Jesu Tondiba Tuona 1
1
O Laabaaliŋamo wangima cilima
1—12
Jesu niani ke U Tienu Fuoma Yua baa cua
1Teofili, min den kpa diani yaa tili#1.1 Wan den kpa diani yaa tili yeni tie Luki n diani yaa Laabaaliŋamo yo. Diidi Luki 1.1-3. nni n den togidi Jesu n den cili ki tieni yaala ki go bangi yaala, #Luk 1.1-4. 2ki taa ki pundi hali yaa daali ke o den doni tanpoli. Hali ke o daa doni, U Tienu Fuoma Yua paalu po, o den teni o ñoamabona o tondiba wan gandi yaaba.
3O fala puoli, o den doagidi o yuli bi po, ki waani ba yaa bonla n yabi ki tie siedi ke laa pia niama ke o go fo. Hali dana piinaa, o den doagidi o yuli bi po ke bi laa o, ke o yen maadi leni ba U Tienu diema maama.
4Dayenli wan den ye leni ba, o den yedi ba: «Yin da ña Jerusalemi, ama yin guudi Baa n den niani yaa ñoanianu, yin den gbadi ke n maadi yaala yaa maama. #Luk 24.49. 5Jan den batisi bi niba leni mi ñima, ama li kan cie danaba, ke yi baa baa U Tienu Fuoma Yua yaa batisima.»#Mat 3.11; Mrk 1.8; Luk 3.16; Jan 1.33.
Jesu doni tanpoli
6Bi ŋoadikaaba n den taani, bi den buali o ki yedi: «O Diedo, naani yaa yogunu n tie ne yo ke a baa teni Isidayeli buolu n guani ki diedi bi diema?» 7O den guani ki yedi ba: «Laa tie yinba ka n bandi Baa n bili yaa yogini leni li dana. O bili la, wani o ba yaa bali po. 8Ama yi baa baa u paalu, U Tienu Fuoma Yua yaa jiidi yi po yaa yogunu. Lani, yi baa yaa tie n siedinba Jerusalemi nni, Jude po leni Samari diema nni kuli, hali ki pundi ŋanduna banlu.»#Mat 28.19; Mrk 16.15; Luk 24.47-48.
9Jesu n den yedi yeni, o den doni ban se ki nua o yaa yogunu. Ku tawaligu den doagini o bi nuni po. #Mrk 16.19; Luk 24.50-51. 10Wan den caa yaa yogunu ke bi yaa ki nua tanpoli, jabilie yaaba n la ti tiapiendi den doagidi bi yula bi po, ki yedi: 11«Yinba Galile yaaba, be yaa po ke yi baa ki se ki diidi tanpoli nanda? Wani Jesu, yua n ñani yi siiga ki doni tanpoli po, baa guani ki cua nani yin laa ke o caa tanpoli po maama.»
Bi gandi Matiasi ke o gaa Juda kaanu
12Lani, bi den jiidi Olivie Tiidi juali, ki guani Jerusalemi dogu nni. Li juali yeni leni Jerusalemi banli tie kilo dajenbiyenga.#1.12 Li banli yeni den bua ki yaa tie kilo dajenbiyenga. 13Ban den pundi, bi den kua li dieli nni ki doni li dietuadili po, ban den maani ki taagi naankani. Li den tie: Pieli, Jan, Jaki, Andre, Filipi, Toma, Batelemi, Matie, Alife bijua Jaki, Simon, ban yi yua o Yankuadaano leni Jaki bijua Jude. #Mat 10.2-4; Mrk 3.16-19; Luk 6.14-16. 14Bikuli den pia yanyenma ki yen taandi ki jaandi kaa cedi, bani leni puotianba, Jesu naa Mariyama leni Jesu waamu.
15Laa dana nni Pieli den fii ki sedi o kpiiba siiga, bani yaaba n den taani ki bua ki pundi niba kobiga n piilie ki yedi: 16«N kpiiba, li den tie tiladi ke i Diani n kua, ke o U Tienu Fuoma Yua n den tuodi ki maadi yaala Davidi ñoabu nni n tieni. O den tuodi ki maadi Juda maama, wani yua n den ciani yaaba n cuo Jesu. 17Judasi den tie ti siiga yua ki taa leni ti tuonyenli. 18O den daa u kuanu leni wan den tieni mi biadima ki baa yaa pani. Ama o den n baa likani ki tandi, ke o siiga pudi ke o nuadi kuli yadi yadi. #Mat 27.3-8. 19Jerusalemi yaaba kuli den bandi ke li tieni yeni, hali ke bi yi laa kuanu bi maama nni “Akelidama”, lani n tie mi soama kuanu. 20Li diani Pisomi tili nni:
‹O diegu n tua diegbengu,
Oba kuli n da go yaa ye lienni.›
Li go diani:
‹Nitoa n gaa o tuonli.›#1.20 Laa maama kuli diani Pisomi tili nni. Diidi Pisomi 69.26 leni 109.8.
21Li pia yaaba n den yegi leni ti ti Diedo Jesu n da den ye leni 22ti yaa yogunu, ki cili hali Jan n den batisi o yaa daali, ki yaa caa hali wan den ti ñani ti siiga ki doni tanpoli po yaa daali. Li tie tiladi ke bi siiga niyendo n taani leni ti ki yaa tiendi siedi, ke Jesu fii bi tinkpiba siiga.» #Mat 3.16; Mrk 1.9; 16.19; Luk 3.21; 24.51.
23Bi den bili nibilie yela, Josefi ban go yi yua Basabasi ki go yi o Jusitusi leni Matiasi. 24Lani, bi den jaandi ki mia U Tienu ki yedi: «Ti Diedo, fini yua n bani bi niba kuli pala, waani ti bi naa niliediba siiga ŋan gandi yua, 25ke wan tua Jesu tondo, ki yaa tuuni Juda n den ŋaa yaa tuonli ki gedi o kaanu.» 26Bi den toani tiatia ke li baa Matiasi po, ke o taani leni bi piiga n tondiyendiba.
Currently Selected:
Jesu Tondiba Tuona 1: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.