INLAHEN 2
2
Taneung Tö Ngam Töhet Fanöinylö
1Hē sanölta ngam sakāmö Pentĕkòstē nö yih, hamūlöre cha-a nö hĕng kang chūök, 2Ngaich hönglūk ök ṙô löktö el halīöngö, tö sā tökumtö tökalēḵ kuföt; hatööḵlö ngam patī angū-ö i chūök cha nö ūichhaka. 3Ngaich meūkö tö cha nuk litāk kö kahĕng, nö sā tameūyö; kö teungtöre anū-ö nö i kui cha. 4Ngaich tööḵlö cha-a tö ngam Töhet Fanöinylö, ngaich kaknyöre tö ṙô tahëng ëlô, sā tī ngam Töhet Fanöinylö nö kētö ṙô cha.
5Yahūti yik umuh, tö pa-ekūö tö ngam Tēv, aṅ i nup taṙòkhöre panam elkatòh ngam halīöngö, mī-iyöng Yerūsalem. 6Ngaich hē ngih ṙô nö hāngö, yihtöre ngaich yik tömaṙôngö, ngaich uṙeh; pò cha nö kö hang ṙô cha, nö ṙôtö ëlô cha. 7Ngaich ṙôkhöre cha-a nö pōyen pinngangkūö nö ngö ṙô. Röh aich vē nö tö ṙô tö ëlô, aṅ Kelelī? 8Sitih öi hang ṙô cha, nö kö ṙô tö ëlô hī; 9Aṅ Pārtī, Mīt, Ēlam, mi-iyöng Mesapotamī, Yūtā, Kapatosiā inrē; aṅ Pòntös, Asi inrē; 10Pruki, Pampuli, Aikup, aṅ Lipyā lā Kurĕnī, mi-iyöng Rōma, Yahūti, tö vītu nö Yahūti inrē, 11Aṅ Krētĕ, Arapī inrē, hang ṙô cha in, nö ṙôtö ëlô hī, minhôiṅyö la-en ngam Tēv. 12Ṙòkhöre cha-a nö ureh, öt akahalōn inrē; ngö ṙô cha-a tö höö, Asuh öng ngih töngatī? 13Rēvre pöri yik tömiyëḵṙô, nö ngö. Tööḵngen yin tö tufömngöre vāin.
Ṙô Pītör
14Söklöre pöri ang Pītör, nö holtö yik tö kahuk sīön; ngaich hūḵnyôre nö ve-ekūö cha, nö ngö ṙô, Yī-ö tarik aṅ Yūtā, yī-ö taṙòkhöre inrē mī-i Yerūsalem; akahalōn yin yēḵ tö ngih; hangihtöre inrē tö ṙô chu. 15Tön rö-ö yin vē nö mihiyōi, nö sā lōn yīö; ṙòngmö machūötörköṅny ṙô ön ing sakāmö. 16Tön ngih ṙô ök pròfĕt ön ngih, Yôĕl, 17Ngö ṙô An ngam Tēv, Ip manā-aṅ sakāmö min ṙöstö ngam Töhet Fanöinylöre Chin min i kuī-taṙòkhöre tarik; ngaich yip kūön yīö, kikōnyö kikānö inrē min nö mikahten; yip tö-ayal tarik yīö min nö meuk tö meūkö; yip tö köiny tarik yīö min inrē nö heūv haneūvö. 18I kui yip töhakövö, mahalanṙen Chu, kikōnyö kikānö inrē, ṙöstö ngam Töhet Fanöinylö min Chu-ö, i nup sakāmö anū-ö: ngaich cha-a min nö mikahten. 19Ngaich Chū-ö min hameuk tö pinngangkūö, lātulöng el halīöngö; minkahngö inrē, lātaṙeū ing panam, mahām, tameūyö inrē, lul, hahanusngö inrē. 20Vīngöre min ngam tavūöi nö sinngūlö; vīngöre ngam chingëṅt inrē nö mahām, urēhĕkūö yanihih ngam sakāmö ngam Mā, ngam tökiröng tö-eūnyu sakāmö. 21Ngaich mīnö yip mahavëkö Mine-eny ngam Mā Tēv nö hayöökaṙen,
22Yī-ö tarik aṅ Israĕl; hang ṙô chu yin; tö Yēsū ngam aṅ Nāsaret, ngam tarik tö hameuktuvö tö ngam Tēv nö in yīö, lökten i nup minhôiṅyö la-en, pinngangkūö, minkahngö inrē, tī ngam Tēv nö lökten in Ò, el ṙôngö yīö, sā mikahlōn yīö. 23Anga-aṅ tökē-ĕ, sā ngam töha-ehangen inlēnngenre tö ngam Tēv; ngaich harātu tö yīö, fëlö inrē, nö lökngö eltī yip tötlöök tarik; 24Ngam töhachohlöngö tö ngam Tēv, ṙānyuvö ṙā-ang im chanökö kinpaha; pò Ò nö öt haköpö tö e. 25Pò Tāvit nö ngö ṙô tö inlahen Ò, Meuk ngam Mā Tēv Chin nö örheūheu nö i kūö Chu; pò Ò nö lāhāmö Chu, lökten Chu öt hanlöinyken. 26Lökten Chu ngaich ṙāmö ellōn; ṙôtö ṙanāmölōnre inrē ngih litāk Chu. Ngih alaha Chu min inrē nöngngöh nö im mineūka. 27Pò Meh öt ṙāngö ngih nômö Chu nö el Chūök Tökapah; ötrēhĕn Öm halöngngen ngam Töhet Meh nö meuk chinhūngö. 28Mikahtö lōn Chu Man ngaich tö ngam talöökö nômö; hatööḵngen Chu min inrē tö ṙanāmölōn i kūö Meh.
29Kahōlö; kô-òren chin öt piyū-u ṙô tö yīö tö ök muvöhngö hī, Tāvit; tö ò nö ngaich nö kapah, ūliyö inrē: holtöṙah hī ngam anūlö ò inrē, ing töngamuh. 30Pò ò nö pròfĕt, akahalōn inrē tö ngam Tēv nö kilēḵngôre nö in ò, tö öp lamökngörit ò min nö ha-ūichlöngö nö el kantēra ò; 31Meuk ngih mū-unôich anga-aṅ; ngaich ṙôtö invanlö Kristū, tö Ò nö öt ṙā-ayö nö el chūök tökapah; öt rēhĕn ök alaha Ò nö chahū-uyö. 32Anga-aṅ ngòh Yēsū töhacholöngö tö ngam Tēv; ṙòkhöre in ihö vamënyen Ò. 33Ngaich yih töngamuh nö hapōilöngö nö lāhāmö ngam Tēv; ngaich nö teūngen tö ṙô ngam Yöng, nö kilēḵngôre tö ngam Töhet Fanöinylö; ṙösten Ò Anga-aṅtöngamuh, ngam maheuṅk yīö, ahang yīö inrē. 34Rö-ö an nö Tāvit yamônlö nö el halīöngö; pò ò anga-aṅ nö ngö ṙô, Ngö ṙô An ngam Mā Tēv tö ngam Mā chu, Ūichngöre Man lāhāmö Chu; 35Hanöng saha tī Chu vītö yip tökunyahaṅelmat tö Meh, nö ranöönö röön Meh. 36Lökten hökngen vē taṙòkhöre aṅ patī Israĕl nö akahalōn takô tö ngam Tēv nö vīlen Ò, nö hĕnghöre Mā, Kristū inrē, ngòh Yēsū harātö yīö.
37Ngaich hē cha nö hāngö e, ngaich lòkngöre ellōn cha-a; ngaich ngö ṙô tö Pītör, tö yik tahëng inrē tanīnöṙô, Kahōlö; Sitih öi min? 38Ngaich ngö ṙô Pītör tö cha. Havöötö ellōnre yin vōkö inrē, yī-ö ṙòkhöre, i Minë-eny Yēsū Kristū, nö inṙēlö nup tökööl yīö, ngaich yī-ö min teūngen tö ngam inlōnti aṅ i ngam Töhet Fanöinylö. 39Pòn lamöö in yīö ngam kinlēḵngô, i yip kūön yīö inrē, i yip taṙòkhöre inrē, yip töhavëtu min tö ngam Mā Tēv hī, nö in Ò. 40Ṙōlö ṙô inrē Pītör nö iṙuhöṙô, nö ngö ṙô tö cha, Hayöökenre yin i ngih tötlöök tūmö. 41Ngaich yik hamôḵòṅ ṙô ò nö vōkö; ngaich hē ök sakāmö angū-ö; nö lūöi köṅny yik tarik töṙūötuṙen nö in cha. 42Ngaich cha-a nö kamnipkūö nö im inköphöti tö yik tanīnöṙô, i innôlö, i finòkö rôti, i vine-eṅkūötēvinrē.
Inlāhen Yik Ṙamātö Ellōn Re
43Ngaich ṙòkhöre cha-a nö pa-ekūö: pōyen nuk inrē pinngangkūö, minkahngö inrē, tī yik tanīnöṙô. 44Ṙòkhöre yik ṙamātö ellōnre nöng mūl, höng hēngö inlānen inrē. 45Inyihngö nuk inlānenre cha-a, ngaich katölhö kūöre nö ṙòkhöre, sālōn ngòh tö hĕng tak tarik. 46Örheūheu nö kamnipkūö nö hamūlöre, nö el ngam töhet chūök; fòk ròtī inrē nö i patī; nya-aṅvkūö cha-a nö holtö ṙanāmölōnre, hēngö lōn inrē. 47Ha-öiny ngam Tēv; aheukhuvö tö taṙòkhöre tarik. Ngaich ngam Mā Tēv nö ṙūötö ṙôngö cha, i tum sumkam, yik mī-im inyööken.
انتخاب شده:
INLAHEN 2: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
