Jan 20
20
Jesu fii bi tinkpiba siiga
(Mat 28.1-8; Mrk 16.1-8; Luk 24.1-12)
1A daleleeda cilima daali, ku tiŋaapanpangu ke li daa yendi, Mariyama, Magidala dogu yua, den gedi li takuli po. O den sua ke bi fuadi li tanli li takuli ñoabu kani. 2O den sani ki gedi Simon Pieli leni o ŋoadikalielo, Jesu n bua yua yeni kani, ki yedi ba: «Bi ñani o Diedo li takuli nni, tii bani ban duani o naankani.»
3Pieli leni o ŋoadikalielo den ñani ki caa li takuli po. 4Bani nibilie kuli den tiini. Ama o ŋoadikalielo den jaligi ki kua Pieli liiga, ki kpa pundi li takuli kani. 5O den buani ki diidi li takuli nni, ki laa a caba ke a bili tiipo, ama waa den kua. 6Simon Pieli mo den yuandi ki pundi ki kua li takuli nni, ki nuali ki laa a caba ke bili tiipo, 7ki go laa ban den fini Jesu yuli yaa cabili. Laa cabili naa den taani leni yaa caba n sieni, li den gbabi ki piadi ki bili. 8Lani, o ŋoadikalielo yua n den kpa pundi li takuli kani moko den kua. O den laa ki daani. 9Li tie ke bi daa den bandi i Diani n yedi yaala, yii n den waani ke li tie tiladi, Jesu n fii bi tinkpiba siiga. 10Lani n pendi, bi ŋoadikaaba yeni den kuni bi denpo.
Jesu doagidi o yuli Mariyama, Magidala dogu yua po
(Mat 28.9-10; Mrk 16.9-11)
11Mariyama den se niini ki nagi li takuli kani ki buudi. Wan den buudi yeni o den buani ki diidi li takuli nni, 12ki laa malekinbilie ke bi la ti tiapiendi ki kaa Jesu o tinkpilo n den dua naankani. Yendo kaa o yuli n den ye naankani, yendo mo o taana n den ye naankani. 13Bi den buali o: «Pua ne, be yaa po ke a buudi?» O den yedi ba: «Bi ñani n Diedo, mii bani ban duani o naani.» 14Wan den maadi yeni, o den jigidi ki sua ke Jesu se likani. Ama waa den bandi ke li tie Jesu. 15Jesu den yedi o: «Pua ne, be yaa po ke a buudi? A lingi ŋme?»
Mariyama den tama ke o tie o koaguudo, ki yedi o: «N Daano, li yaa tie ke fini n ñani o, ŋan waani nni ŋan duani o naani, ke n baa gedi ki ban taa o.» 16Jesu den yedi o: «Mariyama.» O den gbegi ki maadi o Hebilu maama nni, ki yedi o: «Labuni,» lani n tie Canbaa. 17Jesu den yedi o: «Da sii nni, kelima n daa doni ki gedi n Baa po. Ama gedi n kpiiba po, ki ban waani ba ke n baa do n Baa yua n tie yimoko yaa Baa po, wani yua n tie mini leni yinba kuli Tienu yeni po.»
18Mariyama, Magidala yua den gedi Jesu ŋoadikaaba po ki ban waani ba ke o laa o Diedo, ki go waani ba wan yedi o yaala.
Jesu doagidi o yuli o ŋoadikaaba po
(Mat 28.16-20; Mrk 16.14-18; Luk 24.36-49)
19Landaali yaa ñiagu, danalele cilima daali yeni, bi ŋoadikaaba den ye li dieli nni, ke li buliñoana lo, kelima bi jie Jufinba. Jesu den cua ki sedi bi siiga ki yedi: «Mi yanduanma n yaa ye leni yi!» 20Wan den yedi yeni, o den waani ba o nii leni o logili. Bi ŋoadikaaba pala den mangi leni ban laa o Diedo. 21Jesu go den yedi ba: «Mi yanduanma n yaa ye leni yi! Nani Baa n den soani nni maama, mini moko, n soani yi yene.» 22Wan den yedi yeni o den fuo bi po ki yedi: «Gaa mani o U Tienu Fuoma Yua. 23Yin puni yaaba bi tuonbiadi sugili kuli, bi baa sugili. Ama yi yàá puni yaaba sugili bi tuonbiadi po, bi kan baa sugili.» #Mat 16.19; 18.18.
Jesu leni Toma maama fuuli
24Toma, ban go yi yua ku Poligu, bi piiga n niliediba siiga nni yua, naa den ye leni ba Jesu n cua bi kani yaa yogunu. 25Lani, o ŋoadikalieba den yedi o: «Ti laa o Diedo.» Toma den yedi ba: «N yàá laa a kukpaana bona o nii po, ki tuuni n nubili lienni, ki go tuuni n nuu o logili nni, n kan daani.»
26Li daniili daali, Jesu ŋoadikaaba go den ye li dieli nni, ke Toma moko ye leni ba. Ba ke bi den luoni a buliñoana, Jesu den cua ki sedi bi siiga, ki yedi: «Mi yanduanma n yaa ye leni yi!» 27Lani, o den yedi Toma: «Tandi a nubili, ki diidi n nii. Tandi a nuu, ki tuuni n logili nni, ki da luo li dandanli, ama ŋan daani.» 28Toma den guani ki yedi o: «N Diedo leni n Tienu.» 29Jesu den yedi o: «A daani kelima a laa nni. Li pamanli ye leni yaaba n daa laa, ki nan daani.»
Li naa tili n diani yaala yaa po
30Jesu go den tieni banciantoama boncianla, yaama n kaa diani li naa tili nni, o ŋoadikaaba nintuali. 31Ama yaama n tie ne diani ke yin daani ke Jesu tie U Tienu n Gandi Yua, U Tienu Bijua, ke yi yaa tuo ki daani o, yin baa li miali o yeli nni.
Currently Selected:
Jan 20: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.