Jan 21
21
Jesu doagidi o yuli ŋoadikaabilele po
1Lani n pendi, Jesu go den doagidi o yuli o ŋoadikaaba po ke bi ye Tiberiadi ñincianma#21.1 Laa ñincianma n go yi Galile. jaali po. Line n tie wan den doagidi o yuli bi po maama:
2Simon Pieli leni Toma, ban go yi yua ku Poligu leni Galile yaa Kana yua Natanayeli, Sebede bijaba leni ŋoadikatoaba bonbilie den taa ki ye. 3Simon Pieli den yedi ba: «N caa u jankpaanu.» Bi den yedi o: «Ti baa yegi leni a.» Bi den ñani ki kua ku ñinbiagu nni, ki gedi u jankpaanu, ama laa ñiagu kuli baa den baa puu. #Luk 5.5. 4U yienu n den pudi yaa yogunu, Jesu den se li boanjaali kani, ama bi ŋoadikaaba naa den bandi ke li tie Jesu. 5Jesu den buali ba: «N bila, naani yi pia i jami?» Bi den guani ki yedi o: «Aa-a.» 6O den yedi ba: «Lu mani yi taalu ku ñinbiagu jienu po, yi baa baa.» Lani, bi den luni u taalu ke u gbie i jami, hali ke baa fidi ki dadi u. #Luk 5.6. 7Jesu n den bua yaa ŋoadika den yedi Pieli: «Li tie o Diedo yo.» Simon Pieli n den gbadi ke li tie o Diedo, wani yua n den se benbili, den goli o kpalibu ki yugi ki cii mi ñima nni. 8Yaa ŋoadikaaba n den sieni den cua leni ku ñinbiagu, ki dadi u taalu hali li wali kani ke u gbie i jami, kelima baa den foagidi leni li jaali ke li cie nani nukpanduna kobilie. 9Ban den ñani ku ñinbiagu nni ki sedi li jaali po, bi sua ke u mu ye likani ke i jami ŋuabi u mu po, ke dupen mo ye. 10Jesu den yedi ba: «Cuani mani yin cuo yaa jami yeni waamu na!» 11Simon den kua ku ñinbiagu nni ki dadi u taalu ki cuani li jaali kani. U den gbie a jangbenga, ke a pundi kobiga n piimuu n jamitaa. Ba ke i jami den yabi, u taalu naa den padi. 12Jesu den yedi ba: «Cua mani ki siibi.» Bi siiga ba niyendo naa den tuo ki buali o: «A tie ŋme?» Bi den bani ke li tie o Diedo. 13Lanwani, Jesu den nagini ki taa dupen ki teni ba, ki go teni ba i jami moko.
14Lani n den tie mi taataama, hali Jesu n den fii bi tinkpiba siiga ki doagidi o yuli o ŋoadikaaba po.
Jesu maadi leni Pieli
15Ban den siibi ki gbeni, Jesu den buali Simon Pieli: «Jan bijua Simon, a sua ke a bua nni ki cie bine bi?» O den guani ki yedi o: «Mm, n Diedo, a bani ke n bua ŋa.» Jesu den yedi o: «Ŋan yaa kpaa n pebila.» 16Jesu go den buali o: «Jan bijua Simon, a sua ke a bua nni bi?» Pieli den guani ki yedi o: «Mm, n Diedo, a bani ke n bua ŋa.» O den yedi o: «Ŋan yaa kpaa n pe.» 17Jesu go den buali o mi taataama: «Jan bijua Simon, a sua ke a bua nni bi?» Li den biidi Pieli pali leni Jesu n buali o taalimitaa: «A sua ke a bua nni bi?» Lani, o den yedi o: «N Diedo, a bani li bonla kuli, a bani ke n bua ŋa.» Jesu den yedi o: «Ŋan yaa kubi n pe. 18N waani a i moamoani, ŋan den tie jawaalo, a den yie ki ñagindi fini a ba a gbanñagidigu, ki caa ŋan bua naani. Ama a yaa podi, a baa tandi a nii nitoa n ñagini a po, ki gedini a ŋan kaa bua naani.» 19Jesu n den maadi yeni, o den doagidi Pieli n baa ti kpe yaa kuuma, lan kpiagi U Tienu. Lani, Jesu den yedi Pieli: «Ŋoadi nni!»
Jesu leni wan bua yaa ŋoadika
20Pieli den jigidi ki laa Jesu n bua yaa ŋoadika ke o se bi puoli. Laa ŋoadika n den kpagini ki nagini Jesu, ban den taani ki di ban den cuo Jesu yaa ñiagu, ki den buali Jesu: «N Diedo, ŋme n baa janbi a?» #13.25. 21Pieli n den laa o, o den yedi Jesu: «N Diedo, one mo te?» 22Jesu den yedi o: «N yaa bua wan yaa ye hali min go baa cua, li ŋua ŋa bi? Fini, ŋoadi nni!» 23Lani yaa po, mi maama den yadi bi kpiiba siiga, ke laa ŋoadika kan kpe. Ama Jesu naa den yedi Pieli, ke laa ŋoadika kan kpe ka, ama o den yedi: «N yaa bua wan yaa ye hali min go baa cua, li ŋua ŋa bi?»
Mi majuodikaama
24Wani n tie yaa ŋoadika n tiendi siedi yaa maama n tie ne kuli po, ki diani ma. Ti bani ke wan tieni yaa siedi tie moamoani.
25Jesu go den tieni bontoala boncianla. Bi yaa bi diani likuli bonyenla yenla, n tama ke ba ŋanduna nni kuli, kan bi yaa pia yaa kaanu n baa dagidi ki gaa ban diani yaa tila.
Currently Selected:
Jan 21: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.