wandījo 19
19
Sodom na Gomola kūkenaagūlwa
1A bamalaika a babīlī būja ī Sodoma, būshika koi makanza ga līīmi lya mhīndī. Ū Lutu ūsangwa wigashaga ha mita gwa nzengo; aho wababona ūbūūka kūbasūng'wanha, ūshika winama kūshisha ha sī. 2Ūbawīla, “Tūlīho bababa, yīyī numba ya ntūmami wing'we nzūgi ng'wingīle mu kaya, ng'oje na mhambala ng'wifuule ū būjikū wa lelo. Būkweela, ntondo dilū mukūbūūka muje.” Būshosha, “Mm! Yaya tūkūlaala dūhū nūūlū hanze h'kūūwa aha.” 3Alīyo akabikūmbīlīja no, kūshisha nose būzunya ū kūja nang'hwe; bingīla nang'hwe ū mu numba yakwe. Ūbabeegeja shilīwa, ūbeeja migatī ya wangū wangū ītī na shibimbya, būlya. 4Aho bataalī kūlaala, kwimanīla pye a bagosha ba mu nzengo gwa Sodoma biza, bataale na bado; baalī bikobya kūfuma hose pyī ū mu nzengo gwenūyo. Būshika bīpīndya ī numba yenīyo. 5Būlinhya kūng'witana ū Lutu, balīng'wīla, “Bebe balī halī a banhū abo baalī biza mhīndī mhīndī ha ng'wako? Bafunyage aha twize tūbigushe!”#19:5 Tūbigushe: Nūūlū, tūlaale nabo gītī kūlaala na bakīma. 6Ū Lutu ūfuma, ūja a hanze aho baalī; aho wafuma ūgūlugala ū nyango. 7Hūna ūbawīla, “Yaya lekagi ī gīko badūgū bane, mutizūgwīta ū mhayo gwenūyū, gwa malofu no! 8Ū nene nalī na bashīke bane babīlī bataalī kūsanja na ngosha ose ose, hambū hambū nang'wenhele bene, mubīītīle gīt'umo mutogelilwe. Alīyo a banhū benaba yaya mutizūbīītīla mhayo gose gose; nguno bizaga ha ng'wane kwifuula.” 9Nabo būnshokeja, “Bebe tūlekage a bise!” Nīyo bongeja na kūhaya gīkī, “Ū ng'wing'wana ng'wenūyū wasaamīlile haaha haaha ū ng'wenūmu, wandyaga na kūyūtūlomeleja ī ya kwīta. Lembeshaga lūūlū, ū bebe hū tūkūkwītīla yabūbi kūtinda ūmo twalūhayaga kūbīītīla a benabo!” Būnkandīkīja ū Lutu, kūnū balīkooba nzīla ya kūgūpagūla ū nyango. 10Alīyo a banhū abo baalī ū mu kaya būnduta ū Lutu, būng'wingīja mu numba, būgūlugala ū nyango. 11Hanuma ya henaho būbatūla būbboku a banhū abo baalī ī hanze ya numba, a ha nyango. Pye, bado na bataale, bandya kūbbaabbaasha balīgūkooba ū nyango, alīyo batagūpandīkile.
12Hūna a banhū a babīlī benabo būng'wīla ū Lutu gīkī, “Ūlī na banhū bangī bose bose ū mu nzengo gwenūyū? Hamo bakwīlīma, nūūlū bitūnja na bashīke bako; nūūlū munhū ūngī ose ose, ūyo ūlī nang'hwe būdūgū! Bīnjage ū mu nzengo gwenūyū. 13Nguno tūlīlīkenaagūla ī lipandī lyenīlī; ī mihayo ya malofu īyo īkwītagwa ū ng'wenūmu yenhelegije kūlīla kūtaale no ūyo gwashikile mu matū ga ng'wa SEEBA. Na lūūlū watūtūmaga kwiza kūlīkenaagūla ī lipandī lyenīlī.” 14Hūna ū Lutu ūfuma ūja kūbawīla bakwīlīma bakwe#19:14 Bakwīlīma bakwe: Basūmba baalī baabalūnja a bashīke bakwe. gīkī, “Bing'we twīngagi ū ng'wenūmu, nguno ū SEEBA alīgūkenaagūla ū nzengo gwenūyū.” Alīyo ū kū bakwīlīma bakwe akabiza gītī akūmelanaga dūhū.
15Ū būjikū aho boyūjīlīīla kwangalūka, a bamalaika būnkomeleja ū Lutu balīhaya, “Kangīlījaga ūnsole wangū ū nke wako, na a bashīke bako a babīlī abo balīho aha, ng'wīnge ū mu nzengo gwenūyū, mutizūsangwa mulīmo, gūkamupyagūla na a bing'we ū nsango ūyo gūliza!” 16Alīyo akandya kwigedya gedya, nose a bamalaika benabo būndima nkono ū wei, nū nke, na a bashīke bakwe, būbafunya hanze ya nzengo kūlwa kūbapīja; nguno ū SEEBA akabachīla shigongo. 17Bahayūbafunya ī hanze ūmò wabo ūhaya, “Peelagi ng'wipīje; yaya ū kwikībūka, nūūlū kwilendeja hose hose ū ng'witogolo lyenīlo. Peelelagi kū ngūlū; ūlū ītī chene mukūpyagūlwa.” 18Nang'hwe ū Lutu ūhaya, “Ka yaya baba, 19wanoolekejaga wiza būtaale no, a ha kūnichīla shigongo kūbūpīja ū būpanga bone. Gwike natūdūla ū kūpeelela ū kū ngūlū, ū nsango gūkūnipandīka nachīīle mu nzīla. 20Kako kanzengo aho, a kene kalī bbihī nūūlū kūpeelela mo. Nalīkwikūmbīlīja ūnizunīlīje napeelele ng'wenūmo; nguno nīyo a koi kalī kadoololo dūhū gīt'umo ūlīkabonela. Ū mu gīko hū būkūpīla ū būpanga bone.” 21Ūng'wīla, “Ītaga gīko, naakūzunīlījaga nū mhayo ūyo ūlīgūlomba gwenūyo; natūgūkenaagūla ū nzengo ūyo ūlīgūhaya. 22Peelaga wangū lūūlū ūje ko, nguno natīko kwīta mhayo gose gose aho ūtaalī kūshika ko.” (H'ī nguno yene ū nzengo gwenūyo gūkitanwa Zoa). 23Ū Lutu aho alīshika ī Zoa, ī līīmi lyūsangwa hū lyafuma dūhū. 24Hūna ū SEEBA wīyitīīla ī Sodoma nī Gomola moto na būgota wa shibiliti kūfuma ng'wigūlū kūlī SEEBA. 25Wīkenaagūla gete ī mizengo yenīyo, na a mabbaala a gose a ga mapandī genayo; na a bikaji pye a bose a ba mu mizengo yenīyo; nī shose īsho shikazwaga ha sī. 26Ū nke wakwe ū Lutu wanondeelaga a ha numa, alīyo ū ng'wene akikībūka kūlola kū numa, ūgalūka kūbiza ng'hīngī ya munhu. 27Ū Abulahamu ūbūūka ī dilū, ūja ū kwipandī īlo walī wīmīīla kū būtongi bo ng'wa SEEBA. 28Wahayūponya a miso kūlola ī Sodoma nī Gomola, gīkī agalole pye a mabbaala ga kū ntubīlo gwa kwenūko, ūbona lyochi itaale gītī lya būpī līlīdundumūka kūfuma ha sī, kūja ng'wigūlya.
29H'ūmo īkajīla, ū Mulungu aho wahaya kwīkenaagūla ī mizengo ya mu sī ya ntubīlo gwenūyo, akang'wizūkwa ū Abulahamu, ūng'wīnja ū Lutu ū mu makoye ayo gakīkenaagūla ī mizengo ya mu sī īyo wikalaga ū Lutu.
Lutu na bashīke bakwe
30Ū Lutu na a bashīke bakwe a babīlī bakīnga ī Zoa, būja kū ngūlū būkigasha kwenūko; nguno akogoha ū kwikala ī Zoa. Ūyikala ng'wipilinga hamò na a bashīke bakwe būbīlī wabo. 31Kwimanīla ū ntaale wang'wīla ū nzunaye gīkī, “Bebe a henaha atīho ngosha wa kūlaala nise ūmo shilī shīmīle sha banhū bose ū mu sī, hama ū sīswe ī haha wanamhalile. 32Ali lūūlū, tūng'wishage walwa ū sīswe aleewe tūlaale nang'hwe, tūdūle kūlūlang'hana ū lūbīyū lwise mu nzīla ya ng'wa sīswe.” 33Ū būjikū wenūbo būng'winha walwa ū saabo, ūng'wa kūshisha ūleewa. Ū nshīke ū ntaale ūja ūkalaala nang'hwe. Walī atimanaga nūūlū hado, kwandīja aho alīlaala ho ū nshīke wakwe, kūshisha wīnga ho. 34A ha ntondo yaho ū ntaale ūng'wīla ū nzunaye gīkī, “Ū nene nakalaala nang'hwe ū baba ī igolo; nī lelo tūng'wishage, nang'ho ūlakalaale nang'hwe, tūlūlang'hane ū lūbīyū lwise mu nzīla ya ng'wa sīswe.” 35Na ng'hana nū būjikū wenūbo būng'winha walwa ū saabo, ūng'wa kūshisha ūleewa. Ū nshīke ū ndo nawe ūja ūkalaala nang'hwe. Walī atimanaga nūūlū hado, kwandīja aho alīlaala ho ū nshīke wakwe, kūshisha wīnga ho. 36Hūna lūūlū a bashīke ba ng'wa Lutu būbīlī wabo būbiza nda mu nzīla ya ng'wa saabo. 37Ū ntaale ūbyala ng'wana ngosha, ūng'wilīka ī lina lyakwe Moabu. Ū ng'wenūyo hū nkūlūgenji wa Bamoabu ba lelo. 38Ū nshīke ū ndo nang'hwe ūbyala ng'wana ngosha; ūng'wilīka ī lina lyakwe Ben-ammi, ū ng'wene hū nkūlūgenji wa Baamoni ba lelo.
اکنون انتخاب شده:
wandījo 19: SUKBI15
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sukuma Bible © Bible Society of Tanzania, 2019.