Luka 2
2
Ko te Fānau mai o Iehu
(Mataio 1.18-25)
1Ko nā aho lava iēnā, na fai ai te fakatonuga a te Kaihala Aukuho, ke fai he tuhigāigoa a tagata uma o te lalolagi, e i lalo o te pūlega a Loma. 2Ko te tuhigāigoa muamua lava tēnei, ma na fakataunuku i nā aho nae kōvana ai ia Kulenio i Hulia. 3Oi olo ai nā tino uma lele, kua fano lava te tino ki te kakai na fānau mai ai, oi tuhi ai tona igoa.
4Na vēnā foki la ia Iohefa, na fanatu mai te kakai ko Nahaleta i Kalilaia, ki te kakai ko Peteleema i Iutea, te mea na fānau mai ai te Tupu ko Tavita. Na fano ki ei ona ko ia na tupuga mai ia Tavita. 5Na olo ma Malia, tēia kua uma te fakamau ke fakaipoipo ki ei, ke tuhi o lā igoa. Ko Malia kua faitama. 6Ka koi i Peteleema ki lāua kae fakatīgā ia Malia, 7ma na fānau mai ai e ia tana ulumatua, ko he tama. Na āfīfī e ia te pepe i ni meakie, oi fakatakoto ai ki loto o he kumete fāgaimanu, auā kua hē maua ho lātou avanoa i te fale talimālō.
Ko nā Leoleomāmoe ma nā Agelu
8Nae i te kogāfenua foki tēnā ni leoleomāmoe, nae taukikila a lātou māmoe i te vao, i te pō tēnā. 9Oi kitea ai e ki lātou he agelu a te Aliki, ma kua huluia fakatāmilo ki lātou i te mamalu o te Aliki. Na mātataku lahi lele ki lātou, 10kae kua lea atu te agelu ki a te ki lātou, “Koutou nahe mātataku! Kikila, ko au kua hau ma he tala lelei mo koutou, he tala e maua ai e tagata uma te fiafia lahi. 11Auā ko te aho lava tēnei na fānau mai ai i te kakai o Tavita, te koutou Fakaola — ko te Mehia te Aliki! 12Ma ko tēnei te mea ka fakamāonia ai ki a te koutou: ka maua atu e koutou he pepe e āfīfī i ni meakie, ma e fakatakoto i loto o he kumete fāgaimanu.”
13Kae teki lava kua i ei fakatahi ma te agelu, he vāega agelu tokalahi mai te lagi, e pepehe i nā vīkiga ki te Atua:
14“Ko te vīkiga ki te Atua Hilihilikehe,
ma te fīlēmū i te lalolagi, mo ki lātou kua fiafia ia ki ei!”
15I te toe fokiga o nā agelu ki te lagi, oi fakataufai ai nā leoleomāmoe, kua lea vē tētahi ki tētahi, “Tātou olo ki Peteleema oi kikila ki te mea tēnei kua tupu, e vē ona fakailoa mai e te Aliki ki a te ki tātou.”
16Oi olo fakavave ai nā leoleomāmoe, ma na ki lātou maua atu ia Malia ma Iohefa, ma te pepe e takoto i loto o te kumete fāgaimanu. 17I te kiteaga e ki lātou o te pepe, oi taku ai e ki lātou ki nā tino, te mea na lea ake ai te agelu ki a te ki lātou e uiga ki te pepe. 18Ko nā tino uma lele na fakalogo ki ei, na ofo lele ki te mea na lea ake ai nā leoleomāmoe. 19Ka ko Malia, kua teu uma e ia nā kupu iēnei i tona loto, ma māfaufau loloto ki ei. 20Oi toe fōki ai nā leoleomāmoe ma pepehe i nā vīkiga o te Atua, ona ko nā mea uma lele na fakalogo ma kikila ki lātou ki ei, e vē lava oi lea ake ai te agelu.
Kua Fakaigoa te Pepe ki a Iehu
21 #
Lev 12.3; Luk 1.31 Kua teka nā aho e valu talu te fānau mai o te pepe, ko te aho ia e pelitome ai, oi fakaigoa ai ki a Iehu, te igoa na fakaigoa ai e te agelu, ka ko hēki to ia Malia.
Kua Tuku atu ia Iehu ke Fakapaia mo te Atua i te Mālumalu.
22Kua pa ki te aho e fakatino ai e Iohefa ma Malia te hāuniga tau ki te fakamamāgia#2.22 hāuniga tau ki te fakamamāgia; E vē oi fakatonu mai i te tūlāfono a Mohe, kāfai he mātua Iutaia e fānau mai e ia he pepe tama, nae kikila vē ki ei e “hē mamā” i te itū tau tāpuakiga ma nae fakahā oi fano ki te Mālumalu. E nofo lava i te fale ke uma te pelitome o tana pepe i te valu o aho (kikila ki te 1.59). Oi toe nofo ai lava i te fale mo hētahi 33 aho, oi ofo atu ai loa he tāulaga ki te Aliki. e vē ona fakatonu mai e te Tūlāfono a Mohe. Oi kave e ki lāua te pepe ki Ieluhalema, ke tuku atu ke fakapaia i mua o te Aliki, 23#Eho 13.2, 12e vē ona tūhia i te tūlāfono a te Aliki: “Ko nā tamaiti tāne ulumatua uma lele, e fakapaia mo te Aliki.” 24#Lev 12.6-8Na olo foki oi ofo atu te lā tāulaga, e tuha ai ma te tūlāfono a te Aliki, “he luagamata lupe, pe ni lupe pepe e lua.”#2.24 luagamata lupe, pe ni lupe pepe e lua: ni lupe mātutua e lua i te itūkāigā lupe taigogole, pe lua ia lupe pepe i te itūkāigā lupe fuaefa.
25I te vāitaimi tēnā, nae i ei he tino nae igoa ki a Himeona nae nofo i Ieluhalema. Ko he tino lelei ma mataku i te Atua, ma nae fakatalitali ke laveaki e te Atua ia Ihalaelu. Nae fakatahi te Agaga Paia ma ia, 26ma na fakailoa ki ei e te Agaga Paia, ko ia e hē oti heiloga kua ia kitea te Mehia, na folafola e te Aliki. 27Kua tataki ia Himeona e te Agaga Paia, ma ulu atu ai ki loto o te Mālumalu; ma i te kaumaiga o te pepe ko Iehu e nā mātua ki loto o te Mālumalu, ke fai mo ia nā mea māhani e tuha ai ma te Tūlāfono, 28oi puke atu ai ia Himeona ki te pepe, kua hiki i ona lima, ma fakafetai ki te Atua:
29“Te Aliki, keina tuku mai ko tau kaukauna ke fano ma te fīlēmū,
e tuha ai ma tau folafolaga ki a te au.
30Auā kua kitea e oku mata tau fakaolataga,
31tēia kua kē hāuniagia i mua o tagata uma lele o te lalolagi:
32 #
Iha 42.6; 49.6; 52.10 He mālamalama ke fakakitea ai tō finagalo ki tagata nukukehe,
ma maua ai he vīkiga mo ō tagata Ihalaelu.”
33Na ofo lele te tamana ma te mātua, ki nā kupu kua tautala ai ia Himeona e uiga ki te lā pepe. 34Oi fakamanuia ai ki lātou e Himeona, ma lea vē atu ki a Malia, te mātua o te pepe, “Kikila, ko te pepe tēnei kua filifilia e te Atua mo te fakaumatiaga ma te fakaolataga o tagata Ihalaelu. Ka fai ia ma fakailoga mai te Atua e teteke ki ei te tokalahi o tagata, 35kae ke fakailoa ai o lātou manatunatuga lilo — ma ko te fakanoanoa e vē he pelu kakaha, ka tuia ai lava tō loto.”
36-37Nae i ei he pelofeta fafine matua lele e igoa ki a Anā, te afafine o Fanouele o te puikāiga o Ahela. E fitu oioti ia tauhaga na nofotāne ai, ma kua valuhefulu fa nei ona tauhaga.#2.36-37 valuhefulu fa nei ona tauhaga; pe valuhefulu fa tauhaga talu te oti o tana āvaga. Kua hē fano kehe lele ma te Mālumalu; e tatalo ma tāpuaki ki te Atua i te pō ma te ao, ma fakalāina. 38Ko te taimi tonu foki lava tēnā na taunuku atu ai te pelofeta fafine tēnei ki te Mālumalu, ma kāmata oi viviki ake ki te Atua ma fakailoa atu e uiga ki te pepe, kinā tino nae fakatalitali ki te Atua ke ia fakahaolotoa ia Ieluhalema.
Ko te toe Fokiga ki Nahaleta
39 #
Mat 2.23
Kua uma te fakataunuku e Iohefa ma Malia nā mea uma nae tatau ke ki lā faia e tuha ai ma te Tūlāfono a te Aliki, oi toe foki ai ki to lā nuku ko Nahaleta i Kalilaia. 40Kua tuputupu ake te tamaiti, kua mālohi; kua fakatumulia i te poto, ma fakamanuiagia e te Atua.
Ko Iehu i te Mālumalu ka koi Tamaiti ai
41 #
Eho 12.1-27; Teu 16.1-8 I tauhaga uma, ko nā mātua o Iehu e olo ki Ieluhalema, mo te Kaiga Fakamanatu o te Pāheka. 42Kua kātoa te hefululua tauhaga o Iehu, oi olo ai foki ma ona mātua ki te Kaiga Fakamanatu o te Pāheka, e vē lava ko te mea kua māhani ai ki lātou. 43Kua uma te Pāheka, oi kāmata ai kua toe foki ki to lātou kāiga, ka ko Iehu kua nofo i Ieluhalema, kae e hē iloa e ona mātua. 44Nae vēake lava nā mātua ko Iehu e i loto o te lātou kau malaga. Na kātoa te aho e faimalaga ai ki lātou, kae fātoā kāmata oi hakili ia Iehu e ona mātua ki nā kāiga o ki lāua ma a lā uō. 45E hēki ki lā maua te lā tama, oi toe foki ai ki lāua ki Ieluhalema oi hakili. 46Ko tona tolu o aho na maua ai e ki lāua ia Iehu i te Mālumalu, e nofo i te mea e i ei nā faiakoga, e fakalogologo ki ei, ma fai ki ei ana fehili. 47Na tēteki lele nā tino uma na fakalogo ki fakamatalaga a Iehu, ona ko te poto o ana tali. 48Na ofo lele foki ona mātua i te ki lā kiteaga o Iehu, oi lea vē atu ai tona mātua ki ei, “Taku tama, he ā te kua fai ai e koe te mea tēnei ki a te ki māua? Kikila, ko koe nae hakili e ki māua ma tō tamana, ma ko ki māua na popole lele.”
49Ka kua vē atu ki ei tana tali, “He ā te na hakili ai au e koulua? E hē koulua iloa ko au e tatau ke i te fale o toku Tamana?” 50Kae e hēki ki lā hāfia te uiga o tana tali.
51Oi olo fakatahi ai ia Iehu ma ona mātua ki Nahaleta, ma nae uhitaki lele ki a te ki lāua. Na teu i te loto o tona mātua nā mea uma iēnei. 52#1 Ham 2.26; Alk 3.4Kua tuputupu ake ia Iehu i te tino ma te māfaufau, ma na alofagia e te Atua vēnā foki ma tagata.
Currently Selected:
Luka 2: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.