Luka 1
1
1Ki a Teofilo:
E vē ona iloa e koe, e tokalahi nā tino kua taumafai ke ki lātou fakamaumaua ki lalo nā mea kua uma te fakataunukugia. 2Na tūhia e ki lātou nā mea na fakailoa mai ki a te ki mātou e nā tino nae i ei i te kāmataga ma nae ki lātou folafolagia te fekau. 3Kua manatu ai foki la au, ona kua uma te kō hukehukeagia lelei o nā mea uma iēnei mai te kāmataga, ke kō tuhituhia fakalelei ki lalo nā mea iēnei mo tau afioga, 4kae ke iloa ai e koe te moni o nā mea uma kua akoako ai koe.
Kua Folafola te Fānau mai o Ioane te Papatiho.
5 #
1 NT 24.10
I nā aho o Helota te Tupu o Iutea,#1.5 Iutea: Ko te igoa tēnei o te laukelekele kātoa o Palehetina. nae i ei he ohitāulaga e igoa ki a Hakalia, he tino o te vāega ohitāulaga a Apiaha, ma tana āvaga e igoa ki a Elihapeta, na tupuga mai ia Alona.#1.5 Alona: Te uho o Mohe, ma ko te ohitāulaga muamua ia o Ihalaelu. 6Nae ola ki lāua i he ōlaga e tonu i te kikila a te Atua, ma nae tauhihi lelei ki nā tūlāfono ma nā fakatonuga a te Aliki. 7Kae nae hēai he lā fānau ona ko Elihapeta e hē manava ola, ma kua mātutua lele foki ki lāua.
8I tētahi aho, ko Hakalia nae galue i tana gāluega faka-ohitāulaga i te Mālumalu, ona kua pa te fakahologa o nā gāluega ki te vāega ohitāulaga e i ei ia. 9Na fai te vili e vē ko te tū māhani a nā ohitāulaga, oi na filifilia ai ia Hakalia ke ia fakamūa nā meamanogi i luga o te fata faitāulaga. Oi fano ai ki loto o te potu o te Mālumalu o te Aliki e takua ko te Mea e Paia,#1.9 Mea e Paia: E i loto ai te fata faitāulaga, ma e nā ko nā ohitāulaga oioti te fakataga ke olo ki loto. E i ei te kie pupuni nae vaelua ai te potu tēnei ma te potu nae takua ko te Nofoaga e Hili te Paia, e nofo ai te Atua. oi fakamū te tāulaga meamanogi, 10ka ko te tokalahi o tagata, nae tatalo i fafo i te itūlā o nā tāulaga meamanogi.
11Oi fakakitea ai he agelu a te Atua ki a Hakalia, e tū mai i te itū taumatau o te fata faitāulaga e fakamū ai nā meamanogi. 12Na teki lahi ia Hakalia, ma na ia lagona te mataku, i te ia kiteaga o te agelu. 13Kae kua lea atu te agelu ki ei, “Ia koe nā mataku Hakalia, auā kua lagona e te Atua tau tatalo. Ka fānau mai e Elihapeta tau āvaga, he ataliki mo koe, ma ka fakaigoa e koe ki a Ioane. 14Ka fakatumulia koe i te fiafia ma te olioli, ma e tokalahi nā tino ka fiafia i tona fānau mai, 15#Nūm 6.3auā ko Ioane ka kavea ma tagata tāua i mua o te Aliki. E hē tatau lele ia ke inu ki he uaina, pe he mea mālohi. Ka fakatumulia ia i te Agaga Paia mai te aho e fānau mai ai, 16ma ka ia toe fakaliliu maia te tokalahi o tagata Ihalaelu, ki te Aliki to lātou Atua. 17#Mal 4.5-6Ka muamua atu ia i te Aliki, ma e mākeke ma lototele, e vē ko te pelofeta ko Elia. Ka fakaliliu e ia ia loto o mātua ki a lātou fānau; ka fakaliliu e ia nā tino fakalogo gatā ke toe kui i nā auala o te āmiotonu; ka tāpena e ia nā tino o te Aliki, ke hāuniuni mo ia.”
18Kua lea vē atu ia Hakalia ki te agelu, “E vēhea ona kō iloa ko te mea tēnei e taunuku? Ko au kua toeaina, ko taku āvaga foki kua lomatua.”
19 #
Tan 8.16; 9.21 Kua tali mai te agelu, “Ko au ko Kapelielu. Ko au ko he kaukauna fakapitoa e a te Atua. Ko au na uga mai e te Atua ke tautala atu ki a te koe, ma fakailoa atu te tala lelei tēnei. 20Kikila, ona ko koe kua hē talitonu ki aku kupu iēia ka taunuku lava i te taimi kua fuafua ka fakataunuku ai, ko koe la ka gūgū ma hē mafai ke tautala, heiloga kua pa ki te aho e taunuku ai nā mea iēnei.”
21I te taimi tēnā, ko nā tino nae fakatalitali ki a Hakalia, kua māfaufau pe he ā te kua tuai mai ai i loto o te potu e fai ai te tāulaga meamanogi. 22Kae i te hauga o Hakalia ki fafo, kua hē ia mafaia oi tautala atu ki a te ki lātou, oi na ki lātou iloa ai e i ei he fakaaliga na ia kiteagia i loto o te potu. Kua tautalalima lava ki nā tino, ona kua hē ia mafaia oi tautala.
23I te umaga o tona toe aho tiute i te Mālumalu, oi fano ai ki tona kāiga. 24Kua teka atu nā aho iēnā, oi faitama ai ia Elihapeta tana āvaga, ma e lima ia māhina na nofo ai lava i te fale, kua hē hula ki he mea. Kua lea vē ifo ki a te ia lava, 25“Ko te mea tēnei kua fai e te Aliki ki a te au, ona kua kikila alofa mai ki a te au, ma kua ia kave keheagia toku mā nae nofo ma au, i te kikila mai a nā tino!”#1.25 kua ia kave keheagia toku mā nae nofo ma au, i te kikila mai a nā tino; Kāfai he fafine kua āvaga kae hē mafai ke faitama, nae i ei te manatu, ko te fafine tēnā e fakahalagia e te Aliki.
Kua Folafola te Fānau mai o Iehu.
26I te ono o māhina talu te faitama o Elihapeta, na uga atu ai e te Atua te agelu ko Kapelielu, ki he koga i Kalilaia e igoa ki a Nahaleta, 27#Mat 1.18ma he fekau ki he taupou kua uma te tutuhi ke fakaipoipo ki he taulealea e igoa ki a Iohefa, e tupuga mai i te gafa o te Tupu ko Tavita. Ko tona igoa ko Malia. 28Kua fanatu te agelu ki te mea e i ei ia Malia, oi lea vē atu ai ki ei, “Tālofa ni te māfine, tē kua alofagia e te Atua. Ko te Aliki e fakatahi ma koe!”
29Ka ko Malia kua popole lele tona loto, ma kua māfaufau mālie ifo ai, pe he ā te uiga o nā kupu iēnei a te agelu. 30Kua lea atu te agelu ki ei, “Malia, koe nahe mataku, auā kua alofagia koe e te Atua. 31#Mat 1.21Kikila, ko koe ka faitama ma fānau mai e koe he pepe tama, ma ka fakaigoa e koe ki a Iehu. 32#2 Ham 7.12, 13, 16; Iha 9.7Ka kavea ia ma tagata tāua lahi, ma ka takua ia ko te Ataliki o te Atua Hilihilikehe. Ka fai ia ma tupu e te Aliki te Atua, e vē ko tona tupuna ko Tavita, 33ma ka kavea ia ma tupu o nā lāpuna o Iakopo, ke pa ki te fakavavau; ma ko tona mālō, ka hē mafai ke fakauma!”
34Kua lea atu ia Malia ki te agelu, “Ko au ko he taupou. E vēhea la ona mafai he mea vēnā?”
35Ka kua tali mai te agelu, “Ka fanaifo te Agaga Paia ki ō luga, ma ko te mana o te Hilihilikehe ka fakamalumalu ifo ki ō luga. Ko te mea ia ka paia ai te tama ka fānau mai, ma ka takua ai ko te Ataliki o te Atua. 36E kē manatua ia Elihapeta, te fafine o te koutou kāiga. Kua matua lele kae kua faitama; ko te ono tēnei o ona māhina, e ui lava nae fai vēia, e hē manava ola. 37#Ken 18.14Auā e hēai he mea e fokotahi e hē mafai e te Atua.”
38Oi lea atu ai ia Malia, “Ko au ko te kaukauna e a te Aliki; ke vēnā lava ona faia ki a te au, e tuha ai ma tau vāgana mai.” Oi tukua ai loa e te agelu ia Malia kae fano.
Kua Āhiāhi ia Malia ki a Elihapeta
39E hēki mataloa ni aho, oi tū ake ai ia Malia oi fano fakavave ki he kakai i he koga maugā i Iutea. 40Kua ulu atu ki te fale o Hakalia, oi ofoalofa atu ai ki a Elihapeta. 41Na lagona atu lava e Elihapeta te ofoalofa mai a Malia, oi gāoioi ake ai foki ma te pepe i tona manava. Kua fakatumulia foki ia Elihapeta i te Agaga Paia, 42oi kalaga leo lahi lele ai vē, “Kua hili atu tō manuia i lo fafine uma, ma ke manuia foki te tama ka fānau mai e koe! 43Ko ai nei kita, kua āhiāhi mai ai te mātua o toku Aliki ki a au? 44Auā na lagona atu lava e au tau ofoalofa mai, oi gaoi ake ai foki te pepe i toku manava, i tona fiafia. 45Amutia koe e talitonu ko te mea na vāgana atu ai te Aliki ki a te koe, ka fakataunuku lava!”
Ko te Pehe a Malia na Viviki ai ki te Atua
46 #
1 Ham 2.1-10
Oi lea vē ai ia Malia,
“E viviki ake toku loto ki te Aliki;
47e fiafia foki toku agaga ona ko te Atua toku Fakaola,
48 #
1 Ham 1.11
i te kua ia manatua mai o kita, tana kaukauna fafine fakatauva!
E kāmata atu nei, ko augā tupulaga uma, ka fakaamutia mai ki a te au,
49ona kua fai e te Atua Hilihilikehe te Mālohi, nā mea lalahi mo au.
Ko tona igoa e paia;
50ma e fakaalia tona alofa fakahao ki a te ki lātou e mātataku ia te ia
mai tēia tupulaga ki tēia tupulaga.
51Kua fālō atu tona lima mākeke
ma fakatākapekape nā tino fāfifia ma a lātou fuafuaga uma,
52 #
Iop 5.11; 12.19 Kua tuku e ia ki lalo nā tupu mālolohi mai o lātou nofoāliki,
kae hiki ki luga nā tino fakatauva.
53Kua fafaga mākokona e ia nā tino fia kakaia i nā mea lelei,
kae uga kehe vē nā tino maumea e aunoa ma he mea.
54Kua tauhi e ia tana folafolaga na fai ki o tātou tupuna,
ma kua hau ke fehoahoani ki tana kaukauna ko Ihalaelu!
55 #
Ken 17.7
#
1 Ham 2.1-10
Kua manatua e ia ke fakaali tona alofa fakahao ki a Apelaamo
ma ana fānau uma lele ke pa ki te fakavavau!”
56E tai tolu ia māhina na nofo ai ia Malia i te mea e i ei ia Elihapeta, oi toe foki ai ki tona kāiga.
Ko te Fānau mai o Ioane te Papatiho.
57Kua pa ki te māhina o Elihapeta, oi fānau mai ai e ia tana pepe, he tama. 58Kua fakalogo nā tino e tuākoi ki lātou, ma nā kāiga o Elihapeta ki te lahi o te alofa o te Atua ki a Elihapeta, oi fiafia fakatahi ai ki lātou uma lele ma ia.
59 #
Lev 12.3
I te kātoaga o te valu o aho talu te fānau mai o te pepe, oi ōmamai ai ki lātou ke pelitome te pepe, ma na fofou ke ki lātou fakaigoa te pepe ki a Hakalia, te igoa o tona tamana. 60Kae kua lea atu tona mātua, “Hēai; ko tona igoa ko Ioane.”
61Kua lea mai ki lātou, “E hēai he tino e igoa vēnā i te koutou kāiga!” 62Oi tautalalima atu ai nā tino ki a Hakalia, pe ko ai te igoa e fofou ia ke fakaigoa ai tona ataliki.
63Kua tautalalima mai ia Hakalia, ke kavake he mea ke tuhituhi ia ki luga, oi tuhi ai vēnei e ia ki lalo, “Ko tona igoa ko Ioane.” Na tēteki lele ki lātou uma i te mea tēnei. 64Ko te taimi foki lava tēnā na mafai ai ke toe tautala ia Hakalia, ma na kāmata ai oi viviki ake ki te Atua. 65Na fakatumulia nā tino uma i te pitonuku tēnā i te mātataku, ma kua halalau te tala e uiga ki nā mea iēnei ki nā itū uma o te kogāfenua maugā o Iutea. 66Ko nā tino uma lele na fakalogo ki nā mea iēnei, kua teu e ki lātou i o lātou loto, ma kua lea vēia “Ko te tamaiti nei tēnei e fai ma a, kāfai e matua?” Auā kua ki lātou iloa ko te mana o te Aliki e i te tamaiti.
Ko te Vāloaga a Hakalia
67Oi fakatumulia ai ia Hakalia, te tamana o Ioane, i te Agaga Paia, ma na fai ai tana vāloaga e vēnei;
68“Ke vīkia te Aliki, te Atua o Ihalaelu!
Kua hau ke fakaola ona tagata.
69Kua fakatū mai e ia mo ki tātou he Fakaola mākeke,
he lāpuna e o tana kaukauna ko Tavita.
70Na folafola e ia e ala i ana pelofeta paia i te kāloā,
71ka laveaki e ia ki tātou mai o tātou fili,
mai nā lima o ki lātou uma e ita mai ki a te ki tātou.
72Na tākua e ia ka ia fakaalia tona alofa fakahao ki o tātou tupuna,
ma ia manatua tana feagaiga paia.
73-74I tana tautōga na fai ki to tātou tupuna ko Apelaamo,
na folafola e ia e ia laveakia ki tātou mai o tātou fili,
ma fakataga ki tātou ke tautua ki a te ia e aunoa ma he mataku,
75kae ke mafai ai ki tātou ke fakapaiagia ma āmiotonu, i mua o ia
i aho uma o to tātou ola.
76 #
Mal 3.1
“Ma ko koe, taku tama, ka takua koe ko he pelofeta e a te Atua Hilihilikehe.
Ka muamua atu koe i te Aliki,
ke hāuni he auala mo ia,
77ma fakailoa atu ki ona tagata te fakaolataga,
e ala i te fakamāgaloga o a lātou agahala.
78Ko te tātou Atua e alofa ma e agamalū.
Ka fakatafa e ia ia ata o te mālama o te fakaolataga ki o tātou luga,
79 #
Iha 9.2
ma fakahuhulu ifo mai te lagi ki luga o nā tino uma e nonofo i te pōuli o te ata o te oti,
ke takitaki ai o tātou vae ki te auala o te fīlēmū.”
80Kua tuputupu ake te tamaiti, ma kua maua i te loto mākeke. Nae nofo lava i te vao, ke pa ki te aho na kāmata ai tana gāluega ki tagata o Ihalaelu.
Currently Selected:
Luka 1: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.