INLAHEN 14
14
Ikonīöm
1Ngaich cha-a nö i Ikôniöm, kuhēthötre cha-a nö el chūök vine-eṅkūötēv yik Yahūti, ngaich pōyen yik ṙamātö ellōnre, tö kūö ṙô cha, Yahūti, hĕnghöre Krīk inrē. 2Ngaich pöri yik Yahūti, yik tö sōḵ nö hang, nö haruh ellōn yik Tahëng mihëṅṙö tarik, ngaich vītö ötlanöökö ellōn cha nö im māṅ, 3Marô-òten cha-a nö höngngöh nö umuh; ngaich öt pa-ekūö ṙô cha-a, pòn hayönglenre nö im Mā Tēv, ngam mahameukhöti nö im ṙô Ò inlōnti, kētö minkahngö, pinngangkūö inrē nö eltī cha. 4Ngaich pöri yik tarik aṅ ngam panam nö harēvöre; rēvre yik mahaköpngöre nö i yik Yahūti, rēvre yik mī-i nak tanīnöṙô.
5Ngaich hē yik tahëng mihëṅṙö, yik Yahūti inrē, tö yik mākūö, nö hòṅ chökhuṙen tö cha, hòṅ sumrōngngökūö cha, hòṅ kulehe cha inrē; 6Akahalōn cha-a ngaich tö e; afalngöre ngaich nö i nup panam Likônī, Listra, Törpī inrē; i nup töng i chīṙö u inrē. 7In u cha-a ngaich nö ahangkö ngam tölöök inhānga.
I Līstrā Tö Törpī
8Hĕng taka ök tarik i Listra, tötkôlò kalröön, tökaròk nö ṙā-ang ellōn yöngre, ök töng öt hĕng heuh nö kiröönngöre. 9Anga-aṅ hamang ṙô Pôl; ngaich Pôl nö haköpmatre nö ngëichken ò; ngaich akahalōn tö ò nö mikahavö, töp lökten lanööken ò. 10Ngaich ngö ṙô ang Pôl nö pōitô, Hachiplöre man; söklöre. Ngaich tisòklöre anga-aṅ; ngaich kiröönngöre. 11Ngaich hē yik tömaṙôngö nö meuk tī Pôl, kaknyöre cha-a ngaich nö hūḵa, nö ngö ṙô, nö i ëlô aṅ Likônī, Yônti yin vē tēv nö in hī, ngaich nö sā tarik. 12Yupitör ang Parnöpas tö ṙô cha; Mökuiri ang Pôl, pòn yöngkūö ṙô cha anga-aṅ. 13Ngaich ök kūönṙô Yupitör, ök lamatunyī tök panam, nö kētö nuā, tö aneūmu, nö i kūö inkūp; ngaich hòṅ kētö tö tökētu, nö holtö yik tömaṙôngö.
14Hē nak tanīnöṙô pöri, nā Parnöpas, nāṅ Pôl, nö hāngö e, tikaichngö hilāre cha-a ngaich, ngaich faltöre nö i yik tömaṙôngö; nö hūḵa, nö ngö ṙô, 15Mah! Kūö yòh öi ngatī? Tarik an āyö inrē, tö sā yīö; kamëtö ngih tölöök inhānga in yīö, hòṅ yīö havööngökūöre, ṙā-ang i në töng rö-ö, öi im tö aṅ Tēv, ngam Vamī-iṅl halīöngö, panam, mai, nup taṙòkhöre mī-in u. 16Ngam mahalöngten vē tahëng mihëṅṙö tarik sin mīsī, nö lök i nup talöököre. 17Rö-ö pöri Anga-aṅ nö öt ameūku, i tī Ò tö nup taṙòkhöre tölöök, löktö el halīöngö tī Anga-aṅ nö kē-ĕkūö yīö tö kumṙah, hē ṙòng inrē; ngaich hatööḵngen yīö tö nya-aṅkūö, ṙanāmölōn inrē. 18Anū-ö ṙô cha nö pītnyöre nö tahngö yik tarik, nö kētö tökētu nö in cha.
19Chalô ngaich yik Yahūti ṙamā-ang Antiòk, Ikônī inrē; ngaich hōtö yik tömaṙôngö cha-a nö kulehe Pôl; ngaich tūöknyen ò nö latunyī tök panam; pòn kapah anga-aṅ tö lōn cha. 20Ngaich pöri yik mahaköp nö havīlen ò; ngaich choholre anga-aṅ; ngaich kuhēthötre nö im panam, Ngaich im huṙöich anga-aṅ, nö holten Parnöpas, nö Chuh Törpī.
Havan Nö Chuh Entiòk I Sīrīa
21Keuheūthëṙen cha-a nö ahangkö ngam tölöök inhānga nö im panam, ngaich maṙôngö haköpti; havantöre ngaich cha-a nö i Listra, Ikôniöm, Antiòk inrē; 22Hangëkö ellōn yik mahaköp; ṙuhöl alaha cha inrē nö haköpngöre nö im mikah; ve-eny nang cha inrē tö hī, lökten i kanihngen, öi kuhēthötre im pūlngö ngam Tēv. 23Ngaich hē cha nö vī-il yik mā i nuk māṅ, ve-ekūötēv cha-a, ahik inrē; ngaich cha-a nö kēten cha nö im Mā Tēv, ngam chūök cha nö ṙātö ellōnre.
24Ngaich cha-a nö lök Pisitī, ngaich yihtöre nö i Pampuli. 25Keuheūthëṙô cha-a tö ngam ṙô nö i Pörka, ngaich chuh Attalia. 26Ngaich ṙā-ang umuh cha-a nö hatēhhĕngre nö chuh Antiòk, ngam chūök cha nö kētu nö im inlōnti tī ngam Tēv, nö im la-enre ngam tökeuheūten nö ngaich.
27Chalô cha-a, ngaich hamūl ngam māṅ; ngaich keuheūtnyöre ṙô nö ahangnyö elnang cha, tö nuk taṙòkhöre tī ngam Tēv, tö tī Ò inrē nö löpnyökūö inkūp mikah nö i yik tahëng mihëṅṙö tarik. 28Ngaich marô-òten cha-a nöngngöh nö i yik mahaköp.
انتخاب شده:
INLAHEN 14: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
