ra fwom yaga yɛn, hwo hàla me, na me kyè. Hwà tɔk mwa yerê fwom de ma ga ra a hwo.”
27Ko Laban a yang ɛ, “Ka hwô simo a me, ko hwô to gwɛ̌ sangal. Ma ga ra vyoshon, ko ma di, Dagwi Darwey a ga tɛ̀ nerat e ra me yaga hwo.” 28A to ye, “Ha sehwoyo de hwó simo, ko ma rɔda tala hwo.”
29Yakɔp a toyo a yɛ, a ye, “Hwo pyɛ mo hwà tɔk, gwong de ma ra a hwo fwom; di yas mō ya gwɛsɛ hɛ e vwɔ hom. 30Jeng de má vey, yas mō yá jam zɔng, ko a remo ya ga tɛ́ ɛ pyak ding-ding. Dagwi Darwey a ga tɛ̀ a hwo nerat e kawɛ bak de ma doyo ɛ. Ko sɛ̌ remo e yɛ̌ jeng de mê ra pyɛ cak yaga lɔ hom ɛ?”
31Laban a rangal hɛ, “Sɛ́ de mê tala hwo ɛ?”
Yakɔp a ye, “Hwô tala me pyɛ cak wɛt. Mê re nuyel na gyeng kara mō, ka sede hwà simo, na hwo ra a me pyɛ yemo ngan: 32Tik na me kwey e ji kara mō mwa yunung, na me paa ɛ kayɛ mo de ya se berit o, na bwat-bwat, tanga shi tip-tip e ji vyēl pyɛng, tanga mwâ vyēl shi de ya sé berit o tanga bwat-bwat. Yane yê sè sehwoyo hom. 33E ngamo nuyel bê de ba di tsak o hom, jeng de hwô ba bɛrɛng sehwoyo hom: Ka sede hwà de sɛ̀ e ji vyēl shi hom cak de ya sé berit o kɛ bwat-bwat wɛt, kɛ e ji vyēl pyɛng hom cak de ya sé shit o wɛt, ko ya ga tɛ́ ɛ yê shigi.”
34Ko Laban a ye, “Kée, gyat zɔng! Tik na a se sede remo de hwà ha.” 35Tuk hane mo, a kang begam na shêp vyēl shi de ya ragas ɛ̀ nepɛng e kagwa, mwa na shêp vyēl pyɛng de ya se shi tip-tip. A tik yɛ̄ e vwɔ̂ besɔ mɛ, 36ko yɛn ba kyè kwɛngɛl pɔlɔ tat na kwara mo yi e kwɔn de Yakɔp a sé ɛ. Ko Yakɔp a sè re nuyel na gyengês bwâng karâ Laban.
37Yakɔp a vɛ nelang nelǎ ne yerê cɔ́gɔt cak de be tâng yɛ, à pɔpla, na almɔn na plen. A wɔrɔ yɛ̄, a peshe bebók o, na a hala nepɛng e tê yɛ̄. 38Becwang de a peshe mo, a tɛ̀ e ji bavu, yaga na jeng de vyēl ya vey sɔ nshi, yê di vɛ e nuyel yɛ̄. A tɛ̀ vɛ e hwomo, yaga vyēl yé turus e ra bemɛn e jeng sɔ̂ nshi. 39Ano kwong, jeng de vyēl shi ya turus e ra bemɛn e nuyêl becwang o, ya tɔs nèy de na ra ɛ̀ nepɛng, kɛ berit o, kɛ nebwat-bwat.
40Ko e rá na vyēl pyɛng detu. E tɛ̀ yɛ̄, ye bɛrɛng vyēl de ya sé berit o kɛ shi tip-tip e kwarâ Laban. Yi ano, e sɛsɛm ɛ̀ kwara mo mwɛ, ko a kangas yɛ yi e kara ve Laban.
41Ano arɔng, jeng de bekwôs vyēl ba sé turus e ra bemɛn, ko Yakɔp e tɛ̀ becwang o e bavû nshi mo, e nuyêl yɛ̄, yaga na ye turus e ra bemɛn e hagât becwang o. 42Ko a ra ano na vyēl de ya sé mɛrɛk wɛt. Yi ano, vyēl de ya sé mɛrɛk yé sè yê Laban, ko yemo de ya sé bekwos o yé sè yê Yakɔp. 43Ano kwong, a tɛ́ ɛ gbɔng darwey zigit, a vɛ̌ ba sɛ̀ kara pyak, na bemaryat, na bemadung, tanga bemât fwom beras na beha.
اکنون انتخاب شده:
Susumo 30: bomBI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust