Jesu Tondiba Tuona 2
2
U Tienu Fuoma Yua cuama
1 Pantekoti jaanma daali n pundi, Jesu ŋoadikaaba kuli den taa ki ye kaanyendu. #Lev 23.15-21; Tia 16.9-11. 2Lanyogunu lanyogunu, ku fuugu den ñani tanpoli po ki naani leni ku faaciangu, ki gbieni ban ka yaa dieli nni. 3Bi den laa yaa landi n naani leni mi fantanlanma yeni ke i paadi paadi ki maani yuakuli po. 4Bikuli den gbie leni U Tienu Fuoma Yua ki cili ki maadi mabuotoe nni nani mi Fuoma n puni ba ban maadi maama.
5Li sua ke yaa Jufinba n fangi U Tienu ki ye ŋanduna nibuoli kuli siiga, den cua ki da ye Jerusalemi. 6Ban den gbadi ku fuugu yeni, bi den taani ki yabi. Li den paki ba boncianla, kelima yuakuli den gba ke bi maadi o mabuocele nni. 7Ki yanlidiga leni li pakili den cuo ba ke bi tua: «Yaaba n maadi na kuli, baa tie Galile yaaba ka? 8Li nan tieni lede ke ti gba ke bi maadi ti siiga yuakuli mabuocele? 9Tinba Pati,#2.9 Laa yela kuli tie diema yela. Pati, Medi leni Elami tinmu ye ban yi yaa diema Iran n ye naani moala. Mesopotami ye ban yi yaa diema Iraki n ye naani moala. Medi, Elami yaaba, yaaba n kaa Mesopotami, Jude, Kapadosi, Ponti, Asi, 10leni Filiji, Panfili, Ejipiti leni Libi diema nni Sireni yaa tinbuoli kuli, ti siiga yaaba n ñani Loma ki cua ke bi tianba tie Jufinba, bi tianba mo tie nilanba yaaba n lebidi ki ŋoadi U Tienu, Kileti leni Arabi yaaba. 11Li gaa lede ke tikuli, yuakuli gba ke bi maadi o mabuolu, ki togidi U Tienu n tieni yaa bancianma?» 12Li den lidini bikuli ke baa bani ban baa maali yaala. Bi den buali biyaba: «Line bua ki yedi be?» 13Bi tianba mo den ñuadi ba ki tua: «Bi ñuni duven ki gaade!»
Pieli n maadi ku niligu yaa maama
14Lani, Pieli den sedi leni bi piiga n tondiyendiba ki kpaani ki yedi ku niligu: «Yinba Jufinba leni yaaba n ye Jerusalemi na kuli, cengi mani n maama bonŋanla, ki bandi line: 15Daama ka cuo yaa jaba n tie ne nani yin tama maama, kelima u yienu daa paagi. 16Line tie o saawalipualo Joeli n den maadi yaala yaa maama ki yedi:
17U Tienu yedi:
‹Mi juodima yogunu n baa teni n Fuoma n jiidi
Ki yadi yadi bi nisaaliba kuli po,
Yi bijaba leni yi bisiaba baa yaa pua saawali.
Yi jawaaba baa baa li bonlekaala,
Yi jakpela mo baa dangi ti dangidi. #Jl 3.1-4.
18Yeni de! Laa dana nni n baa teni n Fuoma n jiidi
Ki yadi yadi n naacenba leni n puotuada po,
Ke ban yaa pua saawali.
19N baa tieni li bonlidinkaala tanpoli po,
Ki go tieni sinankeeninba ki tinga nni,
Mi soama leni u mu leni a muñiiguona.
20U yienu baa lebidi ki biigi,
O ŋmaalo moko baa lebidi ki moandi nani mi soama yeni,
Hali ke o Diedo daali, yaa dacianli n pia ti kpiagidi yeni, daa cua.
21Lane, yua n taa Diedo yeli,
Ki jaandi ki mia o kuli, baa faabi.›
22Yinba Isidayeli yaaba, cengi mani mi naa maama. Jesu, Nasareti yua, U Tienu n den tieni yua yaa po siedi yikuli nintuali, ki teni ke o tieni mi bancianma, li bonlidinkaala leni sinankeene boncianla yi siiga, nani yinba yi ba n bani maama. 23Bi den taa laa joa ki teni o yi, ke yi kpa o, ki teni ke yaaba n kaa fangi U Tienu den joani o li dapoanpoanli po, nani U Tienu n den jagi ki bili maama, ke li ŋua leni wan den tuodi ki bani bonla kuli maama.#Mat 27.35; Mrk 15.24; Luk 23.33; Jan 19.18. 24U Tienu den fiini o bi tinkpiba siiga, ki faabi o leni mi kuuma lolima, li kan den tuo mi kuuma n yaa muubi o,#Mat 28.5-6; Mrk 16.6; Luk 24.5. 25kelima Davidi den yedi o po line:
‹N den nua o Diedo n kani yogunu kuli.
O ye n jienu ke n yama n da yagini.#Ps 16.8-11.
26Lani n teni ke n pali mani,
Ke n lanbu maadi li pamanli maama.
N gbanandi mo baa yaa ye leni mi suginma,
27Kelima fini U Tienu kan ŋaa nni bi tinkpiba diema nni,
A kan tuo ke a nigagidiŋamo n le mi bedima.
28A teni ke n bandi li miali sani,
A go baa teni n pali n yaa mani boncianla,
Kelima a ye leni nni.› »
29Pieli go den yedi: «N kpiiba, n baa fidi ki kadi ki waani yi ti yaaja Davidi maama. O den kpe ke bi piini o, o takuli mo ye ti siiga hali dinla. 30O tie saawalipualo ki den pua saawali, ki bani ke U Tienu niani o o ñoanianu, ki poli ke o baa teni o puoliŋuani siiga yendo n ti kali o gbandi po.#Ps 132.11; 2Sam 7.12-13. 31Lani yaa po, o den tuodi ki waani U Tienu n Gandi Yua fiima bi tinkpiba siiga. Moamoani U Tienu ki den ŋaa o bi tinkpiba diema nni, o gbanandi mo ki bedi. 32U Tienu den fiini o bi tinkpiba siiga. Tikuli tie siedinba li po. 33U Tienu den duoni o o jienu po ki kpiagi o. O den baa wani Baa kani U Tienu Fuoma Yua nani U Tienu n den niani maama, ki yadi yadi o ti po, nani yin nua ki go gba maama. 34Davidi naa den doni tanpoli po, ama o yedi:
‹Li Miali Diedo U Tienu den yedi n Diedo:
Kali n jienu po, #Ps 110.1.
35Hali min baa guli a yibalinba ŋan ŋmaa ba.› »
36Pieli go den yedi: «Lani yaa po, yinba Isidayeli yaaba kuli, bandi mani bonŋanla ke U Tienu teni ke Jesu, yin den joani yua li dapoanpoanli po, tie o Diedo leni U Tienu n Gandi Yua.» 37Ban den gbadi laa maama, mi den cuo bi pala ke bi yedi Pieli leni o tondilieba: «Ti kpiiba, ti baa tieni lede?»
38Pieli den guani ki yedi ba: «Lebidi mani yi pala, yi siiga yuakuli n batisi Jesu Kilisiti yeli nni, ke yin baa sugili yi tuonbiadi po. Lani, yi baa baa U Tienu paabu yaabu n tie U Tienu Fuoma Yua. 39U Tienu ñoanianu yeni tie yinba leni yi bila yaa po, ki go tie yaaba n ye hali foagima yaa po, o Diedo ti Tienu n baa yini yaaba kuli.» 40Pieli den maadi matoama boncianla ki pugini, ki tiendi siedi Jesu po, ki tundi ba ki yedi: «Sani mani ki faabi yi yula leni bi naa nibiadiba.»
41Bi den batisi yaaba n gaa o maama. Landaali yaaba n den pugini bi ŋoadikaaba po den bua ki pundi niba tudataa (3 000).
Jesu yaaba yema n den tie maama
42Yaaba n den ŋoadi Jesu, den kuani bi yama bonŋanla Jesu tondiba bangima nni, ki taandi li dandanli yaaba taanli nni, ki go taandi ki di#2.42 Li fidi ke li den tie ti Diedo jiema, bi taataajiema yaama yaa puole, ke bi yen taa o Diedo jiema., ki jaandi yogunu kuli kaa cedi.
43Li fangili den cuo nilo kuli. Jesu tondiba den tiendi li bonlidinkaala leni mi bancianma boncianla. 44Yaaba n den daani Jesu kuli den ye kaanyendu, ki taani bi bonpiakaala ke li tie bikuli yaala. #JTT 4.32-35. 45Bi yen kuadi bi kuani leni bi loagi, ki boagidi laa ligi bi siiga nani yuakuli n luo maama. 46Daali kuli, bi den lindi ki taagi U Tienu diegu nni leni yanyenma, ki caa biyaba deni ki taagi ki di, ki boagidi bi jiema leni biyaba leni li pamanli leni li padingili. 47Bi den pagi U Tienu, ki baadi li seli bi niba kuli nintuali. Daali kuli o Diedo go den faabidi nitoaba ki pugidi Kilisiti Nitaanli.
Currently Selected:
Jesu Tondiba Tuona 2: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.