Susumo 28
28
1Yishak a yila Yakɔp, a tɛ̀ a yɛ nerat, ko a nɔng ɛ nu, a yang ɛ, “Hwo vo hwā yi e ji behwông BeKanaan wɛt! 2Kyè vɔk e Mɛsɔpɔtamya-Bato, vɔk e lɔ gwasha mō Bɛtuwɛl, na hwo vo hwā e hwomo yi e ji behwông Laban, gwà neng-gwɔ mō. 3Tik na Dagwi Wo Retô Mwa a tɛ̀ a hwo nerat, na a tɛ̀ hwo tɔs nèy, na nɛ karak hɛn, sɛ̌ hwà ba tɛ́ o dâ regyɛng yére bemât jey. 4Tik na a tɛ̀ a hwo tanga yere mō nerat yerê nemo de à kana tɛ̀ a Abraham, na hwo bin tɛ́ o dâ sevwel de hwà sé sangal ɛ̀ sede kwɛnɛt, sevwel semo de Dagwi à kana nɔ̂ng Abraham.”
5Ano kwong, Yishak a tɛ̀ Yakɔp e gwong, ko a kyè vɔk e Mɛsɔpɔtamya-Bato e kwɔ̂n Laban, hwêy Bɛtuwɛl, WoAram. Laban o yɛ a gwà Rɛbɛka, dê Yakɔp na Esau.
Esau a to vo hwā hwak
6Esau a wok wɔgɔ, Yishak a ga tɛ̀ a Yakɔp nerat, ko a tomo na yɛ vɔk e Mɛsɔpɔtamya-Bato, na a bin vo hwā yi e hwomo. A to wok wɔgɔ, jeng de da mɛn á sè tɛ̀ a Yakɔp nerat, ko a nɔng ɛ nu, a kwon vo hwâ BeKanaan wɛt. 7Ko Yakɔp a raa hâ da mɛ na neng-gwɔ mɛ, a kyè vɔk e Mɛsɔpɔtamya. 8Ko Esau a de tɔk, da mɛ Yishak e simo behâ BeKanaan wɛt. 9Yaga ano a kyè vɔk na Ishmayɛl, hwêy Abraham, ko a ra wenêng Mahalat, gwà Nɛbayɔt, hwey hwông Ishmayɛl, a gwɛ̌ e ra beha de a kana vɔk.
Yakɔp a ranas negwi e Bet-Ɛl
10Yakɔp a hala Bɛɛr-Sheba, a vo gwong vɔk e Haran. 11A wɔ̀ wul kwɔn hak; e hwomo a pɔl ɛ, yaga gwi gwa ga kana gaba. A jut hwàk e ji beta de ba sé e kwɔn o, a vɛ́ mɛ pyɛ tîk to, ko a dyɛng e hwomo. 12A ranas negwi, a di gǎt de wa sé yi e vwel wɔ̀ wul lagwi, ko betom-lagwi vê Dagwi ba sé turus, be gyiris e ra wɛ. 13Ko Dagwi Darwey a tumal e vwara mɛ,#28:13 e vwara mɛ: kɛ: e ra wɛ. ko a ye, “Ma sé Dagwi Darwey, Dagwi wo beda mō Abraham na Yishak. Vwel hemo de hwà sé dyɛng ɛ, mê nɔng o hɛ tanga yére mō. 14Yére mō kwong ya rɔda se pyak sede fongôl vwel, ko yin e shara hin vɔk e neyɛnɛ̂ rwa rak na ta, tanga rwa bato na batin arɔng. Mwa yére bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra hwo tanga yere mō. 15Di, ma rɔda se tanga hwo. Ma rɔda gyep o e kahɛ kwɔn de hwô kyè wɔ, na me to toyo na hwo e vwel hemo. Ma rɔda tik o wɛt, ko mê ra mwa pyɛ́ de ma sira a hwo.”
16Yakɔp a sene yi e dem nevwa, a ye, “Hàa! Dagwi Darwey a sé e kwɔn hemo, ko ma tɔk wɛt!” 17A vow rebek, ko a ye, “E yerê hɛ̌ kwɔn a hemo ɛ? Ha sé kwɔ̂n jɔgɔ wɛt! Ha sé lɔ̂ Dagwi, hɛ à rwi gwong vɔk e lagwi!”
18Bop nagasi Yakɔp a sogo, a jut gwofwa de a tik ɛ to, a tɛ̀ gwɛ cik, na gwo tɛ́ ɛ pyɛ bare, ko a shushu něy e ra gwɛ. 19A vo a kwɔn o rezâ Bet-Ɛl;#28:19 Bet-Ɛl: Cap reza mo ya sé “Lɔ̂ Dagwi”. ba kana tâng hɛ a Lus. 20A sira hɛ, a ye, “Ka sede Dagwi e se tanga me, na a gyep me e ji kwɛngɛl gwomo, na a nɔng me pyɛ́ de mê re, na berugu de mê tɛ̀, 21na me to toyo tyang e lɔ da hom, ko Dagwi Darwey e tɛ́ ɛ Dagwi hom. 22Ko gwofwa gwomo de ma ga tɛ̀ gwɛ cik yaga pyɛ bare, gwô tɛ̀ ɛ kwɔ̂n re a Dagwi fongol, ko e ji kayɛ pyɛ́ kuru de e nɔng me, mê nɔng ɛ pyɔlɔ.”
اکنون انتخاب شده:
Susumo 28: bomBI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust