MITHEW 4
4
Jisu Ta Hlem Na
(Mak. 1:12-13; Luk. 4:1-13)
1Jisu ta hlem ranga dijabol na amota ramrukka muihla na rui thingso. 2Suon somly akha chu jan somly bakno een no na amo hi wontarma hangso. 3Dijabol ahlem na makolla phaoveta ril, “Ejonga nang na Chungthieng sanao mak ata lea chu nangna allung hita budol wul ranga rillo.” 4Jisu na sang, “Hita jiek shi ae, budol chakna malmashi ringna no ae, chuna Chungthieng kol hai thou phao rou lim na ring ange.” 5Hana hrano dijabolna athieng inn wangtekti am na Jerushalem athieng huluk hana amota ruija thingso. 6“Ejonga nangna Chungthieng asanaopa lea chu,” nangna chom ma tummo, amona ril rouram chu hita jiekka shi so ae,
“Amo na mawanrui ngeita hla weta mani
kut na nangta lang ah,
nakae allung chunga
theng pi ang no ae.”
7Jisu na sange, “Hita jiek ka shi sho ae, nang na narengpu Chungthieng ta chang an no oh.” 8Woiha pakom dijabol na mullon chungtekti mun na rui oh thinga akha chu simlei chunga rengram lim ma ahra ahoi eja ta ripi. 9Hana amo na ril, “Nalim hi keina nangta pe-ange, ejonga nangna keita huk rhun weta mok ta lea chu.” 10Jisu na amota ril, “Ka am na hai thou wa thing jou oh, Saitan! rouram chu hita jieka shi so ae nangna narengpa Chungthieng mo ta chak mokkanga ae.” 11Hana chu dijabol na amota houphur weta wanrui na makolla phao weta amha so.
Jisu Na Galily Ah Tullu Lu Thou Na
(Mak. 1:14-15; Luk. 4:14-15)
12Johon ta aral inn sunga shi so ae ta Jisu na thei pha pa chu amona Galily tienga lea so. 13Hana Nazarete houphur weta Jebulun akha chu Naptaly Galily tuipi ramtienga Kapharnahum ma thing so. 14Rouphu Isaiah ril sha adiek takka shuk ranga, 15“Jebulun ram akha chu Naptaly ram tuipi lam tienga mun ha ah Jordan, ral ha ah meejat adang Galily. 16Ramthim ma ringa am malmashi ngei na alok mawar ripha so. Hana athi hla ram ma ringa am ngei tarang mawar war thou so.” 17Hana apha thou wa Jisu na rou sam thouso. “Lung hlongo, rouram chu thangwan rengram nei so ae.”
Jisu Na Tuirik Mant Inly Ta Kokna
(Mak. 1:16-20; Luk. 5:1-11)
18Jisu na Galily tuipi ralla mathing juija Saimon Pitar akhu chu manou Andrew manui na tuipi sunga len junna am riso, manui ha tuirik mant mee ae. 19Jisu na ril, “Wa oh kanutieng juijo, akha chu keina nangei ta mee mant mee changpi ange.” 20Hana makka manui na mani len haouphur weta manutieng jui so. 21Amunt hana thou thinga amo na Zebedi spa ulehnao Jacob akha chu Johon riso. Manui ha mapa hitta kung sunga len photta am ha Jisu na manuita kok. 22Apha hana makka manuina kung akha chu mapa ta houphur weta manutieng jui so ae.
Jisu Na Ana Rai Eja Dampi Ah Rousam Na
(Luk. 6:17-19)
23Jisu na Galily ram sung lim ma thing weta Synagoge sunga Reng maram ahra rou chupi rilpi ah akha chu malmashi ana rai eja ta dampi ae. 24Syria ram sunga am malmashi ngei na routhar lim hi thei ah akha chu malmashi ngei na makolla rai adang adang eja hana ehakta dongneno arot asha ngei hana thikirdon, dijabol na mant, akha chu tak ahui athisa ngei eja amo na dampi sho weh. 25Chuna Galily, Dekapoli, Jerushalem, Judiah akha chu Jordan ralha tieng hai thou wairul riha ngei na manutieng jui.
اکنون انتخاب شده:
MITHEW 4: CHOTBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.