INLAHEN 1
1
1Ngam mu-urĕh līpöre kahūich chu, Ō Tĕ-òfilös, inlahen Yēsū nö la-evṙen, ane inrē haköphöti. 2Söl ngam sakāmö hē Ò nö kēḵlöngö; keuheūthëṙen Anga-aṅ, lökten im Töhet Fanöinylö, nö kētö chöngö yik tanīnöṙô tö katöllöngö tö Ò. 3Yik tö hameukhumat tö Ò nö aṅ, unôichrit kanihngen Ò, nö pōiyen minkahngö; meūkö tö cha nö fën anāi tum sumkam; nö ṙôtö inlahen ngam pūlngö ngam Tēv. 4Hamūltöre nö in cha; ngaich sōten cha Anga-aṅ nö kiröönngöre, nö ṙā-ang Yerūsalem; höngkökūö ngam kinlēḵngô ngam Yöng pöri, ngam ahang yīö in Chu. 5Pò Yôhan nö aṅtī tö mak nö vōk; aṅtī tö ngam Töhet Fanöinylö pöri yī-ö min vōk, öt ṙōl töre sumkam.
Kēlöng Yēsū Nö El Halīöngö
6Lökten hē cha nö hamūlöre, ngaich ngö ṙô nö hatönan, Mā; ngaich Öm töngamuh havantö ngam pūlngö in Israĕl?
7Ngaich ngö ṙô Anga-aṅ tö cha, Rö-ö yin yī-ö hōtu akahalōn tö ṙētak, hēk hē, ngam mī-im chöngö ngam Yöng. 8Teūngen pöri min yī-ö tö kanô-òṅ, hē ngam Töhet Fanöinylö nö i kui yīö. Ngaich yī-ö min ameūken Chu, i Yērusalem, keuheūtngöre chūök i Yūtā, Samariā, ane inrē söl ip manā-angkūö ngih pangam. 9Keuheūthëṙô Anga-aṅ tö u, ṙòngmöng hötīöna cha-a, ngaich kēḵlöngö Anga-aṅ, ngaich ök taṙul nö kēḵ An nö i kūö cha.
10Hē cha nö ṙòngmö haköpmatre nö el halīöngö, tö chanūhu Ò; nët tak nak tarik samökhaka nö ranghen cha, tö isōhö hilā; nak tö ngö ṙô, 11Yī-ö tarik aṅ Kelelī; kūöyòh öi höng sökhaka, hatīönkö el halīöngö? Ngatī yanihih ön ngòh Yēsū min, ngam tö kēḵlöngö nö el halīöngö, nö ṙā-ang in yīö, sā mat yīö meūkan nö yônlö nö el halīöngö.
Mi-i Chuök Yūtā
12Havantöre ngaich cha-a, nö i Yerūsalem, nö ṙā-ang kui ap rôngö Ôliv, ap töröhta nö i Yerūsalem, höng rô-òlkūö kinröönngö hē el töhet sakāmö. 13Ngaich hē cha nö yih, yòhlö cha-a ngaich nö el öp lātulöng urôhò, i chūök cha nö höngngöh, hēḵ Pītör, Yôhan, Yāköp, Antaru, Filip, Tômös, Partòlòmai, Mëtiv, Yāköp ök kūön Alfāi, Sīmōn Sēlòt Yūtā inrē ök kūön Yāköp. 14Ṙòkhöre cha-a vē nö hamūlöre, kamnipkūö nö ve-ekūötēv, holtö yik kikānö, Mariā inrē ök yöng Yēsū kikānö, tö yik kahëm Ò inrē.
15Lohten nö hēngòng nët anāi yik tömaṙôngö nö hamūlöre; hē e Pītör nö söklöre nö ellōn cha, ngaich ngö ṙô tö cha, 16Kahōlö; tö hòṅ keuheūtiṙen ṙô an ngam Töhet Līpöre, ngam ṙô ngam Töhet Fanöinylö nö urĕh nö löknyö elvāng Tāvit, tö inlahen Yūtā, ök mahachōkūö yik kameḵeṅ Yēsū. 17Pòn kaheuktu anga-aṅ nö in hī; ngaich nö teūngen tö kintölöre nö i ngih la-en hī.
18(Anga-aṅ ngòh tarik mahavah panam nö ṙāi tö nuk raneushö ötlanöökö; ngaich lāinylörit nö suktöre, lakukköṅnykūö, ngaich talīnköṅny nuk aṅ ellōn ò. 19Ngaich ṙòkhöre yip mī-iyöng Yerūsalem nö akahalōn tö e; tön i ëlô cha, ap panam nö kaheūkö nö Akeltama, ngam tö ngö, Panam Mahām.) 20Pòn ngö kinūichngö nö i mat öp līpöre Salmai, Hökngen ngam elyöngö ò nö ötkôlò, ane inrē un tarīku mī-iyöng in e; hēk ngö öp inrē, Hökngen ngam inyōmö in ò nö kē-ĕ tö tahëng. 21Lökten i yip tarik hamòl hī, i rô-òten ngam Mā Yēsū nö havötköre nö in hī, 22Hēten tö ngam vinôkö tī Yôhan, söl im sakāmö hē Ò nö kēḵlöngö, nö ṙā-ang in hī; hòṅ hĕng taka öp tö cha, vame-eny ngam invanlö Ò, nö hol hī.
23Ngaich nët tak nak töhalāḵnyu tö cha; nāṅ Yôsĕf ök tö Parsapas, Yustös invëka inrē; nāṅ Mātī. 24Ngaich ve-ekūötēv cha-a, nö ngö ṙô, Ō Me-eṅ Mā, tö akahalōn tö ellōn taṙòkhöre tarik; hĕng tak hameukti Man i nāṅ tö nët tak, töp katöllö Meh. 25Nö kamëḵ ngih chūök i ngih la-en tanīnöṙô, ngam töṙā-ayö tö Yūtā, hòn chuh im chūökre anga-aṅ. 26Ngaich cha-a nö kalah taneūngen; ngaich Mātī nö teūngen; ngaich kaheuktu anga-aṅ nö i yik tö kahuk sīön tak tanīnöṙô.
انتخاب شده:
INLAHEN 1: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
