INLAHEN 15
15
Mintingö Nö I Yeruselem
1Ngaich rēvre yik tarik yamih nö ṙā-ang Yūtā; ngaich haköptö yik māṅ, nö ngö ṙô, Yē yīö öt tunyīnyi, asā chöngö Môsös; öt kô yī-ö hayöökaṙen. 2Ngaich hē nā Pôl, nāṅ Parnöpas, nö kilṙô cha, hatöntöre inrē nö in cha; ngaich hōtu nā Pôl, nāṅ Parnöpas, rēvre inrē yik tahëng aṅ in cha, chamuh Yerūsalem, nö i yik tanīnöṙô, mā inrē, nö ve-ekūö cha tö ngam ṙô. Ngaich ngam māṅ nö meukṙen el talöökö cha.
3Ngaich lök Pòinikē cha-a, Samaria inrē; vënyö invöötö ellōn yik tahëng mihëṅṙö tarik. 4Ngaich ṙòkhöre yik Kristīön nö ṙāmölōn. Chalô cha-a nö i Yerūsalem; ngaich höngö tö ngam māṅ, tö yik tanīnöṙô, yik mā inrē; ngaich ahangnyö elnang cha tö ngam Tēv, nö lökten in cha. 5Rēvre yik umuh aṅ i yik Feresī, ṙamātö ellōnre, tö ngö ṙô, Öt kô yip nö öt tunyīnyi; hōtu inrē nö haköp ngam chöngö Môsös.
6Ngaich yik tanīnöṙô, yik mā inrē, nö hamūlöre, nö ve-ekūöre tö ngam ṙô. 7Keuheūthë ṙô cha-a nö ve-ekūöre, söklöre Pītör, ngaich ngö ṙô tö cha, Kahōlö; akahalōn yin tök misī tī ngam Tēv nö katölhöl nö in hī, pòn hōtu vē tahëng mihëṅṙö, nö löknyö elvāng chu ahang tö ngam ṙô ngam tölöök inhānga; ngaich ṙātö ellōnre. 8Eūken cha inrē ngam Tēv, ngam tö akahalōn; tö ellōn; i tī Ò nö kē-ĕkūö cha tö ngam Töhet Fanöinylö, sā tī Ò nö in hī ayī-ö. 9Öt harīkngöre tī An tö hī, tö cha inrē; halööktö ellōn cha, lökten im mikah. 10Lökten, kūöyòh öi kalah ngam Tēv; öi hakeunlö elranôṙö yip mahaköp, tö ngam töt rēhĕn nö kanô-òṅ yik muvöhngö hī öt rēhĕn ayī-ö kô keūnö e? 11Ṙātö ellōnre pöri ayī-ö, tö hī min hayöökaṙen lökten im inlōnti ngam aṅ im Mā Yēsū; sā cha cha-a.
12Ṙòkhöre ngaich yik tömaṙôngö nö ṙangôre; ngaich hangihtöre tö ṙô nā Parnöpas, nāṅ Pôl, nö ahangnyö elnang cha tö nuk minkahngö, pinngangkūö inrē tī ngam Tēv nö i yik tahëng mihëṅṙö tarik nö lökten in cha. 13Keuheūthë ṙô cha-a, kaknyöre ngaich Yāköp, nö ngö ṙô, Kahōlö; hangihtöre yin tö ṙô chu. 14Ngaichô an taheui Sīmōn, nö ahangnyö elnang yīö tö tī ngam Tēv nö urĕh nö chöhkö yik tahëng mihëṅṙö tarik, nö kēḵ tarikre tö aṅ in cha, nö tarik Ò. 15Hōḵen höö nun tö e, tö ṙô yik pròfĕt, sā kinūichngö e, nö ngö, 16Unôichrit u Chū-ö min Öich havantöre; ngaich Chū-ö min hēk mānlö ngam inrūkui Tāvit, ngam tö taṙēhĕi. Hēk Chin min mānlö nup töfukngö, ngaich asöklö e min; 17Hòṅ yip chööḵvē tarik, nö chöh ngam Mā Tēv, ṙòkhöre inrē vē tahëng mihëṅṙö tarik, yip tö havëka tö Minënyö chu. 18Ngatī ṙô ngam Mā Tēv, ngam mumkahtölōn tö u, hēten tö ranehlö ngih panam.
19Lökten ön ngih chöngö chu, uh in hakihten cha yip aṅ i yip tahëng mihëṅṙö tarik mahavöötökūöre nö im Tēv; 20Höng kūichtö līpöre cha pöri, hòṅ cha nö ṙāngenre i nup tö hachōchi tö insa tēv, i chinô-òṅkānö i nyinā-aṅvkūö tö hanlöiny hang likeun, mahām inrē. 21Pò ngam chöngö Môsös nö misī-iten nö ahangka, ve-evkūö inrē nö el chūök vine-eṅkūötēv, örheūheu hē el töhet sakāmö.
Līpöre Chamuh In Yik Tahëng Mihëṅṙö Ṙamātölōnre
22Ngaich yik tanīnöṙô, tö yik mā, ṙòkhöre inrē ngam māṅ, nö hōtö kintöllö tarik aṅ in cha, nö tīni nö i Anti-òk, nö hol nāṅ Pôl, nāṅ Yūtās nak tö tīni, ök tö Pārsöpas invëka, Sailes inrē; nak mākūö yik Kristīön. 23Ngaich ngö tī cha-a nö kūichtö kum cha, Salām yip aṅ Antī-òk, Siriā, Kilikī inrē, yip tahëng mihëṅrö Kristīön, vē tanīnöṙô, tö vē mā inrē. 24Pò ih hang tö yip rēvre aṅ in ih, tö hòṅ hakihten yīö tö nup ṙô cha, kumtöngngölōn yīö, nö hōten yīö tunyīnyi, ngaich haköp chöngö Môsös: yip tö rö-ö nö tölô tö ih; 25Tölöök an nö ngaich, tö lōn ih ngaich hĕngrelōn, öi katöllö tarik nö tintu nö in yīö nö hol nā Parnöpas, nāṅ Pôl. 26Nāṅ tarik kamëtö nômöre tö pòkūö ngam Mā hī Yēsū Kristū. 27Lökten in ngaich tīnten nā Yūtās, nāṅ Sailes, nāṅ vamë-eny nang yīö min tö e, nö hakôtôre nö in yīö. 28Tölöök an nö im Töhet Fanöinylö, nö in ih inrē, öi rö-ö hòṅ hakeunlen yīö tö tömötlö lumngan, tö në töt ṙanāngen; 29Hòṅ yīö ṙāngenre i nup tökētu nö i insā tēv, i nyinā-aṅvkūö inrē tö mahām, nup tö hanlöiny hang likeun inrē, i chinô-òṅkānö. Lööken yin min, yē yīö haköpngöre öt in u. Lööken yin yēḵ.
30Ngaich hē tinīnngö cha, yih cha-a ngaich nö i Anti-òk; ngaich hamūl yik tömaṙôngö; kēḵ tök līpöre cha-a ngaich, nö in cha. 31Keuheūthëṙô cha-a nö ve-ekūö e, ngaich ṙāmölōn tök ṙinuöhöl alahare. 32Pròfĕt nak inrē nā Yūtās, nāṅ Sailes; 33Ngaich ṙōlö ṙô nö ṙuhöl alaha ök māṅ, nö hangëken cha. Rĕh rô-òten cha-a nö umuh; ngaich tīniyö tök māṅ nö holtö kumchikṙen, nö chuh i yik tamīnngöre. 34Höng hòṅ ngöh pöri Sailes nö umuh. 35Höngngöh inrē nā Pôl, nāṅ Parnöpas, nö i Anti-òk; ngaich haköphöti, ane inrē ahangkö ngam ṙô ngam Mā Tēv; maṙôngö yik hol cha tahëng.
Ṙāngen Höö Nā Pôl Nāṅ Pārnāpās
36Rĕh rô-òngen, ngaich ngö rô Pôl tö Parnöpas, Ta-a tai hēk havantöre chöhkö yip Kristīön i nup panam, chūök hā ngaich ahangkö ngam ṙô ngam Mā tēv, ai ngëichkö inlahen cha. 37Ngaich ang Parnöpas nö hòṅ ngô-òṅ Yôhan, nö hol cha inrē; ök tö Mākös invëka. 38Rö-ö pöri angū-ö nö tölöök tö lōn Pôl. Ngam nginô-òṅ ò; pòn ṙamāngen cha sin, nö ṙā-ang Pampuli; öt iṙuhöröön nö in cha, nö im la-en. 39Ngaich cha-a nö lā-alkūöre; lökten cha nö ngaich nö kö köhngen tö höö. Ngô-òṅ Mākös ang Parnöpas, ngaich chuh Saiprös/Kūprös. 40Katöllen Sailes pöri ang Pôl ngaich kiröönngöre; kētu cha-a tö ngam māṅ nö im inlōnti aṅ im Tēv. 41Ngaich kiröönngöre anga-aṅ nö lök Siriā Kiliki inrē, hangëkö nuk māṅ.
انتخاب شده:
INLAHEN 15: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
