MITHEW 5
5
Jisu Na Mullon Na Chupi Na
1Jisu na wairul riha ta mari juija amo na mullon tienga kal hang weta ong so weh, hana marui ngei na makolla wa ah. 2Akha chu amo na manita chupi thou so weh:
Adiek Ariem Na
(Luk. 6:20-23)
3“Muihla ah ringrei ngei ha jaihra ae;
ti chu thangwan rengram ha mani tarange!
4“Ningshi tah olla am mani ha jaihra ae;
rouram chu mani ta hoipi ange!
5“Lung nem ngei ha jaihra ae;
rouram chu mani na alei ram hi chang ange!
6“Adiek taranga tuiral wantam ngei ha jaihra ae;
rou ram chu mani ta won shi pi ange!
7“Lungshi ngei ha jaihra ae; rouram chu
mani chunga meelungshit pha nge!
8“Lung thieng ngei ha jaihra ae;
rouram chu mani na chung thieng ta ri ange!
9“Adai semthei ngei ha jaihra ae;
rouram chu manita Chungthieng sanao ngei ta kokkange!
10“Adiek taranga aol ana dong ngei ha jaihra ae;
rouram chu thangwan rengram mani ta ae!
11“Kasaruk ka sharei ah nangei ta mee na anar ah ehai lim na hra no tullu lu, diekno rou ril, aol ana dong akha chu ajak pha ngei ha jaihra ae. 12Ariem mo akha chu lella hoi oh. Rouramchu wanram ma natarang alok amant shi sho weh rouram chu nangei matienga roumaril shuk thiempu ngei ta kom aol ana pe ae.
Chi Akha Chu Awar
(Mak. 9:50; Luk. 14:34-35)
13“Nangei chu alei ram ma chi chau ae. Chutiweta ejonga chi na ma-al am no lea, alo ta amota al rang sem mang meh? Chu lea chu lea sier ra amo ta eheilim ma ahra rang am no ae, denga hou weta mee na to ah hou no wa chu.
14“Nangei ha aleiram ma awar chau ae, mullon na hulok ta eitick ko thumpa shi ngai no ae. 15Atuna kom awar dewankari ta tai sunga shi no ae; hana shi ang hutta mani na adui na chunga shi ae, akha chu mawar ha inn sunga am limpa na pha ae. 16Hihekta nawar hakom mee ngei maikunga warpi oh, chuleh chu mani na ahra natullu lu ri weta akha chu wanram ma napathieng ta kom malmashi ngei na dom mange.
Rouphun Rou Ah Chupi Na
17“Nangei na keita hal no oh rouphon hou ranga akha chu rouphusuk ngei ta mangpi junge ta; manita mangpi jung nonge chuti weta mami ta tinpi jung singe. 18Keina adiek rou ril inge thangwan akha chu shimlei tiem ma lim chu jiekka shi sintekti rou akha chu chilepti akhaphao rouphun na mapung pha malim chu mang ang no ae. 19Chuna sarukka atu jongpa na, natrongsan hita kuipi weta meeta atante chupi takpi lea chu amo ta kom thangwan rengram ma amo ta kom asintekti kok kange, chuti weta atu jongpa na natrongsan hita hrabakta chupi takpi ah tullu lu lea chu thanwan rengram ma amota alokka kok kange. 20Rouram chu keina nangei ta rilla aminge nangeina Pharisi ngei akha chu rouphun ocha ngei ta hella ngoiring am no lea chu nangei na thangwan rengram ma lut nea ang no ae.
Lungshat Na Rou Ah Chupi Na
21“Apha eja matienga malmashi ngei ta rilphur rou ha nangna thei ang chau ae, ‘meeta that no oh; akha chu atu jongpa amona meeta that lea chu amota i routreem mang.’ 22Hana keina nangei kolla rilla aminge: atu jongpa na ma-u-manao ta eko nowa lungsha meeta kom routreem mange, woi hapa kom atu-jongpa na ma-u-manao ta ‘Raca’ (wonpilok) ta rilleh chu ulenchang ngei mai ah ajak tukkange, hana atu jongpa ta ‘he lungmo!’ ta ril mee kom sarmei kum ma aol pha ange. 23Chuna sarukka ejonga nangna Chungthieng kolla napek rang pot nadon ha, maicham ma tung ma tienga na-u-nonao na nangta anda ah am meh ta angei thei oh. 24Napot ha maicham matieng houphur weta, masha ah lea weta na-u-nanao kolla ngei hlak su thingo; hana napot ha choiweta pe oh.
25“Nang hitta anda hlak ha ranga lungleh hlakko. amona nangta ruisanga rui ange, nangna amohitta lampi hana thingha amlei ah, anoleh amona nangta routreem ae ngeita pekom ngei ange hana routreem pangei na nangta aral inn na si ange. 26Keina nakolla adiek rou rillinge maleh pi phung shuk som ha naleh pi malium chu nangna amunt hana thou wa shukne ang no che ae.
Simsi Bohron Meenamei Meepashal Lal Na
27“Nangei na rilsa rou thei pha ang chau ae, ‘mee namei mee pashal lal no oh.’ 28Chuna keina nangei kolla rilla amminge: atujong akha na mee nameinu ta amitta adi apam ma an thing lea alungsunga namei nu hata lal thing shu sa hekti ae. 29Ejonga namit changtieng pana pak tapi ang lea chu kolweta denga hou oh. Rouram chu natak lim pa sarmei ah luttang masing chu natakka tum akha sal pana lella hra tekkae. 30Akha chu nakut changtieng pana nangta pak tul pi ang lea chu, tan weta denga hou oh, rouram chu napum limpa sermei kum ma luttang ma sinchu napum ma tum akha sal pana lella hra tekkae.
Namei Hran Na Roulam
(Mit. 19:9; Mak. 10:11-12; Luk. 16:18)
31“Nahi rilla am meh, atujong amo na anamei ta hranhlak lea chu hran sange ti na ajiek pe shu oh. 32Chuti weta kaina nangei ta rillinge atu jong akha na anamei ta emo rou sarukka hran hlakka, mee pasal ta lalla hranhlak anowa chu, ahran namei ta nei mee amo ha namei ta lal mee ae.
Saro Ei Na
33“Woihakom amatienga nangei na malmashi ngeita ril thei pha ange, ‘Diekno saro ei no oh, chuti weta nasaro ei nu juija narengpu kolla hata shi oh.’ 34Chuti weta keina nangei ta rillinge Chungthieng minga saro ei no oh, apha chang honna ano lea thanwan hai ah rouram chu Chungthieng phum lu ae. 35Anoleh simlei phu ah, rouram chu makae tro na ae anoleh. Jerushalem phu ah, rouram chu Rengram alok hupi sa ae. 36Akha chu nalu thamma saro ei no oh, rou ram chu nangei na tou sam angou hal ahanghal akha phao sem nea no che; 37Chuna cham prekta nangna ngai sange nati ha ngai sange ta ammo, akha chu ngai nong nati ha ngai nonge ta am mo, nahina hei thou ralha ah phao chu hra no sa ae.
Mangshak Rouram Ma Chupi
(Luk. 6:29-30)
38“Nangei na hita ril thei pha sho chou ae, mit akha tarang mit akha, akha chu ha akha tarang ha akha, 39Chuti weta atun chu keina nangeita rillinge hrano ae mee ta mangshak lea no oh. Ejonga atujong akha na nabe changtienga bengleh chu woitieng tiengpa kom wulla pe shir oh amo ta. 40Akha chu atu jong akha na naling lut nie lea chu napun pai kom amota pe ngal oh. 41Ejonga atu jong akha na nangta mile akha thing ranga kalla rilleh chu amo hita mile ani thing ha oh. 42Nakolla mee akha na nie lea chu amo ta pe oh, akha chu nakolla pu phao ngei ta kom pu pi oh.
Nangta Anda Meeta Lungshi Oh (Anda Ngeita Lungshit Na)
(Luk. 6:27-28,32-36)
43“Nangna hita ril theipha ang che ae na inn ning tuh tieng ta lungshi oh akha chu nangta anda meeta atier ro. (“Nangei na rilla hou phurha thei so chou weh, nangei tonpi ngeita lungshi oh na ngei ta an da ngei ta atir ou oh.”) 44Chutiweta keina nanta rillinge anda meeta lungshi oh akha chu nangta aol ana pe mee tarang nie oh. (Chutiweta atun chu keina rillinge nangei ta anda mee ngei ta lungshi oh, akha chu wut rel ngei taranga nie pi oh.) 45Chuleh chu thangwan na napathieng sanao akha chang ange amona ahra mee tarang kom hrano mee tarang kom nienu shukpi, hana dramo chel mee tarang kom chelno mee tarang kom ru surpi. (Chuleh chu nangei hi thangwan ram ma pathieng spa ngei chang ange, rouram chu amo na hrano mee ngei chunga kom ahra mee ngei chunga kom ni war warpi ah ru shur pi ae.) 46Eje ah nangta lungshi meeta nangna lungshi ta lea chu, echu pha anga meh? Hajongpa chu khasanu thou ngei nakom hata ae. (Nungei ta lungshi ngei ta chak nang na lungshi ta lea chu, Chungthieng na amant e pe ang meh? Hajongpa chu pak chel ngei na kom ae ah am meh.) 47Akha chu na-u-nanao ta chak riemtuk pe ta lea chu adangei hitta nangna ejongpa hella ae ah che? Hojong chu adang jat na kom ae sa ae. (Chuna nangei na nangei tonpi ngei ta chak trongthou lea chu, adangei ta chu ejongpa tullu lu ah che? Hojong chu jat adang na kom ae sha.) 48Mapung pha oh, thangwan napathieng mapung pha hekta. (Thawan pathieng rakit hek ta nangei kom rakit anga ae.)
اکنون انتخاب شده:
MITHEW 5: CHOTBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.